“Magtao nin Orog Kisa Dating Atension”

“Kinakaipuhan na kita magtao nin orog kisa dating atension sa mga bagay na satong nadangog, tanganing dai kita noarin man ikaanod.”​—HEBREO 2:1.

1. Ipaheling kun paano an pagkadisturbo puedeng magresulta sa kapahamakan.

MGA 37,000 katawo an nagagadan sa mga aksidente sa auto kada taon sa Estados Unidos sana. An mga eksperto nagsasabi na an dakol sa mga aksidenteng ini puedeng nalikayan kutana kun an mga nagmamaneho nagin mas atento sa tinampo. An nagkapirang motorista nadidisturbo kan mga karatula asin paskilan o kan paggamit kan saindang cell phone. Yaon man an mga nagkakakan mantang sinda nagmamaneho. Sa gabos na situwasyon na ini, an pagkadisturbo puedeng magresulta sa kapahamakan.

2, 3. Ano an ikinonseho ni Pablo sa mga Kristianong Hebreo, asin taano ta angay an hatol nia?

² Haros 2,000 na taon bago naimbento an auto, may sinabi si apostol Pablo na sarong klase nin pagkadisturbo na ikinapahamak nin nagkapirang Kristianong Hebreo. Idinoon ni Pablo na an binuhay liwat na si Jesu-Cristo tinawan nin katongdan na mas halangkaw kisa gabos na anghel, ta sia pinatukaw sa too nin Dios. Dangan sinabi kan apostol: “Kaya ngani kinakaipuhan na kita magtao nin orog kisa dating atension sa mga bagay na satong nadangog, tanganing dai kita noarin man ikaanod.”​—Hebreo 2:1.

³ Taano ta kaipuhan kan mga Kristianong Hebreo na ‘magtao nin orog kisa dating atension sa mga bagay na nadangog’ may labot ki Jesus? Huli ta haros 30 taon na an uminagi poon kan maghale si Jesus sa daga. Mantang mayo an saindang Kagurangnan, an nagkapirang Kristianong Hebreo nagpoon na ianod parayo sa tunay na pagtubod. Sinda nadisturbo kan Judaismo, an saindang dating paagi nin pagsamba.

Kaipuhan Sindang Magtao nin Orog na Atension

4. Taano ta tibaad nasugotan na bumalik sa Judaismo an nagkapirang Kristianong Hebreo?

⁴ Taano ta tibaad masugotan kaidto an sarong Kristiano na bumalik sa Judaismo? Bueno, an sistema nin pagsamba sa irarom kan Ley may kaibang naheheling na mga bagay. Naheheling kan mga tawo an mga saserdote asin napaparong ninda an sinosolo na mga atang. Minsan siring, sa nagkapirang bagay an Kristianismo medyo napapalaen. An mga Kristiano igwa nin Halangkaw na Saserdote, si Jesu-Cristo, alagad tolong dekada na siang dai naheheling kaidto sa daga. (Hebreo 4:14) Igwa sinda nin templo, alagad an banal na lugar kaiyan iyo an langit mismo. (Hebreo 9:24) Bakong arog nin pisikal na pagturi sa irarom kan Ley, an Kristianong pagturi iyo “an sa puso paagi sa espiritu.” (Roma 2:29) Kun siring, para sa mga Kristianong Hebreo, an Kristianismo tibaad nagpoon na magin garo medyo abstrakto.

5. Paano ipinaheling ni Pablo na an sistema nin pagsamba na inintrodusir ni Jesus nakalalabi kisa pagsamba sa irarom kan Ley?

⁵ Kinaipuhan na marealisar kan mga Kristianong Hebreo an sarong bagay na mahalagang marhay manongod sa sistema nin pagsamba na inintrodusir ni Cristo. Iyan mas basado sa pagtubod kisa pakaheling, alagad ta nakalalabi iyan sa Ley na itinao paagi ki propeta Moises. “Kun an dugo nin mga kanding asin nin mga toro asin an abo nin bakang babae na iwinirik sa mga nadigtaan nagpapagin banal sagkod sa kalinigan kan laman,” an isinurat ni Pablo, “gurano pa daw kaorog na an dugo kan Cristo, na paagi sa daing katapusan na espiritu nagdolot kan saiyang sadiri na daing kanawayan sa Dios, malilinigan an satong mga konsensia sa gadan na mga gibo tangani kitang makatao nin sagradong paglilingkod sa nabubuhay na Dios?” (Hebreo 9:​13, 14) Iyo, an kapatawadan na makakamtan paagi sa pagtubod sa atang na pantubos ni Jesu-Cristo nakalalabing marhay sa dakol na paagi kisa kapatawadan na itinatao kan mga atang na idinodolot sa irarom kan Ley.​—Hebreo 7:26-28.

6, 7. (a) Ano an situwasyon kaya apurado na an mga Kristianong Hebreo ‘magtao nin orog kisa dating atension sa mga bagay na nadangog’? (b) Kan magsurat si Pablo sa mga Hebreo, gurano pa kadakol na panahon an natatada para sa Jerusalem? (Helingon an nota sa ibaba.)

⁶ Igwa nin saro pang dahelan kun taano ta kaipuhan kan mga Kristianong Hebreo na magtao nin estriktong atension sa mga bagay na nadangog manongod ki Jesus. Ihinula nia na lalaglagon an Jerusalem. Nagsabi si Jesus: “Madatong sa saimo an mga aldaw na an saimong mga kaiwal matogdok sa palibot mo nin kuta na may matarom na mga taldok asin lalaomon ka patin pasasakitan ka sa gabos na lado, asin ika asin an saimong mga aki dian sa saimo papasubsobon ninda sa daga, asin dai ka ninda tatadaan nin gapo sa ibabaw nin gapo, huli ta dai mo namansayan an panahon na ika sisiyasaton.”​—Lucas 19:​43, 44.

⁷ Noarin ini mangyayari? Dai ihinayag ni Jesus an aldaw asin oras. Imbes, itinao nia an instruksion na ini: “Kun maheling na nindo an Jerusalem na napalilibotan nin nagkakampong mga hukbo, dangan aramon nindo na harani na an paggaba sa saiya. Dangan an mga nasa Judea magpoon nang dumulag pasiring sa kabukidan, asin an mga nasa tahaw nia magruluwas, patin an mga nasa oma dai na magralaog sa saiya.” (Lucas 21:​20, 21) Durante kan 30 taon pakatapos na itaram iyan ni Jesus, an nagkapirang Kristiano sa Jerusalem nawaran kan saindang pakamate nin pagkaapurado asin nadisturbo. Garo man sana naparayo an saindang atension mantang nagmamaneho. Kun dai ninda itatanos an saindang kaisipan, segurado an kapahamakan. Baga man iniisip ninda iyan o dai, madali na an pagkalaglag kan Jerusalem!a Awot pa man na an konseho ni Pablo nagin pampagimata sa mga Kristiano sa Jerusalem na nagtutungka sa espirituwal.

Pagtao nin “Orog Kisa Dating Atension” Ngonyan

8. Taano ta kaipuhan kitang “magtao nin orog kisa dating atension” sa mga katotoohan sa Tataramon nin Dios?

⁸ Arog kan mga Kristiano kan enot na siglo, kaipuhan kitang “magtao nin orog kisa dating atension” sa mga katotoohan sa Tataramon nin Dios. Taano? Huli ta napapaatubang man kita sa nagdadangadang na kalaglagan, bakong nin saro sanang nasyon, kundi nin enterong sistema nin mga bagay. (Kapahayagan 11:18; 16:​14, 16) Siempre, dai ta aram an eksaktong aldaw asin oras kun noarin mahiro si Jehova. (Mateo 24:36) Minsan siring, naheheling mismo niato an kaotoban kan mga hula sa Biblia na malinaw na nagpapaheling na kita nabubuhay na sa “huring mga aldaw.” (2 Timoteo 3:1-5) Huli kaini, maninigo kitang magmaan tumang sa ano man na puedeng makadisturbo sa sato. Kaipuhan kitang magtao nin atension sa Tataramon nin Dios asin papagdanayon an listong pakamate nin pagkaapurado. Paagi sana sa paggibo kaiyan na kita magigin “mapanggana sa pagdulag sa gabos na ining bagay na nakatalagang mangyari.”​—Lucas 21:36.