Pagbukas kan Dalan Pabalik sa Paraiso
“[Si Jesus] nagsabi sa saiya: ‘Sa katotoohan sinasabi ko saimo ngonyan, Ika makakaibahan ko sa Paraiso.’ ”—LUCAS 23:43.
1, 2. (a) Ano an kahulogan kan “paraiso,” asin nagin siring nin ano an hardin nin Eden? (b) Paano an Hebreong tataramon para sa “hardin” itrinadusir sa Kristianong Griegong Kasuratan?
AN PAMILYA nin tawo nagkaigwa kan kapinonan kaini sa Paraiso. Manongod sa paglalang kan tawo, mababasa niato sa enot na libro kan Banal na Kasuratan: “Pinorma ni Jehova Dios an tawo hale sa kabokabo kan daga asin hinangosan sia sa saiyang dongo kan hangos nin buhay, asin an tawo nagin buhay na kalag. Asin si Jehova Dios nagtanom nin hardin sa Eden, sa sirangan, asin duman nia ibinugtak an tawo na saiyang hinaman.” (Genesis 2:7, 8) An ngaran na “Eden” nangangahulogan na “Kagayagayahan,” asin sa siring an hardin nin Eden sarong mahiwas na parke nin kagayagayahan, na may dakol asin manlaenlaen na magagayon na mga kabtang.
2 An tataramon na “paraiso” kinua hale sa Griegong lenguahe, asin sa lenguaheng iyan nangangahulogan ini na sarong arog parkeng hardin. An Griegong tataramon na ginagamit tanganing itradusir an Hebreong nombreng gan, na nangangahulogan na “hardin,” iyo an pa·raʹdei·sos. An mga Kasuratan poon sa Mateo sagkod sa Kapahayagan isinurat sa Griegong lenguahe, asin an Griegong tataramon na ini an ginamit sa pagtala kan mga sinabi kan Kagurangnan na si Jesu-Cristo kan sia nagsasakit kan padusa nin kagadanan sa sarong hariging pasakitan sa Kalbaryo kan Nisan 14 kan taon 33 C.E.
An Panugang Paraiso ni Jesus sa Sarong Paragibo nin Kasalan
3. (a) Ano an hinagad kan may simpatiyang paragibo nin maraot ki Jesus? (b) An kahagadan kan paragibo nin maraot nagpaheling nin ano manongod sa saiyang pagtubod ki Jesus?
3 Kan panahon na iyan, duwang paragibo nin maraot an ipinako na kataed ni Jesus. An saro sa sainda nag-ontok na sa pagtataram nin maraot ki Jesus sa paagi na padagos na ginigibo kan ikaduwang parahabon na nakapako sa ibong ni Jesus. An may simpatiyang paragibo nin maraot kuminiling asin nagsabi: “Jesus, girumdoma man ako kun ika yaon na sa saimong kahadean,” sa siring nagpahayag nin pagtubod na si Jesus, minsan nakapako na kaiba nia, may kakamtan na sarong kahadean sa ngapit. (Lucas 23:42; Marcos 15:32) Sierto nanggad na napahiro kaiyan an puso kan Kagurangnan na si Jesus! An makiamigong kriminal na iyan nagtubod na si Jesu-Cristo daing sala asin sia bakong angay sa siring na makuring penalidad nin pagpako tanganing mapasopog sa atubang nin publiko. (Lucas 23:41) Ipinaheling nia paagi kan saiyang kahagadan na nagtubod sia na bubuhayon liwat si Jesus hale sa kagadanan asin madatong sa saiyang kahadean. An paragibo nin maraot nagpaheling man nin pagtubod na sia man puwedeng magkamit nin pagkabuhay liwat asin na si Jesus an Saro na maapod sa saiya hale sa mga gadan asin matao sa saiya nin ibinalik na buhay sa daga.
4. Paano sinimbag ni Jesus an kahagadan kan paragibo nin maraot, na nagpapaheling nin ano?
4 Kan sinabi saiya ni Jesus: “Sa katotoohan sinasabi ko saimo ngonyan, Ika makakaibahan ko sa Paraiso,” itinokdo nia an sarong pagkabuhay liwat kan may simpatiyang paragibo nin maraot. Iyan seguradong nagin sarong tunay na karangahan sa kriminal na nagpaheling nin pagtubod. Tanganing mangyari an pagkabuhay liwat kan lalaking iyan, kaipuhan nguna na buhayon liwat si Jesus. Dangan, sa paggamit kan saiyang itinao nin Dios na kapangyarihan na magbuhay liwat, aapodon ni Jesus an paragibong ini nin maraot hale sa mga gadan sa aldaw nin pagkabuhay liwat kan kinaban nin katawohan.—Lucas 23:43; Juan 5:28, 29; 1 Corinto 15:20, 23; Hebreo 9:15.
5, 6. (a) Ano an ipinasurat ni Gobernador Poncio Pilato sa pamayohan kan ipinakong si Jesus? (b) Posibleng sa anong lenguahe nagtaram si Jesus sa paragibo nin maraot?
5 Sa anong lenguahe itinao ni Jesus an panugang iyan? Nagkapira an ginagamit duman kan panahon na idto. Maheheling ini paagi sa mga tataramon na ipinasurat ni Gobernador Poncio Pilato sa pamayohan kan ipinakong si Jesu-Cristo, na nagpapamidbid kun siisay sia asin mababasa kan gabos na minaagi. An tala sa Juan 19:19, 20 nagsasabi: “Si Pilato nagsurat man nin titulo asin ibinugtak ini sa hariging pasakitan. An nakasurat: ‘Si Jesus na Nazareno an Hade kan mga Judio.’ Kun siring kadakol kan mga Judio an nakabasa kan titulong ini, huli ta an lugar kun saen ipinako si Jesus harani sa siudad; asin isinurat idto sa Hebreo, sa Latin, sa Griego.”
6 Paagi sa saiyang pagkamundag sa Betlehem sa saiyang inang birhen, si Maria, namundag si Jesus na sarong Judio, o sarong Hebreo. Kun siring, sa saiyang paghuhulit sa laog nin tolo may kabangang taon sa daga nin saiyang pagkamundag, maliwanag na naghulit sia sa presenteng Judiong tataramon, o Hebreo. Kaya, kan nagtao sia nin nagsisiertong mga tataramon sa may simpatiyang paragibo nin maraot, posible na nagtaram sia sa Hebreo. Kaya posibleng ginamit nia an Hebreong tataramon na gan kan nagtataram manongod sa Paraiso—an tataramon na manonompongan sa Genesis 2:8. Duman, ginagamit kan Greek Septuagint na bersion kan Banal na Kasuratan an tataramon na pa·raʹdei·sos kun nagtatradusir kan orihinal na tataramon na gan.
7. Paano pinamuraway si Jesus kan binuhay sia liwat?
7 Binuhay liwat si Jesus hale sa mga gadan kan ikatolong aldaw pakatapos kan pagpako sa saiya, o kan Nisan 16 kan Hebreong kalendaryo. Pagkaagi nin kuwarentang aldaw nagbalik sia sa langit, an saiyang orihinal na istada, lamang ngonyan sa orog na mamuraway na kamugtakan. (Gibo 5:30; 31; Filipos 2:9) Nagugubingan na sia ngonyan nin inmortalidad, sarong kuwalidad na kapareho kan sa saiyang langitnon na Ama. Si Jehova Dios an nagin solamenteng Kagsadiri kan inmortalidad sagkod sa pagkabuhay liwat ni Jesus hale sa mga gadan kan Domingong idto, Nisan 16.—Roma 6:9; 1 Timoteo 6:15, 16.
Binuksan kan Pantubos an Dalan
8. Ano an orihinal na katuyohan ni Jehova manongod sa daga, asin ano an nagpapaheling na nagdadanay sia sa katuyohan na iyan?
8 Gabos ini mga tangga sa katuyohan nin Dios na gubingan an bilog na daga nin arog paraisong kagayonan, iyo, tanganing magin sarong panglobong paraiso. (Genesis 1:28; Isaias 55:10, 11) Sa 1 Corinto 15:45, itinokdo ni apostol Pablo si Jesus bilang “an huring Adan.” Nagpapaheling ini na nagdanay an Dios sa saiyang orihinal na katuyohan manongod sa daga asin na igwa nin saro na maotob kan katuyohan na dai naginibo kan enot na Adan.
9. Ano an itinao ni Jesus tanganing bukasan an dalan pabalik sa Paraiso?
9 Oyon ki Pablo, si Jesus nagtao “nin katimbang na pantubos.” (1 Timoteo 2:6) Si Jesu-Cristo mismo nagsabi: “An Aki nin tawo nagdigdi, bakong tanganing paglingkodan, kundi tanganing maglingkod asin magtao kan saiyang kalag bilang pantubos na karibay nin dakol.” Ini an nagpagin posible para sa mga naggigibo nin pagtubod ki Jesu-Cristo na magkaigwa nin buhay na daing sagkod.—Mateo 20:28; Juan 3:16.
10. (a) Ano an dineterminar nin Dios manongod sa limitadong bilang nin inoyonan na mga tawo? (b) Kasuarin nagpoon an pagpipili kan “sadangoton na aripompon,” asin paagi niisay?
10 Kan nagsakat si Jesus sa langit pakatapos kan saiyang pagkabuhay liwat hale sa mga gadan, saiya nang ikaaatubang an merito kan saiyang pantubos na atang sa Dios para sa pamilya nin tawo. Minsan siring, katuyohan kan saiyang langitnon na Ama, si Jehova Dios, na kumua sa mga nasyon sa daga nin “banwaan para sa saiyang ngaran.” (Gibo 15:14) Sono sa Kapahayagan 7:4 asin 14:1-4, ini may bilang sana na 144,000 na mga indibiduwal, an “sadangoton na aripompon,” na inapod sa langitnon na Kahadean nin Dios. (Lucas 12:32) An pagpili kaining espesyalmenteng mga inoyonan ni Jehova Dios nagpoon sa pagpili kan 12 apostol ni Jesu-Cristo. (Mateo 10:2-4; Gibo 1:23-26) Sinabi ni Jesus sa mga miembro kan pundasyon kan saiyang kongregasyon: “Bako kamo an nagpili sa sako, kundi ako an nagpili sa saindo.” (Juan 15:16) An mga ini an mangengenot sa gibohon na pagpahayag kan maabot na panglobong Paraiso sa pagsakop kan Kahadean.
An Pagigin Harani kan Kahadean
11. Kasuarin nakatalaan na patindogon an Mesiyanikong Kahadean?
11 Sa ngaran kan Kagurangnan na si Jesu-Cristo, padagos kita ngonyan na nagdodolot nin pamibi ki Jehova para dumatong na an Saiyang Kahadean. (Mateo 6:9, 10; Juan 14:13, 14) An Mesiyanikong Kahadean patitindogon sa katapusan kan “itinalaan na mga panahon kan mga nasyon.” (Lucas 21:24) An Panahon nin mga Hentil na idto naotob kan taon na 1914.a
12. Ano an nangyari kan 1914 na kaoyon kan hula ni Jesus manongod sa risang gayong mga bagay na magtatanda kan saiyang dai naheheling na presensia?
12 An taon na iyan tinandaan kan enot na pankinaban na guerra sa kasaysayan nin tawo. Kaoyon ini kan hula ni Jesus manongod sa risang gayong mga bagay na magtatanda kan saiyang dai naheheling na presensia sa kapangyarihan sa Kahadean sa daga. Hinapot sia kan saiyang mga disipulo: “Sabihi kami, Noarin mangyayari an mga bagay na ini, asin ano an magigin tanda kan saimong presensia asin kan pagtatapos kan sistema nin mga bagay?” Bilang simbag sinabi ni Jesus: “Huli ta an nasyon matindog tumang sa nasyon asin an kahadean tumang sa kahadean, asin magkakaigwa nin mga kakulangan nin kakanon asin mga linog sa surunodsunod na lugar. An gabos na bagay na ini iyo an kapinonan nin kasakitan. Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:3, 7, 8, 14; Marcos 13:10.
13. (a) Sa anong bagay na an paghuhulit kan Kahadean nin Dios maogmang bareta? (b) Gurano kahaloy na idinolot an mga pamibi na dumatong na an Kahadean nin Dios, asin an saiyang mga saksi daw sa daga dai napapagal sa pagdolot kan mga pamibing ini?
13 An maogmang baretang ini kan Kahadean ni Jehova ihinuhulit na ngonyan sa labi sa 200 na kadagaan, asin ginigibo an mga pagmamaigot tanganing paaboton ini sa orog pang mga teritoryo. Bareta ini, bako nin maabot pa sanang pankinaban na gobyerno, kundi nin sarong kahadean na nasa kapangyarihan na ngonyan, saro na namamahala na. An Kahadean na iyan naestablisar kan 1914. Nakaandam ini para sa simbag sa pamibi na itinokdo ni Jesus labi nang 1,900 na taon an nakaagi. An pamibing iyan idinolot sa Pundador kan Kahadean na iyan poon kan an saro na magigin Hade kan gobyernong iyan nagtokdo sa saiyang mga disipulo na mamibi para kaini. Kaya an Autor kan Kahadean na iyan haloy nang naghihinanyog sa kahagadan para kaiyan. Naogma siang naghinanyog sa pamibi na idinolot sa saiya kan saiyang mga saksi sa daga durante kan gabos na panahon na iyan, huli ta ini nagdemonstrar na nagdanay sinda sa saindang pagtubod na maabot an Kahadean na iyan. Dai sinda napapagal sa pagdolot kan pamibing iyan sa “Ama na nasa langit,” na garo baga iyan nagin sarong bagay na daan na sa sainda.—Mateo 6:9, 10.
14. Taano ta an mga Saksi ni Jehova mapirit sa paghuhulit kan maogmang bareta nin Kahadean?
14 Mantang nagtutubod an mga Saksi ni Jehova asin nagpahayag na an Kahadean naestablisar na sa langit kan 1914, nagmamaigot sinda sa paghuhulit kan maogmang baretang ini kan Kahadean. Ginigibo ninda ini huli ta an naestablisar nang Kahadean dai pa biyong minakapot kan lubos na pamamahala sa daga kundi nagtogot pa sa mga kahadean kan kinaban na ini na padagos na magkapot kan saindang kapangyarihan asin autoridad sa gabos na tribo asin rasa nin katawohan. (Roma 13:1) Kaipuhan kun siring na iyan dumatong sa lubos na sentido, an boot sabihon, sa kamugtakan na iyan an esklusibong gobyerno na namamahala sa bilog na daga.—Daniel 2:44.
15. Ano an nangyayari poon kan Pentecostes 33 C.E. na mas dakula kisa kan lahidan an mga hade kan Israel?
15 Minsan ngani nombrado bilang an Hade kan Kahadean na iyan, si Jesus dai mamamahala na sia sana. Si Jehova Dios nagnombra nin 144,000 na parasunod kan saiyang mamamahalang Aki tanganing magin kairibang mga paramana kan Mesiyanikong Kahadean nin Dios. (Daniel 7:27) Kun paano na an mga hade sa suanoy na Israel linahidan nin banal na panlahid na lana kan halangkaw na saserdote, siring man poon kan Pentecostes 33 C.E., linahidan ni Jehova an 144,000 na kairibang paramana ni Jesu-Cristo kan Saiyang banal na espiritu, na pinaniaki sinda pasiring sa espirituwal na buhay sa langit kairiba kan “Hade nin mga hade asin Kagurangnan nin mga kagurangnan.”—Kapahayagan 19:16; ikomparar an 1 Hade 1:39.
An Paraiso Ibabalik Liwat “kan Huring Adan”
16. Ano an paglaom sa ngapit para sa Kahadean kan ipinako si Jesus, alagad taano ta dai sia nagin sarong parabalangibog nin salang mga bareta?
16 Sa pagpako ki Jesus kan 33 C.E., garo masakit isipon na sia magkaigwa nin sarong kahadean. Alagad sa saiyang paghuhulit kan Kahadean nin Dios, dai sia nagin parabalangibog nin salang bareta. Kan ikatolong aldaw pagkalihis kan saiyang pagkapako, sinierto kan Pundador kan Kahadean na an mga disipulo ni Jesus dai nagdodolot nin pamibi para sa sarong gobyerno na bakong posible. Binuhay liwat ni Jehova an Saro na magrerepresentar sa Saiya sa ipinamibing Kahadean asin ginubingan sia nin inmortalidad.
17, 18. (a) Ano an kahalagahan sa pag-apod ki Jesus bilang “an huring Adan”? (b) Ano an ipinaheling kan mga pangyayari sa kinaban poon kan 1914?
17 Aram ni Jesus na an Kaglalang kan enot na Paraiso sa daga magbubugtak sa saiya kan katongdan na bagohon liwat an Paraiso asin siertohon na panoon nin tawo an panglobong hardin. Sa 1 Corinto 15:45, 47, satong mababasa: “Nasusurat pa ngani: ‘An enot na tawong si Adan nagin buhay na kalag.’ An huring Adan nagin espiritung nagtatao nin buhay. An enot na tawo hale sa daga asin ginibo sa kabokabo; an ikaduwang tawo hale sa langit.” An ikaduwang Adan naghilig hale sa langit asin sia an saro na inasignar ni Jehova tanganing establisaron liwat an Paraiso digdi sa daga. Sa basihan na ini itinaram nin Kagurangnan na si Jesus sa may simpatiya na paragibo nin maraot: “Ika makakaibahan ko sa Paraiso.” (Lucas 23:43) Sa pag-oolay na ini malinaw liwat na an Paraiso eestablisaron sa daga sa pagsakop kan Kahadean nin langit sa mga kamot kan pinamuraway na si Jesu-Cristo, “an huring Adan.”
18 An mga pangyayari sa kinaban poon kan 1914 minaoyon sa mga hula na itinaram ni Jesu-Cristo asin kun siring nagpapatunay na si Jesus nasa kapangyarihan na poon kaidto. Sa labi sa pitong dekada na ngonyan, an mga tawo sa ika-20 siglong kapag-arakian na nabubuhay poon kan 1914 nakaeksperyensia kan kaotoban nin mga pangyayari na nakalista sa hula ni Jesus na manonompongan sa Mateo kapitulo 24. Kun siring, an lawig nin panahon na ini naghaharani na sa katapusan kaini, na harani na an pagbabalik liwat kan Paraiso sa daga.—Mateo 24:32-35; ikomparar an Salmo 90:10.
An Sarong Nakapupukaw sa Pusong Bagong Kinaban Harani Na
19, 20. (a) Pakatapos kan Armagedon, sa ano dadarahon ni Jehova an mga namomoot sa saiya? (b) Ano an maninigong gibohon tolos pakatapos kan Armagedon?
19 Bakong nakalalangkag, nakauuyam na sistema nin mga bagay an iiintrodusir ni Jehova sa mga namomoot sa saiya pakatapos niang ibindikar sa paaging dai mapagdududahan an saiyang pan-unibersong soberaniya sa ralaban nin Armagedon. An maabot na kapanahonan para sa pamilya nin tawo sa marahay na pagsakop kan Mesiyanikong Hade, si Jesus, na Aki nin Dios, magigin nanggad saro na nakapupukaw nin boot. O, kadakol nanggad an kaipuhan na gibohon sa kapakipakinabang na paagi! An ano man asin an gabos na nawalat na depekto sa ibabaw nin daga huli sa panbilog na globong ralaban sa pag-oltanan nin langitnon na hukbo ni Jehova asin kan inorganisar na puwersa nin karatan hahaleon. Mayong gira an matatada.
20 Alagad ano an manongod sa mawawalat na gamit sa ralaban kan mga nasyon? Huli sa simbolikong pagladawan kan lawig nin panahon na kaipuhan tanganing haleon an masusulong mga kabtang kaiyan, an bilang magigin dakulaon. (Ezequiel 39:8-10) An mga makaliligtas sa Armagedon puwedeng bagohon an mga materyales nin ano man na natatadang kasangkapan sa ralaban kan mga nasyon para sa kapakipakinabang na mga katuyohan.—Isaias 2:2-4.
21. Kaagid kan eksperyensia kan mga nakaligtas sa Baha, anong kamugtakan an mapapaatubang sa mga nakaligtas sa Armagedon, alagad igwa nin anong dakulang kalaenan?
21 An benendisyonan na modernong mga kaagid ni Noe asin nin saiyang pamilya bilang milagrosong mga nakaligtas sa panglobong Delubyo maatubang sa daganon na kamugtakan na kaagid sa nanompongan kan pamilya ni Noe. Alagad, si Satanas na Diablo asin an saiyang mga puwersa nin demonyo dai na magdadamat sa dai naheheling na kalangitan na nakapalibot sa daga kundi lubos na popogolon sa laog nin sampulong siglo. (Kapahayagan 20:1-3) An mga makaliligtas sa Armagedon magkakaigwa nin mapan-angat na gibohon nin pagsakop sa sarong daga na nakaligtas “sa dakulang aldaw nin Dios na Makakamhan sa gabos,” na maatubang sa ano man na epekto na iwawalat kaini sa planetang ini.—Kapahayagan 16:14.
22. Ano an magigin reaksion kan mga nakaligtas sa Armagedon sa angat nin pagpapahiwas kan Paraiso sa bilog na daga?
22 Sadit sa bilang, an mga makaliligtas na ini sa ralaban nin Armagedon ordinaryo sanang laoman na matatakot nanggad kun asignaran kan dakulang gibohon na pahiwason an Paraiso sa bilog na daga. Alagad al kontraryo, lubos na napukaw an boot, magibo sinda nin mapuso asin masinunod na pagpoon kaini. Lubos nindang narealisar na an dagang ini iyo an simbolikong tongtongan nin Dios, asin odok nindang mawot na an kinabanon na ronang ini bagohon na magin sarong lugar nin pan-akit asin kagayonan na angay na an saiyang mga bitis magpahingalo digdi.
23. Magkakaigwa nin anong pagtabang an mga nakaligtas sa Armagedon bilang kasegurohan na an saindang gibohon na pagbalik kan Paraiso magigin mapanggana?
23 Makaoogma asin nakapagpapakosog na maaraman na dai sinda babayaan na sinda sana asin mayo nin tabang pakatapos na gibohon an magayagayang paglilingkod na ini bilang kaotoban kan banal na pagboot manongod sa daga. (Ikomparar an Isaias 65:17, 21-24.) Magkakaigwa sinda kan lubos, mayong limiteng pagtabang kan Saro na nanuga kan Paraiso na ibinalik asin nagsabi kan aldaw nin saiyang pagsakat sa langit: “An gabos na kapangyarihan sa langit asin sa daga itinao na sa sako.” (Mateo 28:18) Sadiri pa man nia an kapangyarihan na iyan, asin kaya niang otobon an pambihirang panuga nia sa may simpatiyang paragibo nin maraot, siring kan satong maheheling sa masunod na artikulo.
[Nota sa Ibaba]
a Para sa detalye, helingon an librong “Let Your Kingdom Come,” na ipinublikar kan Watchtower Bible and Tract Society of New York, Inc., pahina 135-9. Helingon man an Ezequiel 21:27.
Mga Hapot sa Repaso
◻ Ano an siniseguro para sa katawohan asin sa sarong kriminal kan panuga ni Jesus sa Kalbaryo?
◻ Ano an pundamental sa pagbubukas kan dalan pabalik sa Paraiso?
◻ Ano an dai nagibo kan enot na Adan, alagad ano an gigibohon kan “huring Adan”?
◻ Pakatapos kan Armagedon, sa anong klaseng sistema nin mga bagay dadarahon ni Jehova an mga namomoot sa saiya?
[Ritrato sa pahina 13]
An artikulong “End of All Kingdoms in 1914” naglataw sa “The World Magazine” kan Agosto 30, 1914