Ikabalde Niato an Maraot

SI Jehova banal na Dios. Kan suanoy na mga panahon sia an “Banal nin Israel,” asin bilang siring hinagad nia na an Israel magin malinig, daing digta. (Salmo 89:18) Sinabihan nia an saiyang piniling banwaan: “Kaipuhan na kamo magpakabanal, huli ta ako banal.” (Levitico 11:45) An siisay man na gustong ‘tumukad sa bukid ni Jehova’ kaipuhan na magin “inosente sa saiyang kamot asin malinig sa puso.” (Salmo 24:​3, 4) Labi pa sa paglikay sana sa makasalan na mga gibo an nagin kahulogan kaiyan. Iyan nangahulogan nin “pagkaongis sa maraot.”​—Talinhaga 8:13.

Mamomoton na nagtao si Jehova nin detalyadong mga ley tanganing mamidbid asin malikayan kan nasyon nin Israel an salang gibo. (Roma 7:​7, 12) Kabale sa mga ley na ini an estriktong mga susundan dapit sa moralidad. An pagsambay, mga gibong homoseksuwal, pagdodorog nin haraning magpaparyente, asin pakikidorog sa hayop gabos ipinamidbid bilang bakong banal na mga nakaaati sa espirituwal. (Levitico 18:23; 20:​10-17) Pinara sa nasyon nin Israel an mga nagkasala nin siring na makasosopog na mga gibo.

Kan an kongregasyon nin linahidan na mga Kristiano magin an “Israel nin Dios,” itinao man sa sainda an kaparehong mga pamantayan sa moral. (Galacia 6:16) Kaipuhan man kan mga Kristiano na “ikabalde an maraot.” (Roma 12:9) Aplikado man sa sainda an mga tataramon ni Jehova sa Israel: “Kaipuhan kamong magin banal, huli ta ako banal.” (1 Pedro 1:​15, 16) An bakong banal na mga gibo na arog baga nin pakikisaro, pagsambay, mga gibong homoseksuwal, pakikidorog sa hayop, asin incesto dai dapat na makaraot sa Kristianong kongregasyon. An mga habong pumondo sa paggibo nin siring na mga bagay dai makakaiba sa Kahadean nin Dios. (Roma 1:​26, 27; 2:​22; 1 Corinto 6:​9, 10; Hebreo 13:4) Sa “huring mga aldaw” na ini, an iyo man sanang mga pamantayan aplikado sa “ibang karnero.” (2 Timoteo 3:1; Juan 10:16) Bilang resulta, an linahidan na mga Kristiano asin ibang karnero minakompuesto nin malinig asin marahay na banwaan, na puedeng magdara kan ngaran kan saindang Dios bilang Mga Saksi ni Jehova.​—Isaias 43:10.

Pagpadanay na Malinig an Kongregasyon

Sa kabaliktaran, kinokonsinte kan kinaban an gabos na klase nin inmoralidad. Minsan ngani laen an tunay na mga Kristiano, maninigo na dai ninda paglingawan na an dakol na naglilingkod ngonyan ki Jehova dati nasa kinaban. Dakol an, bago ninda namidbid an satong banal na Dios, dai nakasabot kun taano ta dai dapat na padara sa mga horot asin pantasya kan saindang makasalan na laman, na nalulugom sa “karigsokan.” (1 Pedro 4:4) Si apostol Pablo, pakatapos na iladawan an makababaldeng mga gibo kan nagpakaraot na mga tawo kan mga nasyon, nagsabi: “Arog kaiyan kaidto an nagkapira sa saindo.” Pero, sinabi nia: “Alagad kamo nahugasan na, alagad kamo sinantipikar na, alagad kamo ipinahayag nang matanos sa ngaran kan satong Kagurangnan na si Jesu-Cristo asin sa espiritu kan satong Dios.”​—1 Corinto 6:11.

Kanigoan kanakararangang mga tataramon iyan! Ano man an nagin buhay nin saro kan enot, nagbabakle sia kun an mamuraway na maogmang bareta manongod sa Cristo igwa nin epekto sa saiyang puso. Naggigibo sia nin pagtubod asin idinudusay an saiyang sadiri ki Jehova Dios. Poon sa panahon na iyan namumuhay na sia nin dalisay sa moral, nahugasan na sa pagheling nin Dios. (Hebreo 9:14) Ipinatawad na an mga kasalan na ginibo nia kaidto, asin saiya nang ‘mapipirit na aboton an mga bagay na nasa enotan.’a​—Filipos 3:​13, 14; Roma 4:​7, 8.

Pinatawad ni Jehova sa paggadan asin pagsambay an nagsolsol na si David, asin pinatawad Nia sa inmoral na idolatriya asin grabeng pagpabolos nin dugo an nagsolsol na si Manases. (2 Samuel 12:​9, 13; 2 Cronica 33:​2-6, 10-​13) Tunay na makapasasalamat kita na sia andam na patawadon man kita kun kita nagsosolsol asin minadolok sa saiya na may sinseridad asin kapakumbabaan. Pero, apisar kan pagpatawad ni Jehova ki David asin Manases, kaipuhan na mamatean kan duwang lalaking ini​—asin kan Israel sa kaibanan ninda—​an mga epekto kan saindang makasalan na mga gibo. (2 Samuel 12:​11, 12; Jeremias 15:​3-5) Sa kaagid na paagi, minsan ngani pinatatawad ni Jehova an mga nagkasala na nagsosolsol, tibaad may mga epekto kan saindang gawe na dai malilikayan.

Dai Maeebitaran na mga Epekto

Halimbawa, an saro na namumuhay sa inmoral na karigsokan asin may AIDS tibaad akoon an katotoohan asin magbakle sagkod na makaabot sa pagdusay asin bautismo. Sia ngonyan saro nang Kristiano na malinig sa espirituwal na igwang relasyon sa Dios asin makangangalas na paglaom para sa ngapit; alagad may AIDS pa man giraray sia. Pag-abot nin panahon tibaad magadan sia sa helang na iyan, sarong mamondo alagad dai madudulagan na epekto kan saiyang nakaaging paggawe. Para sa nagkapirang Kristiano an mga epekto nin nakaaging magabat na inmoralidad tibaad magpadagos sa ibang mga paagi. Sa laog nin dakol na taon pakapabautismo ninda, posibleng sa natatada pa nindang buhay sa palakaw na ini nin mga bagay, tibaad kaipuhan nindang labanan an mga pagmawot kan saindang laman na bumalik sa saindang dating inmoral na estilo nin buhay. Sa tabang kan espiritu ni Jehova, dakol an nakapanggana sa pakikilaban. Alagad kaipuhan nindang makilaban nin dayaday.​—Galacia 5:​16, 17.

An mga siring dai nagkakasala basta kinokontrol ninda an saindang mga pagmawot. Alagad kun sinda lalaki, tibaad madonong na magdesisyon sinda na dai ‘maghingoang maabot’ an sarong paninimbagan sa laog kan kongregasyon mientras na kinakaipuhan pang labanan an mapuersang mga horot nin laman. (1 Timoteo 3:1) Taano? Huli ta aram ninda an pagtitiwala kan kongregasyon sa kamagurangan. (Isaias 32:​1, 2; Hebreo 13:17) Aram ninda na kinokonsulta an kamagurangan dapit sa dakol na personal na bagay asin kaipuhan na mag-asikaso nin sensitibong mga situwasyon. Magigin bakong mamomoton, madonong, ni rasonable na an sarong dayaday na nakikilaban sa marigsok na mga horot nin laman maghingoang maabot an siring na responsableng katongdan.​—Talinhaga 14:16; Juan 15:​12, 13; Roma 12:1.

Para sa sarong lalaki na kaidto nanlupig nin aki bago sia nabautismohan, tibaad iba man an epekto. Kan manodan nia an katotoohan, sia nagsolsol asin nagbakle, na dai dinadara an maringis na kasalan na iyan sa laog kan kongregasyon. Pakatapos kaiyan tibaad marahay an saiyang pag-oswag, biyo nang dinaog an saiyang salang mga pagmawot, asin may tendensia pa ngani na ‘maghingoang aboton’ an sarong responsableng katongdan sa kongregasyon. Pero, ano kun sagkod ngonyan kinakaipuhan pa niang haleon an maraot na dangog nia sa komunidad bilang dating nanlupig nin aki? Sia daw ‘magigin dai nin kanawayan, igwa nin marahay na patotoo hale sa mga tawo sa luwas, mayo nin akusasyon sa saiya’? (1 Timoteo 3:​1-7, 10; Tito 1:7) Dai. Huli kaini, dai sia makukualipikar para sa mga pribilehio sa kongregasyon.

Kun Magkasala an Sarong Nagdusay na Kristiano

Nasasabotan ni Jehova na kita maluya asin na minsan pakatapos na mabautismohan puede kitang magkasala. Si apostol Juan nagsurat sa mga Kristiano kan saiyang kaaldawan: “Isinusurat ko sa saindo an mga bagay na ini tanganing dai kamo makaginibo nin kasalan. Minsan siring, kun an siisay man makaginibo nin kasalan, igwa kita nin parasorog sa Ama, si Jesu-Cristo, sarong matanos. Asin sia sarong pampagian nin boot na atang para sa satong mga kasalan, alagad bako sanang kan sa sato kundi siring man kan sa bilog na kinaban.” (1 Juan 2:​1, 2) Iyo, basado sa atang ni Jesus, patatawadon ni Jehova an bautisadong mga Kristiano na nagkakasala​—kun sinda tunay na nagsosolsol asin binabayaan an saindang salang dalan.

An sarong halimbawa kaini naheling sa kongregasyon sa Corinto kaidtong enot na siglo. Nabaretaan ni apostol Pablo an manongod sa sarong kaso nin pakikidorog na incesto sa bago pa sanang kongregasyon na iyan, asin nagtao sia nin mga pagboot na itiwalag an lalaking napapalabot. Kan huri, an nagkasala nagsolsol, asin sinadol ni Pablo an kongregasyon na ibalik ini. (1 Corinto 5:​1, 13; 2 Corinto 2:​5-9) Sa siring, paagi kan nakakapaomay na puersa kan mamomoton na kabootan ni Jehova asin kan dakulang halaga kan pantubos na atang ni Jesus, an lalaki nalinigan sa saiyang kasalan. Puede man na mangyari ngonyan an kaparehong mga bagay. Pero, sa giraray, dawa kun nagsosolsol an sarong bautisado na nakaginibo nin magabat na kasalan asin pinatawad na sa pagheling ni Jehova, tibaad igwa pa giraray nin nagpapadagos na mga epekto kan saiyang kasalan.​—Talinhaga 10:​16, 17; Galacia 6:​7.

Halimbawa, kun an sarong nagdusay na aking babae makaginibo nin pakikisaro, tibaad may kapaitan na pagbasolan nia an saiyang iginawe asin pag-abot nin panahon ikabalik sa espirituwal na salud paagi sa tabang kan kongregasyon. Alagad ano kun sia bados huli sa saiyang inmoralidad? Kun siring an bilog niang buhay talagang naliwat huli kan saiyang ginibo. An sarong lalaki na nakaginibo nin pagsambay tibaad magsolsol asin dai matiwalag. Alagad an saiyang inosenteng agom igwa nin Makakasuratan na dahelan na idiborsio sia, asin puede niang gibohon iyan. (Mateo 19:9) Kun gibohon nia iyan, an lalaki, minsan ngani pinatawad na ni Jehova, makamamate sa bilog niang buhay kan dakulang epektong ini kan saiyang kasalan.​—1 Juan 1:9.

Kumusta man an sarong lalaki na daing pagkamoot na idiniborsio an saiyang agom tanganing mag-agom nin ibang babae? Tibaad pag-abot nin panahon sia magsosolsol asin ikababalik sa laog kan kongregasyon. Sa pag-agi nin mga taon tibaad sia umoswag asin ‘magpadagos sa pagkamaygurang.’ (Hebreo 6:1) Alagad sagkod na an saiyang enot na agom nabubuhay na mayong agom, dai sia makukualipikar na maglingkod sa sarong responsableng katongdan sa kongregasyon. Bako siang “agom na lalaki nin sarong agom na babae” huli ta mayo sia nin Makakasuratan na basehan na idiborsio an saiyang enot na agom.​—1 Timoteo 3:​2, 12.

Bako daw na ini mapuersang mga dahelan kun taano ta maninigong pataluboon nin sarong Kristiano an pagkabalde sa maraot?

Kumusta an Sarong Nanlupig nin Aki?

Ano kun an sarong bautisadong adultong Kristiano nanlupig nin aki? An nagkasala daw maraot na marhay kaya nungka siang patatawadon ni Jehova? Dai man. Si Jesus nagsabi na ‘an paglanghad tumang sa banal na espiritu’ dai nang kapatawadan. Asin si Pablo nagsabi na mayo nang natatadang atang para sa mga kasalan nin saro na naggigibo nin tuyong pagkakasala apisar na aram na nia an katotoohan. (Lucas 12:10; Hebreo 10:​26, 27) Alagad daing sinasabi sa Biblia na an sarong adultong Kristiano na nan-abuso nin aki sa seksuwal na paagi​—baga man kaparyente o bako—​dai puedeng patawadon. Tunay nanggad, puedeng hugasan an saiyang mga kasalan kun sia odok na nagsosolsol gikan sa puso asin nagbabakle. Minsan siring, tibaad kaipuhan pa man giraray na labanan nia an salang mga pagmawot nin laman na napatalubo nia. (Efeso 1:7) Asin tibaad igwa nin mga epekto na dai nia malilikayan.

Depende sa ley kan nasyon na saiyang ineerokan, an nanlupig posibleng kaipuhan na mabilanggo o atubangon an iba pang penalidad gikan sa Estado. Dai sia dian poprotehiran kan kongregasyon. Dugang pa, ihinayag kan tawong iyan an sarong seryosong kaluyahan na poon sa panahon na ini kaipuhan na isip-isipon. Kun sia minalataw na nagsosolsol, paririgonon an saiyang boot na umoswag sa espirituwal, makikabtang sa paglilingkod sa langtad, magkaigwa pa ngani nin mga kabtang sa Teokratikong Paadalan sa Pagmiministro asin mga kabtang na bakong pagtotokdo sa Pagtiripon sa Paglilingkod. Minsan siring, dai ini nangangahulogan na makukualipikar siang maglingkod sa sarong katongdan nin paninimbagan sa kongregasyon. Ano an Makakasuratan na mga rason kaini?

Enot, an magurang sa kongregasyon dapat na “mapagpogol sa sadiri.” (Tito 1:8) Totoo, mayo sa sato an may sangkap na pagpopogol sa sadiri. (Roma 7:​21-25) Alagad an sarong nagdusay na adultong Kristiano na nagkasala nin seksuwal na pan-aabuso sa aki naghahayag nin bakong natural na kaluyahan nin laman. Ipinaheheling nin eksperyensia na an siring na adulto posibleng manlupig nin iba pang aki. Totoo, bakong gabos na nanlupig nin aki inootro an kasalan, alagad an dakol iyo. Asin an kongregasyon dai nakababasa nin mga puso tanganing sabihon kun siisay an puedeng manlupig giraray o dai nin mga aki. (Jeremias 17:9) Huli kaini, an sadol ni Pablo ki Timoteo minaaplikar na may espesyal na pagdodoon sa kaso nin bautisadong mga adulto na nanlupig nin mga aki: “Dai ka noarin man magdoon kan saimong kamot nin padale sa siisay man; ni makikabtang man sa mga kasalan kan iba.” (1 Timoteo 5:22) Para sa proteksion kan satong mga aki, an sarong lalaki na midbid na nanlupig nin aki bakong kualipikado para sa sarong responsableng katongdan sa kongregasyon. Saro pa, dai sia puedeng magin payunir o maglingkod sa ano man na iba pang espesyal, bilog na panahon na paglilingkod.​—Ikomparar an prinsipyo na nasa Exodo 21:​28, 29.

Tibaad ihapot nin nagkapira, ‘Bako daw na may nagkapirang nakaginibo nin ibang klase nin kasalan asin minalataw na nagsolsol, dangan inotro an saindang kasalan paghaloyhaloy?’ Iyo, nangyari iyan, alagad may iba pang dahelan na dapat isipon. Kun, halimbawa, an sarong indibiduwal gumibo nin inmoral na mga pagdolok sa saro pang adulto, maninigo na mahimong labanan kan adultong iyan an mga pagdolok kaini. An mga aki mas madaling dayaon, ribarawon, o takoton. An Biblia nagtataram dapit sa kakulangan nin kadonongan nin aki. (Talinhaga 22:15; 1 Corinto 13:11) Ginamit ni Jesus an mga aki bilang halimbawa nin mapakumbabang pagkainosente. (Mateo 18:4; Lucas 18:​16, 17) Kabale sa pagkainosente nin aki an biyong kadaihan nin eksperyensia. An kadaklan na aki prangka, gustong-gustong makapaoyon, asin sa siring madaling maabuso nin nagpapakanang adulto na midbid asin pinagtitiwalaan ninda. Kun siring, may paninimbagan an kongregasyon sa atubangan ni Jehova na protehiran an mga aki na yaon dian.

An mga aki na marahay an pagkapatood tataong kumuyog asin tumao nin onra sa saindang mga magurang, sa kamagurangan, asin iba pang adulto. (Efeso 6:​1, 2; 1 Timoteo 5:​1, 2; Hebreo 13:7) Magigin nakakukubhan na karatan kun an saro sa mga personang ini na may autoridad gamiton sa salang paagi an inosenteng pagtitiwala kan aking iyan tanganing akiton o puersahon sia na tumogot sa seksuwal na mga gibo. An mga linupigan sa paaging ini sa parate dakol na taon na nasasakitan sa pagpanggana sa ibinubungang kakologan sa emosyon. Huli kaini, an nanlupig nin aki tatawan nin magabat na disiplina asin mga restriksion kan kongregasyon. Bakong an saiyang posisyon bilang persona na may autoridad an maninigong isipon kundi, imbes, an daing digta na kadalisayan kan kongregasyon.​—1 Corinto 5:6; 2 Pedro 3:14.

Kun odok na nagsosolsol an nanlupig nin aki, mimidbidon nia an kadonongan nin pag-aplikar kan mga prinsipyo sa Biblia. Kun sia tunay na nakanonood na ikabalde an maraot, kaoongisan nia an saiyang ginibo asin magmamaigot na likayan na maotro an saiyang kasalan. (Talinhaga 8:13; Roma 12:9) Dugang pa, seguradong pasasalamatan nia si Jehova huli sa kadakulaan kan Saiyang pagkamoot, na bilang resulta kaiyan an sarong nagkasala na nagsosolsol, arog nia, makasasamba pa giraray sa satong banal na Dios asin makalalaom na makabilang sa “mga matanos” na mag-eerok digdi sa daga sagkod lamang.​—Talinhaga 2:21.

[Nota sa Ibaba]

[Blurb sa pahina 28]

Minsan ngani pinatatawad ni Jehova an mga nagkasala na nagsosolsol, tibaad may mga epekto kan saindang gawe na dai malilikayan