Sa mga Kristianong Hebreo kan enot na siglo, si apostol Pablo nagsurat: “Igwa pang natatada na pagpahingalo sa sabbath para sa banwaan nin Dios. Huli ta an luminaog na sa kapahingaloan nin Dios nagpahingalo na man sa saiyang sadiring mga gibo, arog kan ginibo nin Dios. Kun siring gibohon niato an satong pinakamakakaya na makalaog sa kapahingaloan na iyan.”​—Hebreo 4:9-11.

Kun babalikan an mga tataramon ni Pablo sa Hebreo, maririsa ta na sinabi nia na “igwa pang natatada na pagpahingalo sa sabbath para sa banwaan nin Dios,” asin sinadol nia an saiyang mga kapwa Kristiano na gibohon an saindang pinakamakakaya “na makalaog sa kapahingaloan na iyan.” Ipinaheheling kaini na kan isurat ni Pablo an mga tataramon na iyan, an “ikapitong aldaw” kan pagpahingalo nin Dios, na nagpoon mga 4,000 na taon na bago kaidto, nagpapadagos pa. Dai iyan matatapos sagkod na an katuyohan nin Dios mapadapit sa katawohan asin sa daga biyo nang maotob sa katapusan kan Sangribong Taon na Paghade ni Jesu-Cristo, na iyo an “Kagurangnan kan sabbath.”​—Mateo 12:8; Kapahayagan 20:1-6; 21:1-4.

An pagtokar ni Pablo kan kapahingaloan nin Dios asin kun paano an saro makalalaog dian sierto nanggad na sarong pamparigon sa boot para sa mga Kristianong Hebreo sa Jerusalem, na nagtagal nin dakol na paglamag asin pag-olog-olog huli sa saindang pagtubod. (Gibo 8:1; 12:1-5) Kaagid kaiyan, an mga tataramon ni Pablo puedeng magparigon sa boot kan mga Kristiano ngonyan. Huling nakaaaram na haranihon na an kaotoban kan panuga nin Dios na pangyarihon an sarong paraisong daga sakop kan saiyang matanos na Kahadean, kita maninigo man na magpahingalo sa satong sadiring mga gibo asin gibohon an satong pinakamakakaya na makalaog sa kapahingaloan na iyan.​—Mateo 6:​10, 33; 2 Pedro 3:13.