• Puwede Kang Magin Amigo ni Jehova
    Mabuhay nin Maugma Sagkod Pa Man!—Interactive na Pag-adal sa Bibliya

    • Puwede Kang Magin Amigo ni Jehova

      Gusto ni Jehova na mas mamidbid mo pa siya. Taano? Inaasahan niya na mantang mas naaaraman mo kun ano an saiyang mga kuwalidad, kun paano niya tinatrato an mga tawo, asin kun ano an gusto niya para sa saimo, mas gugustuhon mo man na magin amigo niya. Puwede ka daw talagang magin amigo nin Diyos? (Basahon an Salmo 25:14.) Ano an puwede mong gibuhon para magin amigo niya? Sinisimbag kan Bibliya an mga hapot na iyan asin ipinapahiling man kaiyan kun taano ta si Jehova an pinakamarahay na puwede mong magin Amigo.

      1. Inaagda ka ni Jehova na gibuhon an ano?

      Sinasabi sa sato kan Bibliya: “Rumani kamo sa Diyos, asin marani siya sa saindo.” (Santiago 4:8) Ano an buot sabihon kaiyan? Inaagda ka ni Jehova na magin amigo niya. Para sa iba, tibaad masakit magin amigo an saro na dai ninda personal na nahihiling, di lalo na an Diyos. Pero sa saiyang Tataramon, an Bibliya, sinasabi sa sato ni Jehova an gabos na kaipuhan tang maaraman manungod sa saiya para magin harani kita sa saiya. Pag binabasa ta sa Bibliya an mensahe ni Jehova para sa sato, nagigin mas harani kita sa saiya dawa dai ta siya nahihiling.

      2. Taano ta si Jehova an pinakamarahay na puwede mong magin Amigo?

      Mayo nang malabi pa sa pagkamuot sa saimo ni Jehova. Gusto niyang magin maugma ka asin magrani sa saiya pag kaipuhan mo nin tabang. Puwede mong ‘ipasa saiya an gabos mong kahaditan, huli ta nagmamakulog siya sa saimo.’ (1 Pedro 5:7) Handa pirmi si Jehova na tabangan, pakusugon, asin dangugon an saiyang mga amigo.—Basahon an Salmo 94:18, 19.

      3. Para magin amigo ni Jehova, ano an gusto niyang gibuhon ta?

      Namumutan ni Jehova an gabos, “pero dayupot Siyang nakikipag-amigo sa mga matanos.” (Talinhaga 3:32) Inaasahan ni Jehova na gigibuhon kan mga amigo niya an ibinibilang niyang marahay asin lilikayan an ibinibilang niyang maraot. Tibaad may magsabi na dai ninda kaya an ipinapagibo ni Jehova. Pero mapagsabot si Jehova. Inaako Niya an siisay man na talagang namumutan Siya asin ginigibo an pinakamakakaya para mapaugma Siya.—Salmo 147:11; Gibo 10:34, 35.

      ARAMON PA

      Aramon kun ano pa an magigibo mo para magin amigo ni Jehova, saka kun taano ta si Jehova an pinakamarahay na puwede mong magin Amigo.

      4. Si Abraham amigo ni Jehova

      Tinatabangan kita kan istorya sa Bibliya manungod ki Abraham (inapod man na Abram) na masabutan kun ano an buot sabihon kan pagigin amigo ni Jehova. Basahon an manungod ki Abraham sa Genesis 12:1-4. Dangan pag-ulayan an mga hapot na ini:

      • Ano an ipinagibo ni Jehova ki Abraham?

      • Ano an ipinangako ni Jehova sa saiya?

      • Ano an ginibo ni Abraham?

      5. Kun ano an inaasahan ni Jehova sa mga amigo niya

      Sa parati, may mga inaasahan kita sa satong mga amigo.

      • Ano an pirang bagay na gusto mong gibuhon kan mga amigo mo para saimo?

      Basahon an 1 Juan 5:3, dangan pag-ulayan an hapot na ini:

      • Ano an inaasahan ni Jehova na gigibuhon kan mga amigo niya?

      Para masunod si Jehova, tibaad kaipuhan tang baguhon an satong ugali o an satong pagkatawo. Basahon an Isaias 48:17, 18, dangan pag-ulayan an hapot na ini:

      • Taano ta inaasahan ni Jehova na magibo nin mga pagbabago an mga amigo niya?

      Sarong construction worker na iinaabot sa saiyang kapwa trabahador an sarong safety helmet.

      Ipapagirumdom sa sato nin sarong marahay na amigo an mga bagay na makakaprotektar saka makakatabang sa sato. Iyan man an ginigibo ni Jehova para sa saiyang mga amigo

      6. Kun ano an ginigibo ni Jehova para tabangan an saiyang mga amigo

      Tinatabangan ni Jehova an saiyang mga amigo na makayanan an saindang mga problema. I-play an VIDEO, dangan pag-ulayan an hapot.

      VIDEO: Dakulaon an Utang na Buot Ko ki Jehova (3:20)

      • Paano ni Jehova tinabangan an babayi sa video na malabanan an saiyang negatibong mga kaisipan asin emosyon?

      Basahon an Isaias 41:10, 13, dangan pag-ulayan an mga hapot na ini:

      • Ano an pangako ni Jehova sa gabos niyang amigo?

      • Sa hiling mo, marahay daw na Amigo si Jehova? Taano?

      Collage: Mga mag-aramigo na tinatabangan an kada saro. 1. Tinatabangan nin sarong lalaki an saro pang lalaki sa pag-alsa nin sarong dakulang lamesa. 2. Sarong babayi na sinasabi sa saro pang babayi an mga namamatian niya. 3. Sarong lalaki na inaalalayan an saro pang lalaki na nakasaklay.

      An tunay na mga amigo nagtatabang pag kaipuhan mo nin tabang. Tatabangan ka man ni Jehova

      7. Para magin amigo ni Jehova, kaipuhan tang makipag-ulay saka magdangog saiya

      Mas nagigin harani sa kada saro an mag-amigo pag may panahon sinda para mag-ulay. Basahon an Salmo 86:6, 11, dangan pag-ulayan an mga hapot na ini:

      • Paano ta makakaulay si Jehova?

      • Paano niya kita kinakaulay?

      Collage: 1. Sarong babayi na namimibi. Pataas an direksiyon kan arrow na nasa itaas kan saiyang payo. 2. Sarong babayi na nagbabasa nin Bibliya. Pababa an direksiyon kan arrow na nasa itaas kan saiyang payo.

      Kinakaulay ta si Jehova paagi sa pamibi; kinakaulay niya man kita paagi sa Bibliya

      MAY MGA NAGSASABI: “Imposible man na magin harani sa Diyos.”

      • Anong teksto an gagamiton mo para ipahiling na puwede kitang magin amigo ni Jehova?

      SUMARYO

      Gusto kang magin amigo ni Jehova, asin tatabangan ka niya na magin harani sa saiya.

      Rebyu

      • Paano tinatabangan ni Jehova an saiyang mga amigo?

      • Taano ta sinasabi ni Jehova sa saiyang mga amigo na gumibo nin mga pagbabago?

      • Sa hiling mo, masakiton daw magin amigo ni Jehova? Taano ta nasabi mo iyan?

      Gibuhon Ini

      HILINGON MAN

      Paano ka makikinabang kun makikipag-amigo ka sa Diyos?

      “Si Jehova—Sarong Dios na Maninigong Mamidbid” (An Torrengbantayan, Pebrero 15, 2003)

      Aramon kun paano ka magigin harani sa Diyos.

      “Paano Ako Magigin Amigo nin Diyos?” (Hapot kan mga Hoben—Mga Simbag na Makakatabang, Tomo 2, kapitulo 35)

      Aramon kun taano ta nasabi nin sarong babayi na nailigtas an buhay niya huli sa pakikiamigo ki Jehova.

      “Habo Kong Magadan!” (An Torrengbantayan Num. 1 2017)

      Dangugon an sinabi kan mga tin-edyer manungod ki Jehova.

      Ano an Buot Sabihon kan Pagigin Amigo nin Diyos? (1:46)