“An Maogmang Bareta Kaipuhan na Ikahulit Nguna”
“Siring man, sa gabos na nasyon an maogmang bareta kaipuhan na ikahulit nguna.”—MARCOS 13:10.
1. Ano an sarong bagay na nagpapalaen kan mga Saksi ni Jehova sa gabos na relihiyon nin Kakristianohan, asin taano?
SA GABOS na naghihingakong Kristiano, mga Saksi ni Jehova sana an isinasaboot an paghuhulit kan maogmang bareta. Sinda sana an grupo na dian an kada miembro nakamamate nin personal na obligasyon na regular na dumanan an saiyang kataed tanganing kaolayon sia manongod sa mga katuyohan nin Dios. Taano daw? Huli ta para sa kada Saksi, bilang Kristiano, kaipuhan na sia magin parasunod sa lakad ni Cristo. (1 Pedro 2:21) Ano an ipinaririsa kaini?
2. Ano an pagheling nin dakol ki Jesu-Cristo, alagad ta ano an pangenot na gibohon nia sa daga?
2 Sa isip nin dakol, si Jesu-Cristo saro sanang tawo na naggibo nin marahay. Sia nagpaomay sa may helang, nagpakakan sa mga nagugutom, asin nagpaheling nin pagkamoot asin kabootan sa mga nangangaipo. Alagad ta labi pa dian an ginibo ni Jesus. Enot sa gabos sia mahigos na parahulit kan maogmang bareta kan Kahadean nin Dios. Pirang bulan pakatapos na sia mabautismohan sa salog nin Jordan, pinonan ni Jesus an paghuhulit sa publiko na: “Magsorolsol kamo, banwaan, huli ta an kahadean kan kalangitan harani na.” (Mateo 4:17) An tala ni Marcos nagsasabi: “Si Jesus nagduman sa Galilea, na naghuhulit kan maogmang bareta nin Dios asin nagsasabi: ‘An itinalaan na panahon naotob na, asin an kahadean nin Dios harani na. Magsorolsol kamo, banwaan, asin magtubod kamo sa maogmang bareta.’”—Marcos 1:14, 15.
3, 4. (a) Minsan ngani si Jesus nagpaomay sa gabos na klase nin helang, ano an idinoon nia sa saiyang ministeryo? (b) Taano ta isinugo si Jesus? (c) Sa ano ibinaing ni Jesus an saiyang paghuhulit, asin ano an ipinagboot niang gibohon kan saiyang mga disipulo?
3 Inapod ni Jesus si Pedro, Andres, Santiago, asin Juan na sumunod sa saiya, asin mababasa niato: “Dangan sia naglibot sa bilog na Galilea, na nagtotokdo sa saindang mga sinagoga asin naghuhulit kan maogmang bareta kan kahadean patin nagpapaomay kan gabos na klase nin kahelangan asin kan gabos na klase nin kamatean sa banwaan.” Kan pogolan sia kan mga kadaklan sa Galilea, sia nagsabi: “Kaipuhan na ipahayag ko sa iba pang mga siudad an maogmang bareta kan kahadean nin Dios, huli ta dahelan kaini na ako isinugo.” Dangan sia naghulit sa mga sinagoga sa Judea.—Mateo 4:18-23; Lucas 4:43, 44.
4 Sa pagbuwelta liwat sa Galilea, si Jesus “naglibot sa siudad-siudad asin baryo-baryo, na naghuhulit asin nagpapahayag kan maogmang bareta kan kahadean nin Dios.” (Lucas 8:1) Ibinaing nia an saiyang paghuhulit sa pag-ani asin nagsabi: “An anihon mahiwas, alagad an mga paraani kakadikit. Kaya makimaherak kamo sa Kagurangnan kan anihon na magsobol nin mga paraani sa saiyang anihon.” (Mateo 9:35-38) Dawa kan dai sia pinahihingalo nin mga kadaklan, “sia maboot na nag-ako sa sainda asin nagtaram sa sainda dapit sa kahadean nin Dios, asin pinaomayan nia an mga nangangaipo nin pagpaomay.”—Lucas 9:11.
5. Kan isugo ni Jesus an saiyang mga apostol asin iba pang disipulo sa ministeryo, anong mga instruksion an itinao nia sa sainda?
5 Totoo, pinaomayan ni Jesus an mga naghehelang asin may beses na pinakakan an mga nagugutom. Alagad orog sa gabos, sia sibot sa pagpahayag sa mga tawo kan Kahadean nin Dios. Asin boot nia na iyan man an gibohon kan saiyang mga parasunod. Kan matokdoan na an saiyang mga apostol, isinugo nia sinda nin manduwaduwa na maghulit, na sinasabi: “Sa pagduman nindo, maghulit kamo, na nagsasabi, ‘An kahadean kan kalangitan naghaharani na.’” (Mateo 10:7) Si Lucas nagsasabi: “Sinugo nia sinda tanganing ihulit an kahadean nin Dios asin magpaomay.” (Lucas 9:2) Sa 70 disipulo, itinao man ni Jesus an pagboot na ‘paomayan an mga naghehelang asin sabihan sinda na an kahadean nin Dios nagrani na.’—Lucas 10:9.
6. Bago sumakat sa langit, anong mga instruksion manongod sa saindang ministeryo an itinao ni Jesus sa saiyang mga parasunod?
6 Bago sumakat sa langit, pinagbotan ni Jesus an saiyang mga parasunod na ipagpadagos an paghuhulit asin pahiwason pa ngani iyan. Pinagbotan nia sinda: “Kaya paduman kamo asin gumibo kamo nin mga disipulo sa mga tawo kan gabos na nasyon . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) Dugang pa, sia nagsabi: “Kamo mag-aako nin kapangyarihan kun dumatong na saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi nin daga.” (Gibo 1:8) Kaya, si Jesus asin an saiyang mga apostol pareho nagtao nin pangenot na atension sa paghuhulit kan maogmang bareta kan Kahadean nin Dios.
An Kahadean na Ihuhulit sa Satong Panahon
7. Ano an isinabi ni Jesus manongod sa paghuhulit na gigibohon sa “pagtatapos kan palakaw nin mga bagay”?
7 Sa saiyang hula manongod sa mga mangyayari sa “pagtatapos kan palakaw nin mga bagay,” si Jesus nagsabi: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:3, 14) O, arog kan sinasabi sa Marcos 13:10: “Siring man, sa gabos na nasyon an maogmang bareta kaipuhan na ikahulit nguna.”—Helingon man an Kapahayagan 14:6, 7.
8. (a) Ano an kaiba sa maogmang bareta kaidtong panahon kan mga apostol? (b) Ano an kaiba ngonyan sa mensahe kan maogmang bareta?
8 Sa “huring mga aldaw,” mas dakol an kalabot sa Kahadean kisa kan nasa daga si Jesus. Si Jesus naghulit na an Kahadean harani na, na inaapod an atension sa bagay na sia nasa tahaw kan banwaan bilang an Mesiyas asin Hade. (2 Timoteo 3:1; Mateo 4:17; Lucas 17:21) An maogmang bareta na ihinulit kan enot na mga Kristiano kaiba an bagay manongod sa pagkabuhay liwat ni Jesus asin pagsakat sa langit, asin iyan nakadagka sa mga mahoyo na tumubod sa nagdadangadang na Kahadean. (Gibo 2:22-24, 32; 3:19-21; 17:2, 3; 26:23; 28:23, 31) Ngonyan na naabot na niato an “pagtatapos kan palakaw nin mga bagay,” kaiba sa paghuhulit kan maogmang bareta kan Kahadean an pambihirang mensahe na an Kahadean tinindog na sa kalangitan.—Kapahayagan 11:15-18; 12:10.
Siisay an Maghuhulit kan Maogmang Bareta?
9. (a) Paano puwedeng mangatanosan an iba na an paghuhulit kan maogmang bareta bakong obligasyon nin gabos na Kristiano ngonyan? (b) Siisay an ginamit ni Jehova kan mga nakaagi na maghulit kan saiyang tataramon, asin ano an kahulogan kaini para sa sato ngonyan?
9 Siisay, ngonyan, an maninigong makikabtang sa paghuhulit? Maliwanag na an Kakristianohan naghohona na iyan bakong obligasyon nin gabos, asin totoo na kan si Jesus magsabi na an maogmang bareta ihuhulit, dai nia isinabi nin espisipiko kun siisay an magibo kaiyan. Alagad ta, siisay pa an gagamiton ni Jehova para sa siring na gibohon kundi an mga nagturubod sa saiyang Tataramon asin nagpoon na gibohon iyan sa saindang buhay? Kan magdesisyon si Jehova kaidtong kaaldawan ni Noe na patanidan an maraot na kinaban nin katawohan manongod sa nagdadangadang na kalaglagan, ginamit nia an sarong tawo na “naglakaw sa kaibanan kan tunay na Dios.” (Genesis 6:9, 13, 14; 2 Pedro 2:5) Kan boot niang ipatao sa Israel an makahulang mga mensahe, isinugo nia an ‘saiyang mga lingkod, an mga propeta.’ (Jeremias 7:25; Amos 3:7, 8) An nagdusay na nasyon nin Israel nasyon nin saiyang mga saksi. (Exodo 19:5, 6; Isaias 43:10-12) Iyo, ginagamit ni Jehova an saiyang nagdusay na mga lingkod bilang saiyang mga saksi.
10. Paano maririsa sa pagkasabi kan Mateo 28:19, 20 na an pagboot na gumibo nin mga disipulo aplikado sa gabos na Kristiano?
10 May mga nagsasabi na an pagboot na gumibo nin mga disipulo, na itinao sa Mateo 28:19, 20, itinao sana sa mga apostol asin kun siring dai minaaplikar sa mga Kristiano sa pankagabsan. Alagad mangnoha an isinabi ni Jesus: “Kaya paduman kamo asin gumibo kamo nin mga disipulo sa mga tawo kan gabos na nasyon . . . na tokdoan nindo sinda na otobon an gabos na bagay na ipinagboot ko sa saindo.” Kaipuhan na tokdoan kan mga parasunod ni Jesus an bagong mga disipulo na otobon an gabos na ipinagboot ni Jesus. Asin an saro sa saiyang mga ipinagboot iyo an ‘paduman asin gumibo nin mga disipulo.’ Tunay na an gabos na bagong disipulo kaipuhan na tokdoan na otobon man an pagboot na ini.
11. (a) Ano an obligasyon kan kongregasyon Kristiano kaidtong enot na siglo? (b) Ano an kaipuhan tangani na an saro maligtas, asin ano an kaiba digdi?
11 An kongregasyon Kristiano kan enot na siglo inapod na ‘banwaan nin Dios para sa espesyal na pagkasadiri tanganing ipahayag ninda an mga kamurawayan kan saro na nag-apod sa sainda hale sa kadikloman pasiring sa saiyang makangangalas na liwanag.’ (1 Pedro 2:9) An mga miembro kaiyan mahigos na nagpatotoo sa Kahadean nin Dios. (Gibo 8:4, 12) An gabos na “banal,” linahidan na mga Kristiano, sa Roma sinabihan na “paagi sa ngoso na an saro nagpapahayag sa publiko para sa kaligtasan” asin “an gabos na nag-aapod sa ngaran ni Jehova maliligtas.” (Roma 1:7; 10:9, 10, 13) An pagpahayag na ini sa publiko para sa kaligtasan, na ginibo sa panahon kan pagpabautismo nin saro, kaiba man an paghuhulit sa publiko kan maogmang bareta kan Kahadean ni Jehova.
12, 13. (a) Ano an kaiba sa “hayag na pagtuga kan satong paglaom” na sinasabi sa Hebreo 10:23? (b) Paano ipinaheheling kan Salmo 96 an pangangaipo nin hayag na pagtuga sa luwas kan kongregasyon, asin paano ini sinusuportaran kan Kapahayagan 7:9, 10?
12 Si apostol Pablo nagsurat sa mga Kristianong Hebreo: “Mangapot kita nin posog sa hayag na pagtuga kan satong paglaom na daing pagduwaduwa, huli ta maimbod sia na nanuga.” (Hebreo 10:23) An hayag na pagtugang ini bako sanang sa mga pagtiripon kan kongregasyon. (Salmo 40:9, 10) Sa Salmo 96:2, 3, 10 malinaw na naheheling niato an makahulang pagboot na maghulit sa luwas kan kongregasyon, sa mga nasyon, sa mga tataramon na ini: “Sa aroaldaw ibalangibog nindo an maogmang bareta kan saiyang pagliligtas. Ipahayag nindo sa mga nasyon an saiyang kamurawayan, sa gabos na banwaan an saiyang makangangalas na mga gibo. Sabihon nindo sa tahaw kan mga nasyon: ‘Si Jehova mismo nagin hade.’” Tunay nanggad, sa Mateo 28:19, 20 asin Gibo 1:8, pinagbotan ni Jesus an mga Kristiano na maghulit sa mga nasyon.
13 An paghuhulit na ini sa publiko sinasabi sa dugang pang mga tataramon ni Pablo sa linahidan na mga Kristianong Hebreo: “Paagi sa saiya danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.” (Hebreo 13:15) Sa libro nin Kapahayagan, an “dakulang kadaklan,” na tinipon hale sa gabos na nasyon, naheling man na nagkukurahaw sa makosog na tingog: “Utang niato an kaligtasan sa satong Dios, na nagtutukaw sa trono, asin sa Kordero.” (Kapahayagan 7:9, 10) Kaya, sa panahon na ini kan pagtatapos kan palakaw nin mga bagay, an paghuhulit kan maogmang bareta ginigibo kan nagdusay na mga Saksi ni Jehova, an natatada sa espirituwal na mga tugang ni Cristo, asin kan saindang kairibang arog-karnero na minakompuwesto sa “dakulang kadaklan.” Alagad paano ninda aktuwal na gigibohon ini?
“Sa Publiko Asin sa Pagharongharong”
14. Saen ginibo ni Jesus an saiyang paghuhulit, asin anong prinsipyo an manonodan niato digdi?
14 Si Jesus direktang naghulit sa mga tawo. Halimbawa, mababasa niato na sia naghulit sa mga sinagoga. Taano? Huli ta an mga tawo nagtitiripon duman kun Sabbath asin naghihinanyog sa pagbasa asin pag-orolay sa Kasuratan. (Mateo 4:23; Lucas 4:15-21) Si Jesus naghulit man sa mga tawo na nasa gilid kan dalan, sa baybayon, sa bakilid, sa sarong bobon sa luwas nin siudad, asin sa mga harong. Saen man may tawo, si Jesus naghulit sa sainda.—Mateo 5:1, 2; Marcos 1:29-34; 2:1-4, 13; 3:19; 4:1, 2; Lucas 5:1-3; 9:57-60; Juan 4:4-26.
15. (a) Anong mga instruksion an itinao ni Jesus sa saiyang mga disipulo kan isugo nia sindang maghulit? (b) Paano ini ipinaliliwanag nin ibang komentarista sa Biblia?
15 Kan isugo ni Jesus an saiyang mga disipulo na maghulit, isinugo man nia sinda nin direkta sa mga tawo. Maheheling ini sa saiyang instruksion na nasusurat sa Mateo 10:1-15, 40-42. Sa bersikulo 11 sinabi nia: “Sa ano man na siudad o baryo kamo lumaog, hanapon nindo kun siisay dian an maninigo, asin magdanay kamo dian sagkod na kamo humale.” An The Jerusalem Bible isinalin an bersikulong ini na: “Ipaghapot an saro na mapaniniwalaan,” na garo baga an mga disipulo mahapot sa saro na prominente o may kaaraman sa banwaan tanganing aramon kun siisay an may marahay na dangog asin sa siring maninigong tawan kan mensahe. (Helingon man an Weymouth asin an King James Version.) Asin ini an paliwanag na itinatao nin pirang komentarista sa Biblia manongod sa bersikulo 11.
16. Anong mas basado sa katunayan na paghorophorop sa mga tataramon ni Jesus sa Mateo 10:11 an nagpaparisa kun paano hahanapon kan mga apostol an mga maninigo?
16 Minsan siring, maninigong girumdomon na sa kadaklan, an mga teologo nin Kakristianohan dai naghaharongharong, asin an dakol na komentarista sa Biblia may tendensia na interpretaron an Kasuratan basado sa saindang sadiring eksperyensia. An mas basado sa katunayan na paghorophorop sa instruksion ni Jesus nagpaparisa na sia nagtataram manongod sa paghanap kan saiyang mga disipulo sa mga tawo bilang indibiduwal, baga man sa pagharongharong o sa publiko, asin pag-atubang sa sainda kan mensahe kan Kahadean. (Mateo 10:7) An saindang reaksion magpaparisa kun baga sinda maninigo o bako.—Mateo 10:12-15.
17. Ano an nagpapatunay na an mga disipulo ni Jesus dai sana minasongko sa mga tawong maninigo basado sa rekomendasyon o pagnombra?
17 Maririsa ini sa mga tataramon ni Jesus sa Mateo 10:14: “Saen man an siisay man dai umako sa saindo o maghinanyog sa saindong mga tataramon, sa pagluwas nindo sa harong na iyan o sa siudad na iyan pagpagon nindo an kabokabo sa saindong mga bitis.” Si Jesus nagtataram manongod sa paggibo kan saiyang mga disipulo nin dai man iniimbitaran na pagsongko sa mga tawo tanganing hulitan sinda. Totoo, sinda makikidagos man sa saro sa mga harong na nag-ako kan mensahe. (Mateo 10:11) Alagad an pangenot na bagay iyo an paghuhulit. Sa Lucas 9:6 sinasabi: “Dangan sa pagpoon linibot ninda an teritoryo paghale sa sarong baryo pasiring sa sarong baryo, na nagpapahayag kan maogmang bareta asin naggigibo nin mga pagpaomay sa gabos na lugar.” (Helingon man an Lucas 10:8, 9.) An mga maninigo na nag-ako kan mga disipulo sa saindang harong bilang mga propeta, tibaad tinatawan sinda nin “sarong baso nin malipot na tubig” o pinaiistar pa ngani, dai mawawaran kan saindang balos. Madadangog ninda an mensahe kan Kahadean.—Mateo 10:40-42.
18, 19. (a) Sono sa Gibo 5:42, paano ginibo kan enot na mga Kristiano an saindang paghuhulit? (b) Paano an mga tataramon ni Pablo sa Gibo 20:20, 21 nagpapaheling na sia nagtataram manongod sa ministeryo sa mga daing pagtubod, bakong sa panlaog na gibong pagpapastor?
18 Pakatindoga kan kongregasyon Kristiano, mababasa niato manongod sa mga apostol: “Asin aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus.” (Gibo 5:42; helingon an Reference Bible, nota sa ibaba.) An mga tataramon sa Griego na isinalin na “sa harong-harong” kat’ oiʹkon. Digdi an ka·taʹ nasa sentido distributibo. Kaya masasabi na an paghuhulit kan mga disipulo idinistribuwir sa harong-harong. An ginigibo ninda bako sanang sosyal na mga pagdalaw na dati nang iinareglo. An kaagid na paggamit sa ka·taʹ yaon sa Lucas 8:1 sa mga tataramon na “sa siudad-siudad asin baryo-baryo.”
19 An kaparehong mga tataramon na nasa plural, kat’ oiʹkous, ginamit ni apostol Pablo sa Gibo 20:20. Dian sia nagsabi: “Dai ako nagpogol sa . . . pagtokdo sa saindo sa publiko asin sa pagharongharong.” An mga tataramon na “sa pagharongharong” isinasalin na “sa saindong harong” nin pirang traduksion. Kaya, an ibang komentarista sa Biblia kan Kakristianohan nagsasabi na an boot sabihon digdi ni Pablo mga pagsongko sa pagpastor sa harong nin mga may pagtubod. Alagad an sumunod na mga tataramon ni Pablo nagpapaheling na an sinasabi nia ministeryo sa mga daing pagtubod, huli ta sia nagsasabi: “Kundi lubos akong nagpatotoo sa mga Judio asin Griego manongod sa pagsolsol sa atubang nin Dios asin pagtubod sa satong Kagurangnan na si Jesus.”—Gibo 20:21.
20. (a) Gurano na kahiwas an ginibo kan mga Saksi ni Jehova na paghuhulit kan maogmang bareta kan Kahadean sa satong panahon? (b) Ano an tibaad magin punto-de-vista nin nagkapira manongod sa pagpapadagos kan paghuhulit?
20 Kaya an paaging ini nin pagduman sa mga tawo maninigong gamiton sa satong panahon na an “maogmang bareta kan kahadean” kaipuhan na ‘ihulit sa bilog na ineerokan na daga para sa pagpatotoo sa gabos na nasyon.’ (Mateo 24:14) Sa laog nin labi nang 65 taon, an mga Saksi ni Jehova mahigos na naghuhulit kan maogmang bareta kan napatindog nang Kahadean nin Dios sa publiko asin sa harong-harong—ngonyan sa 210 na kadagaan. Kanigoan kadakulang patotoo an nagigibo! Asin ini sa ibong kan bagay na an kadaklan ngonyan nakakadangog sa mensahe na “daing pagkuyog,” na an iba ngani nauuyam pa. (Mateo 13:15) Taano an mga Saksi ni Jehova ta nagpapadagos na maghulit sa mga lugar na an mga tawo habong maghinanyog o tinutumang pa ngani sinda? An hapot na ini sisimbagon sa minasunod na artikulo.
Ano an Isisimbag Nindo?
◻ Ano an ipinaheheling kan Kasuratan na lataw sa ministeryo ni Jesus?
◻ Anong mga pagdirehir an itinao sa mga apostol sa saindang ministeryo?
◻ Anong gibohon an kaipuhan na hamanon sa satong panahon, asin taano?
◻ Siisay an gagamiton ni Jehova na maghulit kan maogmang bareta sa satong kaaldawan?
◻ Saen asin paano gigibohon an paghuhulit?