Pakanood sa Nakaaging mga Sala
AN MGA ley sa moral kan satong Kaglalang daing sagkod asin dai mababago. Sa dahelan na ini an prinsipyo na manonompongan sa Galacia 6:7 aplikado ngonyan: “Ano man an itinatanom nin tawo, ini man an saiyang aanihon.” Totoo, tibaad deharan nin sarong indibiduwal an pagigin may paninimbagan sa Dios, alagad an reglamento nin Dios dai naliliwat. Sa katapustapusi, daing tawo na libre sa mga resulta kan saiyang gawe-gawe.
Kumusta an sarong tawo na namumuhay sa kasumbikalan dangan magbago, na magin nang lingkod nin Dios? Tibaad kaipuhan pa man giraray niang mamatean an mga resulta kan saiyang nakaaging estilo nin pamumuhay. Minsan siring, ini dai nangangahulogan na dai pa sia pinatawad nin Dios. An pagsambay ni Hadeng David ki Bat-seba nagbunga nin dakol na kalamidad sa saiyang buhay. Dai nia ini nadulagan. Alagad sia nagsolsol, asin pinatawad sia nin Dios.—2 Samuel 12:13-19; 13:1-31.
Kamo daw pinanluyahan na nin boot kun kamo nakaeeksperyensia kan mga resulta nin nagibo nindong mga sala? Kun mamansayon sa tamang paagi, an pakamate nin pagbasol puedeng magpagirumdom sa sato na ‘magmaan na dai kita magkiling sa nakadadanyar.’ (Job 36:21) Iyo an pakamate nin pagbasol makatatabang sa sato na likayan na maotro an sala. Orog pa nganing kapakipakinabang, ginamit ni David an nagin eksperyensia nia sa kasalan na nakomiter nia tanganing pakinabangon bako sanang an saiyang sadiri kundi pati an iba. Sinabi nia: “Itotokdo ko sa mga paralapas an saimong mga dalan, tangani na an mga parakasala mismo bumalik sa saimo.”—Salmo 51:13.
[Mga retrato sa pahina 7]
Si David nakanood sa saiyang kasalan ki Bat-Seba