Puede Kamong Umoswag sa Espirituwal

AN TUNAY na halaga puedeng depisil na marekonoser. Iyan an kamugtakan nin mga brilyante. Dawa ngani nagkikinang an nalinigan nang brilyante, an dai pa nalinigan na brilyante nagkikinang sana nin kadikit. Minsan siring, sa kalaoglaogi kan dai pa nalinigan na brilyante yaon an dai mapagdududahan na sarong magayon na mutya.

An mga Kristiano nakaaagid sa dakol na paagi sa dai pa nalinigan na mga brilyante. Minsan ngani harayoon pa kita sa pagkasangkap, kita igwa nanggad nin pundamental na halaga na pinahahalagahan na marhay ni Jehova. Siring sa mga brilyante, kita gabos igwa nin sadiring napapalaen na mga kualidad. Asin an kada saro sa sato puede pang orog na umoswag sa espirituwal kun iyan an satong odok sa pusong pagmawot. An satong pagkatawo puedeng linigon, tangani na iyan orog pang kuminang sa ikamumuraway ni Jehova.​—1 Corinto 10:31.

Pakatapos na sapsapon asin linigon, ibinubugtak an brilyante sa sarong montadura na nagpapagayon sa makinang na mga kualidad kaiyan. Kaagid kaiyan, puede kitang gamiton ni Jehova sa laen-laen na kamugtakan, o asignasyon, kun kita “magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.”​—Efeso 4:​20-24.

An siring na pag-oswag sa espirituwal tibaad dai basta na sana nangyayari, kun paano na an brilyante sa natural na kamugtakan kaiyan bihirang magkinang siring sa sarong mutya. Tibaad kaipuhan niatong haleon sa satong sadiri an sarong nagdadanay pang kaluyahan, liwaton an satong aktitud manongod sa pag-ako nin paninimbagan, o hingoahon pa ngani niatong humale sa espirituwal na kinaugalean. Alagad puede kitang umoswag kun talagang gusto niato, huling si Jehova Dios makapagtatao sa sato nin “kosog na lihis sa ordinaryo.”​—2 Corinto 4:7; Filipos 4:13.

Pinakokosog ni Jehova an Saiyang mga Lingkod

An pagsapsap sa mga brilyante nangangaipo nin kompiansa na minagikan sa tamang kaaraman, huling pakasapsap sa sarong kabtang nin dai pa nalinigan na brilyante, iyan sa parate nawawara na. An mahal na materyal​—na kun beses sagkod sa 50 porsiento kan dai pa nasasapsap na gapo—​kaipuhan na sapsapon tangani na magibo an gustong korte. Kita nangangaipo man nin kompiansa na minagikan sa tamang kaaraman tanganing makortehan an satong pagkatawo asin tanganing umoswag sa espirituwal. Nangorognang dapat kitang magkompiar na si Jehova tatawan kita nin kosog.

Minsan siring, tibaad makamate kitang may kulang, o maghona na kita dai nakagigibo nin orog pa. Kan nakaagi, an fiel na mga lingkod nin Dios kun beses nakamate man nin siring kaiyan. (Exodo 3:​11, 12; 1 Hade 19:​1-4) Kan asignaran nin Dios na magin “propeta sa mga nasyon,” si Jeremias nagkagsing: “Dai ako tataong magtaram, huli ta aki pa ako.” (Jeremias 1:​5, 6) Pero sa ibong kan saiyang pagduwaduwa, si Jeremias nagin sarong mapusong propeta na nagdara nin prangkang mga mensahe sa antipatikong banwaan. Paano ini nagin posible? Nakanood siang manarig ki Jehova. Kan huri nagsurat si Jeremias: “Maogma an pusog na lalaki na nananarig ki Jehova, asin na an nagin kompiansa iyo si Jehova.”​—Jeremias 17:​7; 20:11.

Ngonyan, pinakokosog man ni Jehova an mga nananarig sa saiya. Si Edward,a na ama nin apat na aki na maluway na nag-oswag sa espirituwal, nanompongan na totoo ini. Sia nagpapaliwanag: “Ako siyam na taon nang saro sa Mga Saksi ni Jehova, alagad garo baga dai ako nag-aabante sa espirituwal. An problema iyo na kakadikit an motibasyon ko asin mayo ako nin kompiansa. Pakabalyo sa España, napaasosyar ako sa sarong sadit na kongregasyon na saro sana an magurang sa kongregasyon asin sasaro an ministeryal na lingkod. Huli sa pangangaipo, hinagad sako kan magurang sa kongregasyon na mag-asikaso nin dakol na asignasyon. Nagtatakig ako mantang itinatao ko an kaenot-enote kong mga pahayag asin kabtang sa pagtiripon. Alagad ta nakanood akong manarig ki Jehova. Pirme akong kinokomendaran kan magurang sa kongregasyon asin sia nagtatao nin mataktikang mga suhestion para sa pag-oswag.

“Kadungan kaiyan, dinagdagan ko an sakong paglilingkod sa langtad asin orog pang pinangenotan sa espirituwal an sakong pamilya. Bilang resulta, nagkaigwa nin mas dakulang kahulogan an katotoohan sa bilog na pamilya, asin nakontento nanggad akong marhay. Saro na ako ngonyan na ministeryal na lingkod, asin naghihingoa akong marhay na pataluboon an mga kualidad nin sarong Kristianong paraataman.”

“Halea Nindo an Daan na Pagkatawo”

Siring kan narealisar ni Edward, an espirituwal na pag-oswag nagkakaipo nin pagtitiwala ki Jehova. An pagpatalubo kan arog-Cristong “bagong pagkatawo” kaipuhan man na marhay. Paano daw ini magigibo? An enot na tangga iyo na ‘haleon’ an mga karakteristiko na kabtang kan daan na pagkatawo. (Colosas 3:9, 10) Kun paano na an mga pagkabakong sangkap, siring baga kan bakong kabtang na mga mineral, kaipuhan na haleon sa dai pa nalinigan na brilyante tangani na iyan magin sarong nagkikinang na mutya, an mga aktitud “na nanonongod sa kinaban” kaipuhan man na haleon tanganing an satong bagong pagkatawo kuminang.​—Galacia 4:3.

An saro sa siring na aktitud iyo an pagduwaduwa na mag-ako nin paninimbagan huli sa takot na kadakol kan hahagadon sa sato. Totoo, an paninimbagan nangangahulogan nin trabaho, alagad iyan nakakokontentong trabaho. (Ikomparar an Gibo 20:35.) Inadmitir ni Pablo na an diosnon na debosyon naghahagad na kita ‘magpagal asin maghingoa.’ Maogma ta iyan na ginigibo, sia nagsasabi, “huli ta ibinugtak niato an satong paglaom sa nabubuhay na Dios,” saro na nungkang nakalilingaw sa ginigibo niato sa kapakanan kan satong mga kapwa Kristiano asin kan iba.​—1 Timoteo 4:​9, 10; Hebreo 6:10.

An nagkapirang brilyante nagkakaigwa nin “parteng matapo” sa panahon na iyan napoporma asin kaipuhan na kapotan nin maingat. Minsan siring, sa tabang nin sarong instrumento na inaapod polariscope, puedeng maheling kan paralinig an parteng matapo asin puedeng mapangganang magibo an mutya. Tibaad kita igwa nin parteng matapo sa laog niato, o kaluyahan sa pagkatawo, huli sa satong pinaghalean o makolog na eksperyensia. Ano an puede niatong gibohon? Enot, kaipuhan niatong admitiron sa satong sadiri an problema asin magdesisyon na pangganahan iyan sagkod sa mapupuede. Maninigo nanggad na ipahayag niato ki Jehova an ikinagagabat kan satong boot paagi sa pamibi, na posibleng naghahagad man nin espirituwal na tabang hale sa sarong Kristianong magurang sa kongregasyon.​—Salmo 55:​22; Santiago 5:​14, 15.

An siring na parteng matapo sa laog nakaapektar ki Nicholas. “Alkoholiko an sakong ama, asin sia an causa kan grabeng pagdusa mi kan sakong tugang na babae,” an paliwanag nia. “Kan pumondo ako sa pag-eskuela, uminayon ako sa hukbo, alagad dai nahaloy nagkaproblema ako huli sa sakong rebeldeng tendensia. Ibinilanggo ako kan mga autoridad sa hukbo huli sa pagpabakal nin droga, asin sa saro pang okasyon naghale ako na daing paaram. Sa katapustapusi, huminale ako sa hukbo, alagad ta nagkaproblema pa man giraray ako. Maski ngani an sakong buhay pano nin problema huli sa pag-abuso sa droga asin sobrang pag-inom, nagkainteres ako sa Biblia asin naghimuyawot na magkaigwa nin katuyohan sa buhay. Pag-abot nin panahon, nakaolay ko an Mga Saksi ni Jehova, liniwat an sakong buhay, asin inako an katotoohan.

“Minsan siring, nagkaipo nin dakol na taon bago ko naako an diperensia sa sakong pagkatawo. Makosog an sakong pagkauyam sa autoridad asin naaanggot ako kun tinatawan nin hatol. Dawa ngani boot kong gamiton ako nin lubos ni Jehova, inoolang ako kan kaluyahan na ini. Sa katapustapusi, sa tabang nin duwang mapagsabot na kamagurangan, inadmitir ko an sakong problema asin nagpoon na iaplikar an saindang mamomoton na sadol gikan sa Kasuratan. Maski ngani paminsanminsan bigla pang nagkakaigwa nin kadikit na paghinanakit, kontrolado ko na ngonyan an sakong rebeldeng naturalesa. Nagpapasalamat akong marhay sa mapasensiang paagi ni Jehova sa pagtratar sa sako asin sa mamomoton na tabang kan kamagurangan. Huli sa sakong pag-oswag sa espirituwal, ninombrahan ako sa dai pa sana nahahaloy bilang ministeryal na lingkod.”

Siring sa nadiskobre ni Nicholas, bakong pasil an pagliwat sa hararom nang nakagamot na mga aktitud. Tibaad kita mapaatubang sa kaagid na angat. Tibaad kita sobra kasensitibo. Tibaad kita nagpaparahinanakit, o tibaad sobra an pagdodoon niato sa independensia. Sa siring, an satong Kristianong pag-oswag puedeng magin limitado. An mga paralinig nin brilyante nakaeeksperyensia nin kaagid kaiyan sa mga gapo na inaapod nindang naats. Ini sa aktuwal duwang gapo na natunaw asin nagin saro kan napoporma an brilyante. Bilang resulta, an naats igwa nin duwang nagkakakontrahan na paagi nin pagtalubo na nagpapadepisil na gayo sa pagsapsap oyon sa naturalesa. Sa satong kamugtakan, nanonompongan niato an naturalesa kan espiritu nin pagigin gikan sa boot na nakikipaglaban tumang sa naturalesa kan bakong sangkap na laman. (Mateo 26:41; Galacia 5:17) Kun beses, tibaad may tendensia kitang biyo nang sumuko sa pakipagtusayan, na nangangatanosan na an mga pagkabakong sangkap sa satong pagkatawo bako man nganing importante. ‘Total,’ tibaad magsabi kita, ‘namomotan pa man giraray ako kan sakong pamilya asin mga katood.’

Minsan siring, tanganing mapaglingkodan niato an satong mga tugang asin mapamuraway an satong langitnon na Ama, kaipuhan kitang ‘magin bago sa puersa na nagpapahiro sa satong isip’ paagi sa pagsolog kan bagong pagkatawo. Kapakipakinabang an paghihingoa, siring kan mapatutunayan ni Nicholas asin kan dai mabilang na iba pa. An paralinig nin brilyante nakaaaram na an sarong depekto puedeng makaraot sa bilog na brilyante. Kaagid kaiyan, paagi sa pagpabaya sa sarong kaluyahan kan satong pagkatawo, puede niatong maraot an satong espirituwal na itsura. Mas maraot pa, an seryosong kaluyahan puedeng gumiya sa satong kapahamakan sa espirituwal.​—Talinhaga 8:33.

Siring sa “Laad” na Nasa Laog Niato

An paralinig nin brilyante naghihingoang maheling an laad na nasa laog kan brilyante. Ginigibo ini paagi sa pag-areglar sa mga kabtang tanganing maprodusir kaiyan an inaapod na garo hablondawani. Sa laog kan brilyante an laen-laen na kolor nin ilaw paorootrong nagrereplektar, na nagpoprodusir nin laad na nagpapakinang sa mga brilyante. Kaagid kaiyan, an espiritu nin Dios puedeng magin siring sa “laad” na nasa laog niato.​—1 Tesalonica 5:​19; Gibo 18:​25; Roma 12:11.

Alagad kumusta kun namamatean niato an pangangaipo na kita magin motibado sa espirituwal? Paano daw ini magigibo? Kaipuhan niatong ‘horophoropon an satong mga dalan.’ (Salmo 119:​59, 60) Kalabot digdi an pagmidbid sa mga bagay na nagpapaluway sa sato sa espirituwal dangan pagdeterminar kun arin na teokratikong mga aktibidad an kaipuhan na orog pa niatong pagmaigotan. Maparararom niato an espirituwal na pagpahalaga paagi sa regular na personal na pag-adal asin odok na pamibi. (Salmo 119:​18, 32; 143:​1, 5, 8, 10) Dugang pa, paagi sa pakikiasosyar sa mga nagmamaigot sa pagtubod, orog pa niatong mapakokosog an satong desisyon na maigot na paglingkodan si Jehova.​—Tito 2:14.

Si Louise, sarong hoben na Kristiana, nag-admitir: “Pinaghorophorop ko an regular na pagpapayunir sa laog nin duwang taon bago ako aktuwal na nagpalista bilang payunir, o bilog na panahon na parabalangibog kan Kahadean. Mayo nin nakapopogol sa sako, alagad pasil an sakong rutina, asin dai man lamang ako naghingoang makahale dian. Dangan biglang nagadan an sakong ama. Narealisar ko kun gurano kadelikado kan buhay asin na dai ko ginagamit sa pinakamarahay na paagi an sakong buhay. Kaya liniwat ko an sakong punto de vista sa espirituwal, dinagdagan an sakong paglilingkod, asin nagin sarong regular payunir. Partikularmenteng nakatabang sa bagay na ini an sakong espirituwal na mga tugang na lalaki asin babae na pirmeng nagsusuportar sa mga areglo sa paglilingkod sa langtad asin regular na nag-iiba sa sako sa ministeryo. Nanodan ko na baga man paborable o bako, pareho kan kairiba niato an satong mga pamantayan sa buhay asin pasohan.”

Garo Baga Pinatatarom Paagi sa Batbat

An mga brilyante iyo an pinakamatagas na kemikal na bagay na natural na napoporma digdi sa daga. Huli kaini, kaipuhan an sarong brilyante tangani na sapsapon an saro pa. Puedeng ipagirumdom kaini sa mga estudyante sa Biblia an talinhaga na nagsasabi: “Sa batbat, an batbat mismo minatarom. Kaya an tawo minapatarom sa lalauogon nin ibang tawo.” (Talinhaga 27:17) Paano an lalauogon nin saro “minatarom”? An sarong indibiduwal puedeng magin mapanggana sa pagpatarom kan intelektuwal asin espirituwal na kamugtakan nin saro, kun paano na an sarong pidaso nin batbat puedeng gamiton sa pagpatarom nin sarong tarom na gibo sa iyo man sanang metal. Halimbawa, kun kita namomondo nin makuri huli sa pagkadesganar, an pagparigon sa boot kan iba puedeng magin nakapakokosog na marhay. An satong kamondoan sa siring maliliwat para sa orog pang ikararahay, asin kita mapakokosog giraray para sa maigot na aktibidad. (Talinhaga 13:12) Nangorognang makatatabang an kamagurangan sa kongregasyon na mapatarom kita paagi sa pagtao nin Makakasuratan na pamparigon sa boot asin sadol para sa pag-oswag. Sinusunod ninda an prinsipyo na sinabi ni Salomon: “Tawe an madonong asin sia orog pang madonong. Tawe nin kaaraman an sarong matanos asin madakula pa an saiyang pakanood.”​—Talinhaga 9:9.

Siempre, nagkakaipo nin panahon an espirituwal na pagsasanay. Sa laog nin labing sampulong taon, ihiniras ni apostol Pablo ki Timoteo an saiyang eksperyensia asin mga paagi nin pagtokdo. (1 Corinto 4:​17; 1 Timoteo 4:​6, 16) An halawig na pagsasanay ni Moises ki Josue sa laog nin labing 40 taon pinakinabangan kan nasyon nin Israel sa haloy na panahon. (Josue 1:​1, 2; 24:​29, 31) Inibanan ni Eliseo si propeta Elias sa laog nin tibaad 6 na taon, na nag-aako nin marahay na pagsasanay para sa saiyang ministeryo na mga 60 taon an ilalawig. (1 Hade 19:​21; 2 Hade 3:11) Paagi sa mapasensiang pagtao nin padagos na pagsasanay, sinusunod kan kamagurangan an halimbawa ni Pablo, Moises, asin Elias.

An pagtaong komendasyon sarong mahalagang marhay na kabtang nin pagsasanay. An sinserong mga kapahayagan nin pag-apresyar para sa mga asignasyon na inasikasong marhay o para sa kaomaw-omaw na mga gibo puedeng magpahiro sa iba na booton na lubos pang paglingkodan an Dios. An komendasyon nagpapatalubo nin kompiansa na nakapagtatao man nin pan-enganyar na pangganahan an mga kaluyahan. (Ikomparar an 1 Corinto 11:2.) An pamparigon sa boot na umoswag sa katotoohan minagikan man sa pagigin sibot na marhay sa paghuhulit kan Kahadean asin iba pang mga aktibidad sa kongregasyon. (Gibo 18:5) Kun inaasignaran nin kamagurangan an mga tugang na lalaki nin paninimbagan sono sa saindang inoswag na sa espirituwal, ini nagtatao sa mga lalaking ini nin mahalagang eksperyensia asin posibleng mapakosog kan saindang pagmawot na padagos na umoswag sa espirituwal.​—Filipos 1:​8, 9.

Marahay na Dahelan sa Pag-oswag sa Espirituwal

Ibinibilang an mga brilyante na mahal na marhay. Totoo man iyan sa mga nakikiasosyar na ngonyan sa pambilog na kinaban na pamilya nin mga parasamba ki Jehova. Sa katunayan, an Dios mismo inaapod sinda na “kawiliwili,” o “mahal na marhay,” na mga bagay kan gabos na nasyon. (Haggeo 2:​7, nota sa ibaba) Kan nakaaging taon, 375,923 an nagin bautisadong Saksi ni Jehova. Tangani na maasikaso an pag-oswag na ini, kaipuhan na ‘pahiwason an tolda.’ Paagi sa pag-oswag sa espirituwal​—asin paagi sa paghihingoang maabot an mga pribilehio nin Kristianong paglilingkod—​posibleng magkaigwa kita nin kabtang sa pag-asikaso sa paghiwas na ini.​—Isaias 54:​2; 60:22.

Bakong arog sa mahal na marhay na mga brilyante na nakasaray sa mga kaha de yero nin bangko asin bihirang naheheling, an satong halaga sa espirituwal puedeng kuminang na marhay. Asin mantang regular na linilinig asin ipinaheheling niato an satong Kristianong mga kualidad, pinamumuraway niato si Jehova Dios. Pinakasadol ni Jesus an saiyang mga parasunod: “Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:16) Siertong tinatawan kita kaiyan nin marahay na dahelan na umoswag sa espirituwal.

[Nota sa ibaba]