Tinutuyong Pagpapalakop nin Kagadanan
BAGO gadanon nin AIDS an mga biktima kaini, itinatao kaini sa sainda an nakatatakot na paninimbagan: an puwersa nin buhay o kagadanan sa iba. Kadakol na nagtitios huli sa AIDS an naghihiro sa responsableng paagi, na pinaiindahan an saindang sadiri sa ano man na paghiro na tibaad makaolakit sa iba. Alagad an peligrosong dikit nagdesisyon sa nalalaen na paagi.
Sarong sikayatrista sa Washington, D.C., an nagsurat nin sarong nakatatakot na halimbawa—saro kan saiya mismong mga pasyente: “Sarong napurisaw na gayong nakikidorog sa kasekso asin sa bakong kasekso na biktima nin AIDS an, ikinatatakot ko, tinutuyong pinagmamaigotan na maolakitan an ibang tawo kan saiyang helang. Aram nia na puwede kaining gadanon sinda.” Sinabihan sia kan lalaking ini: “Kan enot kong maaraman na igwa ako nin AIDS nagdesisyon ako na dai makidorog sa kiisay man, asin dangan naanggot sana ako asin nagsabi: Satuyang sakopon an mundo.” Ano an boot sabihon nia?
An sikayatrista nagpapaliwanag: “Sinabihan nia ako na kun minsan kun sia naaanggot sa kiisay man, sarong panlaog na tingog an nagsasabi saiya, ‘Kuanon ta an lalaking ini’ asin pagmamaigotan niang makidorog sa saiya. Sinabi man nia na nakikidorog sia sa sarong lalaking nakikidorog man sa kasekso asin sa bakong kasekso na mayong pinipiling babae.” Pinagmaigotan kan sikayatrista na dagkahon an mga opisyal na laomon an peligrosong lalaking ini alagad mayong nangyari. “Kan huri ko siang maheling,” isinurat nia, “an saiyang ugale dai nagliwat, asin mayo ako nin dahelan na magduda na may ano man na kalaenan ngonyan.”
Saro daw na pambihirang kaso? An mamondo, bako. Sarong lalaki an inapod na Pasyenteng Sero kan Centers for Disease Control huli kan saiyang nangongorog na kabtang sa amay na paglakop kan AIDS sa Estados Unidos. Minsan kan pakatapos na maaraman niang isinasapeligro nia an buhay nin iba, padagos siang nagkaigwa nin homoseksuwal na relasyon sa 250 kapareha sa sarong taon. An mga babae nagrereklamo na itinatagong hilom kan saindang mga agom an saindang pakikidorog sa kasekso asin sa bakong kasekso. An mga naggagamit nin droga padagos na nakikihiras kan saindang ginamit asin nakaoolakit na mga dagom asin kaya nagin an pinakadakulang grupo nin bagong mga biktima nin AIDS sa nagkapirang nasyon.
An kaagid na nakapupurisaw siring kan gabos na ini iyo, na dai ini ipinagngangalas kan mga estudyante nin Biblia. An suanoy na librong iyan haloy nang panahon na naghula na an mga tawo sa nakapupurisaw na kapag-arakian na ini magigin “mamomoton sa sainda man sana . . . dai nin pagkamoot.” (2 Timoteo 3:1-5) An panahon na iyan siertong uya na. Idtong mga nagbabasangbasang sa mga pagboot nin Dios manongod sa moralidad an perming nakakokolog sa Autor kan mga pagboot na iyan, an satong Kaglalang. Iyan an pinakamaraot na peligrong puwedeng magibo sa buhay. Alagad ngonyan an kaagid na kasumbikalan parateng nagdadara nin dugang na peligro: an pagkakatiwala kan mismong buhay nin saro sa mga tawong dai nin ibang pinahahalagahan kundi an saindang sadiring kaogmahan.