• Makanuod sa Nguhod na Tugang ni Jesus
    An Torrengbantayan (Pag-aadalan)—2022 | Enero

    • MAGDANAY NA MAPAKUMBABA AROG NI SANTIAGO

      Si Santiago na nagkakarpintero asin kaulay siya kan binuhay nang si Jesus.

      Mapakumbabang inako ni Santiago si Jesus kan magpahiling ini sa saiya, asin puon kaidto maimbod siyang naglingkod bilang disipulo ni Cristo (Hilingon an parapo 5-7)

      5. Ano an ginibo ni Santiago kan magpahiling saiya an binuhay liwat na si Jesus?

      5 Kasuarin si Santiago nagin maimbod na parasunod ni Jesus? Pagkatapos na buhayon si Jesus, “nagpahiling siya ki Santiago, dangan sa gabos na apostol.” (1 Cor. 15:7) Nakapabagong marhay sa buhay ni Santiago an paghilingan nindang iyan ni Jesus. Yaon siya sa Jerusalem kaiba kan mga apostol sa sarong kuwarto sa itaas na naghahalat sa ipinanugang banal na espiritu. (Gibo 1:13, 14) Kan huri, maugma si Santiago na naglingkod bilang miyembro kan namamahalang grupo kan inot na siglo. (Gibo 15:6, 13-22; Gal. 2:9) Asin bago 62 C.E., pinasabngan siya na maggibo nin surat para sa linahidan na mga Kristiyano. Nakikinabang kita ngunyan sa surat na iyan, sa langit man o sa daga an satong paglaom. (Sant. 1:1) Sinasabi kan inot na siglong historyador na si Josephus na si Santiago ginadan sa pagbuot kan Judiong Halangkaw na Saserdoteng si Ananias na aki ni Annas. Si Santiago nagdanay na maimbod ki Jehova sagkod na matapos an saiyang buhay digdi sa daga.