Mga Lalaki, Nagpapasakop daw Kamo sa Pagkapayo ni Cristo?

“An payo kan lambang lalaki iyo an Cristo.”—1 COR. 11:3.

1. Ano an nagpapaheling na si Jehova sarong Dios nin areglo?

“MANINIGO ka, Jehova, na samong Dios, na mag-ako kan kamurawayan asin kan onra patin kan kapangyarihan,” an sabi sa Kapahayagan 4:11, “huli ta linalang mo an gabos na bagay, asin huli sa saimong kabotan an mga iyan nag-eksister asin nalalang.” Huling si Jehova Dios an Kaglalang, sia an Supremong Soberano sa uniberso asin nakakalabi sa gabos niang linalang. An paagi nin pagkaorganisar sa saiyang pamilya nin mga anghel nagpapaheling na si Jehova “sarong Dios, bakong nin karibarawan, kundi nin katoninongan.”—1 Cor. 14:33; Isa. 6:1-3; Heb. 12:22, 23.

2, 3. (a) Siisay an enot na linalang ni Jehova? (b) Ano an katongdan kan panganay na Aki may koneksion sa Ama?

² Bago nalalang an gabos na iba pang bagay, an Dios nag-eeksister na sa laog nin dai masokol na panahon. An pinakaenot niang linalang iyo an espiritung linalang na midbid bilang “an Tataramon” huling sia an Representante sa Pagtaram ni Jehova. An Tataramon iyo an saro na paagi sa saiya an gabos na iba pang bagay nalalang. Kan huri, sia nagdigdi sa daga bilang sangkap na tawo asin namidbid bilang si Jesu-Cristo.—Basahon an Juan 1:1-3, 14.

³ Ano an sinasabi sa Kasuratan manongod sa katongdan nin Dios asin kan saiyang panganay na Aki may koneksion sa lambang saro sa sainda? Sa ipinasabong na surat ni apostol Pablo, sia nagsabi sa sato: “Boot kong maaraman nindo na an payo kan lambang lalaki iyo an Cristo; an payo man nin babae iyo an lalaki; an payo man kan Cristo iyo an Dios.” (1 Cor. 11:3) An Cristo nasa irarom kan pagkapayo kan saiyang Ama. An pagkapayo asin pagpasakop mahalagang marhay tanganing mangibabaw an katoninongan asin areglo sa madonong na mga linalang. Kaipuhan na magpasakop sa pagkapayo nin Dios dawa an saro na “paagi sa saiya an gabos na iba pang bagay linalang.”—Col. 1:16.

4, 5. Ano an saboot ni Jesus manongod sa katongdan nia may koneksion ki Jehova?

⁴ Ano an saboot ni Jesus sa pagpasakop sa pagkapayo ni Jehova asin sa pagdigdi nia sa daga? An Kasuratan nagsasabi: ‘Si Cristo Jesus, minsan ngani kabaing nin Dios, dai nag-isip na mang-agaw, an boot sabihon, na sia makapantay sa Dios. Dai, kundi sia nagpakadai sa sadiri asin nagpakang-oripon patin nagin kaagid nin mga tawo. Orog pa dian, kan sia magin kabaing nin tawo, sia nagpakumbaba asin nagin makinuyog sagkod sa kagadanan, iyo, kagadanan sa hariging pasakitan.’—Fil. 2:5-8.

⁵ Sa gabos na panahon, si Jesus mapakumbabang nagpasakop sa kabotan kan saiyang Ama. Sia nagsabi: “Dai ako makakagibo ni sarong bagay sa sadiri kong boot; . . . an paghokom na sakuyang ginigibo matanos, huli ta pinagmamaigotan kong maotob, bakong an sadiri kong kabotan, kundi an kabotan nia na nagsugo sa sako.” (Juan 5:30) “Danay kong ginigibo an mga bagay na nakakapaogma sa [sakong Ama],” an sabi nia. (Juan 8:29) Sa pagtatapos kan saiyang buhay digdi sa daga, sinabi ni Jesus sa pamibi sa saiyang Ama: “Pinamuraway taka sa daga, na tinapos an gibohon na ipinagibo mo sa sako.” (Juan 17:4) Minalataw na si Jesus dai nasakitan na midbidon asin akoon an Dios bilang saiyang payo.

An Pagpasakop sa Ama Nakakatabang sa Aki

6. Anong marahayon na mga kualidad an ipinaheling ni Jesus?

⁶ Kan si Jesus nasa daga, nagpaheling sia nin dakol na marahayon na kualidad. Kaiba dian an dakulang pagkamoot na ipinaheling nia sa saiyang Ama. “Namomotan ko an Ama,” an sabi nia. (Juan 14:31) Nagpaheling man sia nin dakulang pagkamoot sa mga tawo. (Basahon an Mateo 22:35-40.) Si Jesus maboot asin makonsiderasyon, bakong maringis o dominante. “Madia kamo sa sako, kamo gabos na nagpapagal asin nagagabatan,” an sabi nia, “asin papaginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin magkakaigwa kamo nin kaginhawahan para sa saindong kalag. Huli ta an sakong sakal maboot asin an sakong pasan magian.” (Mat. 11:28-30) An mga tawong arog-karnero na laen-laen an edad, nangorogna an mga inaapi, naranga nanggad sa nakakaogmang marhay na personalidad asin nakakaparigon na mensahe ni Jesus.

7, 8. Oyon sa Ley, ano an bawal na gibohon kan babaeng inaawasan nin dugo, alagad paano sia trinatar ni Jesus?

⁷ Isip-isipa kun paano trinatar ni Jesus an mga babae. Sa bilog na kasaysayan, maraoton an nagin pagtratar nin dakol na lalaki sa mga babae. Totoo man iyan sa mga namomoon sa relihion sa suanoy na Israel. Alagad may paggalang na trinatar ni Jesus an mga babae. Risang-risa ini sa pagtratar nia sa may helang na babae na 12 taon nang inaawasan nin dugo. “Sia pinaagi na sa dakol na kakologan” nin mga doktor asin naubos na niang ikabayad an gabos na sadiri nia sa pagmamaigot na rumahay. Sa ibong kan gabos na paghihingoang iyan, sia “naggrabe pa.” Sa Ley, sia ibinibilang na maati. An siisay man na magduta sa saiya magigin maati man.—Lev. 15:19, 25.

⁸ Kan madangog kan babae na si Jesus nagpapaomay sa mga may helang, nakisusoan sia sa mga tawong nakapalibot ki Jesus, na nagsasabi: “Kun dutaan ko dawa an saiya sanang pang-ibabaw na mga gubing maoomayan ako.” Dinutaan nia si Jesus asin tolos siang naomayan. Aram ni Jesus na dai dapat dinutaan kan babae an gubing nia. Pero, dai nia ini inanggotan. Sa kabaliktaran, nagin maboot sia sa saiya. Nasabotan nia kun ano an seguradong namatean kan babae huling halawig nang panahon na may helang ini asin aram nia na kaipuhan nanggad kaini nin tabang. May pagmalasakit na sinabihan sia ni Jesus: “Aki, pinaomayan ka kan saimong pagtubod. Lakaw sa katoninongan, asin magin marahay an saimong salud.”—Mar. 5:25-34.

9. Kan probaran kan mga disipulo ni Jesus na pugolan an mga aki na rumani sa saiya, ano an reaksion nia?

⁹ Dawa an mga aki pamugtak an boot ki Jesus. Sa sarong pangyayari, kan an mga tawo magdara ki Jesus nin mga aki, sinagwe sinda kan saiyang mga disipulo, na minalataw na iniisip ninda na habo niang madisturbo sia nin mga aki. Alagad bakong arog kaiyan an saboot ni Jesus. An sono sa Kasuratan na pagkasaysay nagsasabi sa sato: “Kan maheling ini si Jesus naanggot asin sinabihan [an mga disipulo]: ‘Pabayae nindo na dumolok sa sako an saradit na aki; dai nindo sinda pagpugolan, huli ta an kahadean nin Dios para sa mga siring sa sainda.’” Dugang pa, “kinugos nia an mga aki asin pinonan na bendisyonan sinda, na ipinapatong an saiyang mga kamot sa sainda.” Dai sana ni Jesus pinabayaan na magrani sa saiya an mga aki; maogma nia sindang inako.—Mar. 10:13-16.

10. Paano si Jesus nagkaigwa kan mga kualidad na ipinaheling nia?

¹⁰ Paano si Jesus nagkaigwa kan mga kualidad na ipinaheling nia durante kan saiyang buhay digdi sa daga? Sa buhay nia bago nagin tawo, haloyon nang panahon na naobserbaran nia an saiyang langitnon na Ama asin nanodan nia an Saiyang mga dalan. (Basahon an Talinhaga 8:22, 23, 30.) Sa langit, naheling nia kun paano mamomoton na ginamit ni Jehova an Saiyang pagkapayo sa gabos Niang linalang asin iyan man an ginibo ni Jesus. Magigibo daw iyan ni Jesus kun dai sia nagin mapagpasakop? Dakulang kaogmahan para sa saiya na magin sakop kan saiyang Ama, asin ikinaogma ni Jehova na magkaigwa nin siring na Aki. Kan si Jesus nasa daga, ipinabanaag nia sa sangkap na paagi an marahayon na mga kualidad kan saiyang langitnon na Ama. Sarong pribilehio nanggad niato na magin sakop ni Cristo, an ninombrahan nin Dios bilang Tagapamahala kan langitnon na Kahadean!

Arogon an mga Kualidad ni Cristo

11. (a) Siisay an maninigo niatong pagmaigotan na arogon? (b) Taano an mga lalaki sa kongregasyon ta nangorognang maninigong magmaigot na arogon si Jesus?

¹¹ An gabos sa Kristianong kongregasyon, nangorogna an mga lalaki, maninigong padagos na maghingoa na arogon an mga kualidad ni Cristo. Arog kan nasambitan na, an Biblia nagsasabi: “An payo kan lambang lalaki iyo an Cristo.” Kun paanong inarog ni Cristo an saiyang Payo, an tunay na Dios, an mga lalaki man maninigo na magmaigot na arogon an saindang payo—an Cristo. Kan si apostol Pablo magin Kristiano, ginibo nia nanggad iyan. “Magin kamong mga paraarog sa sako,” an sadol nia sa mga kapwa Kristiano, “siring na ako paraarog ki Cristo.” (1 Cor. 11:1) Asin si apostol Pedro nagsabi: “Sa dalan na ini kamo inapod, huli ta minsan si Cristo nagsakit para sa saindo, na winalatan kamo nin modelo tanganing sunodon nindo nin estrikto an saiyang mga lakad.” (1 Ped. 2:21) An konseho na arogon an Cristo partikularmente nang interesante sa mga lalaki huli sa saro pang dahelan. Sinda an nagigin mga magurang sa kongregasyon asin ministeryal na lingkod. Kun paanong naggayagaya si Jesus sa pag-arog ki Jehova, an Kristianong mga lalaki man maninigong maggayagaya sa pag-arog ki Cristo asin sa saiyang mga kualidad.

12, 13. Paano maninigong trataron kan kamagurangan an mga karnero na nasa pangangataman ninda?

¹² An kamagurangan sa Kristianong kongregasyon obligadong makanood na magin arog ni Cristo. Ini an sadol ni Pedro sa mga magurang sa kongregasyon: “Pastoran nindo an aripompon nin Dios na nasa saindong pangangataman, bakong dahel sa napipiritan, kundi gikan sa boot; ni dahel sa pagkamoot sa madayang pakinabang, kundi may pagkagalaga; ni nagpapakangkagurangnan sa mga mana nin Dios, kundi nagigin mga halimbawa sa aripompon.” (1 Ped. 5:1-3) An Kristianong kamagurangan dai dapat na magin diktador, dominante, bakong makatanosan, o maringis. Sa pag-arog sa halimbawa ni Cristo, nagmamaigot sinda na magin mamomoton, makonsiderasyon, mapakumbaba, asin maboot sa pagtratar ninda sa mga karnero na ipinagkatiwala sa sainda na atamanon.

¹³ An mga nangengenot sa kongregasyon mga lalaking bakong sangkap, asin maninigo na pirme nindang girumdomon an limitasyon na iyan. (Roma 3:23) Kaya dapat na andam nanggad sindang makanood manongod ki Jesus asin arogon an saiyang pagkamoot. Kaipuhan nindang horophoropon kun paano trinatar nin Dios asin ni Cristo an mga tawo dangan pagmaigotan na arogon sinda. Sinasadol kita ni Pedro: “Gabos kamo maghagkos nin kababaan nin pag-isip sa pagtratar sa lambang saro, huli ta tinutumang nin Dios an mga maabhaw, alagad ta tinatawan nia nin dai na kutana maninigong kabootan an mga mapakumbaba.”—1 Ped. 5:5.

14. Sagkod saen maninigong magtao nin onra sa iba an kamagurangan?

¹⁴ Sa pagtratar ninda sa aripompon nin Dios, an nombradong mga lalaki sa kongregasyon dapat na magpaheling nin marahay na mga kualidad. An Roma 12:10 nagsasabi: “Sa pagkamoot na sa magturugang magkaigwa kamo nin mamomoton na kapadangatan sa lambang saro. Sa pagtao nin onra sa lambang saro mangenot kamo.” An kamagurangan asin ministeryal na mga lingkod nagtatao nin onra sa iba. Arog kan mga Kristiano sa pangkagabsan, an mga lalaking ini ‘dai dapat maggibo nin ano man huli sa pagigin parapakisuhay o huli sa sobrang pagpaimportante sa sadiri kundi may kababaan nin isip na dapat na ibilang na an iba mas halangkaw kisa sa sainda.’ (Fil. 2:3) An mga nangengenot maninigo nanggad na mansayon an iba bilang nakakalabi sa sainda. Sa paggibo kaiyan, sinusunod kan nombradong mga lalaki an konseho ni Pablo: “Pero, kitang mga makosog kaipuhan na magpasan kan mga kaluyahan kan mga bakong makosog, asin dai magin mapagpanigo sa satong sadiri. An lambang saro sa sato magpanigo sa saiyang kapwa sa kun ano an marahay para sa pagpakosog sa saiya. Huli ta dawa an Cristo dai nagpanigo sa saiyang sadiri.”—Roma 15:1-3.

‘Pagtao nin Onra sa mga Babae’

15. Paano maninigong trataron nin mga agom na lalaki an saindang agom?

¹⁵ Estudyare ngonyan an konseho ni Pedro sa mga lalaking may agom. Sia nagsurat: “Kamong mga agom na lalaki, padagos na makiiba sa siring na paagi sa [saindong agom] segun sa kaaraman, na tinatawan sinda nin onra siring sa lalagan na mas maluya, an babae.” (1 Ped. 3:7) Kun tinatawan nindo nin onra an saro, nangangahulogan iyan na halangkaw an pagheling nindo sa saiya. Sa siring, kokonsideraron nindo an mga opinyon, pangangaipo, asin gusto nin siring na tawo asin tibaad magpahunod kamo kun mayo man nin kalabot na mahalagang marhay na isyu. Iyan an maninigong pagtratar nin agom na lalaki sa saiyang agom.

16. Ano an ipinapatanid kan Tataramon nin Dios sa mga agom na lalaki dapit sa pagtao nin onra sa saindang agom?

¹⁶ Kan sinasabihan ni Pedro an mga agom na lalaki na tawan nin onra an saindang agom, sia nagpatanid pa: “Tanganing an saindong mga pamibi dai maolang.” (1 Ped. 3:7) Malinaw na ipinapaheling kaiyan an kaseryosohan kan pagmansay ni Jehova dapit sa pagtratar nin lalaki sa saiyang agom. Puedeng maolang an mga pamibi nin agom na lalaki huli sa dai pagtao nin onra sa saiyang agom. Dugang pa, bako daw na sa pangkagabsan positibo an reaksion nin mga agom na babae kun tinatawan sinda nin onra kan saindang agom?

17. Sagkod saen maninigong ipaheling nin agom na lalaki an pagkamoot sa saiyang agom?

¹⁷ Kun dapit sa pagpaheling nin pagkamoot sa agom na babae, an Tataramon nin Dios nagsasadol: “An mga agom na lalaki kaipuhan na mamoot sa saindang agom na babae siring sa saindang sadiring hawak. . . . Huli ta mayong tawo na naongis kasuarin man sa saiyang sadiring laman; kundi pinapakakan nia asin pinapadangat iyan, arog kan ginigibo man kan Cristo sa kongregasyon . . . An lambang saro sa saindo mamoot man sa saiyang agom na babae arog kan pagkamoot nia sa saiyang sadiri.” (Efe. 5:28, 29, 33) Sagkod saen maninigong ipaheling nin mga agom na lalaki an pagkamoot sa saindang agom? “Mga agom na lalaki,” an isinurat ni Pablo, “padagos nindong mamotan an saindong agom na babae, kun paanong namotan man kan Cristo an kongregasyon asin itinao an saiyang sadiri para dian.” (Efe. 5:25) Iyo, an agom na lalaki maninigong magin andam na itao dawa an buhay nia para sa saiyang agom, arog kan ginibo ni Cristo para sa iba. Kun an Kristianong agom na lalaki mamomoton, makonsiderasyon, maasikaso, asin bakong maimot sa saiyang agom, mas madali para sa saiyang agom na magpasakop sa pagkapayo nia.

18. Ano an nakakatabang sa mga lalaki sa pag-asikaso sa saindang mga paninimbagan sa pag-agoman?

¹⁸ Sobra daw na kahagadan sa mga agom na lalaki na tawan nin onra an agom na babae sa paaging ini? Bako, nungkang ipapagibo ni Jehova an sarong bagay na dai ninda makakaya. Apuera kaiyan, an mga nagsasamba ki Jehova puedeng magkaigwa kan pinakadakulang puersa sa uniberso—an banal na espiritu nin Dios. Si Jesus nagsabi: “Kun kamo, minsan ngani maraot, tataong magtao nin marahay na mga regalo sa saindong mga aki, gurano pa daw an Ama sa langit na dai matao nin banal na espiritu sa mga naghahagad sa saiya!” (Luc. 11:13) Sa mga pamibi nin mga agom na lalaki, puede nindang hagadon ki Jehova na tabangan sinda kan saiyang espiritu sa pagtratar ninda sa iba, pati na sa saindang agom.—Basahon an Gibo 5:32.

19. Ano an ipapaliwanag kan sunod na artikulo niato?

¹⁹ Tunay nanggad, may dakulang paninimbagan an mga lalaki na makanood kun paano magpasakop ki Cristo asin arogon an saiyang pagkapayo. Alagad kumusta man an mga babae, partikularmente an mga agom na babae? Ipapaliwanag kan sunod na artikulo kun paano ninda maninigong mansayon an saindang papel sa areglo ni Jehova.

Mga Babae, Taano ta Dapat Magpasakop sa Pagkapayo?

‘An payo nin babae iyo an lalaki.’—1 COR. 11:3.

1, 2. (a) Ano an isinurat ni apostol Pablo manongod sa areglo ni Jehova sa pagkapayo asin pagpasakop? (b) Anong mga hapot an eestudyaran sa artikulong ini?

INESTABLISAR ni Jehova an aregladong pagkasunodsunod na sinambit ni apostol Pablo kan isurat nia na “an payo kan lambang lalaki iyo an Cristo” asin ‘an payo kan Cristo iyo an Dios.’ (1 Cor. 11:3) Sinambit sa sinundan na artikulo na ibinilang ni Jesus na pribilehio saka kagayagayahan na magin sakop kan saiyang Payo, si Jehova Dios, asin sinambit man dian na an payo nin Kristianong mga lalaki iyo si Cristo. Si Cristo maboot, mapagmalasakit, asin bakong maimot sa mga tawo. An mga lalaki sa kongregasyon dapat na magin arog kaiyan sa iba, lalo na sa saindang agom.

² Pero, kumusta man an mga babae? Siisay an saindang payo? ‘An payo nin babae iyo an lalaki,’ an isinurat ni Pablo. Paano maninigong mansayon nin mga babae an ipinasabong na mga tataramon na ini? Aplikado pa daw an prinsipyong iyan kun an agom na lalaki bakong kapagtubod? An pagpasakop daw sa pagkapayo kan lalaki nangangahulogan na an agom na babae dai dapat maggirong, na dai puedeng magtao nin opinyon kun naggigibo nin mga desisyon? Paano nag-aako nin kaomawan an sarong babae?

“Magibo Ako nin Katabang Para sa Saiya”

3, 4. Taano ta kapakipakinabang an areglo nin pagkapayo sa pag-agoman?

³ An areglo nin pagkapayo hale sa Dios. Pagkalalang ki Adan, si Jehova Dios nagsabi: “Bakong marahay na an lalaki padagos na magsolo. Magibo ako nin katabang para sa saiya, bilang komplemento nia.” Pagkalalang ki Eva, ogmahon na marhay si Adan na igwa na sia nin kaibaiba asin katabang kaya sinabi nia: “Ini sa katapustapusi tolang nin sakong mga tolang asin laman nin sakong laman.” (Gen. 2:18-24) Si Adan asin Eva may marahayon na oportunidad na magin ama asin ina kan bilog na rasa nin sangkap na mga tawo, na mabubuhay sagkod lamang sa sarong pangglobong paraiso.

⁴ Huli sa pagrebelde kan enot na mga magurang niato, nawara an sangkap na kamugtakan sa hardin nin Eden. (Basahon an Roma 5:12.) Alagad nagdanay an areglo nin pagkapayo. Kun sinusunod nin tama, iyan nagbubunga nin dakulang pakinabang asin kaogmahan sa pag-agoman. An resulta nagigin kaagid kan saboot ni Jesus sa pagigin sakop kan saiyang Payo, si Jehova. Sa buhay ni Jesus bago nagin tawo, sia “maogma sa atubangan [ni Jehova] sa gabos na panahon.” (Tal. 8:30) Huli sa pagkabakong sangkap, an mga lalaki mayo nang kakayahan na magin sangkap na payo, asin an mga babae dai na makakapagpasakop sa sangkap na paagi. Minsan siring, kun an mga agom na lalaki asin babae padagos na nagmamaigot na gibohon an saindang pinakamakakaya, an areglo minaresulta sa pinakanakakakontentong pag-agoman na posible sa panahon na ini.

5. Taano ta maninigong isapuso kan mga mag-agom an konseho sa Roma 12:10?

⁵ Mahalaga sa kapangganahan nin pag-agoman an pag-aplikar nin mga mag-agom sa konsehong ini kan Kasuratan na para sa gabos na Kristiano: “Sa pagkamoot na sa magturugang magkaigwa kamo nin mamomoton na kapadangatan sa lambang saro. Sa pagtao nin onra sa lambang saro mangenot kamo.” (Roma 12:10) Siring man, maninigong hingoahon kan agom na lalaki asin babae na ‘magin maboot sa lambang saro, mapagmalasakit sa mamomoton na paagi, na lubos na nagpapatawadan.’—Efe. 4:32.

Kun an Agom Bakong Kapagtubod

6, 7. Ano an puedeng magin resulta kun an sarong Kristianang agom nagpapasakop sa saiyang bakong kapagtubod na agom?

⁶ Paano kun bakong lingkod ni Jehova an saindong agom? Sa parate, agom na lalaki an bakong kapagtubod. Sa kamugtakan na ini, paano sia tatrataron kan saiyang agom? An Biblia nagsisimbag: “Kamong mga agom na babae, magpasakop kamo sa saindong agom na lalaki, tangani na, kun an siisay man dai nagkukuyog sa tataramon, sinda madara minsan daing tataramon paagi sa gawe-gawe kan saindang agom na babae, huli sa pakaheling mismo sa saindong mabining gawe-gawe na may hararom na paggalang.”—1 Ped. 3:1, 2.

⁷ An Tataramon nin Dios nagsasabi sa agom na babae na papagdanayon an pagigin mapagpasakop sa bakong kapagtubod na agom. An marahay na paggawe kan babae puedeng makaimpluwensia sa agom nia na isip-isipon kun ano an nagmomotibar sa saiya na gumawe sa siring na marahay na paagi. Bilang resulta, tibaad siyasaton kan agom na lalaki an mga paniniwala kan saiyang Kristianang agom asin pag-abot nin panahon akoon nia mismo an katotoohan.

8, 9. Ano an magigibo nin Kristianang agom kun bakong paborable an reaksion kan saiyang agom sa marahay na paggawe nia?

⁸ Pero, paano kun bakong paborable an reaksion kan bakong kapagtubod na agom na lalaki? Dinadagka kan Kasuratan an Kristianang agom na ipaheling an mga kualidad nin Kristiano sa gabos na panahon, gurano man tibaad kasakit kaini. Halimbawa, mababasa niato sa 1 Corinto 13:4: “An pagkamoot matinios.” Kun siring, marahay para sa Kristianang agom na padagos na gumawe “na igwa nin lubos na kababaan nin isip asin kahoyoan, na may pakatios,” na nagtatagal huli sa pagkamoot. (Efe. 4:2) Sa tabang kan aktibong puersa nin Dios—an saiyang banal na espiritu—posible na mapagdanay an mga kualidad nin Kristiano sa ibong nin masakit na mga kamugtakan.

⁹ “Igwa ako kan kosog para sa gabos na bagay huli sa saiya na nagtatao nin puersa sa sako,” an isinurat ni Pablo. (Fil. 4:13) An espiritu nin Dios nakakatabang sa Kristianong agom na gibohon an dakol na bagay na imposible kutana kun mayo iyan. Halimbawa, kun an saro maringis na tinatratar kan saiyang agom, tibaad matentaran siang magbalos. Minsan siring, an Biblia nagsasabi sa gabos na Kristiano: “Dai kamo magbalos nin maraot sa maraot sa kiisay man. . . . Huli ta nasusurat: ‘Sako an pagbalos; ako an mabalos, sabi ni Jehova.’” (Roma 12:17-19) Kaagid kaiyan, an 1 Tesalonica 5:15 nagsasadol sa sato: “Siertohon na mayo nin siisay man na magbalos nin maraot sa maraot sa kiisay pa man, kundi danay na hanapon an karahayan kan lambang saro asin kan gabos na iba pa.” Sa tabang kan banal na espiritu ni Jehova, nagigin posible an ano man na imposible kun sa sadiri sana niatong kosog. Angay nanggad na hagadon niato sa pamibi an banal na espiritu nin Dios tanganing itao sa sato an ano man na kulang sa sato!

10. Paano inatubang ni Jesus an makolog na mga sinabi asin ginibo nin iba?

¹⁰ Si Jesus nagpaheling nin marahayon na halimbawa kun paano tatrataron an mga nagtaram o naggibo sa sato nin bakong marahay. “Kan sia pinagtataraman nin maraot,” an sabi sa 1 Pedro 2:23, “dai sia nagbalos na magtaram nin maraot. Kan sia nagsasakit, dai sia nanghuma, kundi padagos na ipinagkatiwala an saiyang sadiri sa saro na naghohokom nin matanos.” Sinasadol kita na sundon an marahay na halimbawa nia. Dai mapukaw sa kaanggotan huli sa maraot na gawe-gawe nin iba. Arog kan sadol sa gabos na Kristiano, magin “mapagmalasakit sa mapagpadangat na paagi, mapakumbaba sa isip, na dai nagbabalos nin maraot sa maraot o nagtataram nin maraot sa nagtataram nin maraot.”—1 Ped. 3:8, 9.

Mga Agom na Dai Dapat Maggirong?

11. Sa anong dakulang pribilehio magkakaigwa nin kabtang an nagkapirang Kristiana?

¹¹ An pagpasakop daw sa pagkapayo nin agom na lalaki nangangahulogan na an mga babae dai dapat maggirong, na dai puedeng magtao nin opinyon sa mga bagay na pampamilya o iba pang tema? Dai nanggad. An mga babae saka lalaki tinawan ni Jehova nin dakol na pribilehio. Isip-isipa na sana an dakulang onra kan mga kabilang sa 144,000 huli sa pagigin nindang mga hade asin saserdote sa langit sa pangengenot ni Cristo kun mamahala na sia sa dagang ini! Kaiba sa bilang na iyan an mga babae. (Gal. 3:26-29) Malinaw na an mga babae tinawan ni Jehova nin aktibong papel sa areglo nia.

12, 13. Magtao nin halimbawa na nagpapaheling na may mga babae na naghula.

¹² Halimbawa, kan mga panahon kan Biblia, may mga babae na naghula. Ihinula sa Joel 2:28, 29: “Ibububo ko an sakong espiritu sa gabos na klase nin laman, asin an saindong mga aking lalaki asin an saindong mga aking babae maghuhurula nanggad. . . . Pati sa mga oripon na lalaki asin sa mga oripon na babae sa mga aldaw na iyan ibububo ko an sakuyang espiritu.”

¹³ Kompuesto nin mga babae saka lalaki an mga 120 disipulo ni Jesus na nagtiripon sa itaas na kuarto sa Jerusalem kan aldaw nin Pentecostes 33 C.E. An espiritu nin Dios ibinubo sa bilog na grupong ini. Kun siring, makokotar ni Pedro an ihinula ni propeta Joel asin ikakaaplikar iyan pareho sa mga lalaki asin babae. Si Pedro nagsabi: “Ini an sinabi paagi ki propeta Joel, ‘Asin sa huring mga aldaw,’ an sabi nin Dios, ‘ibububo ko an iba kan sakong espiritu sa gabos na klase nin laman, asin an saindong mga aking lalaki asin an saindong mga aking babae maghuhurula . . . ; asin pati sa sakong mga oripon na lalaki asin sa sakong mga oripon na babae ibububo ko an iba kan sakong espiritu sa mga aldaw na iyan, asin sinda maghuhurula.’”—Gibo 2:16-18.

14. Ano an papel nin mga babae sa pagpalakop kan Kristianismo kan enot na siglo?

¹⁴ Kan enot na siglo, mahalaga an papel nin mga babae sa pagpalakop kan Kristianismo. Sinda naghulit sa iba manongod sa Kahadean nin Dios asin naggibo nin mga bagay na may koneksion sa paghuhulit na iyan. (Luc. 8:1-3) Halimbawa, inapod ni apostol Pablo si Febe na “sarong ministro kan kongregasyon na yaon sa Cencrea.” Asin sa pagpaabot nin pangungumusta sa mga kapwa trabahador, nasambitan ni Pablo an nagkapirang maimbod na babae, kaiba na si “Trifina asin si Trifosa, mga babaeng nagpapagal sa Kagurangnan.” Nasambit man nia si “Persida na satong namomotan, huli ta sia naggibo nin dakol dian sa Kagurangnan.”—Roma 16:1, 12.

15. Ano an papel nin mga babae sa pagpalakop kan Kristianismo sa panahon niato?

¹⁵ Sa panahon niato, mga babae na manlaenlaen an edad an minakompuesto sa dakulang kabtang kan labing pitong milyon na naghuhulit kan maogmang bareta kan Kahadean nin Dios sa bilog na kinaban. (Mat. 24:14) Dakol sa sainda an bilog na panahon na ministro, misyonera, asin Bethelite. An salmistang si David nag-awit: “Si Jehova mismo an nagtataram; an mga babaeng nagsasabi kan maogmang bareta sarong dakulang hukbo.” (Sal. 68:11) Nagin totoo nanggad an mga tataramon na ini! Pinapahalagahan ni Jehova an papel nin mga babae sa pagpahayag kan maogmang bareta asin pag-otob kan saiyang mga katuyohan. An kahagadan nia na magpasakop an mga Kristiana siertong dai nangangahulogan nin daing girong na pagpasakop.

Duwang Babae na Dai Nag-alangan na Magtaram

16, 17. Paano ipinaheling kan halimbawa ni Sara na an mga babae dai man kaipuhan na magin daing girong na agom?

¹⁶ Kun an mga babae tinatawan ni Jehova nin dakol na pribilehio, bako daw na maninigong konsultahon nin mga agom na lalaki an saindang agom bago gumibo nin magagabat na desisyon? Madonong para sa sainda na gibohon iyan. An Kasuratan nagsambit nin nagkapirang pangyayari na dian an mga agom na babae nagtaram o naghiro dawa dai hinagad kan saindang agom an opinyon ninda. Estudyare an duwang halimbawa.

¹⁷ Pigpaparasabihan ni Sara an saiyang agom, an patriarkang si Abraham, na pahaleon an ikaduwang agom asin an aki kaini huli sa kawaran ninda nin galang. ‘An bagay na iyan ikinaraot na gayo nin boot ni Abraham’—alagad inoyonan iyan nin Dios. Si Jehova nagsabi ki Abraham: “Dai mo ikaraot nin boot an ano man na pigpaparasabi sa saimo ni Sara manongod sa aki asin manongod sa saimong surugoon na babae. Hinanyogon mo an saiyang tingog.” (Gen. 21:8-12) Si Abraham nagkuyog ki Jehova, naghinanyog ki Sara, asin ginibo an hinagad kaini.

18. Nagsadiring boot si Abigail na gibohon an ano?

¹⁸ Isip-isipa man si Abigail, an agom ni Nabal. Kan si David nagdudulag sa maimon na si Hadeng Saul, si David temporaryong nagkampo harani sa mga aripompon ni Nabal. Imbes na magkua nin arin man sa dakol na pagsasadiri kan mayaman na tawong ini, prinotehiran ni David asin kan mga tawohan nia an pagsasadiri ni Nabal. Minsan siring, si Nabal “maisog asin maraot an saiyang mga gibo,” saka ‘pasilyak niang inanggotan’ an mga tawohan ni David. Sia ‘daing kamanungdanan na tawo’ asin “nasa saiya an pagkadaing isip.” Kan an mga tawohan ni David magalang na maghagad nin nagkapirang probisyon, nagsayuma si Nabal. Ano an ginibo ni Abigail kan madangog nia an nangyari? Dawa mayong sinasabi ki Nabal, “naghidali [sia] asin nagkua nin dos sientos na tinapay saka duwang dakulang lalagan nin arak asin limang karnero na binuno asin limang takad na sea nin sinanlag na tipasi asin sanggatos na tinapay na gibo sa pasas patin dos sientos na tinapay na gibo sa pinilpig na igos” dangan itinao iyan ki David asin sa mga tawohan kaini. Tama daw an ginibo ni Abigail? “Hinampak ni Jehova si Nabal,” an sabi kan Biblia, “kaya sia nagadan.” Kan huri inagom ni David si Abigail.—1 Sam. 25:3, 14-19, 23-25, 38-42.

‘An Babae na Nag-aako nin Kaomawan’

19, 20. Ano an nagpapangyari sa sarong babae na magin tunay na kaomaw-omaw?

¹⁹ Kinokomendaran kan Kasuratan an agom na babae na minahiro oyon sa paagi ni Jehova. An libro sa Biblia na Talinhaga inoomaw an “may kakayahan na agom na babae,” na nagsasabi: “An saiyang halaga orog na gayo kisa kan sa korales. Nagtitiwala sa saiya an puso kan saiyang kagsadiri, asin dai magkukulang nin pakinabang. Binalosan nia ini nin karahayan, asin bakong nin karatan, sa gabos na aldaw kan saiyang buhay.” Dugang pa, “ibinuka nia an saiyang ngoso sa kadonongan, asin an ley nin mamomoton na kabootan nasa saiyang dila. Binabantayan nia an mga nangyayari sa saiyang kasararo sa harong, asin dai sia nagkakakan kan tinapay nin kahugakan. An saiyang mga aki nagtirindog asin inapod siang maogma; an saiyang kagsadiri minatindog, asin inoomaw sia kaini.”—Tal. 31:10-12, 26-28.

²⁰ Ano an nagpapangyari sa sarong babae na magin tunay na kaomaw-omaw? “An pang-akit tibaad falso, asin an kagayonan tibaad basang sana,” an sabi sa Talinhaga 31:30, “alagad an babae na natatakot ki Jehova iyo an nag-aako nin kaomawan para sa saiya man sana.” Kaiba sa pagkatakot ki Jehova an pangangaipo na gikan sa boot na magpasakop sa areglo nin Dios sa pagkapayo. ‘An payo nin babae iyo an lalaki,’ kun paanong “an payo kan lambang lalaki iyo an Cristo,” asin ‘an payo kan Cristo iyo an Dios.’—1 Cor. 11:3.

Magpasalamat sa Regalo nin Dios

21, 22. (a) Taano ta ikakapagpasalamat nin mag-agom na mga Kristiano an regalo nin Dios na pag-agoman? (b) Taano ta maninigo niatong igalang an mga areglo ni Jehova sa autoridad asin pagkapayo? (Helingon an kahon sa pahina 17.)

²¹ An mga Kristianong pinagsaro nin pag-agoman may dakolon na dahelan na magpasalamat sa Dios! Sinda makakapamuhay na magkaibanan bilang maogmang mag-agom. Nangorognang ikakapagpasalamat ninda an nakakaogmang regalo nin Dios na pag-agoman huling nagtatao iyan sa sainda nin oportunidad na pagsaroon an saindang buhay asin maglakaw kaiba ni Jehova. (Rut 1:9; Miq. 6:8) Aram na marhay kan Kagtugdas nin pag-agoman kun ano an kaipuhan tanganing magin maogma an pag-agoman. Pirmeng humiro oyon sa paagi nia, asin ‘an kagayagayahan gikan ki Jehova iyo an saindong magigin kuta,’ dawa sa maribok na kinaban ngonyan.—Neh. 8:10.

²² An sarong Kristianong agom na lalaki na namomoot sa saiyang agom arog kan pagkamoot nia sa sadiri nia magigin mamomoton asin makonsiderasyon na payo. An saiyang diosnon na agom magigin tunay na kawiliwili, huling sia magigin mapagsuportar asin magpapaheling sa saiya nin hararom na paggalang. An pinakamahalaga, an arogan na pag-agoman ninda magtatao nin onra sa satong kaomaw-omaw na Dios, si Jehova.