Aprobetsaran Ining Daing Kaagid na Oportunidad!

SI Peter halangkaw nang marhay an inadalan sa medisina kan mapukaw an saiyang interes sa mensahe kan Biblia dapit sa kaligtasan. Kan sia maggraduwar asin magpoon bilang doktor sa sarong ospital, danay siang ineenkaminar kan mga superyor nia na mag-espesyalisar bilang neurosurgeon. Uya an sarong oportunidad na daing pag-alangan na aaprobetsaran nin dakol na bagong doktor.

Pero, nagdesisyon si Petera na palihison an oportunidad na ini. Taano? Mayo sana daw sia kan kinakaipuhan na ambisyon asin motibasyon? Dai, huli ta talagang maingat na hinorophorop ni Peter an alok. Pakatapos na magin dusay, bautisadong Saksi ni Jehova, minawot niang gamiton an pinakadakol na panahon na mapupuede sa laen-laen na aspekto kan Kristianong ministeryo. Oras na sia makualipikar bilang neurosurgeon, an rason nia, orog pang uuboson kan saiyang propesyon an saiyang panahon asin kosog. Mangmang daw sia na butasan an pambihirang oportunidad na ini, o sia daw madonong?

Para sa iba, an desisyon ni Peter tibaad garo mangmang. Minsan siring, kinonsiderar nia an mga teksto sa Biblia na arog kan Efeso 5:​15, 16. Dian dinagka ni apostol Pablo an mga kapwa Kristiano: “Magmaan kamong marhay na an saindong paglakaw bakong siring sa mangmang kundi siring sa mga madonong, na tinutubos an angay na panahon para sa saindo man sana, huli ta an mga aldaw maraot.”

Mangnoha tabi nindo an ekspresyon na “angay na panahon.” Trinadusir iyan sa Griegong termino na ginamit sa Biblia na sa kadaklan nanonongod sa sarong panahon o peryodo na igwa nin nagkapirang karakteristiko o angay para sa sarong espesipikong aktibidad. Idinoon digdi ni Pablo na an mga Kristiano maninigong tawan nin panahon an mahalagang mga bagay. Iyo nanggad, kaipuhan nindang ‘siertohon an orog na mahalagang mga bagay.’ (Filipos 1:10) Iyan pagbugtak sana nin mga ipaoorog.

Kaya, kun siring, ano an katuyohan nin Dios para sa satong panahon? Ano an kabotan nin Dios para duman sa mga namomoot sa saiya? Malinaw na ipinamimidbid kan mga hula sa Biblia an satong kaaldawan bilang “panahon kan katapusan,” o “huring mga aldaw.” (Daniel 12:4; 2 Timoteo 3:1) Lininaw ni Cristo Jesus kun ano an magigin pangenot na mahalaga para sa satong kaaldawan. Sinabi nia nin espesipiko na bago kan katapusan kan maraot na palakaw na ini nin mga bagay, “an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon.” Dangan sana madatong an katapusan.​—Mateo 24:​3, 14.

Kun siring, kaipuhan na aprobetsaran niato an lambang oportunidad na ihulit an maogmang bareta kan Kahadean asin gumibo nin mga disipulo. (Mateo 28:​19, 20) Mantang dai na ootrohon an mga aktibidad na ini, ini na an ultimong oportunidad na itao an bilog niatong makakaya sa nagliligtas-buhay na gibohon na ini. “Ngonyan na an panahon nin pag-ako.” Iyo nanggad, “ngonyan na an aldaw nin kaligtasan.”​—2 Corinto 6:2.

Paggibo nin Madonong na Desisyon

Si Peter​—na nasambitan sa enotan—​hinorophorop nin maingat an saiyang desisyon asin pinagturotimbang an saiyang diretsong pumili. Narealisar nia na bakong sala na sia mag-adal sa katuyohan na magin neurosurgeon. Alagad ano an pinakamahalaga para sa saiya? An saiyang aktibidad sa Kristianong ministeryo, na kinokonsiderar an pagkaapurado kan gibohon na ini. Kadungan kaiyan, may mga obligasyon siang dapat otobon. May agom sia asin kaipuhan niang sustentohan an saiyang agom, na nakikikabtang sa paghuhulit nin bilog na panahon. (1 Timoteo 5:8) Kaipuhan man na bayadan ni Peter an mga utang na ginastos sa saiyang edukasyon. Ano, kun siring, an nagin desisyon niang gibohon?

Si Peter nagdesisyon na mag-espesyalisar sa radyolohiya asin mag-eksamin paagi sa ultrasound. Ini magkakaipo nin normal na aldaw nin pagtrabaho. Aakoon man nia an pagsasanay sa saiya durante nin regular na mga oras nin trabaho. Iyo, tibaad ibilang ini nin iba na medyo menus na posisyon, alagad matao ini sa saiya nin mas dakol na panahon na ikadudusay sa espirituwal na mga aktibidad.

May saro pang nagin dahelan kan desisyon ni Peter. Minsan ngani dai man hinuhusgaran an iba na tibaad laen an nagin desisyon, aram nia na an mapalabot nin labi-labi sa sekular na mga bagay tunay na nagtatao nin peligro sa sarong Kristiano. Puedeng magpangyari iyan sa saiya na mapabayaan an espirituwal na mga paninimbagan. Iiniilustrar ini nin saro pang halimbawa na nakasentro sa trabaho.

An sarong bilog na panahon na parahulit kan Kahadean sarong tuodan na pintor. Nasusustentohan nia an saiyang sadiri paagi sa pagpabakal kan saiyang mga ipininta. Mantang idinudusay an kadaklan kan saiyang panahon sa pinakamahalagang Kristianong ministeryo, sa siring nasusustentohan nin tamang-tama sana an saiyang sadiri. Minsan siring, nagpoon na tumalubo an pagmawot na paoswagon pa an saiyang karera sa pagpinta. Sia orog pang napalabot sa pagpinta asin sa kinaban nin arte, binayaan nia an pambilog na panahon na ministeryo, asin sa katapustapusi nagin biyo nang bakong aktibo kun dapit sa aktibidad na paghuhulit kan Kahadean. Pag-abot nin panahon, napalabot sia sa bakong Makakasuratan na paggawe, na nagbunga kan saiyang pagigin bako nang kabtang kan Kristianong kongregasyon.​—1 Corinto 5:​11-13.

Espesyal an Satong Panahon

Bilang mga naglilingkod ngonyan ki Jehova, sierto na boot niatong magdanay na fiel sa saiya. Aram ta na kita nabubuhay na sa pinakapambihirang panahon sa kasaysayan nin tawo. Tanganing makapadagos sa paglilingkod sa Dios asin maatubang nin epektibo an mga kamugtakan sa presenteng aldaw, tibaad kaipuhan kitang gumibo nin laen-laen na mga pagliliwat. Ikakokomparar ta ini sa panahon nin pag-ani nin paraoma. Iyan panahon nin espesyal na aktibidad, na an mga trabahador sa oma linalaoman na magmamaigot nin orog pa kisa dati asin gumamit nin mas halawig na mga oras sa mga aldaw nin pagtrabaho. Taano? Huli ta an inani kaipuhan na matipon sa laog nin sarong limitadong peryodo nin panahon.

Limitadong marhay na panahon na sana an natatada para sa presenteng maraot na palakaw nin mga bagay. Ngonyan orog kisa kaidto, an sarong tunay na Kristiano kaipuhan na magmaigot na sunodon an halimbawa ni Jesus asin lumakaw sa saiyang mga lakad. An nagin buhay nia digdi sa daga malinaw na nagpaheling kun ano an pinakamahalaga para sa saiya. Sia nagsabi: “Gibohon niato an mga gibo nia na nagsugo sa sako mantang aldaw; nagdadangadang an banggi na mayo nin siisay man na makagigibo.” (Juan 9:4) Paagi sa pagsabi na nagdadangadang an banggi, an pinanonongdan ni Jesus iyo an panahon na sia bibistahon, ipapako, asin gagadanon, na an saiyang ministeryo sa daga matatapos asin dai na nia magigibo an mga gibo kan saiyang langitnon na Ama.

Totoo, durante kan saiyang tolo may kabangang taon na ministeryo, ginamit ni Jesus an saiyang panahon sa paggibo nin mga milagro asin sa pagpaomay sa mga may helang. Minsan siring, ginamit nia an kadaklan kan saiyang panahon na maghulit kan mensahe nin Kahadean asin “maghulit nin pagkabutas sa mga bihag” kan falsong relihion. (Lucas 4:18; Mateo 4:17) Si Jesus odok na naghingoa sa saiyang ministeryo asin nagtao man nin panahon na sanayon an saiyang mga disipulo tanganing madugangan ninda an pundasyon na saiya nang ibinugtak asin ikapadagos nin epektibo an paghuhulit. Inaprobetsaran ni Jesus an gabos na oportunidad na paoswagon an intereses kan Kahadean asin boot nia na iyan man an gibohon kan saiyang mga disipulo.​—Mateo 5:​14-​16; Juan 8:​12.

Arog ni Jesus, kita na saiyang mga parasunod sa modernong aldaw kaipuhan na mansayon an situwasyon kan katawohan nin siring sa pagmansay ni Jehova Dios. Nauubos na an panahon para sa palakaw na ini nin mga bagay, asin may pagkaherak na minamawot nin Dios na an gabos magkaoportunidad na kamtan an kaligtasan. (2 Pedro 3:9) Kun siring, bako daw na madonong na gibohon an gabos na iba pang aktibidad na panduwa sa paggibo kan kabotan ni Jehova? (Mateo 6:​25-​33) Nangorogna durante nin espesyal na panahon na arog kaini, an sarong bagay na normal nang ibibilang na mahalaga tibaad magin mas dikit an halaga sa satong buhay bilang mga Kristiano.

Igwa daw nin siisay man sa sato na pagbabasolan an pag-enot sa satong buhay kan kabotan nin Dios? Dai nanggad, huli ta an Kristianong dalan nin pagsakripisyo sa sadiri kapakipakinabang sa makangangalas na paagi. Halimbawa, sinabihan ni Jesus an saiyang mga disipulo: “Sa katotoohan ako nagsasabi sa saindo, Dai nin siisay man na nagbaya sa harong o mga tugang na lalaki o mga tugang na babae o ina o ama o mga aki o mga oma huli sa sako asin huli sa maogmang bareta na dai magkakamit nin mananggatos ngonyan sa panahon na ini, mga harong asin mga tugang na lalaki asin mga tugang na babae asin mga ina asin mga aki patin mga oma, na may mga paglamag, asin sa madatong na palakaw nin mga bagay buhay na daing katapusan.”​—Marcos 10:​29, 30.

Dai kaya nin siisay man na timbangan nin kuarta an mga balos na nakakamtan kan mga naggagamit kan saindang panahon na omawon si Jehova asin ibalangibog an mensahe nin Kahadean. Kadakol na bendisyon an nakakamtan ninda! Kabale digdi an tunay na mga katood, satispaksion sa paggibo kan kabotan nin Dios, huyom nin pag-oyon nin Dios, asin an paglaom na buhay na daing katapusan. (Kapahayagan 21:​3, 4) Asin kanigoan na bendisyon na tabangan an mga tawo sa espirituwal asin tawan nin onra an banal na ngaran ni Jehova bilang saiyang mga Saksi! Daing duwa-duwa, an ‘pagtubos sa angay na panahon’ tunay nanggad na madonong asin kapakipakinabang. Orog kisa kaidto ngonyan na an panahon na makikabtang sa pagpahayag kan maogmang bareta kan Kahadean nin Dios. Kamo daw maaprobetsar kan asin magdadanay sa daing kaagid na oportunidad na ini?

[Nota sa Ibaba]