1 Pedro 5:6, 7—“Magpakumbaba Kamo sa Irarom kan Makapangyarihan na Kamot nin Diyos, . . . na Inaapon Nindo sa Saiya an Gabos Nindong Kahaditan”

“Kaya, magpakumbaba kamo sa irarom kan makapangyarihan na kamot nin Diyos, tanganing mailangkaw niya kamo sa itinalaan na panahon, mantang ipinapasa nindo sa saiya an gabos nindong kahaditan, huli ta nagmamakulog siya sa saindo.”—1 Pedro 5:6, 7, Bagong Kinaban na Traduksiyon.

“Magpakumbaba kamo sa irarom kan makapangyarihan na kamot nin Diyos, tanganing tibaad ilangkaw Niya kamo sa itinalaan na panahon, na inaapon nindo sa Saiya an gabos nindong kahaditan, huli ta Siya nagmamakulog saindo.”—1 Pedro 5:6, 7, New King James Version.

Kahulugan kan 1 Pedro 5:6, 7

Paagi sa mga tataramon na ini, inaasigurar ni apostol Pedro sa mga Kristiyano na may pagtitiwala sindang makakapamibi sa Diyos manungod sa saindang mga problema saka kahaditan. Inuuyunan nin Diyos an mga mapakumbaba, asin abunda niya sindang bebendisyunan.

“Magpakumbaba kamo sa irarom kan makapangyarihan na kamot nin Diyos.” Sa Bibliya, an kamot nin Diyos sa parati nanunungod sa kapangyarihan niyang magligtas asin magprotektar. (Exodo 3:19; Deuteronomio 26:8; Esdras 8:22) Ipinapahiling kan mga Kristiyano na nagpapakumbaba sinda sa irarom kan kamot nin Diyos pag nagsasarig sinda sa saiya. Aram ninda na may mga limitasyon sinda asin inaako ninda na dai ninda makakayanan an mga pagbalo kun sa sadiri sana ninda. (Talinhaga 3:5, 6; Filipos 4:13) Tiwala sinda na an Diyos igwa kan kapangyarihan na humiro para sa kapakanan ninda sa tamang panahon asin sa pinakamarahay na paaging posible.—Isaias 41:10.

“Tanganing mailangkaw niya kamo sa itinalaan na panahon.” An mga mapasensiyang nagtatagal nin mga pagbalo makakapagtiwala na pag-abot nin panahon ilalangkaw, o babalusan, sinda nin Diyos. Dai niya tutugutan na an mga parasamba niya mabalo nin daing sagkod o sa paaging dai ninda makakaya. (1 Corinto 10:13) Sa kabaliktaran, kun padagos sindang magibo nin marahay, siguradong babalusan sinda nin Diyos “sa itinalaan na panahon.”—Galacia 6:9.

“Mantang ipinapasa nindo sa saiya an gabos nindong kahaditan, huli ta nagmamakulog siya sa saindo.” Puwedeng ipasa, o iapon, kan mga Kristiyano sa Diyos an gabos nindang kahaditan paagi sa mapakumbabang pagpamibi saiya. Sinabi nin sarong reperensiya: “An verb na iapon nagpapahiling kan ideya nin paghihinguwa na mapuwersang iitsa an sarong bagay parayo sa satong sadiri. An aksiyon na ini intensiyonal o tuyo.” Pag ipinasa nin sarong Kristiyano sa Diyos an mga kahaditan niya, dai na siya gayong maparahadit asin mamamatian niya an inaapod kan Bibliya na “katuninungan nin Diyos.” (Filipos 4:6, 7) Makakasigurado siya na gusto nin Diyos na tabangan siya huling aram niyang nagmamakulog an Diyos sa saiya asin puwede Niyang gamiton an Saiyang abundang kapangyarihan tanganing alalayan siya.—Salmo 37:5; 55:22.

Konteksto kan 1 Pedro 5:6, 7

An kapitulo 5 an katapusan kan inot na surat ni apostol Pedro para sa mga Kristiyano. (1 Pedro 1:1) An mga parasunod ni Cristo kaidto, arog ngunyan, napaatubang sa manlain-lain na kadipisilan na nakabalo sa saindang pagtubod asin posibleng nakapapurisaw sa sainda. (1 Pedro 1:6, 7) Aram ni Pedro an mga kadipisilan na inaagihan ninda kaya naggibo siya nin sarong mamumuton asin nakakapakusog na surat kaidtong mga 62-64 C.E.—1 Pedro 5:12.

Tinapos ni Pedro an saiyang surat paagi sa sarong nakakapakusog na pagirumdom para sa mga napapaatubang sa mga pagbalo huli sa saindang pagtubod. Kun magdadanay sindang mapakumbaba asin nagsasarig sa Diyos, makakapagtiwala sinda na tatabangan sinda nin Diyos na marigon na makapanindugan. (1 Pedro 5:5-10) An mga tataramon ni Pedro makakapakusog man sa mga Kristiyano na pinepersegir ngunyan.

Dalanon an halipot na videong ini para mahiling an sumaryo kan libro nin 1 Pedro.