Responsableng Pag-aki sa Panahon na Ini kan Katapusan
“Nangangataman sa marahay na paagi sa mga aki.”—1 TIMOTEO 3:12.
1. Ano an natural na kamawotan nin kadaklan na babae, asin paano ini naririsa sa pagkaaki?
DAI maninigaran an kaogmahan sa pagkaigwa nin aki. Natural an pagmawot nin babae na mag-aki, minsan ngani iyan mas makosog sa pirang babae kisa iba. Sa dakol na nasyon sa Solnopan, an mga aking lalaki mas interesadong magkawat sa mekanikal na mga kawatan, mantang an mga aking babae sa kadaklan mas gusto an munyeka, na hinihingoa nin mga paragibo nin kawatan na magin pinakatunay sagkod sa mapupuwede. An dakol na aking babae daing ibang hinahalat kundi an panahon na an makukulkul ninda bako nang munyeka, kundi an sadiri nindang buhay, mahimbong, nakikiurak na omboy.
Mga Kaogmahan Asin Paninimbagan
2. Ano an maninigong magin pagkonsiderar nin mga magurang sa omboy na bagong mamundag, asin sinda dapat na andam na isaabaga an ano?
2 An responsableng pag-aki naghahagad sa mga magurang na konsideraron an bagong mamundag na omboy na bakong kawatan kundi linalang na an buhay asin ngapit paninimbagan ninda sa Kaglalang. Kun ilinuluwas ninda sa kinaban an sarong aki, an mga magurang kaipuhan na andam na pasanon an dakulang paninimbagan asin gumibo nin pagliwat oyon dian. Minapoon sinda sa 20 anyos na programa nin pagpakakan, paggubing, pag-ataman sa salud, asin pag-edukar, na dai masabi an magigin resulta.
3. Taano an Talinhaga 23:24, 25 ta ikaaaplikar sa dakol na Kristianong magurang?
3 Makaoogma, an kadakol na Kristianong magurang nakapagpadakula nin mga aki na nagin maimbod, dusay na mga lingkod ni Jehova. An iba naheling an saindang mga aki na magdakula asin lumaog sa bilog na panahon na paglilingkod bilang payunir, misyonero, o miembro kan pamilyang Bethel. Manongod sa siring na mga magurang talagang masasabi: “An ama kan matanos siertong maoogma; an nagigin ama nin madonong maggagayagaya man sa saiya. An saimong ama asin an saimong ina maggagayagaya, asin sia na nangaki sa saimo maoogma.”—Talinhaga 23:24, 25.
Mga Kakologan sa Boot nin mga Magurang
4, 5. (a) Ano an kahagadan kan Kasuratan sa kamagurangan asin ministeryal na lingkod na may mga aki? (b) Paano an ibang aki nagin “mga kasakitan” sa saindang ama?
4 Alagad bakong perming siring kaini an nangyayari, minsan sa kamagurangan sa kongregasyon na may mga aki. Si apostol Pablo nagsurat: “Kaya an paraataman maninigong magin dai nin kanawayan, agom nin sarong babae . . . sarong lalaki na nangangataman sa saiyang sadiring harong sa marahay na paagi, na an mga aki nasasakop sa lubos na kamayokodan; (ta kun an sarong lalaki dai tataong pangatamanan an saiyang sadiring harong, paano sia makapangangataman sa kongregasyon nin Dios?)” Idinugang ni Pablo: “An ministeryal na mga lingkod agom nin sarong babae, na nangangataman sa marahay na paagi sa mga aki asin sa saindang sadiring harong.”—1 Timoteo 3:2-5, 12.
5 Siyempre, an Kristianong kamagurangan asin ministeryal na mga lingkod dai mapaninimbag kun an saindang mga aki, kun nasa edad na, habo nang magpadagos na maglingkod ki Jehova. Alagad maninimbag nanggad sinda para sa saindang mga aking minor de edad asin sa mas matuang mga aki na kaiba pa ninda sa harong. May kamagurangan asin ministeryal na mga lingkod na nawaran nin mahalagang mga pribilehiyo sa paglilingkod huli ta sinda nagin pabaya o nagkulang na gayo sa pakaabot sa kahagadan kan Kasuratan na “nangangataman sa marahay na paagi sa mga aki asin sa saindang sadiring harong.” Para sa sainda, asin sa dakol pang iba, an saindang mga aki nagdara sa sainda nin mas dakol na kasakitan kisa kaogmahan. Parate nanggad na nagigin totoo an talinhaga: “An aking mangmang nangangahulogan nin mga kasakitan sa saiyang ama”!—Talinhaga 19:13.
Responsableng Pagkaama
6. Ano an maninigong ihapot nin Kristianong mga agom na lalaki sa sainda man sana?
6 An gabos na Kristianong agom na lalaki, baga man sinda may mga paninimbagan sa kongregasyon o mayo, maninigong konsideraron man an puwedeng magin epekto kan pag-ataman sa saradit na aki sa espirituwalidad kan saindang agom. Kun an agom na babae bakong makosog sa espirituwal, paano an sarong omboy, o nagkapirang omboy, makaaapektar sa saiyang personal na pag-adal asin mga oportunidad na makikabtang sa paghuhulit?
7. Ano an nangyari sa ibang Kristianong agom na babae, asin ano an parateng dahelan kan situwasyon na ini?
7 Permi daw na narerealisar nin mga agom na lalaki na an pag-ataman sa omboy o sadit na aki parateng nakaoolang sa saindang agom na lubos na makinabang sa Pag-adal sa Libro kan Kongregasyon, mga pagtiripon sa Kingdom Hall, mga pansirkitong asamblea, asin pandistritong kombension? An siring na situwasyon puwedeng lumawig nin pirang bulan, asin mga taon pa ngani, kun sunod-sunod an aki. Kanaturalan na nin mga bagay na an paninimbagan, sa bagay na ini, sa pangenot pinapasan kan ina, imbes na kan ama. Kun beses namamasdan na mantang an ibang Kristianong lalaki nag-ooswag sa espirituwal, sagkod na matawan nin mga pribilehiyo sa kongregasyon, an saindang agom minaluya sa espirituwal. Taano? Parate na an dahelan an saindang saradit na aki minaolang sa mga agom na babae sa pagkonsentrar sa pagtiripon, sa odok na pag-adal sa Biblia, o sa dakulang pakikikabtang sa paghuhulit. Masasabi daw na responsable an pagkaama kun iyan minatogot na mangyari an siring na mga situwasyon?
8. Paano an dakol na ama minatabang sa pag-asikaso sa mga aki, na may anong pakinabang sa saindang agom?
8 Marahay sana ta bako man na perming siring kaini an kamugtakan. An dakol na Kristianong ama ginigibo an bilog nindang makakaya na tumabang sa pag-asikaso sa mga aki. Ginigibo ninda an bilog nindang kabtang sa pag-asikaso na an saindang mga aki magdanay na pormal sa mga pagtiripon kan kongregasyon. Kun minahibi an omboy, o nagigin maringgaw an saindang aki, ilinuluwas ninda iyan para sa angay na disiplina. Taano man ta permi na sanang si nanay an dapat na may malaktawan sa mga kabtang kan pagtiripon? Sa harong, an makonsiderasyon na mga agom na lalaki tinatabangan an saindang agom sa mga trabaho sa harong asin sa pagpatorog sa mga aki tanganing an mag-agom makatukaw sa toninong na pagkonsentrar sa espirituwal na mga bagay.
9. Ano an nagpapatunay na an mga aki bako man na perming kaolangan?
9 Kun marahay an pagkaorganisar sa sarong kongregasyon, an hoben na mga ina na may mga omboy puwedeng makikabtang sa pag-auxiliary payunir. An iba regular payunir pa ngani. Kaya an mga aki bako man na perming kaolangan. An dakol na Kristianong magurang nagpapaheling nin marahay na espiritu nin pagpapayunir.
Daing Aki Pero Maogma
10. Ano an nagin desisyon nin ibang mag-agom, asin paano sinda binendisyonan?
10 An ibang hoben pang mag-agom nagdesisyon na dai mag-aki. Minsan ngani an agom na babae may kamawotan na mag-aki na arog kakosog kan nasa ibang babae, sinda nagdesisyon, kaoyon kan saindang agom na lalaki, na dai mag-aki tanganing ikadusay an saindang sadiri sa bilog na panahon na paglilingkod ki Jehova. An dakol sa sainda naglingkod na payunir o misyonero. Masasalingoy ninda ngonyan an nag-aging mga taon na may pasasalamat. Totoo, mayo sinda nin mga aki sa laman. Alagad sinda nakapaluwas nanggad nin bagong mga disipulo na nagpadagos na maimbod na naglilingkod ki Jehova. An ‘tunay na mga aki sa pagtubod’ na ini noarin man dai malilingaw kun siisay an nagin instrumento sa pagdara sa sainda kan “tataramon nin katotoohan.”—1 Timoteo 1:2; Efeso 1:13; ikomparar an 1 Corinto 4:14, 17; 1 Juan 2:1.
11. (a) Saen naglilingkod ki Jehova an dakol na mag-agom na daing aki, asin taano ta dai sinda nagbabasol? (b) Anong kasuratan an ikaaaplikar sa gabos na mag-agom na dai nag-aki “huli sa kahadean”?
11 An dakol na mag-agom sa bilog na kinaban na isinakripisyo an kaogmahan sa pag-aki nakapaglingkod ki Jehova sa paglilingkod sa sirkito, distrito, o sa Bethel. Sinda sinasalingoy man na may pagkakontento an saindang buhay na ginamit sa paglilingkod ki Jehova asin sa saindang mga tugang sa espesyal na mga pribilehiyong ini. Dai sinda nagbabasol. Minsan ngani dai ninda nakamtan an kaogmahan na magdara nin aki sa kinaban, sinda nagkaigwa nin mahalagang kabtang sa pagpaoswag sa intereses kan Kahadean sa saindang laen-laen na langtad nin aktibidad. Sa gabos na mag-agom na ini na nagdanay na daing aki “huli sa kahadean,” tunay na aplikado an kasuratan na nagsasabi: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.”—Mateo 19:12; Hebreo 6:10.
Sarong Personal na Bagay
12. (a) Taano ta pambihirang pribilehiyo an pag-aki? (b) Sa anong mga panahon na an pag-aki asignasyon na itinao nin Dios?
12 Arog kan nasabotan niato sa kapinonan kan leksion na ini, an pag-aki sarong balaog nin Dios. (Salmo 127:3) Iyan pambihirang pribilehiyo na mayo sa espiritung mga linalang ni Jehova. (Mateo 22:30) May mga panahon na an pag-aki kabtang kan gibohon na itinao ni Jehova sa saiyang mga lingkod digdi sa daga. Ini an nangyari ki Adan asin Eva. (Genesis 1:28) Totoo iyan sa mga nakaligtas sa Baha. (Genesis 9:1) Kabotan ni Jehova na an mga aki ni Israel magdakol paagi sa pag-aki.—Genesis 46:1-3; Exodo 1:7, 20; Deuteronomio 1:10.
13, 14. (a) Ano an masasabi manongod sa pag-aki ngonyan, asin anong pagtatsar an dai magigin maninigo? (b) Minsan ngani personal na bagay an pag-aki sa panahon na ini kan katapusan, ano an hatol na itinao?
13 Ngonyan, an pag-aki bakong espisipikong kabtang kan gibohon na itinao ni Jehova sa saiyang banwaan. Minsan siring, iyan sagkod ngonyan pribilehiyo na itinatao nia sa mga mag-agom kun gusto ninda. Kun siring, an Kristianong mag-agom na nagdesisyon na magpamilya dai maninigong tatsaran; ni an mga mag-agom na dai nag-aaki.
14 Kaya an manongod sa pag-aki sa panahon na ini kan katapusan personal na bagay na dapat na pagdesisyonan kan kada mag-agom. Minsan siring, mantang “nainaan na an panahon na natatada,” marahay na maingat asin mapagngayongayong turotimbangon nin mga mag-agom an mga bentaha asin disbentaha nin pag-aki sa mga panahon na ini. (1 Corinto 7:29) An mga nagdesisyon na mag-aki maninigong lubos na marealisar bako sanang an mga kaogmahan na puwedeng itao nin pag-aki kundi pati an mga paninimbagan na napapalabot asin an mga problemang puwedeng lumataw para sa sainda asin sa mga ipangangaki ninda sa kinaban na ini.
Kun Mayo sa Plano
15, 16. (a) Anong kaisipan an maninigong likayan kun nangyayari an pagbabados na dai linalaoman, asin taano? (b) Paano maninigong ibilang an arin man na aki, na napapalabot an anong mga paninimbagan?
15 An iba tibaad magsabi: ‘Marahay gabos iyan, alagad ano kun umabot an aki na dai linalaoman?’ Ini nangyari sa dakol na mag-agom na lubos na nakaaaram kan bagay na bako ini an pinakamarahay na panahon na mag-aki. An iba sa sainda dakol nang taon sa bilog na panahon na paglilingkod. Ano an maninigong magin punto-de-vista ninda sa pag-abot kan dai linalaoman na aki?
16 Digdi napapalabot an responsableng pagkamagurang. Totoo, tibaad dai linalaoman an pagbabados, pero an omboy na nag-abot dai puwedeng sabihon na dai gusto nin Kristianong mga magurang. Ano man na mga pagkaliwat sa saindang buhay an darahon kan pag-abot kaiyan, tunay na dai ninda maninigong ikaanggot iyan. Total, sinda an responsable sa pangingidam kaiyan. Ngonyan na iyan yaon na, maninigo nindang akoon an saindang naliwat na situwasyon, sa pakaaram na, sa laen-laen na paagi, “an panahon asin pagkanorongod nangyayari” sa gabos na tawo. (Eclesiastes 9:11) Boluntad man o bako, sinda nakikabtang sa akto nin paglalang na si Jehova Dios an Autor. Maninigo nindang akoon an saindang aki bilang banal na obligasyon asin mamomoton na pasanon an saindang mga paninimbagan bilang “mga magurang na nasa Kagurangnan.”—Efeso 6:1.
“Gibohon Nindo an Gabos na Bagay sa Ngaran kan Kagurangnan”
17. Anong hatol an itinao ni apostol Pablo sa mga taga-Colosas, asin paano makukuyog ngonyan an hatol na ini?
17 Bago sia nagtao nin hatol manongod sa pamilya, si apostol Pablo nagsurat: “Ano man an gibohon nindo sa tataramon o sa gibo, gibohon nindo an gabos na bagay sa ngaran kan Kagurangnan na Jesus, na pinasasalamatan an Dios na Ama paagi sa saiya.” (Colosas 3:17-21) Ano man an kamugtakan nin sarong Kristiano, maninigo niang pasalamatan si Jehova asin aprobetsaran an saiyang kamugtakan tanganing ‘gibohon an gabos na bagay sa ngaran kan Kagurangnan.’
18, 19. (a) Paano an mga Kristianong daing agom asin an mga mag-agom na daing aki ‘magigibo an gabos na bagay sa ngaran kan Kagurangnan’? (b) Ano an maninigong magin punto-de-vista nin Kristianong mga magurang sa saindang mga aki, asin anong pasohan an maninigo nindang ibugtak para sa sainda man sana?
18 An Kristiano na nagdesisyon na dai mag-agom gagamiton an saiyang libertad, bakong sa pagpanigo sa sadiri, kundi sa pagtrabaho “nin bilog na kalag na siring baga kun para ki Jehova,” kun mapupuwede sa sarong klase nin bilog na panahon na paglilingkod. (Colosas 3:23; 1 Corinto 7:32) Kapareho kaiyan, an mag-agom na nagdesisyon na dai mag-aki dai paslong ‘gagamiton an kinaban nin lubos’ kundi tatawan kan pinakadakulang lugar sa saindang buhay an paglilingkod sa Kahadean.—1 Corinto 7:29-31.
19 Kun manongod sa mga Kristiano na may mga aki, maninigo nindang akoon an saindang pagkamagurang sa responsableng paagi. Imbes na ibilang an saindang mga aki na kaolangan sa paglilingkod ki Jehova, maninigo nindang ibilang sinda na espesyal na asignasyon. Ano an kalabot digdi? Bueno, kun an nagdusay na Kristiano nakakanompong nin saro na nagpapaheling nin interes sa katotoohan, pinoponan nia an regular na pakipag-adal sa Biblia sa tawong iyan. Kun naponan na an pag-adal, an Saksi mahigoson, na minabuwelta serosemana tanganing tabangan an interesado na umoswag sa espirituwal. Arog man kaini an kaipuhan sa mga aki nin Kristiano. An regular, pinag-isipan na pag-adal sa Biblia, na pinonan sa pinakamadaling panahon asin ginigibo nin regular, kaipuhan tanganing matabangan an aki na magtalubo sa espirituwal asin makanood na mamoot sa saiyang Kaglalang. (2 Timoteo 3:14, 15) Dugang pa, an mga magurang mag-iingat na tumao nin marahay na halimbawa sa Kristianong ugale sa harong, arog kan ginigibo ninda sa Kingdom Hall. Asin kun mapupuwede isasaabaga ninda an paninimbagan na tokdoan an saindang mga aki sa paglilingkod sa langtad. Sa paaging ini, apuwera sa paghuhulit sa ibang may edad na, pagmamaigotan nin mga magurang, sa tabang ni Jehova, na ‘gibohon na disipulo’ an saindang mga aki.—Mateo 28:19.
An mga Aki sa Panahon kan “Dakulang Kahorasaan”
20. (a) Ano an nasa enotan niato, asin anong mga kasakitan an ipinatanid ni Jesus? (b) Ano an koneksion kan mga tataramon ni Jesus sa pagpadakula sa mga aki sa panahon kan katapusan?
20 Nasa enotan niato an “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mateo 24:21) Iyan magigin masakit na panahon kapwa para sa mga gurang asin aki. Sa saiyang hula manongod sa pagtatapos kan presenteng palakaw nin mga bagay, ihinula ni Jesus na an Kristianong katotoohan makababanga sa mga pamilya. Sia nagsabi: “Dugang pa, an tugang ipagagadan nin tugang, asin an ama nin aki, asin an mga aki matindog tumang sa mga magurang asin ipagagadan sinda.” (Marcos 13:12) Malinaw na an pagpadakula sa mga aki sa panahon kan katapusan dai perming magigin labi-labing kaogmahan. Iyan puwedeng magtao nin kakologan sa boot, pagkabigo, asin peligro pa ngani, arog kan ipinaheheling kan mga tataramon ni Jesus na kinotar sa itaas.
21. (a) Mantang realistikong hinohorophorop an ngapit, taano ta dai man maninigong mahadit nin labi-labi an mga magurang? (b) Ano an malalaoman ninda, para sa sainda man sana asin sa saindang mga aki?
21 Alagad minsan ngani kita realistiko manongod sa maabot na mga kasakitan, an mga may saradit na aki dai man maninigong maghadit nin labi-labi manongod sa ngapit. Kun sinda magdanay na maimbod asin gibohon an pinakamakakaya ninda na padakulaon an saindang aki “sa disiplina asin pagtatanos nin isip ni Jehova,” makasasarig sinda na an saindang makinuyog na mga aki tatawan nin paborableng pagkonsiderar. (Efeso 6:4; ikomparar an 1 Corinto 7:14.) Bilang kabtang kan “dakulang kadaklan,” sinda asin an saindang mga aki makalalaom na makaligtas sa “dakulang kahorasaan.” Kun an mga aking iyan magdakula na maimbod na mga lingkod ni Jehova, sinda sagkod lamang na magpapasalamat sa saiya na sinda nagkaigwa nin responsableng mga magurang.—Kapahayagan 7:9, 14; Talinhaga 4:1, 3, 10.
Mga Hapot sa Repaso
◻ Anong haloyan na programa an napapalabot sa pagkamundag nin sarong aki?
◻ Taano ta nawaran kan saindang pribilehiyo an ibang kamagurangan asin ministeryal na mga lingkod?
◻ Anong mga bagay an maninigong konsideraron nin Kristianong agom na lalaki manongod sa pagbabados kan saiyang agom?
◻ Ano an nagpapatunay na an Kristianong mag-agom puwedeng magin daing aki asin maogma?
◻ Paano maninigong ibilang nin mga magurang an pagkamundag nin sarong aki, asin taano ta dai sinda kaipuhan na mahadit nin labi-labi manongod sa ngapit?
[Retrato para sa pahina 9]
An mga ama puwedeng tumabang sa paninimbagan na papagdanayon na pormal an mga aki sa panahon nin pagtiripon