An Biblia—Tataramon nin Dios o nin Tawo?
Kapitulo 13: “An Tataramon nin Dios Buhay”
Sa nakaaging kapitulo, naheling niato na an hatol kan Biblia makatatabang sa sato na maresolberan an mga problema asin malikayan an mga sala. An dai apektado nin panahon na kadonongan kan hatol kan Biblia makosog na ebidensia nin pagpasabong. An Biblia mismo nagsasabi: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.” (2 Timoteo 3:16) Alagad an Biblia dai sana nagtatao sa sato nin madonong na hatol. Bilang an Tataramon nin Dios, aktuwal na binabago kaiyan an mga tawo.
1-3. (a) Paano idinodoon kan Biblia an pangangaipo nin mga pagbago sa personalidad? (b) Anong eksperyensia an nagpapaheling kan puersa kan Biblia na bagohon an mga personalidad?
Talaga daw na nababago kan Biblia an mga tawo? Iyo, naliliwat pa ngani kaiyan an saindang personalidad. Estudyare an hatol na ini na nasusurat sa Biblia: “Maninigo nindong haleon an daan na personalidad na komporme sa dati nindong paggawe asin na nararaot sono sa saiyang mapandayang mga horot; kundi . . . maninigo kamong magin bago sa puersa na nagpapahiro sa saindong isip, asin maninigong magsolog kan bagong personalidad na linalang oyon sa kabotan nin Dios sa tunay na katanosan asin kaimbodan.”—Efeso 4:22-24.
2 Talaga daw na posibleng magsolog nin bagong personalidad? Iyo nanggad! Sa katunayan, an pagigin Kristiano kun beses may kaibang pambihirang mga pagliwat sa personalidad. (1 Corinto 6:9-11) Halimbawa, an sarong aking lalaki sa Amerika del Sur nailo sa edad na nuebe. Huling nagdadakula na daing paggiya nin magurang, nagkaigwa sia nin grabeng mga problema sa personalidad. Sia nagsasaysay: “Pagtongtong ko sa edad na 18, biyo na akong adikto sa droga asin nabilanggo na huli sa paghabon tanganing masustentohan an bisyong iyan.” Pero an saiyang inaon saro sa Mga Saksi ni Jehova, asin sa kahurihurihi natabangan sia kaini.
3 An paliwanag nia: “Pinonan akong adalan sa Biblia kan inaon ko, asin pakalihis nin pitong bulan nahale ko an bisyo sa droga.” Binayaan man nia an dati niang mga kaibaiba asin nagkaigwa nin bagong mga amigo sa Mga Saksi ni Jehova. Ipinagpadagos nia: “An bagong mga kaibaibang ini, kaiba kan sakong regular na pag-adal sa Biblia, nagpangyari sa sako na umoswag asin sa katapustapusi idusay an sakong buhay na maglingkod sa Dios.” Iyo, an dating adikto sa droga asin parahabon na ini nagin aktibong Kristiano, asin an radikal na pagbagong ini nahimo paagi sa puersa kan Biblia. Tunay nanggad, arog kan sinasabi ni apostol Pablo, “An tataramon nin Dios buhay asin mapuersa.”—Hebreo 4:12.
Nabago Paagi sa Kaaraman
4, 5. Oyon sa Colosas 3:8-10, ano an kaipuhan tanganing mapatalubo an bagong personalidad?
4 Paano binabago kan Biblia an mga tawo? An simbag maheheling sa halipot na kotasyon na ini sa Biblia: “Irayo nanggad nindo an gabos na iyan sa saindo, an kabangisan, kaanggotan, karatan, mapanlibak na pagtaram, asin malaswang orolay hale sa saindong ngoso. Dai kamo magpapurutikputik. Hubaa nindo an daan na personalidad kaiba an mga gibo kaini, asin isolog nindo an bagong personalidad, na binabago paagi sa tamang kaaraman oyon sa ladawan kan Saro na naglalang kaiyan.”—Colosas 3:8-10.
5 Mangnoha an mahalagang kabtang kan tamang kaaraman sa Biblia. Ipinaliliwanag kan Biblia kun arin na mga ugale an kaipuhan niatong haleon asin kun arin an maninigo niatong kultibaron. An mismong kaaraman na iyan puede nang magkaigwa nin mapuersang epekto, arog kan nadiskobre nin sarong hoben na lalaki sa timog na Europa. May magabat siang problema: madahas na templada kan payo. Kan nagdadakula, pirme siang nakikiiwal, asin bilang paluwasan kan saiyang kadahasan, nagboksingero sia; alagad dai pa man giraray nia makontrol an saiyang pagigin madahas. Kan nasa militar, nagkakaso sia huli sa pagbugbug sa sarong kapwa soldados. Pagkaluwas sa militar, nag-agom sia alagad ta binubugbug man nia an agom nia. Sa sarong simbagan sa pamilya, binugbug ngani nia an sadiri niang ama, na pinabagsak ini. Abaa kaanggot, kadahas na hoben na lalaki!
6, 7. Paano an tamang kaaraman sa Biblia nakatabang sa sarong hoben na lalaki sa timog na Europa na bagohon an saiyang personalidad?
6 Pero, sa kahurihurihi, nakipag-adal sia kan Biblia sa Mga Saksi ni Jehova asin nakadangog nin hatol na arog kan minasunod: “Dai kamo magbalos nin maraot sa maraot sa kiisay man. . . . Kun mahihimo, sagkod na iyan nasa saindo, makipagkatoninongan sa gabos na tawo. Dai kamo magbalos, mga namomotan, kundi magtao nin lugar sa kabangisan.” (Roma 12:17-19) Ini nakatabang sa saiya na marealisar kun gurano karaot na kaluyahan an saiyang madahas na ugale. Pinondo nia an pagboksing, na narealisar niang dai bagay sa matoninong na Kristianong personalidad. Alagad may totoo pa man giraray siang pakipagtusayan sa saiyang madahas na ugale.
7 Minsan siring, natabangan sia kan nagdadakula niang kaaraman sa mga prinsipyo sa Biblia. Nadalisay kaini an saiyang konsensia, na huminiro man tanganing kontrahon an saiyang madaling mag-init na templada kan payo. Sarong beses, kan medyo nag-oswag na sia sa saiyang pag-adal sa Biblia, may sarong dai kamidbid na naanggot asin pinag-insulto sia nin pasilyak. Namatean kan hoben na lalaki an pamilyar na kabangisan na nagbubuladbukad sa saiyang boot. Dangan, namatean nia an saro pang puersa: an pakamate nin kasopganan; asin ini nakaolang sa saiya na padara sa saiyang kaanggotan. Imbes na “magbalos nin maraot sa maraot,” pinogolan nia an saiyang boot. Ngonyan, sia nabago na, na may bagong personalidad, huli sa tamang kaaraman hale sa Biblia.
Pakamidbid sa Dios
8. (a) Sa kiisay na ladawan ginigibo an bagong personalidad? (b) An tamang kaaraman na nagmomolde sa bagong personalidad dapat na may kaibang kaaraman dapit kiisay?
8 Totoo, dakol an aram kun ano an tamang gibohon, alagad napadadaog sinda sa mga kaluyahan sa laman. Malinaw nanggad na an pagkaigwa sana nin tamang kaaraman dapit sa tama asin sala bakong iyo sana an kaipuhan. May iba pang nakatabang sa duwang indibiduwal na isinaysay sa enotan na magbago. Ano daw iyan? An halipot na kotasyon na nasambitan sa enotan nagsabi: “Isolog nindo an bagong personalidad, na binabago paagi sa tamang kaaraman oyon sa ladawan kan Saro na naglalang kaiyan.” (Colosas 3:10) Mangnoha na, kun paanong si Adan kan enot ginibo sa ladawan nin Dios, an bagong personalidad ginigibo man sa ladawan nin Dios. (Genesis 1:26) Kun siring, an tamang kaaraman na nakatabang sa duwang hoben na lalaking ini seguradong may kaibang kaaraman dapit sa Dios. Ipinagigirumdom kaini sa sato an mga tataramon ni Jesus: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”—Juan 17:3.
9. Paano nakatatabang sa sato an kaaraman dapit sa Dios na bagohon an satong personalidad?
9 Paano nakatatabang sa sato an kaaraman dapit sa Dios na bagohon an satong personalidad? Tinatawan kita kaiyan nin motibo na gibohon iyan. Kun namimidbid niato an Dios paagi sa satong pag-adal sa Biblia, nanonodan niato an saiyang banal na mga kualidad asin naheheling an pagkamoot na ipinaheling nia sa sato. Ini nagmomotibar sa sato na kamotan man sia. (1 Juan 4:19) Kun siring, makukuyog niato an isinabi ni Jesus na iyo an enot asin kadarudakulaing togon: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” (Mateo 22:37) An pagkamoot sa Dios nagpapahiro sa sato na mawoton na isolog an bagong personalidad na nasosonoan nia. Pinahihiro kita kaiyan na mawoton na orog na makaarog sa saiya, gurano man kasakit an tibaad pakipagtusayan niato tanganing magibo iyan.
Mga Kaluyahan na Hararom an Pagkatanom
10, 11. Paano an tamang kaaraman nakatabang sa sarong hoben na babae na taga Amerika del Norte na pumoon na bagohon an saiyang personalidad?
10 Sa nagkapirang kaso, iyan talagang pakipagtusayan. An sarong hoben na babae sa Amerika del Norte kinaipuhan na makipaglaban nin maigot tanganing magbago. Biktima nin seksuwal na pagmaltrato kan aki pa, nagdakula sia sa sarong madahas na pamilya asin pag-abot nin panahon nagdroga. Pero mahal an droga kaya ipinabakal nia an saiyang sadiri bilang patotot tanganing masustentohan an bisyong iyan. Sia nanribok man saka nanhabon sa mga turista asin an nangyari mas dakol an panahon nia sa mga bilanggoan asin bilyaran kisa sa harong.
11 Kan manompongan sia kan mga Saksi ni Jehova, sia may saro nang aki sa luwas—pakalihis nin nagkapirang pagpakua sa aki. Minsan siring, nagustohan nia an nadangog nia hale sa Biblia asin pinonan na adalan iyan. Dai nahaloy pinatatalubo na nia an relasyon sa Dios asin ginigibo an mga pagliwat sa saiyang buhay.
12, 13. Isaysay kun paano an tamang kaaraman, oras na nakatanom na, minahiro bilang puersa para sa pagbago.
12 Minsan siring, maigot na pakikilaban an nasa enotan ta hararom an pagkatanom kan daan na personalidad. Sarong beses, ikinaanggot nia an sarong hatol na marahay an intension, nagpondo sia sa pag-adal kan Biblia, asin nagbuelta sa saiyang marompot na mga gibo. Alagad dai nia malingawan an katotoohan sa Biblia na ikinatanom sa saiya, asin inaadmitir nia: “Sa panapanahon nakokonsensia ako, asin minasabong sa isip ko an mga tataramon kan 2 Pedro 2:22: ‘An ayam minabalik sa sadiring suka kaiyan asin an orig na nalinigan sa lamaw.’”
13 Sa kahurihurihi, an kaaraman na ini nagmotibar sa saiya na gumibo nin saro pang determinadong paghihingoa. Sia nagsasabi: “Pinonan kong buksan an tata ki Jehova asin parateng umarang nin tabang.” Ngonyan, an bagong personalidad mas masarig na nakatanom, minsan ngani kaipuhan pa man giraray siang makipagtusayan nin maigot. Sarong beses, sa panahon nin kaluyahan, nagbuelta sia sa pagbuburat asin sa inmoralidad. Pero an reaksion nia ngonyan nagpaheling na sia talagang nagbabago na. Ikinabalde nia an saiyang sadiri asin sinasabi: “Kanigoan an sakong pamibi asin pag-adal.” Sa kahurihurihi, an Tataramon nin Dios nagkaigwa nin puersa sa saiyang buhay sagkod na sia nagin aktibong Kristiana, na may malinig, ginagalangan na pamumuhay. Nagkapirang taon na ngonyan, sia biyo nang laen sa dati minamaltrato, adikto sa droga, daing disiplina an pamumuhay na tawo.
Sarong Banwaan na Binago kan Tataramon nin Dios
14, 15. (a) Anong puersa gikan sa Dios an naghihiro paagi sa Biblia? (b) Ano an nagkapirang karakteristiko nin tunay na mga Kristiano ngonyan?
14 An nagin puersa kan Biblia sa buhay nin mapakumbabang mga tawo nagpapaheling na iyan bako sanang gibo nin tawo. Bilang ipinasabong na Tataramon nin Dios, iyan pinakapaagihan para sa paghiro kan espiritu nin Dios. An iyo man sanang espiritu na nagpangyari sa mga milagro ni Jesus nagtatabang sa sato ngonyan na madaog an maraot na mga kualidad asin mapatalubo an Kristianong personalidad. Sa katunayan, an pundamental na mga kualidad na kaipuhan na kultibaron nin mga Kristiano—an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri—inaapod sa Biblia na “bunga kan espiritu.”—Galacia 5:22, 23.
15 Ngonyan, an espiritung ini naghihiro bako sanang sa nagkapirang indibiduwal kundi sa minilyon na “tinokdoan ni Jehova” asin may ‘abundang katoninongan’ hale sa Saiya. (Isaias 54:13) Sairisay ini? Itinao ni Jesus an sarong paagi na mamidbid sinda, na sinasabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) An Kristianong pagkamoot bunga kan espiritu asin importanteng marhay na kabtang kan bagong personalidad na Kristiano. Igwa daw nin grupo nin mga tawo na nagpapaheling nin pagkamoot sa paaging isinabi ni Jesus?
16, 17. Kotaron an nagkapirang komento sa peryodiko na nakatatabang na mamidbid kun sairisay an “tinokdoan ni Jehova” asin may ‘abundang katoninongan.’
16 Bueno, hinanyoga an kotasyon na ini hale sa sarong surat na ipinadara sa New Haven Register, sarong peryodiko sa Amerika del Norte: “Baga man kamo nasurang o naanggot, arog ko, sa saindang paggibo nin proselito, dai kang maginibo kundi hangaan an saindang dedikasyon, an saindang karahayan, an saindang marahayon na halimbawa sa gawe-gawe nin tawo asin ikararahay na pamumuhay.” An peryodiko sa Alemania na Münchner Merkur nagtataram manongod sa iyo man sanang grupo kan iyan magsabi: “Sinda an pinakaonesto asin pinakaalistong parabuhis sa Republika Pederal [nin Alemania]. An pagkuyog ninda sa mga ley maheheling sa saindang pagpadalagan nin sasakyan saka sa mga estadistika nin krimen.”
17 Manongod kiisay na nagtataram an duwang peryodikong ini? An iyo man sanang grupo na pinag-olayan sa Herald nin Buenos Aires, Argentina. An peryodikong ini nagsabi: “Pinatunayan nin Mga Saksi ni Jehova sa nag-aging mga taon na sinda mahigos, malinaw an isip, maekonomiya asin matatakton sa Dios na mga siudadano na arog kan malinaw na kaipuhan kan nasyon.” An sosyolohikong pag-estudyar sa Zambia na ipinublikar sa American Ethnologist nagtataram man manongod sa grupong iyan. Iyan nagsasabi: “An Mga Saksi ni Jehova nagkakaigwa nin orog na kapangganahan kisa sa mga miembro nin ibang denominasyon sa pagpapadanay sa marigon na mga pag-agoman.”
18, 19. Paano ilinadawan an Mga Saksi ni Jehova sa Italia asin sa Aprika del Sur?
18 An peryodikong La Stampa sa Italia nagtataram man manongod sa Mga Saksi ni Jehova kan iyan magsabi: “Sinda an pinakamaimbod na siudadano na mamawoton nin siisay man: dai sinda nagdudulagdulag sa pagbubuhis o naghihingoang ebitaran an nakaaabalang mga ley para sa sadiri nindang ganansia. An moral na mga pamantayan na pagkamoot sa kataed, pagsayuma sa kapangyarihan, paglikay sa kadahasan asin personal na pagkaonesto (na para sa kadaklan na Kristiano ‘mga reglamento kun Domingo’ na marahay sanang ihulit sa pulpito) nakaiimpluwensia sa saindang ‘pan-aroaldaw’ na pamumuhay.”
19 An sarong propesor sa unibersidad na taga Aprika del Sur na nakaeksperyensia nin diskriminasyon sa irarom kan mga ley sa rasa kan nasyon na iyan inaapod an Mga Saksi ni Jehova na “sarong banwaan na natokdoan kan halangkawon na mga pamantayan kan Biblia na magin talagang ‘dai tataong magheling nin kolor.’” Sa pagpaliwanag kaini, idinugang nia: “Uya an mga tawo na naheheling kun ano an iba sa laog, bako sanang an kolor kan saindang kublit. An Mga Saksi ni Jehova ngonyan iyo an solamenteng tunay na kasararoan nin magturugang sa katawohan.”
20. Taano ta napapalaen an Mga Saksi ni Jehova?
20 Ipinaheheling kan mga komentong ini na may sarong grupo nin mga tawo na binukasan an saindang puso sa Biblia asin dian sa sainda aktibo an espiritu nin Dios. Mahalagang mangnohon na sinda man sana an sinabi niato kan enot na nagkukuyog sa pagboot ni Jesus na ihulit an maogmang bareta kan Kahadean sa bilog na kinaban. (Mateo 24:14) Taano ta lataw an Mga Saksi ni Jehova sa mga paaging ini? Sa dakol na bagay sinda daing kalaenan sa iba. Igwa man sinda kan kaparehong mga kaluyahan sa laman, kaparehong mga problema sa kabuhayan, asin kaparehong pundamental na mga pangangaipo. Alagad bilang grupo, sinda namomoot sa Dios, isinasaboot an Biblia, asin pinababayaan na iyan magkaigwa nin puersa sa saindang buhay.
21. Ano an pinatutunayan kan bagay na nangyaring magkaigwa nin sarong banwaan na arog kan Mga Saksi ni Jehova sa pano nin pagkaongis na kinaban ngonyan?
21 Minilyon na Saksi ni Jehova an yaon sa 232 na kadagaan. Kabilang sa sainda an mga tawo hale sa lambang rasa, lenguahe, asin sosyal na posisyon na maiisip nindo. Pero sinda sararo, matoninong, internasyonal na kasararoan nin magturugang. Sinda marahay na mga siudadano kan ano man na nasyon na iniistaran ninda, alagad primero asin sa pangenot, sinda mga sakop kan Kahadean nin Dios, asin sinda gabos aktibong marhay sa pagsabi sa iba kan maogmang bareta kan Kahadean na iyan. Pambihira nanggad na sa baranga, pano nin pagkaongis na kinaban na ini, nangyari nganing magkaigwa nin grupo na arog kan Mga Saksi ni Jehova. An bagay na sinda yaon mapuersang ebidensia na an espiritu nin Dios aktibo pa sa katawohan. Asin iyan prueba na an Biblia talagang “buhay asin mapuersa.”