Logod na Nungka Kitang Sumibog Pasiring sa Kalaglagan!
“Bako kita an klase na minasibog pasiring sa kalaglagan.” —HEBREO 10:39.
1. Anong mga kamugtakan an nagbunga kan pagpadaog ni apostol Pedro sa takot?
SEGURADONG nabigla an mga apostol kan sabihan sinda kan saindang namomotan na marhay na Kagurangnan, si Jesus, na sinda gabos magkakasuruwaysuway asin babayaan sia. Paano mangyayari an siring na bagay—sa oras na ini na pinakadakula an pangangaipo nia? Nag-insistir si Pedro: “Dawa pa masingkog an gabos na iba pa, pero ako dai.” An totoo, si Pedro maisog, pusoan na lalaki. Alagad kan si Jesus pasaloiban asin arestaron, an mga apostol—pati si Pedro—nagkasuruwaysuway. Pagkatapos, kan si Jesus inuusisa sa harong ni Halangkaw na Saserdote Caifas, si Pedro hadit na nag-istambay sa patyo. Mantang luway-luway na nag-aagi an mga oras kan malipot na bangging idto, posibleng natakot si Pedro na tibaad gadanon si Jesus asin an siisay man na kaibaiba nia. Kan si Pedro mamidbid nin nagkapirang miron bilang saro sa dayupot na kaibaiba ni Jesus, nataranta sia. Tolong beses niang nenegaran an koneksion nia ki Jesus. Nagdehar pa ngani si Pedro na midbid nia sia!—Marcos 14:27-31, 66-72.
2. (a) Taano an may pagkamatatakton na iginawe ni Pedro kan bangging inarestar si Jesus ta dai sia ginibong saro sa “klase na minasibog”? (b) Ano an maninigong magin determinasyon niato?
2 Idto pinakamaluyang parte sa buhay ni Pedro, panahon na daing duda na pinagbasolan nia sa natatada pang mga aldaw kan saiyang buhay. Alagad ginibo daw si Pedro na matalaw kan iginawe nia kan bangging idto? Ginibo daw sia kaiyan na saro sa “klase” na kan huri sinabi ni apostol Pablo kan sia sumurat: “Ngonyan bako kita an klase na minasibog pasiring sa kalaglagan”? (Hebreo 10:39) An kadaklan sa sato posibleng umoyon na an mga sinabi ni Pablo dai aplikado ki Pedro. Taano? Huli ta an pagkatakot ni Pedro temporaryo sana, madali sanang pagkasala sa buhay na midbid sa pambihirang kosog nin boot asin pagtubod. Siring man, an dakol sa sato may mga panahon sa satong nakaagi na nagigirumdoman niato na may kadikit na pagkasupog, mga panahon na naenotan kita nin takot asin napogolan kita na pusoan na manindogan para sa katotoohan nin siring sa mawot niato kutana. (Ikomparar an Roma 7:21-23.) Makasisierto kita na an siring na madali sanang mga pagkasala dai kita ginigibong an klase na minasibog pasiring sa kalaglagan. Pero, kaipuhan na magin determinado kita na nungka na magin an klaseng iyan. Taano? Asin paano niato malilikayan an pagigin siring na tawo?
An Kahulogan kan Pagsibog Pasiring sa Kalaglagan
3. Paano an mga propetang si Elias asin Jonas nagpadaog sa takot?
3 Kan si Pablo magsurat manongod sa “klase na minasibog,” an boot niang sabihon bakong an mga tibaad sa madali sana mawaran nin kosog nin boot. Seguradong aram ni Pablo an eksperyensia ni Pedro asin an kaagid na iba pang mga pangyayari. Si Elias, sarong pusoan asin prangkang propeta, sarong beses nagpadaog sa takot asin duminulag tanganing iligtas an saiyang buhay huli sa huma kan maraot na si Reyna Jezabel na sia gagadanon. (1 Hade 19:1-4) An propetang si Jonas nagkaigwa nin mas seryosong atake nin takot. Idinestino sia ni Jehova na magbiahe pasiring sa midbid na madahas, maraot na siudad nin Ninive. Si Jonas tolos na nagsakay sa barko na pasiring sa Tarsis—3,500 kilometros an rayo sa ibong na direksion! (Jonas 1:1-3) Pero, ni an duwang fiel na propetang ini ni si apostol Pedro dai masasabing an klase na minasibog. Taano ta dai?
4, 5. (a) Paano kita tinatabangan kan konteksto na maaraman kun ano an boot sabihon ni Pablo sa “kalaglagan” sa Hebreo 10:39? (b) Ano an boot sabihon ni Pablo kan sabihon nia: “Bako kita an klase na minasibog pasiring sa kalaglagan”?
4 Mangnoha an bilog na frase na ginamit ni Pablo: “Ngonyan bako kita an klase na minasibog pasiring sa kalaglagan.” Ano an boot niang sabihon sa “kalaglagan”? An termino sa Griego na ginamit nia kun beses nanonongod sa daing sagkod na kalaglagan. An pakahulogan na ini tamang-tama sa konteksto. Nagpatanid pa sana si Pablo: “Kun maggibo kita nin tuyong pagkakasala pakatapos na maako niato an tamang kaaraman sa katotoohan, mayo na nin natatadang atang para sa mga kasalan, kundi yaon an siertong makatatakot na paghalat nin silot asin yaon an naglalaad na pag-imon na matunaw sa mga tumang.”—Hebreo 10:26, 27.
5 Kaya kan sabihon ni Pablo sa saiyang mga kapagtubod na, “Bako kita an klase na minasibog pasiring sa kalaglagan,” an boot niang sabihon sia saka an fiel na Kristianong mga nagbabasa sa surat nia determinado na nungka na bayaan si Jehova asin pumondo sa paglilingkod sa saiya. An paggibo nin siring daing ibang ibubunga kundi daing sagkod na kalaglagan. Si Judas Iscariote saro na suminibog pasiring sa siring na kalaglagan, arog kan iba pang mga kaiwal kan katotoohan na tuyong tinumang an espiritu ni Jehova. (Juan 17:12; 2 Tesalonica 2:3) An mga indibiduwal na iyan kabilang sa “mga matalaw” na magdudusa nin daing sagkod na kalaglagan sa simbolikong danaw nin kalayo. (Kapahayagan 21:8) Dai, habo niato na mapabilang sa klaseng iyan noarin man!
6. Ano an gustong ipagibo sa sato ni Satanas na Diablo?
6 Gusto ni Satanas na Diablo na kita sumibog pasiring sa kalaglagan. Eksperto sa “tusong mga gibo,” aram nia na an siring na kapahapahamak na dalan parateng minapoon sa saradit na paagi. (Efeso 6:11, nota sa ibaba) Kun dai naootob nin direktang paglamag an saiyang mga katuyohan, hinihingoa niang luway-luway na raoton an pagtubod nin tunay na mga Kristiano paagi sa mas pairarom na mga paagi. Gusto niang papondohon sa pagtaram an pusoan, maigot na mga Saksi ni Jehova. Helingon niato kun anong mga taktika an ginamit nia tumang sa Hebreong mga Kristiano na sinuratan ni Pablo.
Kun Paano Ginipit an mga Kristiano na Sumibog
7. (a) Ano an kasaysayan kan kongregasyon sa Jerusalem? (b) Ano an yaon na espirituwal na mga kamugtakan sa kaso kan nagkapira na nagbabasa sa surat ni Pablo?
7 Ipinaririsa kan ebidensia na isinurat ni Pablo an surat nia sa mga Hebreo kaidtong mga 61 C.E. Purisaw na marhay an kasaysayan kan kongregasyon sa Jerusalem. Pagkagadan ni Jesus, uminabot nin bigla an madahas na paglamag, kaya napiritan an dakol na Kristiano sa siudad na magkasuruwaysuway. Minsan siring, suminunod an sarong panahon na may katoninongan, na nagtogot na dumakol an mga Kristiano. (Gibo 8:4; 9:31) Sa pag-agi nin mga taon, abot-abot an iba pang mga paglamag asin kasakitan. Minalataw na kan isurat ni Pablo an surat nia sa mga Hebreo, an kongregasyon nag-aagi na naman sa panahon nin limitadong katoninongan. Pero, may mga sakit pa man giraray. Haros tolong dekada na an nakaagi poon kan ihula ni Jesus an pagkalaglag kan Jerusalem. Posible na may nagkapira na naghohona na an katapusan sobra na kaatrasado asin tibaad dai na dumatong sa panahon na sinda nabubuhay. An iba, nangorogna an mga mas bago sa pagtubod, dai pa nababalo nin grabeng paglamag asin kadikit an aram manongod sa pangangaipo nin pakatagal sa irarom nin pagbalo. (Hebreo 12:4) Seguradong hiningoa ni Satanas na aprobetsaran an siring na mga kamugtakan. Anong “tusong mga gibo” an ginamit nia?
8. Ano an aktitud nin dakol na Judio manongod sa bagohan na Kristianong kongregasyon?
8 Pinagmenus kan Judiong komunidad sa Jerusalem asin Judea an bagohan na Kristianong kongregasyon. Kun hehelingon an laog kan surat ni Pablo, magkakaideya kita sa mga pagduhagi sa mga Kristiano kan arogante, Judiong mga namomoon sa relihion asin kan mga parasunod ninda. Tibaad garo man sana sinabi ninda: ‘Yaon sa samo an dakulang templo sa Jerusalem, na dakol nang siglong nag-eeksister! Igwa kami nin nobleng halangkaw na saserdote na nangengenot sa seremonya duman, kaiba an saiyang katabang na mga saserdote. Aroaldaw na idinodolot an mga atang. Yaon sa samo an Ley, na ipinaabot ki Moises paagi sa mga anghel asin inestablisar na may makangingirhat na mga paheling sa Bukid nin Sinai. An putot pang sektang ini, an mga Kristianong ini, na nag-apostatar sa Judaismo, mayo sinda kan mga bagay na ini!’ Nagkaepekto daw an siring na pagtuya? Minalataw na napurisaw kan siring na mga atake an nagkapirang Hebreong Kristiano. Tinabangan sinda kan surat ni Pablo sa tamang-tamang panahon.
Kun Taano ta Maninigo na Nungka Sindang Sumibog Pasiring sa Kalaglagan
9. (a) Anong tema an lakop sa surat sa mga Hebreo? (b) Sa anong sentido na an mga Kristiano naglilingkod sa mas marahay na templo kisa yaon sa Jerusalem?
9 Siyasaton niato an duwang dahelan na itinao ni Pablo sa saiyang mga tugang na lalaki saka babae duman sa Judea na nungkang sumibog pasiring sa kalaglagan. An enot—an pakalabi kan Kristianong sistema nin pagsamba—lakop sa surat sa mga Hebreo. Sa bilog niang surat, detalyadong ipinaliwanag ni Pablo an temang ini. An templo sa Jerusalem kopya sana nin mas dakula nanggad na tunay na bagay, an espirituwal na templo ni Jehova, sarong edipisyo na “bakong gibo nin mga kamot.” (Hebreo 9:11) An mga Kristianong idto igwa kan pribilehio na maglingkod sa espirituwal na areglong idto para sa dalisay na pagsamba. Sinda naglilingkod sa irarom nin mas marahay na tipan, an haloy nang ipinanugang bagong tipan, na an Parapangoltanan nakalalabi ki Moises, si Jesu-Cristo.—Jeremias 31:31-34.
10, 11. (a) Taano an linahe ni Jesus ta dai nagdiskualipikar sa saiyang paglilingkod bilang Halangkaw na Saserdote sa espirituwal na templo? (b) Sa anong mga paagi na si Jesus Halangkaw na Saserdote na nakalalabi sa naglilingkod sa templo sa Jerusalem?
10 An mga Kristianong idto mas marahay man na marhay an Halangkaw na Saserdote, si Jesu-Cristo. Dai, dai sia guminikan ki Aaron. Imbes, sia Halangkaw na Saserdote “segun sa orden ni Melquisedec.” (Salmo 110:4) Si Melquisedec, na dai nakarekord an linahe, hade sa suanoy na Salem saka halangkaw na saserdote kaiyan. Sa siring sia angay na makahulang tipo ni Jesus, na an pagkasaserdote depende, bakong sa ano man na bakong sangkap na mga apoon na tawo, kundi sa sarong bagay na mas dakulang marhay—an mismong sumpa ni Jehova Dios. Arog ni Melquisedec, si Jesus naglilingkod bako sanang bilang Halangkaw na Saserdote kundi bilang Hade man, saro na nungkang magagadan.—Hebreo 7:11-21.
11 Apuera kaini, bakong arog kan halangkaw na saserdote sa templo sa Jerusalem, si Jesus dai kaipuhan na magdolot nin mga atang taon-taon. An atang nia iyo an sadiri niang sangkap na buhay, na idinolot nia “nin sararoan sana.” (Hebreo 7:27) An gabos na atang na idinolot sa templo mga anino sana, ladawan kan idinolot ni Jesus. An saiyang sangkap na atang nagtao kan probisyon na tunay na kapatawadan kan mga kasalan nin gabos na tuminubod. Nakaoogma man an mga komento ni Pablo na nagpapaheling na an Halangkaw na Saserdoteng ini iyo man sana an dai nagliliwat na si Jesus na namidbid kan mga Kristiano sa Jerusalem. Sia mapakumbaba, maboot, asin saro na “makakapakidamay sa satong mga kaluyahan.” (Hebreo 4:15; 13:8) An linahidan na mga Kristianong idto may esperansang maglingkod bilang mga katabang na saserdote ni Cristo! Paano ninda iisipon man lamang na sumibog pasiring sa “maluya asin dukhang” mga bagay kan marigsok na Judaismo?—Galacia 4:9.
12, 13. (a) Anong ikaduwang dahelan na nungka na sumibog an itinao ni Pablo? (b) Taano an nakaagi nindang rekord nin pakatagal ta makaparirigon sa boot kan Hebreong mga Kristiano na nungka na sumibog pasiring sa kalaglagan?
12 Garo baga kulang pa iyan, an mga Hebreo tinawan ni Pablo nin ikaduwang dahelan na nungka na sumibog pasiring sa kalaglagan—an sadiri nindang rekord nin pakatagal. Isinurat nia: “Padagos nindong girumdomon an nakaaging mga aldaw kan, pakatapos na kamo maliwanagan, kamo nagtagal nin dakulang pakilaban sa irarom nin mga pagdusa.” Ipinagirumdom sa sainda ni Pablo na sinda ‘iinatubang na garo sa sarong teatro’ sa mga pag-olog-olog asin kahorasaan. An nagkapira nabilanggo; an iba nakidamay saka nagsuportar sa mga nasa bilanggoan. Iyo, nagpaheling sinda nin arogan na pagtubod asin pagmamaigot. (Hebreo 10:32-34) Pero, taano ta hinagad sa sainda ni Pablo na ‘padagos na girumdomon’ an makokolog na eksperyensiang iyan? Bako daw na iyan magigin nakapanluluya sa boot?
13 Al kontraryo, an ‘paggirumdom sa nakaaging mga aldaw’ mapagirumdom sa mga Hebreo kun paano sinda inataman ni Jehova sa irarom nin pagbalo. Sa tabang nia, napaglabanan na ninda an dakol sa mga pagsalakay ni Satanas. Isinurat ni Pablo: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” (Hebreo 6:10) Iyo, nagigirumdoman ni Jehova an gabos nindang fiel na ginibo, na tinitipon iyan sa saiyang memorya na daing limite. Ipinagigirumdom kaini sa sato an sadol ni Jesus na magtipon nin mga kayamanan sa langit. Mayo nin parahabon na mahahabon an mga kayamanan na ini; mayo nin polilya o takla na makararaot kaiyan. (Mateo 6:19-21) Sa katunayan, mararaot sana an mga kayamanan na ini kun an Kristiano sumibog pasiring sa kalaglagan. Sasayangon kaiyan an ano man na kayamanan na natipon nia sa langit. Abaa kamapuersang dahelan an itinao ni Pablo sa Hebreong mga Kristiano na nungka na sundon an siring na dalan! Taano ta sasayangon an gabos na taon ninda sa fiel na paglilingkod? Tama asin mas marahay nanggad na magpadagos sa pagtagal.
Kun Taano ta Maninigo na Nungka Kitang Sumibog Pasiring sa Kalaglagan
14. Anong mga kadepisilan an inaatubang niato na kaagid kan mga inatubang kan mga Kristiano kan enot na siglo?
14 An tunay na mga Kristiano ngonyan may arog man kaiyan kamapuersang mga dahelan sa dai pagsibog. Enot, girumdomon niato kun gurano kadakulang bendisyon an yaon sa sato na dalisay na paagi nin pagsamba na itinao sa sato ni Jehova. Arog kan mga Kristiano kan enot na siglo, nabubuhay kita sa panahon na an mga miembro kan mas popular na mga relihion kinukusmodan kita asin tinutuyatuya kita, na may pagpalangkaw na itinotokdo an saindang nakagugulat na relihiosong mga edipisyo asin an pagkasuanoy kan saindang mga tradisyon. Pero, inaasegurar kita ni Jehova na oyon sia sa satong paagi nin pagsamba. Sa katunayan, may mga bendisyon sa sato ngonyan na mayo sa mga Kristiano kan enot na siglo. Tibaad isipon nindo, ‘Paano mangyayari iyan?’ Total, nabuhay sinda kan magpoon na magpunsionar an espirituwal na templo. Si Cristo nagin Halangkaw na Saserdote kaiyan kan sia mabautismohan kan 29 C.E. An nagkapira sa sainda naheling an nagmimilagrong Aki nin Dios. Dawa pagkagadan nia, may mga milagro pa. Pero, siring sa ihinula, an siring na mga balaog sa kahurihurihi uminontok.—1 Corinto 13:8.
15. An tunay na mga Kristiano ngonyan nabubuhay sa panahon kan kaotoban nin anong hula, asin ano an kahulogan kaiyan para sa sato?
15 Minsan siring, nabubuhay kita sa panahon nin dakulang kaotoban kan mahiwas an sakop na hula sa templo kan Ezequiel kapitulo 40-48.a Sa siring, naheling niato an pagbabalik kan areglo nin Dios para sa dalisay na pagsamba. An espirituwal na templong iyan nalinigan na kan gabos na klase nin relihiosong polusyon saka idolatriya. (Ezequiel 43:9; Malaquias 3:1-5) Isip-isipa an mga bentaha na itinao sa sato kan paglinig na ini.
16. Anong nakapanluluya sa boot na dalagan nin mga bagay an inatubang kan mga Kristiano kan enot na siglo?
16 Kaidtong enot na siglo, garo baga mamondo an ngapit para sa organisadong Kristianong kongregasyon. Ihinula ni Jesus na an mangyayari garo sinabwagan nin doot an oma nin trigo na bagong tanoman, kaya an trigo haros dai mamidbid an kalaenan sa doot. (Mateo 13:24-30) Asin iyan man nanggad an nangyari. Kaidtong katapusan kan enot na siglo, kan an gurang nang si apostol Juan nagseserbing pangultimong pan-olang sa pagkaraot, maoswag na an apostasiya. (2 Tesalonica 2:6; 1 Juan 2:18) Dai nahaloy pagkagadan kan mga apostol, naglataw an siblag na grupong klero, na nan-aapi sa aripompon asin nagsusulot nin napapalaen na gubing. An apostasiya luminakop na garo gangrena. Abaa kanakapanluluya sa boot para sa fiel na mga Kristiano! Naheling ninda na an bagong maestablisar na areglo sa dalisay na pagsamba pinangibabawan nin raot na klase. Nangyari ini mayo pang sarong siglo pagkapundar ni Cristo sa kongregasyon.
17. Sa anong sentido na an Kristianong kongregasyon sa presenteng aldaw mas matagal kisa kapareho kaiyan kan enot na siglo?
17 Ngonyan, estudyare an pagkakalaen. Ngonyan, an dalisay na pagsamba mas haloy na an ilinawig kisa kan peryodo sagkod na magadan an mga apostol. Poon kan panahon na ipublikar an enot na isyu kan magasin na ini kaidtong 1879, binendisyonan kita ni Jehova nin orog na dinadalisay na pagsamba. Si Jehova asin si Cristo Jesus naglaog sa espirituwal na templo kan 1918 sa katuyohan na linigan iyan. (Malaquias 3:1-5) Poon kan 1919, progresibong pinakakarhay an areglo sa pagsamba ki Jehova Dios. Nagin mas malinaw an pakasabot niato sa mga hula saka prinsipyo sa Biblia. (Talinhaga 4:18) Kiisay an kaomawan? Bakong sa mga tawo sanang bakong sangkap. Solamente si Jehova, kaiba an saiyang Aki bilang Payo kan kongregasyon, an makapoprotehir sa Saiyang banwaan tumang sa pagkaraot durante kan maraot na mga panahon na ini. Kun siring, nungka kitang magkulang sa pagpasalamat ki Jehova sa pagtogot sa sato na makikabtang sa dalisay na pagsamba ngonyan. Asin magin desidido nanggad kita na nungka na sumibog pasiring sa kalaglagan!
18. Ano an dahelan niato na nungka na sumibog pasiring sa kalaglagan?
18 Arog kan Hebreong mga Kristianong idto, may ikaduwa kitang dahelan sa paghabo sa matalaw, nagsisibog na paggawe—an sadiri niatong rekord nin pakatagal. Baga man nagpoon kitang maglingkod ki Jehova sa nakaagi pa sanang mga taon o fiel na ginigibo iyan sa laog nin dakol nang dekada, kita nakagibo nin rekord nin Kristianong mga gibo. An dakol sa sato nag-agi nin paglamag, baga man iyan pagkabilanggo, pagprohibir, kabangisan, o pagkawara nin rogaring. An dakol pa napaatubang sa oposisyon kan pamilya, pagtuya, pag-olog-olog, asin pagkaindiperente. Kita gabos nagtagal, na nagpapadagos sa satong fiel na paglilingkod ki Jehova sa ibong nin mga kadepisilan saka pagbalo sa buhay. Sa paggibo kaiyan, kita nakagibo nin rekord nin pagmamaigot na dai lilingawan ni Jehova, sarong tambobong nin mga kayamanan sa langit. Daing duwa-duwa, kun siring, bako ini an panahon na sumibog pasiring sa maraot na daan na sistema na binayaan niato! Taano ta gigibohon na daing kamanungdanan an gabos niatong paghigos? Ini nangorognang totoo ngonyan, na “kadikiton na panahon” na sana an natatada bago an katapusan.—Hebreo 10:37.
19. Ano an pag-oolayan sa sunod niatong artikulo?
19 Iyo, magin kitang desidido na “bako kita an klase na minasibog pasiring sa kalaglagan”! Imbes, magin kita “an klase na may pagtubod.” (Hebreo 10:39) Paano niato masisierto na makatama kita sa paglaladawan na iyan, asin paano niato matatabangan an mga kapwa niato Kristiano na iyo man an gibohon? An bagay na ini an eestudyaran kan sunod niatong artikulo.
[Nota sa Ibaba]
Nagigirumdoman daw Nindo?
◻ Ano an boot sabihon kan pagsibog pasiring sa kalaglagan?
◻ Ano an mga nangigipit sa Hebreong mga Kristiano na sinuratan ni Pablo?
◻ Anong mga dahelan sa dai pagsibog pasiring sa kalaglagan an itinao ni Pablo sa mga Hebreo?
◻ Ano an mga dahelan niato sa pagigin desidido na nungka na sumibog pasiring sa kalaglagan?
[Mga retrato sa pahina 15]
An temporaryong pagkatakot ni Pedro dai sia ginibong saro sa “klase na minasibog pasiring sa kalaglagan”