Magin Marahay an Kaisipan Mantang Naghaharani an Katapusan
1 Paorootrong ilinaladawan kan Tataramon nin Dios an aldaw ni Jehova na minadatong ‘kabaing nin parahabon’—an boot sabihon, bigla, tolos-tolos, patago. (1 Tes. 5:2; Mat. 24:43; 2 Ped. 3:10; Kap. 3:3; 16:15) “Huli kaini,” an sabi ni Jesus, ‘kamo magin andam, huli ta sa oras na dai nindo pinaghohona, an Aki nin tawo madatong.’ (Mat. 24:44) Paano niato mapagdadanay an satong pagigin andam sa espirituwal mantang naghaharani an katapusan? Makukua an pinakasolusyon sa ipinasabong na konseho na: “Magin marahay an kaisipan.”—1 Ped. 4:7.
2 Kalabot sa marahay na kaisipan an pagheling sa mga bagay sa punto de vista ni Jehova. (Efe. 5:17) Tinatabangan kita kaiyan na ibilang an satong sadiri na “mga dayo asin nakiiistar nin temporaryo” sa tahaw kan presenteng sistema nin mga bagay. (1 Ped. 2:11) Pinangyayari kita kaiyan na mamansayan kun ano talaga an importante, magbugtak nin mga prioridad, asin gumibo nin marahay na mga desisyon.—Fil. 1:10.
3 Magbugtak nin Espirituwal na mga Pasohan: An pagbugtak nin asin pag-abot sa espirituwal na mga pasohan nakatatabang sa sato na magin marahay an kaisipan. Igwa daw kamo nin espirituwal na mga pasohan na sa presente pinagmamaigotan nindong maabot? Pinagmamaigotan daw nindong basahon an Biblia aroaldaw, umatender sa gabos na Kristianong pagtiripon, basahon an kada isyu kan An Torrengbantayan asin Awake!, o tibaad dugangan an saindong pakikikabtang sa ministeryo? Kun kamo mabugtak nin mga pasohan na angay para sa saindo, magpoprosegir sa pagmamaigot na maabot iyan, asin maarang ki Jehova na bendisyonan an mga paghihingoa nindo, tibaad magngalas kamo sa mga resulta.
4 Hinapot nin sarong magurang sa kongregasyon an sarong hoben na mag-agom manongod sa saindang espirituwal na mga pasohan. Huli sa hapot narealisar ninda na kun gigibohon nindang simple an saindang buhay asin hahaleon an nakapagagabat na utang, puede sindang magpayunir. Nagdesisyon sindang gibohon iyan na pasohan ninda. Maigot nindang binayadan an saindang utang asin naghanap sinda nin mga paagi na mainaan an dai kinakaipuhan na mga aktibidad na nakauubos kan saindang panahon asin kosog. Pakalihis nin eksaktong sarong taon, naabot na ninda an pasohan ninda. Na may anong resulta? Sabi kan agom na lalaki: “Kun mayo nin mga pasohan mayo kutana kami sa kamugtakan niamo ngonyan. Mas maogma kami. Mas trangkilo asin mas marahay an buhay niamo. Igwa iyan nin tunay na kahulogan asin katuyohan.”
5 Mantang hinahalat niato an aldaw ni Jehova, papagdanayon logod niato an satong pagigin andam sa espirituwal paagi sa pamumuhay na may marahay na kaisipan, na nagdadanay na nakakonsentrar sa paggibo kan kabotan nin Dios.—Tito 2:11-13.