Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 1: An Pagmawot nin Katoninongan Asin Katiwasayan sa Bilog na Kinaban
1, 2. Ano an dakulaon na pangangaipo nin gabos na tawo, asin taano?
Katoninongan asin katiwasayan an gusto niato digdi sa daga. An pangangaipo para sa marahayon na situwasyon na ini noarin man dai nagin arog kadakula ngonyan. Ini totoo bako sanang sa sato bilang mga indibiduwal kundi siring man sa bilog na pamilya nin tawo sa bilog na daga.
2 Iyan an dahelan na an presenteng populasyon sa daga nabubuhay ngonyan sa panahon nin mga panahon! ‘Paano ini mangyayari,’ tibaad ihapot nindo, ‘mantang kita ngonyan nasa pinakamakatatakot na panahon sa bilog na kasaysayan nin tawo, an panahon nin mga armas nuklear?’
3. (a) Ano an sinasabing dahelan kan pagkaigwa kan bomba nuklear kan mga nasyon? (b) Ano an ididikta nin ordinaryong sentido komun?
3 Kisuerra walong nasyon an sinasabing may kakayahan na gumibo nin bomba nuklear. Asin kinakarkulo na 31 nasyon an puwedeng magkaigwa nin mga armas nuklear sa taon 2000. An dahelan ninda sa pagkaigwa kan pinakamakosog na bomba sinasabi na para sa proteksion, pan-olang sa ibang nasyon na igwa kan kaparehong armas, sarong pan-uma sa nuklear na pagbalos. Sa atubang kan siring na kamugtakan kan kinaban, an ordinaryong sentido komun magdidikta na an mga nasyon maninigong umoyon na mag-iribang mabuhay na may pagtogot sa lambang saro.
4. Minsan ngani dai inolang kan Kaglalang an mga paghihingoa nin tawo na magkaigwa nin katiwasayan, ano an katuyohan nia sa bagay na ini?
4 Alagad, katoninongan daw na gibo sana nin tawo an gusto niato, kaiba an ano man na katiwasayan na ikatatao nin tawo? Minsan ngani dai inolang kan Kaglalang an mga paghihingoa nin tawo na mag-establisar asin papagdanayon an katoninongan asin katiwasayan sa bilog na kinaban, igwa sia nin sadiring sangkap na paagi sa pagpanigo sa satong natural na pagmawot nin katoninongan asin katiwasayan. Igwa sia nin sadiring itinalaan na panahon para sa paghale sa gabos na pararaot sa katiwasayan kan mga nagmamawot na sumamba sa saiya. Maogmahon nanggad kitang maaraman na an panahon nia digdi harani na!
5. Ano an isinabi kan pinasabngan na salmista manongod sa daga, asin ano an katuyohan kan Kaglalang para sa tawo?
5 Pakalihis nin rinibong taon na maribok na kasaysayan nin tawo, malalaoman na magkaigwa nin makosog na pagmawot nin katoninongan asin katiwasayan sa bilog na daga. An daga nagin nang natural na istaran nin tawo poon sa kapinonan kan pagkabuhay nin tawo. An pinasabngan na salmista nagsabi: “Kun manongod sa kalangitan, an kalangitan rogaring ni Jehova, alagad an daga itinao nia sa mga aki nin mga tawo.” (Salmo 115:16) Poon sa pagkapinoon, dati nang mamomoton na katuyohan kan Kaglalang na an tawo magkamit nin lubos na buhay sa saiyang daganon na erokan na itinao nin Dios.
6. Sa anong paagi na an enot na tawo asin an saiyang aki makagagawe na kaagid nin Dios?
6 Sono sa tala kan paglalang sa Genesis 2:7, “pinorma ni Jehova Dios an tawo hale sa kabokabo kan daga asin hinangosan sia sa saiyang dongo kan hangos nin buhay, asin an tawo nagin buhay na kalag.” Mayo nin ibang nabubuhay na linalang sa daga na kapareho nin tawo sa grado nin buhay o kapareho nin tawo sa sokol nin kakayahan—na nakagagawe na kaagid nin Dios sa pagkapot nin pagsakop. Dugang pa, an pagsakop na ini bako sanang nasa enot na tawong linalang kundi kakapotan asin kakamtan man kan saiyang aki.
7. Paano nagkaigwa nin agom si Adan, asin ano an isinabi nia kan iatubang sa saiya an sangkap na linalang na ini?
7 Sa dahelan na iyan, si Adan tinawan kan Kaglalang nin sarong agom. Sia magigin ina kan gabos na mga tawong mag-iistar sa daga. Iyan an dahelan na, kan iatubang saiya an sangkap na linalang na ini, an lalaki nakapagsabi: “Sa katapustapusi ini tolang nin sakong mga tolang asin laman nin sakong laman.” Kaya ipinahayag sia ni Adan na an babae sa mga tawo, ’ish·shahʹ, na iyo an pormang panbabae kan termino sa Hebreo na isinasalin na lalaki, an ’ish.—Genesis 2:21-23.
8. Anong mga instruksion an itinao kan Kaglalang sa enot na mag-agom na tawo?
8 An Kaglalang asin langitnon na Ama nagsabi sa enot na mag-agom na tawo: “Pangagbunga asin pangagdakol kamo asin panoa nindo an daga asin sakopa nindo iyan.” (Genesis 1:28) An paaging ini bago nanggad sa kasaysayan nin intelihenteng mga linalang. An espirituwal na mga nag-iistar sa dai naheheling na kalangitan dai nabubuhay paagi sa pangangaki.
9. Paano ilinaladawan kan Salmo 8:4, 5 an banal na areglo sa mga bagay?
9 Bakong makangangalas na, kan panahon na lalangon an daga, “an mga bitoon nin kaagahan maogmang nagkururahaw, asin an gabos na aki nin Dios nagkururahaw sa pag-omaw.” (Job 38:7) Kan panahon na idto, an gabos matoninong asin oroyon sa bilog na uniberso. Sa ikawalong salmo, wiling-wili sa banal na areglo nin mga bagay, an salmista nagsabi manongod sa tawo: “Ginibo mo man sia na hababa nin kadikit sa mga arog-dios, asin kinoronahan mo sia nin kamurawayan asin kamahalan.” (Bersikulo 4, 5) Sono sa salmong ini, ipinasakop nin Dios sa tawo an gabos na yaon digdi sa daga.
An Kapinonan nin Karibal na Soberaniya
10. (a) Bago ipangidam an enot na aki nin tawo, ano an puminotok? (b) Kun siring ano an puwedeng establisaron sa katawohan?
10 Makangangalas, bago ipangidam an enot na aki nin tawo, puminotok an pagrebelde sa unibersal na soberaniya ni Jehova Dios. An situwasyon puwedeng magbunga kan pag-establisar nin bagong soberaniya, bagong kaharohalangkaweng paghade, sa katawohan—kun an tawo ikasisiblag asin ikararayo sa unibersal na organisasyon ni Jehova. Puwedeng mag-establisar nin soberaniya na karibal kan saiya. Ini nagkaipo kan enot na kaputikan, na nagpapakaraot ki Jehova Dios.
11. Paagi sa pagpakaraot ki Jehova Dios, an enot na rebelde nagin ano?
11 Huli sa pagsabi kan enot na kaputikan ginibo an enot na rebeldeng ini tumang sa Dios na an enot na putikon, an enot na diablo, o parapakaraot. Kabaliktaran na gayo sa saiya, si Jesu-Cristo nagsabi: “Ako iyo an dalan asin an katotoohan patin an buhay.” (Juan 14:6) Sa saiyang relihiyosong mga paratumang, si Jesus nagsabi: “Gikan kamo sa saindong ama na Diablo, asin boot nindo na gibohon an mga horot kan saindong ama. An sarong iyan paragadan sa kapinonan, asin dai sia nagdanay sa katotoohan, huli ta mayo sa saiya an katotoohan. Kun sia nagtataram nin putik, sia nagtataram oyon sa saiyang sadiring boot, huli ta sia putikon asin iyo an ama kan kaputikan.”—Juan 8:44.
12. (a) Paano pinapangyari kan Diablo na ikasabi an enot na kaputikan, asin ano an epekto ki Eva? (b) Ano an ibinunga kan si Adan kumakan kan ipinangangalad na bunga?
12 Sa pagtaram paagi sa sarong halas sa tatamnan nin Eden, o paraiso nin kaogmahan, pinapangyari kan Diablo na ikaatubang sa enot na babae an enot na kaputikan. Sinabi nia na an Kaglalang sa babae putikon, sa siring rinibok an katoninongan kan isip ni Eva. Ipinamate nia sa babae an kadaihan nin katiwasayan sa pinaghohona kan babae na pagkaignorante nia, kaya an babae nagkakan sa ipinangangalad na bunga. Nakombensir kan babae an saiyang agom, si Adan, na kumakan kan ipinangangalad na bunga kaiba nia asin sa siring umiba sa saiya sa saiyang pagrebelde tumang ki Jehova Dios. (Genesis 3:1-6) An sumbikalan na mag-agom nawaran kan saindang pakipagkatoninongan sa Dios asin pinalayas sa paraiso nin kaogmahan tanganing mabuhay na daing katiwasayan sa luwas. Ilinaladawan kan Roma 5:12 an makamomondong kamugtakan na ini, na an sabi: “Paagi sa sarong tawo an kasalan naglaog sa kinaban asin an kagadanan huli sa kasalan, asin kaya an kagadanan nakalakop sa gabos na tawo huli ta sinda gabos nagkasala.”
13. Anong pagpili an kaipuhan na gibohon ngonyan kan lambang saro sato?
13 An situwasyon sa satong kaaldawan naghahagad sato na gumibo nin depinidong pagpili. Iyan pagpili sa pag-oltanan kan karibal na soberaniya ni Satanas na Diablo, “an dios kan palakaw na ini nin mga bagay,” asin kan soberaniya ni Jehova, an Kaharohalangkawe asin Makakamhan sa gabos na Dios kan uniberso.—2 Corinto 4:4; Salmo 83:18.
An Paagi na Magkamit nin Pakipagkatoninongan sa Dios
14. Anong katoninongan asin katiwasayan an makakamtan niato ngonyan pa?
14 Sa dakulang danyos sa saindang sadiri, an kadaklan na tawo habong umako o tumubod sa probisyon kan Makakamhan sa gabos na Dios para sa saiyang mga parasamba na magkamit nin limitadong katoninongan asin katiwasayan minsan sa pinakamakamomondong kamugtakan ngonyan nin tawo. Minsan siring, si Jehova iyo “an Dios na nagtatao nin katoninongan,” asin dakulang pribilehiyo niato ngonyan na lumaog sa katoninongan asin katiwasayan na noarin man dai masusudya. (Roma 16:20; Filipos 4:6, 7, 9) Iyan katoninongan asin katiwasayan na itinatao nia ngonyan pa sa saiyang daganon na mga lingkod, sa saiyang naheheling na organisasyon, bilang pag-otob sa saiyang masasarigan nanggad na mga panuga. Iyan katoninongan asin katiwasayan na makakamtan sana niato sa pakikiasosyar sa saiyang naheheling na organisasyon digdi sa daga.
15. Bako daw na rasonableng isipon na an Dios may organisasyon, asin ano an minidbid ni Jesu-Cristo?
15 Magigin bakong oyon sa malinaw na mga katokdoan kan Kasuratan an tumubod na an Dios mayo nin organisasyon, nin organisadong banwaan, na iyo sana an saiyang minimidbid. Minidbid ni Jesu-Cristo na an saiyang langitnon na Ama may naheheling na organisasyon. Sagkod kan Pentecostes 33 C.E., idto an Judiong organisasyon na katipan ni Jehova Dios sakop kan Pagboot ni Moises.—Lucas 16:16.
16. (a) Si Moises tagapag-oltanan kiisay? (b) Kiisay Tagapag-oltanan an Orog na Dakulang Moises, si Jesu-Cristo?
16 Kun paanong an suanoy na nasyon nin Israel katipan ni Jehova Dios paagi sa tagapag-oltanan na si Moises, an nasyon man nin espirituwal na Israel, “an Israel nin Dios,” may relasyon na katipan paagi sa sarong tagapag-oltanan. (Galacia 6:16) Sono iyan sa isinurat ni apostol Pablo sa saiyang Kristianong katabang: “Igwa nin sarong Dios, asin sarong tagapag-oltanan sa tahaw nin Dios asin nin mga tawo, an sarong tawo, si Cristo Jesus.” (1 Timoteo 2:5) Si Moises daw tagapag-oltanan ki Jehova Dios asin sa katawohan sa pankagabsan? Bako, sia an tagapag-oltanan sa Dios ni Abraham, Isaac, asin Jacob asin sa nasyon kan saindang mga gikan sa laman. Siring man, an Orog na Dakulang Moises, si Jesu-Cristo, bakong Tagapag-oltanan ki Jehova Dios asin sa bilog na katawohan. Sia an Tagapag-oltanan sa saiyang langitnon na Ama, si Jehova Dios, asin sa nasyon nin espirituwal na Israel, na limitado sana sa 144,000 na miembro. An espirituwal na nasyon na ini garo sadangoton na aripompon kan mga arog-karnero ni Jehova.—Roma 9:6; Kapahayagan 7:4.
Pastor Bako Sanang sa “Sadangoton na Aripompon”
17. (a) Iinasignar ni Jehova Dios si Jesu-Cristo na magin ano? (b) Ano an isinabi ni Jesus sa mga magmamana kan langitnon na Kahadean?
17 Sa Salmo 23:1, si Hadeng David kan suanoy na Israel pinasabngan na magsabi: “Si Jehova an sakuyang Pastor. Dai ako magkukulang nin ano man.” Si Jehova, an Supremong Pastor, inasignaran si Jesu-Cristo na magin “an marahay na pastor.” (Juan 10:11) Sa Lucas 12:32, si Jesus nagsabi sa mga sia an Marahay na Pastor: “Dai kamo matakot, sadangoton na aripompon, huli ta an saindong Ama nag-oyon na itao sa saindo an kahadean.”
18. (a) Siisay ngonyan an katimbang kan mga Netinim asin mga aki kan bakong Israelitang mga oripon ni Salomon? (b) Kiisay sinda dayupot na kaasosyar?
18 Kan suanoy na mga panahon, igwa nin mga bakong Judio, arog kan mga Netinim asin mga aki kan bakong Israelitang mga oripon ni Salomon, na kaiba sa nasyon nin Israel. (Esdras 2:43-58; 8:17-20) Siring man ngonyan, igwa nin mga lalaki asin babae na lubos na nagdusay sa Dios paagi ki Jesu-Cristo pero bakong espirituwal na mga Israelitas. Pero sinda asosyado sa natatada kan espirituwal na Israel huli sa pagdusay kan saindang sadiri ki Jehova Dios paagi ki Jesu-Cristo, “na nagtao kan saiyang sadiri bilang katimbang na pantubos para sa gabos.” (1 Timoteo 2:6) Ngonyan, an mga ini mas dakol nanggad sa 144,000 na espirituwal na mga Israelitas, na magmamana kan langitnon na Kahadean.
19. Ano an isinabi ni Jesu-Cristo tanganing iparisa na sia an magigin Pastor bako sanang sa “sadangoton na aripompon”?
19 Kaya si Jesu-Cristo iaasignar, sa itinalaan na panahon nin Dios, na magin an Pastor sa mas dakulang aripompon nin mga arog-karnero na magkakamit nin daganon na mana paagi sa saiya. Ini an mga nasa isip nia kan sia magsabi: “Igwa pa ako nin ibang karnero, na bakong sa toril na ini; kaipuhan man na darahon ko an mga ini, asin sinda maghihinanyog sa sakong tingog, asin sinda manini sarong aripompon, sarong pastor.” Nasa isip an “ibang karnerong” ini, si apostol Juan nagsurat man manongod ki Jesus: “Sia sarong pantubos na atang para sa satong mga kasalan, alagad bako sanang kan sa sato kundi siring man kan sa bilog na kinaban.”—Juan 10:16; 1 Juan 2:2.
20. (a) Paano an kabilangan kan “ibang karnero” nakakokomparar sa kabilangan kan mga natatada sa “sadangoton na aripompon”? (b) Ano an kahulogan para sa sainda gabos kan pagpastor kan Marahay na Pastor?
20 Ngonyan, igwa nin mga 9,000 na naghihingakong miembro kan natatada sa “sadangoton na aripompon” nin espirituwal na mga karnero. Sa ibong na kampi, igwa nin minilyon na nagdusay na kaasosyar kan linahidan na natatada sa pagsunod sa Marahay na Pastor, si Jesu-Cristo. Sinda manonompongan sa labing 200 na kadagaan sa bilog na daga. Ano an kahulogan para sa sainda gabos kan pagpastor kan Marahay na Pastor? Iyan nangangahulogan kan pagkakamit nin katoninongan asin katiwasayan! Kun mayo sinda nin katoninongan sa tahaw ninda, dai magkakaigwa nin odok sa pusong pagkasararo asin dai malalaglag na kooperasyon sa tahaw ninda. Kun mayo sinda nin mamomoton na pagmakolog sa lambang saro kun manongod sa espirituwal na mga interes, mayo kutana sinda kan katiwasayan na nakakamtan ninda. Kaya, an saindang pagmawot nin katoninongan asin katiwasayan sa bilog na daga nagpoon nang mapanigoan ngonyan pa.