Saen Ninda Kinukua an Saindang Kosog?
KUN maingat nindong mamasdan an kulagbaw sa retratong ini, maheheling nindo na an saro sa apat na pakpak kaiyan biyong daing serbi. Pero, an kulagbaw padagos na nagkakakan asin naglalayog. Ini bakong pambihirang kaso. Naobserbaran na an mga kulagbaw nagpapadagos sa saindang aroaldaw na aktibidad na mayo na an 70 porsiento kan saindang pakpak.
Sa kaagid na paagi, dakol na tawo an nagpapaheling nin desididong espiritu. Sa ibong nin makuring pisikal o emosyonal na mga problema, dai sinda minasuko.—Ikomparar an 2 Corinto 4:16.
Si apostol Pablo personal na nagtagal nin grabeng mga kasakitan durante kan saiyang mga biahe sa pagmimisyonero. Sia hinampak, pinakol, ginapo, asin ibinilanggo. Dugang pa, nagkaigwa sia nin sarong klase nin kamatean, na posibleng problema sa saiyang mga mata, na permanenteng “tonok sa laman” para sa saiya.—2 Corinto 12:7-9; Galacia 4:15.
An sarong Kristianong magurang sa kongregasyon na an ngaran David, na nakilaban sa makuring mga atake nin depresyon sa laog nin nagkapirang taon, nagtutubod na an kosog ni Jehova mahalagang marhay sa saiyang pagrahay. “Dakol na beses, an pagrahay na masakit na makamtan garo baga nawawara,” an paliwanag nia. “Sa atubangan nin siring na panluluya nin boot, lubos akong nanarig ki Jehova, asin tunay na sinusteniran nia ako. May mga okasyon na dakol na oras akong namimibi. Kun nakikipag-olay ako ki Jehova, an sakong mga pakamate nin kapungawan asin kadaihan nin serbi nawawara. Linabanan ko an mga panahon nin makuring kaluyahan, alagad salamat ki Jehova, hale sa kaluyahan na ini nag-abot an kosog—pati an kosog sa pagtabang sa iba.”
Pinakosog ni Jehova Dios si Pablo. Kun siring, sia nakasabi: “Kun ako maluya, dangan ako makosog.” (2 Corinto 12:10) Iyo, an mga kaluyahan ni Pablo tinokdoan sia na manarig sa kosog na itinatao nin Dios. “Igwa ako kan kosog para sa gabos na bagay huli sa saiya na nagtatao nin kapangyarihan sa sako,” an sabi kan apostol. (Filipos 4:13) Tunay nanggad na tinatawan ni Jehova nin kapangyarihan an saiyang mga lingkod.