Sa bilog na kinaban, iba-iba an opinyon kan mga tawo sa pag-inom nin arak. May mga nag-iinom paminsan-minsan pag may mga gathering. An iba man dai talaga nag-iinom. Pero may mga tawo man na nag-iinom sagkod na maburat. Ano an sinasabi kan Bibliya manungod sa arak?

1. Maraot daw an pag-inom?

Dai sinasabi kan Bibliya na sala an pag-inom. Kan sinabi ngani kaiyan an manungod sa marahay na mga bagay na itinao nin Diyos sa sato, iiniba kaiyan an “arak na nakakapaugma sa puso nin tawo.” (Salmo 104:14, 15) May maimbod na mga lalaki asin babayi na sinambit sa Bibliya na nag-inom nin arak.—1 Timoteo 5:23.

2. Ano an patanid kan Bibliya para sa mga nag-iinom?

Kinokondenar ni Jehova an sobrang pag-inom saka pagburat. (Galacia 5:21) Sinasabi kan Bibliya: “Dai ka dapat mapabilang sa mga makusog uminom nin arak.” (Talinhaga 23:20) Kaya kun nag-iinom kita—solo man o may kairiba—dapat na dai kita magpasobra na dahil diyan dai na kita nakakapag-isip nin tultol, dai ta na nakokontrol an satong mga sinasabi asin ginigibo, o naaapektaran na an satong salud. Saka kun dai ta kayang kontrulon an satong pag-inom, dapat na magin handa kita na ipundo na talaga an pag-inom.

3. Paano ta igagalang an desisyon kan iba manungod sa pag-inom?

Desisyon kan kada saro kun baga mainom o dai. Dai ta dapat husgaran an siisay man na nag-iinom nin tama sana, asin dai ta man dapat pagpiriton an siisay man na habong mag-inom. (Roma 14:10) Dai man kita mainom kun makakaapektar iyan sa iba. (Basahon an Roma 14:21.) Iniisip ta “bako an para sa sadiri [tang] kapakinabangan, kundi an para sa ibang tawo.”—Basahon an 1 Corinto 10:23, 24.

ARAMON PA

4. Pag-isipan kun baga mainom ka o dai

Ano an pagmansay ni Jesus sa pag-inom? Para maaraman iyan, pag-isipan an inot na milagrong ginibo niya. Basahon an Juan 2:1-11, dangan pag-ulayan an mga hapot na ini:

• Sa milagrong ginibo ni Jesus, ano an manunudan ta manungod sa pagmansay niya sa arak saka sa mga nag-iinom?

• Huling dai man kinondenar ni Jesus an pag-inom nin arak, paano dapat mansayon nin sarong Kristiyano an saro na nag-iinom?

Dai ipinagbabawal sa mga Kristiyano an pag-inom, pero may mga pagkakataon na posibleng bako iyan madunong na gibuhon. Basahon an Talinhaga 22:3, dangan pag-isipan base sa minasunod na mga sitwasyon kun baga dapat kang mag-inom:

• Mamaneho ka o mapaandar nin sarong makinarya.

• Bados ka.

• Sinabi saimo kan doktor na dai mag-inom.

• Nadidipisilan kang kontrulon an pag-inom mo.

• Ipinagbabawal sa saimo kan ley an pag-inom.

• May kaibanan ka na naglilikay sa pag-inom huling nadidipisilan siya kaidto na kontrulon an saiyang pag-inom.

Dapat daw na magserbi nin arak sa mga kasalan o iba pang gathering? Para matabangan kang makapagdesisyon, i-play an VIDEO.

VIDEO: Dapat Daw Akong Magserbi nin Arak? (2:41)

Basahon an Roma 13:13 asin 1 Corinto 10:31, 32. Pagkatapos basahon an kada teksto, pag-ulayan an hapot na ini:

• Paano makakatabang an pag-aplikar sa prinsipyong ini para makagibo ka nin desisyon na makakapaugma ki Jehova?

5. Magbugtak nin limitasyon sa kun gurano kadakul an iinumon mo

Kun mainom ka, tandaan ini: Dawa ngani dai ipinagbabawal ni Jehova an pag-inom, kinokondenar niya an sobrang pag-inom. Taano? Basahon an Oseas 4:11, 18, dangan pag-ulayan an hapot na ini:

• Ano an puwedeng mangyari kun an sarong tawo sobrang mag-inom?

Paano ta malilikayan an sobrang pag-inom? Dapat na magin mapakumbaba kita, o dapat na aram ta an satong limitasyon. Basahon an Talinhaga 11:2, dangan pag-ulayan an hapot na ini:

• Taano ta marahay na magbugtak nin limitasyon sa kun gurano kadakul an iinumon mo?

6. Makakaya mong ipundo an sobrang pag-inom

VIDEO: ‘Sawa Na Ako sa Buhay Ko’ (6:32)

• Sa video, ano an nagin epekto kan arak sa ugali ni Dmitry?

• Naipundo niya daw tulos an sobrang pag-inom?

• Paano niya naipundo an sobrang pag-inom?

Basahon an 1 Corinto 6:10, 11, dangan pag-ulayan an mga hapot na ini:

• Gurano kaseryoso an pagburat o pagbuyong?

• Sa teksto, ano an nagpaparisa na puwedeng magbago an sarong parainom?

Basahon an Mateo 5:30, dangan pag-ulayan an hapot.

• Sa ilustrasyon, an pagputol nin kamot nangangahulugan nin pagsasakripisyo para mapaugma si Jehova. Ano an puwede mong gibuhon kun nasasakitan kang ipundo an sobrang pag-inom?a

Basahon an 1 Corinto 15:33, dangan pag-ulayan an hapot na ini:

• Ano an puwedeng magin epekto kan mga amigo mo sa kun gurano kadakul an naiinom mo?

SUMARYO

Itinao sa sato ni Jehova an arak para mag-enjoy kita, pero kinokondenar niya an sobrang pag-inom asin pagburat.

Rebyu

• Ano an sinasabi kan Bibliya manungod sa arak?

• Ano an mga peligro nin sobrang pag-inom?

• Paano ta maipapahiling na rinerespeto ta an desisyon kan iba manungod sa pag-inom?

HILINGON MAN

Paano makakagibo nin marahay na desisyon an mga tin-edyer manungod sa pag-inom?

Mag-isip Nguna Bago Mag-inom nin Arak (2:31)

Aramon an mga paagi na magigibo mo para maipundo an sobrang pag-inom.

“Pagpadanay kan Inomon na de Alkohol sa Tamang Lugar Kaiyan” (An Torrengbantayan, Enero-Marso 2010)

Dapat daw na makipag-toast an sarong Kristiyano?

“Mga Hapot Hale sa mga Parabasa” (An Torrengbantayan, Pebrero 15, 2007)

Sa istorya na “Para Daw Akong Butás na Bariles,” aramon kun paano naipundo nin sarong lalaki an sobrang pag-inom.

“Binago ng Bibliya ang Kanilang Buhay” (Ang Bantayan, Mayo 1, 2012)

May kanya-kanya kitang gusto pag-abot sa pagbado asin pag-ayos sa sadiri. Kun susunudon ta an nagkapirang simpleng mga prinsipyo sa Bibliya, dai lang kita makakapili nin gusto tang isulot kundi mapapaugma ta man si Jehova. Pag-ulayan ta an pira sa mga prinsipyong iyan.

1. Anong mga prinsipyo an makakatabang sa sato manungod sa pagbado asin pag-ayos sa sadiri?

Dapat na magpili kita nin “angay na bado, na may kabinian asin tultol na isip,” asin pirming magin malinig tanganing mahiling kan iba an satong “debosyon sa Diyos.” (1 Timoteo 2:9, 10) Pag-isipan an apat na prinsipyong ini: (1) Dapat na “angay” an satong bado. Arog kan nahihiling mo sa mga pagtiripon kan kongregasyon, dawa iba-iba an gusto kan mga lingkod ni Jehova sa pagbado asin istilo nin buhok, gabos iyan nagpapahiling nin respeto sa Diyos na satong sinasamba. (2) An pagbado na “may kabinian” nangangahulugan na an satong itsura dapat na dai nakakapukaw nin seksuwal na mga pagmawot, o na nakakakua nin sobrang atensiyon. (3) Naipapahiling ta na igwa kita nin “tultol na isip” pag dai kita basta na sana nagsusunod sa kada usong bado asin pag-ayos sa sadiri. (4) An satong itsura dapat na pirming magpahiling kan satong “debosyon sa Diyos,” para mahiling kan iba na nagsasamba kita sa tunay na Diyos.—1 Corinto 10:31.

2. Ano an puwedeng magin epekto sa satong mga kapagtubod kan satong itsura?

Dawa ngani may deretso kita na magpili kun ano an satong isusulot, dapat tang pag-isipan kun ano an puwedeng magin epekto sa iba kan satong itsura. Ginigibo ta an satong pinakamakakaya para dai kita magin dahilan na magluya an pagtubod kan iba. Hinihinguwa tang ‘mapaugma an satong kapwa para sa ikakarahay niya, tanganing maparigon siya.’—Basahon an Roma 15:1, 2.

3. Paano an satong bado asin pag-ayos sa sadiri puwedeng makapahiro sa iba na mag-adal nin Bibliya?

Hinihinguwa ta na magsulot nin angay na bado sa gabos na panahon, lalo na pag nag-aatender sa pagtiripon kan kongregasyon asin nagpapartisipar sa ministeryo. Habo tang magkaigwa nin bakong magayon na impresyon an mga tawo sa mensaheng dinadara ta. Imbes, gusto niyato na an satong pagbado asin pag-ayos sa sadiri makadagdag sa gayon kan satong mensahe asin “masamnuhan [ta] an katukduan kan satuyang Paraligtas.”—Tito 2:10.

ARAMON PA

4. An marahay na pag-ayos sa sadiri nagpapahiling nin respeto ki Jehova

Ano an pinakaimportanteng dahilan kaya sinisigurado tang pakarhay an satong itsura? Basahon an Salmo 47:2, dangan pag-ulayan an mga hapot na ini:

• Huling an satong pagbado may epekto sa kun ano an iisipon kan mga tawo manungod ki Jehova, ano an dapat na magin epekto kaiyan sa pagpili ta nin bado?

• Sa hiling mo, importante daw talaga na pag-isipan ta an satong pagbado asin pag-ayos sa sadiri pag nag-aatender sa mga pagtiripon asin nagpapartisipar sa ministeryo? Taano?

5. Kun paano makakagibo nin marahay na mga desisyon sa pagbado asin pag-ayos sa sadiri

I-play an VIDEO.

VIDEO: “Gibuhon Nindo an Gabos na Bagay sa Ikakamuraway nin Diyos” (10:18)

Mamahalon man o babaratuhon lang an sulot tang bado, dapat na malinig iyan asin angay sa sitwasyon. Basahon an 1 Corinto 10:24 asin 1 Timoteo 2:9, 10. Dangan pag-ulayan kun taano ta lilikayan tang magsulot nin bado na . . .

• maati asin bakong pakarhay o sobra kakaswal.

• yapit, o mapang-akit.

Dawa ngani an mga Kristiyano bako nang sakop kan Katugunan ni Moises, dakul kitang manunudan diyan mapadapit sa kaisipan ni Jehova. Basahon an Deuteronomio 22:5, dangan pag-ulayan an hapot na ini:

• Taano ta dapat tang likayan an pagbado asin pag-ayos sa sadiri na diyan an lalaki nagigin garo na babayi, o an babayi nagigin garo na lalaki?

Basahon an 1 Corinto 10:32, 33 asin 1 Juan 2:15, 16, dangan pag-ulayan an mga hapot na ini:

• Taano ta dapat tang isipon kun baga an satong pagbado o pag-ayos sa sadiri magkakaigwa nin negatibong impresyon sa kongregasyon o sa mga tawo kun sain kita nakaistar?

• Anong istilo nin bado o pag-ayos sa sadiri an komun sa lugar nindo?

• May nagkapirang istilo daw diyan na sa hiling mo bakong angay para sa sarong Kristiyano? Taano?

SUMARYO

Pag naggigibo kita nin marahay na mga desisyon mapadapit sa satong pagbado asin pag-ayos sa sadiri, ipinapahiling ta na rinerespeto ta si Jehova asin an iba.

Rebyu

• Taano ta importante ki Jehova an satong pagbado asin pag-ayos sa sadiri?

• Ano an nagkapirang prinsipyo na dapat na maggiya sa sato kun manungod sa satong pagbado asin pag-ayos sa sadiri?

• Ano an puwedeng magin epekto kan satong pagbado asin pag-ayos sa sadiri sa magigin impresyon kan iba sa tunay na pagsamba?

HILINGON MAN

Aramon kun ano an puwedeng isipon kan iba kun manungod sa saimong pagbado.

“Kumusta an Itsura Ko?” (Artikulo sa jw.org/bcl)

Aramon kun taano ta dapat mong seryosong pag-isipan nguna an mga konsekwensiya bago magpatatu.

“Ano an Sinasabi kan Bibliya Manungod sa Tatu?” (Artikulo sa jw.org/bcl)

Pag-isipan an iba pang mga prinsipyo sa Bibliya na makakatabang sa sato sa pagdedesisyon.

“Nagpapamuraway Daw sa Diyos an Saimong Istilo nin Pagbado?” (An Torrengbantayan, Setyembre 2016)

Paano nanudan nin sarong sinserong babayi na igalang an desisyon kan iba kun manungod sa pagbado?

“Ang Pananamit at Pag-aayos ang Naging Katitisuran Ko” (Gumising!, Disyembre 22, 2003)