Hapot Hali sa mga Parabasa

Kasuarin nagin Halangkaw na Saserdote si Jesus, asin igwa daw nin pagkakalain kun nuarin nagin balido an bagong tipan asin kun nuarin iyan pormal na naestablisar?

Ipinapahiling kan ebidensiya na nagin Halangkaw na Saserdote si Jesus kan bawtismuhan siya kan 29 C.E. Ano an ebidensiya? Kan bawtismuhan siya, iprinesentar ni Jesus an saiyang sadiri bilang atang sa altar kan “kabutan” nin Diyos. (Gal. 1:4; Heb. 10:5-10) Dahil nag-eeksister na an simbolikong altar puon pa kan bawtismuhan si Jesus, an dakulang espirituwal na templo—na nagrerepresentar sa areglo para sa dalisay na pagsamba ki Jehova basado sa pantubos—siguradong nagpuon man na mag-eksister kan panahon na idto. An altar mahalagang marhay na kabtang kan espirituwal na templong iyan.—Mat. 3:16, 17; Heb. 5:4-6.

Huling igwa na nin dakulang espirituwal na templo, kaipuhan na man nin halangkaw na saserdote para maglingkod diyan. Para mapaniguan an pangangaipong iyan, linahidan si Jesus nin “banal na espiritu saka tinawan nin kapangyarihan.” (Gibo 10:37, 38; Mar. 1:9-11) Pero paano kita nakakasigurado na ninombrahan si Jesus bilang Halangkaw na Saserdote bago siya magadan asin buhayon liwat? Makakakua kita nin nakakakumbinsir na dahilan pag pinag-ulayan ta an halimbawa ni Aaron asin kan mga kasalida niya na naglingkod bilang halangkaw na saserdote sa irarom kan Katugunan ni Moises.

Arog kan kahagadan sa Katugunan, an halangkaw na saserdote sana an puwedeng lumaog sa Kabanal-banali kan tabernakulo asin, pag-abot nin panahon, sa Kabanal-banali kan templo. Igwa nin kurtina na nagseserbing partisyon kan Kabanal-banali asin kan Banal. An halangkaw na saserdote minalagbas sa kurtinang iyan sa Aldaw nin Pagbayad sa Kasalan. (Heb. 9:1-3, 6, 7) Kun paanong si Aaron asin an mga kasalida niya linahidan bilang halangkaw na saserdote bago ‘makalagbas sa [literal na] kurtina’ kan tabernakulo, siguradong ninombrahan man si Jesus bilang Halangkaw na Saserdote kan dakulang espirituwal na templo ni Jehova bago siya magadan dangan ‘naglagbas sa kurtina, na iyo an saiyang laman’ pasiring sa buhay sa langit. (Heb. 10:20) Iyan an dahilan kaya sinambit ni apostol Pablo na si Jesus minadatong “bilang sarong halangkaw na saserdote” dangan minalaog “sa sarong mas importante asin mas marahay na tolda na bakong gibo nin mga kamot” asin pasiring “sa langit mismo.”—Heb. 9:11, 24.

Mayo nin pagkakalain kun nuarin nagin balido an bagong tipan asin kun nuarin iyan pormal na naestablisar. Taano? Kan magsakat si Jesus sa langit asin iprinesentar an saiyang perpektong buhay bilang tawo alang-alang sato, pinunan niya an prosesong nagpagin balido o legal kan bagong tipan. Pormal man na naestablisar kan prosesong iyan an tipan. Anong mga lakdang an kalabot sa prosesong iyan?

Inot, nagduman si Jesus sa atubangan ni Jehova; dangan, iprinesentar ni Jesus ki Jehova an halaga kan saiyang atang; asin ultimo, inako ni Jehova an halaga kan pinabulos na dugo ni Jesus. Sagkod na dai pa nagigibo an mga lakdang na iyan, dai pa magkakaepekto an bagong tipan.

Mayong sinasabi sa Bibliya kun nuarin an eksaktong petsa na inako ni Jehova an halaga kan atang ni Jesus. Kaya dai kita makakapagtao nin espesipikong petsa kun nuarin nagin balido an bagong tipan asin kun kasuarin iyan pormal na naestablisar. Minsan siring, aram ta na nagsakat si Jesus sa langit sampulong aldaw bago an Pentecostes. (Gibo 1:3) Sa sarong panahon durante kan halipot na peryodong iyan, iprinesentar niya an halaga kan saiyang atang ki Jehova, asin inako Niya iyan. (Heb. 9:12) An patunay na nagpupunsiyonar na an bagong tipan malinaw na nahiling sa nangyari kan Pentecostes 33 C.E. (Gibo 2:1-4, 32, 33) Kaya malinaw na establisado na asin nagpupunsiyonar na kan panahon na iyan an bagong tipan.

Bilang sumaryo, nagin balido asin naestablisar an bagong tipan pagkatapos na akuon ni Jehova an halaga kan pinabulos na dugo ni Jesus asin darahon an mga linahidan sa tipan na iyan. Dangan nagpunsiyonar na an tipan na diyan an Halangkaw na Saserdoteng si Jesus an naglilingkod bilang Tagapag-ultanan.—Heb. 7:25; 8:1-3, 6; 9:13-15.