Pamumuhay Para sa Ngonyan o Para sa Sarong Daing Sagkod na Ngapit?
“Kita ilinigtas sa paglaom na ini.”—ROMA 8:24.
1. Ano an itinokdo kan mga Epicureo, asin paano nakaapektar sa nagkapirang Kristiano an siring na klase nin pilosopiya?
SI APOSTOL Pablo nagsurat sa mga Kristiano na nag-eerok sa Corinto: “Taano ta an nagkapira sa saindo nagsasabi na mayo nin pagkabuhay liwat kan mga gadan?” (1 Corinto 15:12) Minalataw na an mararang pilosopiya kan may kabatidan na Griegong si Epicuro nakalaog sa tahaw kan mga Kristiano kan enot na siglo. Sa siring dinara ni Pablo an atension sa katokdoan kan mga Epicureo: “Magkarakan asin mag-irinom kita, huli ta sa aga magagadan kita.” (1 Corinto 15:32) Dinedeharan an ano man na paglaom sa buhay pagkagadan, an mga parasunod kan pilosopong iyan nagtubod na an kasingawan sa laman iyo an solamente o pangenot na pakinabang sa buhay. (Gibo 17:18, 32) An pilosopiya kan mga Epicureo sadiri sana an iniintindi, mapagtuya, asin sa katapustapusi nakararaot.
2. (a) Taano ta peligrosong marhay na negaran an pagkabuhay liwat? (b) Paano pinakosog ni Pablo an pagtubod kan mga Kristianong taga-Corinto?
2 Hararom an mga kalabot bilang resulta kan pagnegar na ini sa pagkabuhay liwat. Si Pablo nangatanosan: “Sa katotoohan, kun mayo nin pagkabuhay liwat an mga gadan, dai man binuhay liwat si Cristo. Alagad kun si Cristo dai binuhay liwat, tunay na sayang sana an satuyang paghulit, asin sayang sana an satuyang pagtubod. . . . Kun sa buhay sanang ini kita naglaom ki Cristo, kita an pinakakaherakherak sa gabos na tawo.” (1 Corinto 15:13-19) Iyo, kun mayo kan paglaom na daing sagkod na ngapit, an Kristianismo “sayang sana.” Iyan mayo nin katuyohan. Bakong makangangalas, kun siring, na sa impluwensia kan paganong kaisipan na ini, an kongregasyon sa Corinto nagin sentro nin mga problema. (1 Corinto 1:11; 5:1; 6:1; 11:20-22) Kun siring, katuyohan ni Pablo na pakosogon an saindang pagtubod sa pagkabuhay liwat. Naggagamit nin mapuersang lohika, mga kotasyon sa Kasuratan, asin mga ilustrasyon, pinatunayan nia sa dai mapagdududahan na paagi na an paglaom na pagkabuhay liwat bakong eroestorya kundi sarong katunayan na seguradong maootob. Basado digdi, nasadol nia an saiyang mga kapagtubod: “Magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong sayang sana dian sa Kagurangnan.”—1 Corinto 15:20-58.
“Magdanay Kamong Mapagbantay”
3, 4. (a) Sono ki Pedro, anong peligrosong aktitud an makapapano sa nagkapira durante kan huring mga aldaw? (b) Ano an kaipuhan na padagos niatong ipagirumdom sa satong sadiri?
3 Ngonyan, an aktitud kan dakol pesimista, mabuhay para sana sa ngonyan. (Efeso 2:2) Pareho iyan kan ihinula ni apostol Pedro. Sia nagtaram dapit sa “mga paraolog-olog . . . na may pag-olog-olog na . . . magsasarabi: ‘Haen man ining ipinanugang presensia nia? Tara, poon kan aldaw na an satong mga kag-anak magtorog sa kagadanan, an gabos na bagay pareho man sana poon kan kapinonan nin paglalang.’” (2 Pedro 3:3, 4) Kun an tunay na mga parasamba padaog sa siring na punto de vista, sinda tibaad magin “inaktibo o daing bunga.” (2 Pedro 1:8) Nakaoogma, bakong arog kaiyan an mayoriya sa banwaan nin Dios ngonyan.
4 Bakong sala na magin interesado sa maabot na katapusan kan presenteng maraot na palakaw. Girumdoma an interes na ipinaheling kan mismong mga apostol ni Jesus: “Kagurangnan, ibabalik mo ngonyan an kahadean sa Israel?” Si Jesus nagsimbag: “Mayo sa saindo an pakaaram kan mga panahon o kapanahonan na ibinugtak nin Ama sa saiyang sadiring kapangyarihan.” (Gibo 1:6, 7) Yaon sa mga tataramon na iyan an pundamental na mensahe na itinao nia sa Bukid nin mga Olibo: “Dai nindo aram kun sa anong aldaw madatong an saindong Kagurangnan. . . . Sa oras na dai nindo pinaghohona, an Aki nin tawo madatong.” (Mateo 24:42, 44) Kaipuhan na padagos niatong ipagirumdom sa satong sadiri an hatol na iyan! An nagkapira tibaad masugotan kan aktitud na ‘Seguro maluwayluway nguna ako nin kadikit asin dai ko na pakaseseryosohon an mga bagay.’ Sala nanggad iyan! Horophoropa si Santiago asin Juan, an “Mga Aki nin Dagoldol.”—Marcos 3:17.
5, 6. Anong mga leksion an makukua niato sa mga halimbawa ni Santiago asin Juan?
5 Aram ta na si Santiago sarong labi-labi kaigot na apostol. (Lucas 9:51-55) Kan oras na maestablisar an Kristianong kongregasyon, sierto na nagin aktibo sia dian. Alagad kan si Santiago medyo hoben pa, ipinagadan sia ni Herodes Agripa I. (Gibo 12:1-3) Hinohona ta daw na si Santiago, kan maheling nia na an saiyang buhay matatapos sa dai linalaoman na paagi, nagmondo na sia nagin maigot na marhay, na sia naghingoang marhay sa saiyang ministeryo? Dai nanggad! Seguradong naogma sia na nagamit nia an pinakamarahay na mga taon kan saiyang medyo halipot na buhay sa paglilingkod ki Jehova. Ngonyan, mayo sa sato na nakakaaram kun baga an satong buhay tibaad matapos sa dai linalaoman na paagi. (Eclesiastes 9:11; ikomparar an Lucas 12:20, 21.) Kaya malinaw nanggad na madonong na papagdanayon na todo-todo an satong kaigotan asin aktibidad sa paglilingkod ki Jehova. Paagi kaiyan mapagdadanay ta an satong marahay na ngaran sa atubangan nia asin padagos kitang mamumuhay na tinatanaw an satong daing sagkod na ngapit.—Eclesiastes 7:1.
6 May konektadong leksion may labot ki apostol Juan, na presente kan si Jesus makosog na nagsadol, “Magdanay kamong mapagbantay.” (Mateo 25:13; Marcos 13:37; Lucas 21:34-36) Isinapuso iyan ni Juan, na naglingkod na may entusiasmo sa laog nin dakol na dekada. Sa katunayan, minalataw na sia an natadang buhay sa gabos na iba pang apostol. Kan si Juan gurang nang marhay, na nakasasalingoy sa mga dekada nin fiel na aktibidad, minansay daw nia iyan na sala, sarong buhay na napasala o bakong balanse? Dai nanggad! Galaga pa giraray siang nagtanaw sa ngapit. Kan an binuhay liwat na si Jesus magsabi, “Iyo; ako madatong sa madali,” si Juan tolos-tolos na nagsimbag, “Amen! Madia, Kagurangnan na Jesus.” (Kapahayagan 22:20) Si Juan tunay na dai namuhay para sa presente, na nagmamawot nin maluway asin kalmadong ‘normal na buhay.’ Desidido siang padagos na maglingkod sa bilog niang buhay asin kosog, noarin man dumatong an Kagurangnan. Kumusta man kita?
Mga Pasisikadan kan Pagtubod sa Buhay na Daing Katapusan
7. (a) Paano an paglaom na buhay na daing katapusan ‘ipinanuga bago an mga panahon na daing sagkod’? (b) Paano si Jesus nagtao nin liwanag sa paglaom na buhay na daing sagkod?
7 Laoman nindo na an paglaom na buhay na daing katapusan bakong pangatorogan o imahinasyon na gibo nin tawo. Siring sa sinasabi kan Tito 1:2, an satong diosnon na debosyon napasisikad sa “paglaom sa buhay na daing katapusan na ipinanuga nin Dios, na dai makakapagputik, bago an mga panahon na daing sagkod.” Orihinal na katuyohan nin Dios na an gabos na makinuyog na tawo mabuhay sagkod lamang. (Genesis 1:28) Daing makaoolang sa katuyohan na ini, maski an pagrebelde ni Adan asin Eva. Siring sa nasusurat sa Genesis 3:15, an Dios tolos-tolos na nanuga nin sarong “banhi” na maremedyo sa gabos na danyos sa katawohan. Kan dumatong an “banhi” o Mesiyas, si Jesus, an paglaom na buhay na daing sagkod ginibo niang saro sa saiyang pundamental na mga katokdoan. (Juan 3:16; 6:47, 51; 10:28; 17:3) Paagi sa pagsakripisyo kan saiyang sangkap na buhay bilang pantubos, nakua ni Cristo an legal na diretso na magtao nin buhay na daing katapusan sa katawohan. (Mateo 20:28) An nagkapira sa saiyang mga disipulo, na 144,000 gabos, mabubuhay sagkod lamang sa kalangitan. (Kapahayagan 14:1-4) Sa siring an nagkapirang dati magagadanon na tawo ‘magubing nin pagkadaing kagadanan.’—1 Corinto 15:53.
8. (a) Ano an “pagkadaing kagadanan,” asin taano ta itinatao iyan ni Jehova sa 144,000? (b) Anong paglaom an iinalok ni Jesus sa “ibang karnero”?
8 An kahulogan kan “pagkadaing kagadanan” bako sanang dai noarin man pagkagadan. Kalabot dian an “kapangyarihan nin buhay na dai malalaglag.” (Hebreo 7:16; ikomparar an Kapahayagan 20:6.) Pero, ano an nagigibo nin Dios sa pagtao nin siring na pambihirang balaog? Girumdoma an angat ni Satanas na mayo ni saro sa mga linalang nin Dios na puedeng pagtiwalaan. (Job 1:9-11; 2:4, 5) Paagi sa pagtao nin pagkadaing kagadanan sa 144,000, ipinaheheling nin Dios an saiyang lubos na kompiansa sa grupong ini na marahayon an pagkasimbag sa angat ni Satanas. Alagad kumusta an iba pa sa katawohan? Sinabihan ni Jesus an enot na mga miembro kan “sadangaton na aripompon” na ini nin mga paramana kan Kahadean na sinda ‘matukaw sa mga trono tanganing maghokom sa doseng tribo nin Israel.’ (Lucas 12:32; 22:30) Nangangahulogan ini na an iba maako nin buhay na daing katapusan digdi sa daga bilang mga sakop kan saiyang Kahadean. Minsan ngani an “ibang karnero” na ini dai tatawan nin pagkadaing kagadanan, sinda maako nin “buhay na daing katapusan.” (Juan 10:16; Mateo 25:46) Sa siring buhay na daing katapusan an linalaoman kan gabos na Kristiano. Bako iyan na imahinasyon sana kundi sarong bagay na solemneng ipinanuga nin “Dios, na dai makakapagputik,” asin binayadan kan mahal na marhay na dugo ni Jesus.—Tito 1:2.
Sa Harayo Pang Ngapit?
9, 10. Ano an malinaw na mga nagpaparisa na kita harani na sa katapusan?
9 Si apostol Pablo naghula na an “delikadong mga panahon na masakit pakibagayan” magpaparisa na kita dai manenegaran na nagdatong na sa “huring mga aldaw.” Mantang an sosyedad nin tawo sa palibot niato natutumpag sa kamugtakan nin kadaihan nin pagkamoot, kahanaban, pagpagusto sa sadiri, asin karatan, bako daw na narerealisar niato na marikas nang nagdadangadang an aldaw ni Jehova sa paggibo kan saiyang mga paghokom sa maraot na palakaw na ini kan kinaban? Mantang nag-oorog an kadahasan asin pagkaongis, bako daw na naheheling niato sa enterong palibot niato an kaotoban kan dugang pang mga tataramon ni Pablo: “An mga maraot asin madaya orog na magraraot”? (2 Timoteo 3:1-5, 13) An nagkapira tibaad may optimismong makurahaw nin “Katoninongan asin katiwasayan,” alagad mawawara an gabos na posibilidad para sa katoninongan, huli ta an “biglang pagkalaglag maabot tolos sa sainda siring sa kolog nin bados na babae; asin dai sinda makaliligtas minsan sa anong paagi.” Dai kita pinabayaan na ignorante kun dapit sa kahulogan kan satong mga panahon. Kaya, “magpuka kita asin papagdanayon niato an toltol na pag-iisip.”—1 Tesalonica 5:1-6.
10 Dugang pa, sinasabi kan Biblia na an huring mga aldaw ‘halipot sanang panahon.’ (Kapahayagan 12:12; ikomparar an 17:10.) An kadaklan kan ‘halipot na panahon’ na iyan minalataw na nag-agi na. An hula ni Daniel, halimbawa, eksaktong ilinaladawan an pagkakalaban kan “hade sa amihanan” asin kan “hade sa timog” na nakaantos sagkod sa siglong ini. (Daniel 11:5, 6) An dai na sana naootob iyo an pangultimong pagsalakay kan “hade sa amihanan,” na ilinadawan sa Daniel 11:44, 45.—Helingon An Torrengbantayan na Hulyo 1, 1987, asin Nobyembre 1, 1993, para sa paliwanag sa hulang ini.
11. (a) Sagkod saen na naotob an Mateo 24:14? (b) Ano an ipinaririsa kan mga tataramon ni Jesus na nasusurat sa Mateo 10:23?
11 Yaon man an hula ni Jesus na “an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Ngonyan, ginigibo kan Mga Saksi ni Jehova an saindang paghuhulit sa 233 na kadagaan, grupo nin mga isla, asin teritoryo. Totoo, may mga teritoryo na dai pa nahuhulitan, asin tibaad sa itinalaan na panahon ni Jehova, mabubuksan an oportunidad. (1 Corinto 16:9) Pero, nakapapepensar an mga tataramon ni Jesus na nasusurat sa Mateo 10:23: “Dai nindo sa ano man na paagi mauubos na liboton an mga siudad kan Israel sagkod na mag-abot an Aki nin tawo.” Minsan ngani segurado na an maogmang bareta ikapaiisi sa bilog na daga, dai niato personal na mapapaabotan kan mensahe kan Kahadean an gabos na parte kan daga bago “mag-abot” si Jesus bilang Parakastigo.
12. (a) Anong ‘pagtatak’ an sinasabi sa Kapahayagan 7:3? (b) Ano an kahulogan kan nag-iinang kabilangan nin mga linahidan digdi sa daga?
12 Horophoropa an teksto sa Kapahayagan 7:1, 3, na nagsasabi na an “apat na doros” nin kalaglagan pinopogolan “sagkod na dai pa niamo natatatakan an mga oripon kan satong Dios sa saindang angog.” Dai ini nagtataram manongod sa enot na pagtatak, na nangyayari sa panahon na akoon kan mga kabilang sa 144,000 an langitnon na pag-apod. (Efeso 1:13) Iyan nagtataram manongod sa pangultimong pagtatak, kun sinda midbidon na sa dai maliliwat na paagi bilang nabalo asin fiel na “mga oripon kan satong Dios.” Dakula na an naina sa kabilangan kan tunay na linahidan na mga aki nin Dios na buhay pa digdi sa daga. Dugang pa, an Biblia malinaw na nagsasabi na “huli sa mga pinili” kaya “pahahalipoton” an pagpopoon kan dakulang kahorasaan. (Mateo 24:21, 22) An kadaklan kan mga naghihingakong linahidan medyo gurang na. Sa giraray, bako daw na ipinaririsa kaini na harani na an katapusan?
Sarong Fiel na Bantay
13, 14. Ano an paninimbagan kan grupong bantay?
13 Mientras tanto, marahay na kuyogon niato an mga paggiya na itinatao kan ‘fiel na oripon.’ (Mateo 24:45) Sa laog nin labi nang sanggatos na taon, an “oripon” sa presenteng aldaw fiel na naglilingkod bilang “bantay.” (Ezequiel 3:17-21) An Torrengbantayan na Hunyo 1, 1984 (w84-E 1/1), nagpaliwanag: “An bantay na ini nagmamasid kun ano an mga nangyayari sa daga bilang kaotoban sa hula kan Biblia, nagtatao kan patanid manongod sa nagdadangadang na ‘dakulang kahorasaan na dai pang kaagid na nangyari poon sa kapinonan kan kinaban’ asin nagbabalangibog nin ‘maogmang bareta dapit sa orog karahay.’”—Mateo 24:21; Isaias 52:7.
14 Girumdomon: Trabaho nin bantay na ikurahaw “an saiyang naheheling.” (Isaias 21:6-8) Kan mga panahon kan Biblia an sarong bantay nagtatao nin patanid dawa kun an potensial na peligro harayoon pa an distansia tanganing malinaw na mamidbid. (2 Hade 9:17, 18) Sierto na may mga alarma kaidto na bakong totoo. Alagad an sarong marahay na bantay dai magpopogol huli sa takot na mapasopog. Kun nasosolo an saindong harong, ano an mamamatean nindo kun an mga bombero dai nag-abot huli ta an paghona ninda iyan tibaad alarma na bakong totoo? Dai, linalaoman ta na an mga tawong iyan insigidang mahiro sa ano man na senyal nin peligro! Sa kaagid na paagi, an grupong bantay nagtataram kun minalataw na hinahagad kan mga kamugtakan na gibohon iyan.
15, 16. (a) Taano ta ginigibo an mga pagliliwat sa satong pakasabot sa hula? (b) Ano an manonodan niato sa fiel na mga lingkod nin Dios na napasala an pakasabot sa nagkapirang hula?
15 Pero, mantang nagpapadagos an mga pangyayari, an satong pakasabot sa hula orog na naglinaw. Ipinaheheling kan kasaysayan na an mga hula nin Dios bihirang nasasabotan nin lubos, kun masabotan man, bago maotob an mga iyan. Eksaktong sinabi nin Dios ki Abram kun gurano kahaloy na an saiyang banhi magigin “nakikihimanwa sa sarong daga na bako ninda,” iyo na ngani an 400 na taon. (Genesis 15:13) Minsan siring, iinopresir ni Moises an saiyang sadiri bilang paraligtas na mayo pa sa panahon.—Gibo 7:23-30.
16 Horophoropa man an mga hula dapit sa Mesiyas. Sa paggirumdom, garo baga malinaw na marhay na an pagkagadan asin pagkabuhay liwat kan Mesiyas ihinula. (Isaias 53:8-10) Pero, an bagay na ini dai nasabotan kan mismong mga disipulo ni Jesus. (Matthew 16:21-23) Dai ninda nasabotan na an Daniel 7:13, 14 maootob durante kan maabot na pa·rou·siʹa, o “presensia,” ni Cristo. (Mateo 24:3) Kaya salto sinda nin haros 2,000 na taon sa saindang pagkalkulo kan hapoton ninda si Jesus: “Kagurangnan, ibabalik mo ngonyan an kahadean sa Israel?” (Gibo 1:6) Dawa kan establisado nang marhay an Kristianong kongregasyon, padagos na naglataw an salang mga ideya asin mga linalaoman na bakong totoo. (2 Tesalonica 2:1, 2) Minsan ngani an nagkapira nasasala an mga punto de vista paminsanminsan, dai manenegaran na binendisyonan ni Jehova an gibohon kaidtong nagturubod kan enot na siglo!
17. Ano an maninigo na magin pagmansay niato sa mga pagliliwat sa satong pakasabot sa Kasuratan?
17 An grupong bantay ngonyan kaipuhan man na klaripikaron an mga pagmansay kaiyan sa panapanahon. Pero, may magduduwaduwa daw na binebendisyonan ni Jehova an ‘fiel na oripon’? Apuera kaiyan, kun hehelingon sa konektadong kamugtakan, bako daw na saradit sana man an kadaklan na pagliliwat na nangyayari? An satong pundamental na pakasabot sa Biblia dai nagliwat. An satong marigon na pagtubod na kita nabubuhay na sa huring mga aldaw mas makosog kisa kasuarin pa man!
Pamumuhay Para sa Daing Sagkod na Ngapit
18. Taano ta dapat niatong likayan na mamuhay para sana sa ngonyan?
18 An kinaban tibaad magsabi, ‘Magkarakan asin mag-irinom kita, huli ta sa aga magagadan kita,’ alagad bako ini an dapat na magin kaisipan niato. Taano ta magmamaigot nin sayang sana para sa mga kasingawan na makukua nindo sa buhay ngonyan mantang puede kamong magmaigot para sa daing sagkod na ngapit? An paglaom na iyan, baga man inmortal na buhay sa langit o buhay na daing katapusan digdi sa daga, bakong pangatorogan, bakong imahinasyon. Iyan sarong katunayan na ipinanuga kan Dios “na dai makakapagputik.” (Tito 1:2) Dakulaon an ebidensia na harani na an kaotoban kan satong paglaom! “Nainaan na an panahon na natatada.”—1 Corinto 7:29.
19, 20. (a) Ano an pagmansay ni Jehova sa mga pagsasakripisyo niato para sa Kahadean? (b) Taano ta dapat kitang mamuhay na nasa isip an panahon na daing sagkod?
19 Totoo, mas haloy na an ilinawig kan palakaw na ini kisa sa pinaghona nin dakol. An nagkapira tibaad magsaboot ngonyan na kun aram sana ninda ini kaidto, tibaad may mga pagsasakripisyo na dai kutana ninda ginibo. Alagad an saro maninigo na dai magbasol na ginibo nia iyan. Total, an paggibo nin mga pagsasakripisyo sarong pundamental na kabtang nin pagigin Kristiano. An mga Kristiano ‘nagpapainda sa saindang sadiri.’ (Mateo 16:24) Nungka niatong isipon na sayang an satong mga paghihingoa na paogmahon an Dios. Si Jesus nanuga: “Dai nin siisay man na nagbaya sa harong o mga tugang na lalaki o mga tugang na babae o ina o ama o mga aki o mga oma huli sa sako asin huli sa maogmang bareta na dai magkakamit nin mananggatos ngonyan . . . asin sa madatong na palakaw nin mga bagay buhay na daing katapusan.” (Marcos 10:29, 30) Sangribong taon poon ngonyan, magigin gurano pa daw kahalaga kan saindong trabaho, harong, o kuarta sa bangko? Pero, an mga pagsasakripisyo nindo para ki Jehova magigin makahulogan sarong milyon na taon poon ngonyan—sarong bilyon na taon poon ngonyan! “Huli ta an Dios bakong biko na malingawan an saindong ginibo.”—Hebreo 6:10.
20 Kun siring, mamuhay kita na nasa isip an panahon na daing sagkod, na itinotorohok an satong mga mata, “bakong sa mga bagay na naheheling, kundi sa mga bagay na dai naheheling. Huli ta an mga bagay na naheheling naagi sana, alagad an mga bagay na dai naheheling daing katapusan.” (2 Corinto 4:18) Si propeta Habacuc nagsurat: “An bisyon para sa itinalaan na panahon pa, asin iyan naghahangoshangos sagkod sa katapusan, asin dai iyan magpuputik. Minsan pa iyan maatraso, padagos iyan na halaton; huli ta sierto nanggad na iyan maootob. Dai iyan mahuhuri.” (Habacuc 2:3) Paano an ‘padagos na paghalat’ kan katapusan nakaaapektar sa paagi nin pag-otob niato sa satong personal asin pampamilyang mga paninimbagan? Tatrataron kan satong sunod na artikulo an mga isyung ini.
Mga Punto sa Pagrepaso
◻ Paano an nagkapira ngonyan naapektaran kan garo baga pagkaatraso kan katapusan kan palakaw na ini nin mga bagay?
◻ Ano an pasisikadan kan satong paglaom sa buhay na daing katapusan?
◻ Ano an maninigo na magin pagmansay niato sa mga pagsasakripisyong ginigibo niato para sa intereses kan Kahadean?
[Retrato sa pahina 15]
An lakop sa globong paghuhulit dapat na taposon bago dumatong an katapusan