Pagpaheling nin Pagkamoot sa mga Nangangaipo
AN MGA Kristiano igwa kapwa kan obligasyon asin pribilehio na magpaheling nin pagkamoot sa saindang mga tugang na lalaki asin babae na nangangaipo. (1 Juan 3:17, 18) Nagsurat si apostol Pablo: “Gumibo kita nin marahay sa gabos, alagad orog na sa mga may relasyon sa sato sa pagtubod.” (Galacia 6:10) An sarong tugang na lalaki na naglilingkod ki Jehova sa laog nin haros apat nang dekada naeksperyensiahan sa dai pa sana nahahaloy an pagkamoot kan Kristianong kasararoan nin magturugang durante kan paghelang asin kasunod na pagkagadan kan saiyang agom. Sia nagsurat:
“Huling ako an nag-aataman sa sakong agom sa harong kan sia naghehelang, dai ako nakatrabaho nin sekular sa laog nin haros duwang bulan. Kanigoan an kaginhawahan ko kan an mga katood sa kongregasyon gikan sa boot na nagtabang sa samo! Nakaresibi kami nin dakol na regalong kuarta—‘na makatatabang sa dagdag na mga gastos,’ siring sa sinasabi kan kadungan na mga kard—na nakabayad sa bulanan na sangra, mga serbisyo publiko, asin iba pang mga gastos.
“Duwang semana bago magadan an sakong agom, an samong paraataman sa sirkito dinalaw kami na nakaparigon sa samong boot. Ipinadalan pa ngani nia an slides na dadalanon kan kongregasyon sa katapusan kan semana. Nadangog niamo an mga pagtiripon paagi sa telepono—kabale an mga pagtiripon bago lumuwas sa paglilingkod sa langtad na pinangenotan kan paraataman sa sirkito. Sa saro kaini, durungan na pinasasabi nia nin ‘kumusta’ sa sakong agom an gabos na presente para sa paglilingkod sa langtad. Sa siring, maski ngani napapasuway sia sa pisikal, nungka siang nakamate na nagsosolo.
“Mayo pang sarong oras pagkagadan nia, nasa harong ko na an haros gabos na kamagurangan. Labing sanggatos na tugang na lalaki asin babae an duminalaw kan aldaw man sanang idto. ‘Milagrosong’ nagkaigwa nin kakanon sa lamesa para sa gabos na presente. Dai ko kayang ponan na sabihon an gabos na regalo, kapahayagan nin pakikidamay, nakararangang mga tataramon, asin pamimibi para sa sako. Abaa kanakapakokosog kan mga iyan! Sa katapustapusi kinaipuhan kong pakiolayan an mga tugang na umontok na sa pagtao nin mga kakanon asin pagtabang sa paglinig sa harong!
“Saen pa daw apuera sa organisasyon ni Jehova kita makanonompong nin siring kadaing kapasloan na mga kapahayagan nin pakikidamay, pagmalasakit, asin pagkamoot? An kadaklan na tawo ngonyan mabibilang sana sa sarong kamot an tunay na mga katood ninda. Binendisyonan kita ni Jehova nin sarong dakulang ekstendidong pamilya nin espirituwal na mga tugang na lalaki asin babae!”—Marcos 10:29, 30.