“Dai Kamo Magmondo Siring kan Iba”
NARISA na daw nindo an garo baga pagkaruyong nin sarong burak pakatapos na tagalan an sarong bagyo? Sa sarong paagi iyan nakapahihirong helingon. Total, an biglang pag-oran posibleng nagpangyari sa dai mabilang na mga hayop asin tawo—orog pang marigon na mga linalang kisa sa arin man na burak—na humanap tolos-tolos nin masisirongan. Alagad, an burak nakatindog duman, nakagamot, na inaatubang an biyong kakurihan nin panahon. Ngonyan, yaon iyan na dai nadanyaran, nakaruyong pero dai nabari, na nagpapaheling nin kosog na kabaliktaran sa maluyang itsura kaiyan. Puwedeng maghorophorop kamo, mantang hinahangaan nindo iyan, kun ikababalik giraray kaiyan an kosog kaiyan asin ikatitingag giraray sa langit an magayon na payo kaiyan.
Kaparehong marhay iyan kan mga tawo. Sa maribok na mga panahon na ini, napapaatubang kita sa gabos na klaseng bagyo. Mga kadepisilan sa ekonomiya, depresyon, nagluluyang salud, pagkagadan nin sarong namomotan—an siring na mga unos inaatake kita gabos sa saro o sa ibang panahon, asin kun beses dai na niato malilikayan an mga iyan na siring sa sarong burak na dai puwedeng gaboton an sadiri asin humanap nin matatagoan. Nakakapahiro na maheling an mga indibiduwal na biyong maluya an itsura na nagpapaheling nin makangangalas na kosog asin nagtatagal nin siring na mga pag-atake. Paano ninda ginigibo iyan? Sa parate an liyabe iyo an pagtubod. An tugang ni Jesus sa ama na si Santiago nagsurat: “Nakakaaram kamo na kun an saindong pagtubod nakapanggagana sa pag-atubang sa siring na mga pagbalo, an resulta iyo an kakayahan na makatagal.”—Santiago 1:3, Today’s English Version.
An saro pang liyabe iyo an paglaom. Kun magadan an sarong namomotan, halimbawa, an paglaom puwedeng makatabang nin dakula sa mga nabayaan. Si apostol Pablo nagsurat sa mga Kristiano sa Tesalonica: “Habo mi na kamo daing pakaaram manongod sa mga natotorog sa kagadanan; tanganing dai kamo magmondo siring kan iba na dai nin paglaom.” (1 Tesalonica 4:13) Mantang siertong nagmomondo an mga Kristiano huli sa kagadanan, igwa nin kalaenan. Igwa sinda nin tamang kaaraman dapit sa kamugtakan kan mga gadan asin manongod sa paglaom na pagkabuhay liwat.—Juan 5:28, 29; Gibo 24:15.
An kaaraman na ini nagtatao sainda nin paglaom. Asin an paglaom na iyan, luway-luway man na hinahale an saindang kamondoan. Tinatabangan sinda kaiyan na makatagal, asin nin orog pa. Pag-abot nin panahon, siring sa burak pakatapos nin bagyo, puwede giraray nindang itingag an saindang payo gikan sa kamondoan asin makanompong nin kagayagayahan asin satispaksion sa buhay.