Si Jehova sarong Diyos nin pagigin areglado. (1 Corinto 14:33) Kaya aasahan ta na magigin organisado man an saiyang mga lingkod. Paano an pagkaorganisar sa Kristiyanong kongregasyon? Paano kita makakatabang sa pagigin organisado kaiyan?

1. Siisay an payo kan kongregasyon?

“An Cristo iyo an payo kan kongregasyon.” (Efeso 5:23) Hali sa langit, si Jesus an nanginginot sa pag-asikaso kan mga aktibidad kan mga lingkod ni Jehova sa bilog na kinaban. Ninombrahan niya “an maimbod asin mapagmansay na uripon”—sarong sadit na grupo nin eksperyensiyadong mga elder na inaapod man na Namamahalang Grupo. (Basahon an Mateo 24:45-47.) Arog kan mga apostol asin mga elder sa Jerusalem kan inot na siglo, an Namamahalang Grupo nagtatao nin instruksiyon sa mga kongregasyon sa bilog na kinaban. (Gibo 15:2) Pero bako sinda an mga lider kan organisasyon mi. Nagpapagiya sinda ki Jehova asin sa saiyang Tataramon, saka nagpapasakop sinda sa pagkapayo ni Jesus.

2. Ano an papel kan mga elder?

An mga elder maimbod na mga Kristiyanong lalaki na dakul nang taon na naglilingkod. Nagtutukdo sinda sa mga lingkod ni Jehova gamit an Bibliya asin nagtatabang saka nagpapakusog sa sainda. Mayo sindang suweldo sa paglilingkod ninda. Imbes, naglilingkod sinda nin “gikan sa buot sa atubangan nin Diyos; bakong dahil sa pagkamuot sa materyal na pakinabang, kundi dahil gustong-gusto [ninda].” (1 Pedro 5:1, 2) Nagtatabang sa mga elder an mga ministeryal na lingkod. Asin pag-abot nin panahon, puwedeng magin mga elder man an mga ministeryal na lingkod na nakakaabot sa mga kahagadan.

Nagnonombra an Namamahalang Grupo nin nagkapirang elder para magin mga paraataman nin sirkito. An mga paraataman na ini nagbibisita sa mga kongregasyon para magtao nin mga instruksiyon saka pampakusog. Nagnonombra sinda nin mga brother na nakakaabot sa mga kahagadan kan Bibliya para maglingkod bilang elder o ministeryal na lingkod.—1 Timoteo 3:1-10, 12; Tito 1:5-9.

3. Ano an papel kan lambang Saksi sa kongregasyon?

An gabos sa kongregasyon ‘inuumaw an pangaran ni Jehova’ paagi sa pagpartisipar sa mga pagtiripon saka sa ministeryo uyon sa kamugtakan ninda.—Basahon an Salmo 148:12, 13.

ARAMON PA

4. Si Jesus sarong mabuot na lider

May marahayon na imbitasyon sato si Jesus. Basahon an Mateo 11:28-30, dangan pag-ulayan an hapot na ini:

• Ano an gusto ni Jesus na mamatian ta sa panginginot niya?

VIDEO: Pagresponde kan mga Elder sa Linog sa Nepal (4:56)

Malinaw an sinasabi kan Bibliya kun ano an dapat gibuhon kan mga elder.

Basahon an Isaias 32:2 asin 1 Pedro 5:1-3, dangan pag-ulayan an mga hapot na ini:

• Ano an namamatian mo sa paghihinguwa kan mga elder na arugon si Jesus para mapaginhawa an iba?

• Sa anong iba pang paagi inaarog kan mga elder si Jesus?

5. An mga elder nagpapahiling nin marahay na halimbawa

VIDEO: Mga Elder—Manginot Kamo! (7:39)

Nagtao si Jesus nin pamantayan para sa mga nanginginot sa kongregasyon. Basahon an Mateo 23:8-12, dangan pag-ulayan an mga hapot na ini:

• Ano an pamantayan kan Bibliya para sa mga elder? Sa hiling mo, sinusunod daw kan mga lider nin relihiyon an sinasabi kan Bibliya?

1. Pinapagdanay kan mga elder na makusog an espirituwalidad ninda saka kan saindang pamilya

2. Inaataman kan mga elder an gabos sa kongregasyon

3. Regular na naghuhulit an mga elder

4. An mga elder paratukdo. Nagtatabang man sinda sa paglinig saka sa iba pang gibuhon

6. Masusuportaran ta an mga elder

Nagtatao an Bibliya nin sarong importanteng dahilan kun taano ta dapat tang suportaran an mga elder. Basahon an Hebreo 13:17, dangan pag-ulayan an mga hapot na ini:

• Rasonable daw an pagdagka sa sato kan Bibliya na magin masinunod asin mapagpasakop sa mga nanginginot sa sato? Taano ta nasabi mo iyan?

Basahon an Lucas 16:10, dangan pag-ulayan an hapot na ini:

• Taano ta mahalagang magsunod pirmi sa mga elder dawa sa garo baga saradit na bagay?

SUMARYO

Si Jesus an payo kan kongregasyon. An mga elder nagpapasakop saiya, asin maugma kitang nagsusuportar sainda huling pinapaginhawa ninda kita asin tinutukduan paagi sa saindang halimbawa.

Rebyu

• Siisay an payo kan kongregasyon?

• Paano tinatabangan kan mga elder an kongregasyon?

• Ano an papel kan lambang parasamba ni Jehova?

HILINGON MAN

Hilingon an patunay na talagang nagmamalasakit sa mga Kristiyano ngunyan an Namamahalang Grupo saka an iba pang mga elder.

Pagpakusog sa mga Tugang sa Panahon nin Pagbabawal (4:22)

Aramon an mga ginigibo kan mga paraataman nin sirkito.

An Buhay kan Paraataman nin Sirkito sa Lugar na Harayo sa Siyudad (4:51)

Basahon an manungod sa papel kan mga babayi sa laog kan kongregasyon.

“May mga Babaing Ministro ba ang mga Saksi ni Jehova?” (Ang Bantayan, Setyembre 1, 2012)

Aramon an paghihinguwa kan mga elder para pakusugon an saindang mga kapagtubod.

“Mga Elder—‘Mga Kapwa Trabahador Para sa Satong Kagayagayahan’” (An Torrengbantayan, Enero 15, 2013)

1. Ano an sinasabi kan Bibliya na dapat gibuhon kan mga agom na lalaki?

Itinao ni Jehova sa agom na lalaki an responsabilidad na magin payo kan pamilya. (Basahon an Efeso 5:23.) Inaasahan sa saiya ni Jehova na magibo siya nin mga desisyon na para sa ikakarahay kan saiyang pamilya. Sinasabi kan Bibliya sa mga agom na lalaki: “Padagos na mamutan an saindong mga agom.” (Efeso 5:25) Ano an buot sabihon kaiyan? An sarong mamumuton na agom na lalaki mabuot na tinatrato an saiyang agom, sa harong man o sa publiko. Pinoprotektaran niya an saiyang agom asin ginigibo an saiyang pinakamakakaya para maitao an pisikal asin emosyonal na pangangaipo kaini. (1 Timoteo 5:8) An pinakaimportante, tinatabangan niya an saiyang agom na magin dayupot ki Jehova. (Mateo 4:4) Halimbawa, puwede siyang mamibi o magbasa nin Bibliya kaiba kan saiyang agom. Pag mamumuton na inaasikaso kan agom na lalaki an saiyang agom, padagos siyang nagigin amigo ni Jehova.—Basahon an 1 Pedro 3:7.

Si Jesus an Payo kan Kristiyanong kongregasyon. (Efeso 5:23) Mantang nasa langit, ginigiyahan ngunyan ni Jesus an saiyang mga parasunod digdi sa daga paagi sa sarong “maimbod asin mapagmansay na uripon.” (Basahon an Mateo 24:45.) Si Jesu-Cristo mismo an nagnombra sa “uripon” asin tinawan iyan nin deretso na gumibo nin partikular na mga desisyon. Pero dapat man giraray na magsunod ki Cristo an uripon na iyan asin paglingkudan an mga tugang ni Cristo. Siisay an uripon na iyan? Paano kita inaataman kan uripon?