13. Anong mga prinsipyo sa Biblia an makakatabang sa mga agom na babae?

¹³ An Biblia igwa man nin mga prinsipyo na makakatabang sa mga agom na babae. An Efeso 5:22-24, 33 nagsasabi: “Magpasakop an mga agom na babae sa saindang agom na lalaki nin siring sa Kagurangnan, huli ta an agom na lalaki iyo an payo kan saiyang agom na babae kun paanong si Cristo iyo man an payo kan kongregasyon, mantang sia an paraligtas kan hawak na ini. Sa katunayan, kun paanong an kongregasyon nagpapasakop ki Cristo, siring man an mga agom na babae sa saindang agom na lalaki sa gabos na bagay. . . . An agom na babae maninigong magkaigwa nin hararom na paggalang sa saiyang agom.”

15. Ano an nagkapira sa mga hatol kan Biblia para sa mga agom na babae?

¹⁵ Sinabi man ni Pablo na an agom na babae “maninigong magkaigwa nin hararom na paggalang sa saiyang agom.” An Kristianang agom maninigong magpaheling nin “toninong asin mahoyong espiritu,” na dai nakikidiskutir nin may pagkaarogante sa saiyang agom o nagsasadiri man nin desisyon. (1 Pedro 3:4) An diosnon na agom na babae nagmamaigot na marhay para sa ikakarahay kan pamilya asin nagtatao nin onra sa saiyang payo. (Tito 2:4, 5) Maghihingoa siang magtaram nin marahay dapit sa saiyang agom asin sa siring dai magibo nin ano man na mapangyari sa lalaki na dai igalang nin iba. Sia magmamaigot man na marhay tanganing magin mapanggana an mga desisyon kan saiyang agom na lalaki.—Talinhaga 14:1.

16. Ano an manonodan kan Kristianang mga agom sa halimbawa ni Sara asin Rebeca?

¹⁶ An pagkaigwa nin toninong asin mahoyong espiritu dai nangangahulogan na an sarong Kristiana mayo nin mga opinyon o na bakong mahalaga an saiyang iniisip. An diosnon na mga babae kan suanoy, arog ni Sara asin Rebeca, dai nag-alangan na ipahayag an saindang ikinakapurisaw manongod sa mga bagay-bagay, asin an rekord sa Biblia nagpapaheling na inoyonan ni Jehova an saindang ginibo. (Genesis 21:8-12; 27:46–28:4) Puede man na ipaaram kan Kristianang mga agom an saindang mga saboot. Minsan siring, maninigo nindang gibohon iyan sa makonsiderasyon, bakong mapagmenos na paagi. Manonompongan ninda na an siring na pakikikomunikar sa lambang saro magigin mas kawiliwili asin epektibo.