Magpadagos sa “Paggibo nin Karahayan”
1 Naggibo kamo nin karahayan kan kamo nagin lingkod ni Jehova Dios. Minsan siring, ngonyan an angat sa delikadong mga panahon na ini iyo an pagpadagos sa “paggibo nin karahayan.” (Gal. 6:9) Minsan ngani ini nagkakaipo nin totoong paghihingoa, kaya nindong gibohon iyan. Paano?
2 Kultibaron an Nasa Isip na Aktitud ni Jesus: Siring ki Jesus, matatagalan nindo an mga pagbalo kun kamo danay na nakapokus sa paglaom sa Kahadean. (Heb. 12:2, 3) Makasisierto kamo na namomotan kamo ni Jehova asin na gusto nia na kamo magin mapanggana. (2 Ped. 3:9) Ibugtak an lubos nindong tiwala sa saiya, na kompiado na tatabangan nia kamo. (1 Cor. 10:13) Magmaigot sa pamimibi, na hinahagad ki Jehova na tabangan kamo na makatagal. (Roma 12:12) Maggayagaya sa kombiksion na an pakatagal nindo mabunga nin aprobadong kamugtakan sa pagheling nin Dios. (Roma 5:3-5) An pagigin fiel nindo sa pagkultibar “kan kaparehong nasa isip na aktitud na yaon ki Cristo Jesus” matao sa saindo nin personal na satispaksion asin makapagagayagaya sa puso ni Jehova.—Roma 15:5; Tal. 27:11.
3 Magpadagos sa Paggibo kan Tama: Lubos na aprobetsaran an mga probisyon na ginibo ni Jehova para sa saiyang banwaan sa pagtabang sainda na padagos na gumibo nin karahayan. Papagdanayon an marahay na personal na kaugalean sa pagbasa kan Tataramon nin Dios asin pag-adal kan basado sa Biblia na mga publikasyon kan fiel asin may diskresion na grupong oripon. Fiel na mag-andam para sa, umatender, asin makikabtang sa gabos na pagtiripon kan kongregasyon. Bago asin pakatapos kan Kristianong mga pagtiripon, dayupot na makiasosyar sa saindong espirituwal na mga tugang na lalaki asin babae. Magbugtak nin realistikong mga pasohan para sa saindong ministeryo tanganing magkaigwa nin makahulogan na pakikikabtang sa paglilingkod sa langtad asin mapaoswag an saindong mga abilidad sa pag-atubang kan maogmang bareta sa iba.
4 Ini an paagi na kamo makapadadagos sa paggibo nin karahayan asin kadungan kaiyan makaeeksperyensia nin dakulang kagayagayahan. Mapadapit digdi, an sarong tugang na lalaki sa Italia nagsabi: “Pagkabanggi, asin pakapuli ko pakatapos nin sarong aldaw na paglilingkod ki Jehova, pagal ako, totoo iyan. Alagad maogma ako, asin nagpapasalamat ako ki Jehova huli sa pagtao sa sako nin kagayagayahan na dai kayang agawon nin siisay man.” Huli kaiyan, magpadagos sa paggibo nin karahayan, asin kamo man makaeeksperyensia nin dakulang kagayagayahan.