Siisay an Nasa Likod kan Gabos na Iyan?

MANTANG naghahanap nin maaagihan sa kadlagan sa Cambodia, si Henri Mouhot, sarong eksplorador na Pranses kan ika-19 siglo, nakaabot sa sarong mahiwas na trintsera sa palibot nin sarong templo. Mga sarong kilometro hale sa saiyang namumugtakan, yaon an limang torre kan templo na labing 60 metros an langkaw. Iyan an Angkor Wat, an pinakadakulang relihiosong monumento digdi sa daga. Natagalan na kaiyan an maraot na mga kamugtakan nin panahon sa laog nin pitong siglo kan iyan madiskobre ni Mouhot.

Masasabi ni Mouhot sa pagsalimbad na an mga estrukturang napapatos nin lumot gibo nin tawo. “Itinogdok nin sarong suanoy na Michelangelo, iyan mas grande kisa sa arin man na natatadang edipisyo kan Grecia o Roma,” an isinurat nia. Apisar na inabandonar na iyan sa laog nin dakol na siglo, mayo sia nin duda na sa likod kan kahangahangang mga estruktura, igwa nin sarong kagdisenyo.

Interesante nanggad, an sarong libro nin kadonongan na isinurat kaidtong pirang siglo na an nakaagi naggamit kan kaagid na pangangatanosan tanganing ipaliwanag kun taano an kinaban na nasa palibot niato ta produkto nanggad nin sarong Kagdisenyo. Iyan linalang nanggad. Si apostol Pablo nagsurat: “Siempre, an lambang harong igwa nin kaggibo, alagad an naggibo kan gabos na bagay iyo an Dios.” (Hebreo 3:4) Tibaad dai umoyon an iba sa pagbabaing na ini, na nagsasabi: ‘An pagpunsionar kan naturalesa laen man sa gibo nin tawo.’ Minsan siring, bakong gabos na sientista minaoyon sa pagsayumang iyan. Pakatapos admitiron na an “biokemikal na mga sistema mayo nin buhay na mga bagay,” si Michael Behe, asosyadong propesor nin biokemika sa Unibersidad nin Lehigh, naghapot: “Puede daw na magdisenyo nin may buhay na biokemikong mga sistema sa intelihenteng paagi?” Sinabi pa nia na an mga sientista nagdidisenyo na ngonyan nin pundamental na mga pagbabago sa nabubuhay na mga organismo paagi sa mga metodo na arog kan henetikong pag-inhenyero. Malinaw nanggad, kapwa an mayong buhay asin buhay na mga bagay puedeng disenyohon asin gibohon! Sinisiyasat an mikroskopikong kinaban nin nabubuhay na mga selula, ipinaliliwanag ni Behe an makangangalas na komplikadong mga sistema na kompuesto nin mga kabtang na nagdedepende sa lambang saro tanganing magpunsionar. An saiyang konklusyon? “An resulta kan progresibong mga paghihingoang ini na estudyaran an selula​—na estudyaran an buhay sa molekular na kamugtakan—​sarong makosog, malinaw, klarong marhay na kurahaw na may ‘nagdisenyo’ kaiyan!”

An mga kosmologo asin pisiko nagkaigwa man nin hararom na pag-adal sa kinaban saka sa uniberso asin nakadiskobre nin nagkapirang nakasosorpresang katunayan. Halimbawa, aram na ninda ngonyan na kun nagkaigwa nin dawa saditon na pagbabago sa kalkuladong numero kan arin man na mga constant sa uniberso, mayo kutanang buhay sa uniberso.a An kosmologong si Brandon Carter inapod an mga katunayan na ini na nakasosorpresang mga pagkanorongod. Alagad kun mapaatubang kamo sa sunod-sunod na misteryoso, magkakoronektar na mga pagkanorongod, dai daw kamo kisuerra masuspetsa na igwang nasa likod kaiyan?

Tunay nanggad, igwa nin Kagdisenyo sa likod kan gabos na komplikadong sistema asin eksakto an pagkaareglar na “mga pagkanorongod” na ini. Siisay? “An sabihon sa sientipikong mga paagi kun siisay an kagdisenyo puedeng magin depisilon,” an inaadmitir ni Propesor Behe, asin ipinabaya nia an hapot na probaran na simbagon kan “pilosopiya asin teolohiya.” Kamo personalmente tibaad magsaboot na an hapot daing koneksion sa saindo. Minsan siring, kun kamo makaresibi nin sarong magayon an pagkapatos na parsel na pano kan mismong kaipuhan nindo, dai daw nindo mamawoton na aramon kun siisay an nagpadara kaiyan sa saindo?

Kita garo man sana nakaresibi nin siring na parsel​—sarong parsel na pano nin marahayon na mga regalo na nagpapangyari na kita mabuhay asin maogma sa buhay. An parsel na iyan iyo an daga, kaiba an gabos na pambihirang sistema kaiyan para sa pagsustenir sa buhay. Bako daw na maninigo niatong aramon kun siisay an nagtao sa sato kan mga regalong ini?

Makaoogma, an Nagpadara kan parsel may ilinaag na surat dian. An “surat” iyo an suanoy na librong iyan nin kadonongan na kinotar kasubago​—an Biblia. Sa introduksion kaiyan, sinisimbag kan Biblia nin pambihira kasimple asin kaklaro an hapot kun siisay an nagtao sa sato kan parsel: “Sa kapinonan linalang nin Dios an kalangitan asin daga.”​—Genesis 1:1.

Sa saiyang “surat” ipinamimidbid kan Kaglalang an saiyang sadiri paagi sa ngaran: “Iyo ini an isinabi kan tunay na Dios, si Jehova, an Kaglalang kan kalangitan . . . , an Saro na nagpapamugtak sa daga asin sa mga bunga kaiyan, an Saro na nagtatao nin hinangos sa mga tawong nag-eerok dian.” (Isaias 42:5) Iyo, Jehova an ngaran kan Dios na nagdisenyo kan uniberso asin naggibo sa mga lalaki asin babae digdi sa daga. Alagad siisay si Jehova? Anong klaseng Dios sia? Asin taano ta maninigong maghinanyog sa saiya an gabos na tawo sa daga?

[Nota sa ibaba]

[Retrato sa pahina 3]

An Angkor Wat itinogdok nin mga tawo

[Retrato sa pahina 4]

Kun kamo makaresibi nin regalo, habo daw nindong maaraman kun siisay an nagpadara kaiyan?