Sinda Daing Kapasloan na Nagbalos sa Pagkamoot nin Dios
“O magpasalamat logod an mga tawo ki Jehova huli sa saiyang mamomoton na kabootan asin huli sa saiyang makangangalas na mga ginibo sa mga aki nin tawo.”—SALMO 107:8.
1. Paano idinodoon ni apostol Juan an kuwalidad na pagkamoot sa enot niang surat?
“AN Dios pagkamoot.” Pano-pano nin kahulogan an mga tataramon na iyan! Bakong makangangalas na namatean ni apostol Juan na kaipuhan na otrohon iyan sa enot niang surat. (1 Juan 4:8, 16) Bako sana na si Jehova Dios pagkamoot kundi sia man an ladawan, o personipikasyon, nin pagkamoot.
2. Sa anong mga paagi na an Dios nagpaheling nin pagkamoot sa paglalang sa lalaki asin babae patin sa pagtagama para sa sainda?
2 Isip-isipa an pagkamoot na ipinaheling nin Dios sa pagkalalang nia sa sato. An may pag-apresyar na mga tataramon ni David angay nanggad. Bilang ipinasabong na salmista, sia nagsabi: “Ika oomawon ko huli ta sa makangingirhat na paagi ako makangangalas na ginibo.” (Salmo 139:14) Tangani na kita mabuhay na may mabagsik na salud asin kaogmahan, pinapangyari nin Dios an daing sagkod na mga kawiwilihan niato paagi sa satong limang sentido—pakaheling, pakadangog, pakanamit, pakaparong, asin pakamate. Kanigoan an kagayonan na naheheling niato sa mga linalang sa palibot niato! Makangangalas nanggad an kadakol asin laen-laen na pananom asin hayop, dai na baga sabihon an kagayonan kan porma asin mga itsura nin tawo! Ibinugtak man nin Dios an masiramon na kadakoldakol na klase nin mga prutas, gulay, asin iba pang kakanon sa lugar na madali niatong makua. (Salmo 104:13-16) May marahay na dahelan, ipinagirumdom ni apostol Pablo sa mga tagasuanoy na Listra na an Dios “marahay [an] ginibo, na tinatawan kamo nin oran hale sa langit asin mabungang mga panahon, na binabasog an saindong mga puso nin kakanon asin marahay na kaogmahan.”—Gibo 14:17.
3. Anong makangangalas na mga abilidad an itinao sato nin Dios?
3 Horophoropa man an gabos na bendisyon na konektado sa maogmang buhay pampamilya. Labi pa dian, pensara an gabos na kaalingan na puwede niatong kamtan huli sa satong mental asin emosyonal na mga abilidad: imahinasyon, rason, memorya, konsensia, asin partikularmente an kapasidad na sumamba—na gabos ilinalangkaw kita sa mga hayop; ni maninigo man niatong lingawan an kaalingan na ikatatao sato nin musika. An mga ini asin dakol pang ibang balaog mga kapahayagan kan pagkamoot nin Dios sa sato.
4. Anong mga kapahayagan kan pagkamoot nin Dios an naeksperyensiahan nin mga tawo poon kan paglapas kan enot nindang mga magurang?
4 Daing duda na si Adan asin Eva nagkamit nin kadakol na kaogmahan sa saindang sangkap na kamugtakan sa tatamnan nin Eden. (Genesis 2:7-9, 22, 23) Alagad kan sinda dai makabalos na daing kapasloan sa gabos na ebidensia nin banal na pagkamoot na saindang nakakamtan, isinikwal na daw nin Dios an rasa nin tawo? Dai nanggad! Guminibo tolos sia nin probisyon para sa pagtanos sa gabos na salang ibinunga kan paglapas kan enot niatong mga magurang. (Genesis 3:15) Si Jehova nagpaheling man nin pagkamoot paagi sa mapagtagal na pagpasensia sa bakong sangkap na gikan ni Adan. (Roma 5:12) Sa gurano kalawig na panahon? Tara, sa laog na nin mga 6,000 na taon sagkod ngonyan! An Dios nangorognang nagpaheling nin pagkamoot sa saiyang mga lingkod. Totoo an mga tataramon na: “Jehova, Jehova, Dios na maheherakon asin maugayon, maluya sa pagkaanggot asin mayaman sa mamomoton na kabootan asin katotoohan, nagpapadanay nin mamomoton na pagkaherak sa rinibo, na nagpapatawad sa sala asin paglapas patin kasalan.”—Exodo 34:6, 7.
5. Paano si Jehova nagpaheling nin mamomoton na pagpasensia sa pagtratar sa nasyon nin Israel?
5 Iyo, dakula man nanggad an pagpapasensia na ipinaheling ni Jehova Dios sa pagtratar nia sa mga Israelitas poon kan panahon na gibohon nia sindang sarong nasyon sa ibaba kan Bukid nin Sinai sagkod kan an saindang kasumbikalan makapirit sa saiya na lubos sindang isikwal. Arog kan mababasa niato sa 2 Cronica 36:15, 16: “Si Jehova na Dios kan saindang mga magurang nagsugo sa sainda paagi sa saiyang mga sugo, nin paolit-olit, huli ta sia naherak sa saiyang banwaan asin sa saiyang inierokan. Alagad ta pinag-oolog-olog ninda an mga isinugo kan tunay na Dios asin dinuduhagi an saiyang mga tataramon patin tinutuya an saiyang mga propeta, sagkod na an kabangisan ni Jehova luminuwas tumang sa saiyang banwaan, sagkod na mayo na nin kaomayan.” Alagad ta may mga daing kapasloan na nagbalos sa pagkamoot ni Jehova Dios. Tanganing maaraman kun paano ninda ginibo iyan, siyasaton niato ngonyan an buhay kan nagkapira sa mga tawong ini. Ini magbubugtak kan pundasyon sa pagpaheling kun paano kita mismo makababalos sa pagkamoot ni Jehova sa praktikal nanggad na mga paagi.
Kun Paano si Moises Nagbalos na Daing Kapasloan
6. Sa anong mga paagi na pambihira an halimbawa ni Moises, asin sa anong mga katongdan na naeksperyensiahan nia an pagkamoot nin Dios?
6 Si Moises pambihirang halimbawa nin saro na nagbalos na daing kapasloan sa pagkamoot nin Dios. Kanigoan na mga oportunidad an iinatubang ki Moises bilang an ampon na aki kan aking babae ni Faraon! Alagad ta pinili nia na “maapi kaibanan kan banwaan nin Dios kisa magkamit kan dai nagdadanay na pag-ogma sa kasalan, huli ta ibinilang niang orog pang kayamanan an pag-olog-olog kan Cristo kisa natipon na mga kayamanan kan Egipto.” (Hebreo 11:25, 26) Sarong beses, boot ni Moises na kaldahon an saiyang mga tugang, an mga Israelitas, sa kaoripnan sa Egipto. Pero dai ninda inapresyar an saiyang mga paghihingoa, ni idto man an itinalaan nin Dios na panahon para sa saindang kaligtasan. (Gibo 7:23-29) Alagad, pakalihis nin dakol na taon, huli sa pagtubod ni Moises asin daing kapasloan na pagmawot na tabangan an saiyang mga tugang, sia tinawan ni Jehova nin kapangyarihan na gumibo nin dakol na milagro asin maglingkod sa mga Israelitas sa laog nin 40 taon bilang Saiyang propeta, hokom, paraboot, asin tagapag-oltanan. Sa mga katongdan na ini, si Moises nakaeksperyensia nin kadakol na kapahayagan kan pagkamoot ni Jehova sa saiya asin sa saiyang mga kapwa Israelita.
7. Paano nagbalos si Moises sa mga kapahayagan kan pagkamoot nin Dios?
7 Paano si Moises nagbalos sa pagkamoot nin Dios asin dai na kutana maninigong kabootan? Saiya daw na ‘inako an dai na kutana maninigong pagkaherak ni Jehova pakatapos binasangbasang sana iyan’? (2 Corinto 6:1) Dai nanggad! Si Moises daing kapasloan na nagbalos sa mga kapahayagan ni Jehova nin pagkamoot sa saiya paagi sa pagigin biyong maki-Dios. Sia naglaom ki Jehova sa gabos na panahon asin may dayupot na relasyon sa saiyang Kaggibo. Inomaw na marhay nin Dios si Moises kan sinasagwe si Aaron asin Miriam huli sa pagtatsar sa saindang tugang! Iyo, si Jehova nagtataram nin “ngoso sa ngoso” ki Moises asin ipinaheling sa saiya “an kamugtakan ni Jehova.” (Bilang 12:6-8) Sa ibong kan kadakol na pribilehiyo ni Moises, sia nagpadagos na pinakamahoyo sa gabos na tawo asin inotob “nanggad” an mga pagboot ni Jehova.—Exodo 40:16; Bilang 12:3.
8. Paano ipinaheling ni Moises na sia talagang maki-Dios?
8 Ipinaheling man ni Moises na sia daing kapasloan na maki-Dios paagi sa pagmakolog na ipinaheling nia para sa ngaran ni Jehova, dangog, asin malinig na pagsamba sa saiya. Kaya, sa duwang pangyayari si Moises may kapangganahan na nakimaherak ki Jehova na kaherakan an Israel huli ta napapalabot an ngaran nin Dios. (Exodo 32:11-14; Bilang 14:13-19) Kan an mga Israelitas mapalabot sa idolatrosong pagsamba sa baka, si Moises nagpaheling nin kaigotan para sa malinig na pagsamba paagi sa pagkurahaw na: “Siisay an ki Jehova? Sa sako!” Pakalihis kaiyan, si Moises asin an kairiba nia ginadan an 3,000 sa mga parasamba sa ladawan. Dangan, sa laog nin 40 taon tinios nia an reklamador asin rebeldeng banwaan. Tunay na daing duwa-duwa na si Moises nagbalos na daing kapasloan sa mga kapahayagan kan pagkamoot nin Dios, na nagtatao nin marahay na halimbawa para sa sato ngonyan.—Exodo 32:26-28; Deuteronomio 34:7, 10-12.
An Marahay na Pagbalos ni David
9. (a) Paano nagbalos si David sa pagkamoot ni Jehova Dios? (b) Kapareho ni David, paano niato matatawan nin onra si Jehova paagi sa mahahalagang bagay?
9 An saro pang lataw na tawohan sa Biblia na nagtao nin marahay na halimbawa sa daing kapasloan na pagbalos sa pagkamoot nin Dios iyo an salmistang si David, an ikaduwang hade sa Israel. An kaigotan nia para sa ngaran ni Jehova nagmotibar saiya na labanan an nagduduhaging Filisteong higanteng si Goliat, na pinapangyari nin Dios na madaog ni David. (1 Samuel 17:45-51) An kaigotan man sanang iyan nagpahiro ki David na darahon sa Jerusalem an kaban kan tipan. (2 Samuel 6:12-19) Asin bako daw na an kamawotan ni David na itogdok si Jehova nin sarong templo saro pang kapahayagan kan saiyang kaigotan asin pag-apresyar sa pagkamoot asin karahayan nin Dios? Iyo nanggad. An dai pagtao saiya kan pribilehiyong idto dai nagpaluya sa boot ni David sa pag-andam para sa proyekto asin pagtaong onra ki Jehova paagi sa personal na pagdonar nin bulawan, pirak, asin mahahalagang gapo na may dakulaon na halaga. (2 Samuel 7:1-13; 1 Cronica 29:2-5) An kaagid na daing kapasloan na pagbalos sa pagkamoot nin Dios maninigong magpahiro sato na ‘tawan nin onra si Jehova paagi sa satong mahahalagang bagay’ paagi sa paggamit sa satong materyal na mga kayamanan sa pagpaoswag sa intereses kan Kahadean.—Talinhaga 3:9, 10; Mateo 6:33.
10. Sa anong bagay na maninigong arogon an ginibo ni David?
10 Minsan ngani si David nakaginibo nin magagabat na sala, sa bilog niang buhay sia napatunayan na ‘sarong lalaki na nasusunoan kan puso ni Jehova.’ (1 Samuel 13:14; Gibo 13:22) An saiyang mga salmo pano nin mga kapahayagan nin pag-apresyar sa pagkamoot nin Dios. An The International Standard Bible Encyclopædia nagsasabi na si David “abunda nin labi-labi sa pagpasalamat kisa siisay pa man na ibang nasambitan sa Banal na Kasuratan.” An salmistang si Asaf nagsabi na “pinili [nin Dios] si David na saiyang lingkod asin kinua sia sa mga toril kan aripompon. . . . Kinua nia sia tanganing magin pastor ki Jacob na saiyang banwaan asin sa Israel na saiyang mana. Asin pinagpastoran nia sinda sono sa integridad kan saiyang puso.” (Salmo 78:70-72) Tunay nanggad, an ginibo ni David maninigo niatong arogon.
Si Jesu-Cristo, an Satong Sangkap na Arogan
11, 12. Paano ipinaheling ni Jesus na sia talagang maki-Dios?
11 Siyempre, si Jesu-Cristo an pinakamarahay na halimbawa sa Kasuratan nin sarong tawo na daing kapasloan na nagbalos sa pagkamoot nin Dios. Ini nagpahiro ki Jesus na gibohon an ano? Enot sa gabos, sia napahiro na tawan si Jehova nin esklusibong debosyon. Daing duwa-duwa na si Jesus biyong maki-Dios. An pag-apresyar sa pagkamoot asin karahayan kan saiyang langitnon na Ama nagpahiro saiya na magin tunay na espirituwal na tawo. Sia may harani, dayupot na relasyon sa Dios. Si Jesus tawong parapamibi, asin gustong-gusto nia na makipag-olay sa saiyang langitnon na Ama. Paorootro, mababasa niato na si Cristo namimibi. Sarong beses magdamlag siang namibi. (Lucas 3:21, 22; 6:12; 11:1; Juan 17:1-26) Bilang pagbalos sa pagkamoot nin Dios, pinatunayan ni Jesus na totoo na ‘an tawo nabubuhay bakong sa tinapay sana kundi sa lambang tataramon na minaluwas sa ngoso ni Jehova.’ An totoo, an pag-otob sa kabotan kan saiyang Ama kakanon para sa saiya. (Mateo 4:4; Juan 4:34) Bako daw na maninigo man kitang magbalos sa pagkamoot nin Dios, na itinatao sa saiya an esklusibong debosyon?
12 Daing kapasloan na nagbabalos sa pagkamoot nin Dios, si Jesu-Cristo perming itinotokdo an atension sa saiyang Dios asin Ama. Kan may mag-apod ki Jesus na “Marahay na Paratokdo,” sia nagsayuma asin nagsabi: “Mayong marahay, kundi saro, an Dios.” (Lucas 18:18, 19) Paorootrong idinoon ni Jesus na mayo sia nin magigibo sa sadiri niang kagustohan. Dai nia noarin man pinalihis an oportunidad na pamurawayon an ngaran kan saiyang Ama, asin angay na gayo na pinonan nia an saiyang modelong pamibi kan pakimaherak na: “Pakangbanalon logod an saimong ngaran.” Asin dai mahaloy bago sia magadan, si Cristo nagsabi sa saiyang Ama: “Pinamuraway taka sa daga, na hinaman ko an trabaho na itinao mo sakong gibohon.” (Mateo 6:9; Juan 12:28; 17:4) Tunay nanggad, bilang balos sa pagkamoot nin Dios, maninigo kitang maghingoa na pamurawayon si Jehova, na ipinamimibi an pagpakangbanal sa saiyang banal na ngaran.
13. An pagkamoot nin Dios nagpahiro ki Jesus sa anong paggawe?
13 Ngonyan, tabi mangnohon an ikaduwang paagi na an daing kapasloan na pagbalos sa pagkamoot nin Dios nagpahiro ki Jesus. Iyan nagpangyari saiya na kamotan an katanosan asin ikaongis an karatan, arog kan ihinula sa Salmo 45:7. (Hebreo 1:9) Sia “maimbod, dai nin kadayaan, dai nin digta, siblag sa mga parakasala.” (Hebreo 7:26) Inangat ni Jesus an may maraot na intension na mga nagtutumang saiya na patunayan na sia may kasalan, alagad ta dai ninda iyan magibo. (Juan 8:46) Sa duwang pangyayari, an pagkaongis nia sa karatan nagpangyari saiya na linigan an templo nin paslong mga relihiyonista. (Mateo 21:12, 13; Juan 2:13-17) Asin malaniton an pagdenunsiar ni Jesus sa parasaginsagin na mga namomoon sa relihiyon, na sinasabihan pa ngani sinda na sinda gikan sa Diablo!—Mateo 6:2, 5, 16; 15:7-9; 23:13-32; Juan 8:44.
14. Bilang pagbalos sa pagkamoot ni Jehova, paano nakiiba si Jesus sa saiyang mga disipulo?
14 An saro pang paagi na nakamotibar ki Jesus an pagkamoot ni Jehova maheheling sa pagtratar nia sa saiyang mga apostol asin sa ibang disipulo. Sia mamomoton nanggad, mapasensia, asin matinios sa sainda! Segurado na binalo ninda nin makuri an saiyang pasensia huli sa saindang pagririribal, na nagdidiriskutiran sagkod sa mismong banggi nin pagpasaloib sa saiya kun baga siisay an pinakadakula. (Lucas 22:24-27) Pero, si Jesus perming mahoyo asin mapakumbaba sa puso. (Mateo 11:28-30) Totoo, pinasaloiban ni Judas si Jesus, dineharan sia ni Pedro nin makatolo, asin an ibang apostol nagdurulag kan dumatong an pagsururog sa pag-arestar sa saiya. Pero nungka sia na nagin mapait an boot o naghinanakit. Paano niato naaaraman? Bueno, kan makaibanan liwat an mga apostol pakabuhay nia liwat, dai sinda malanit na sinagwe ni Jesus sa pagpadaog sa takot. Imbes, saiya sindang rinanga asin pinakosog para sa orog pang paglilingkod sa Kahadean.—Juan 20:19-23.
15. Paano si Jesus daing kapasloan na naglingkod sa pisikal na mga pangangaipo nin mga tawo?
15 Pag-olayan niato an saro pang paagi na si Jesu-Cristo nagbalos na daing kapasloan sa pagkamoot nin Dios. Ginibo nia iyan paagi sa pag-atang kan saiyang sadiri para sa iba, sagkod sa makasosopog asin makolog na kagadanan sa hariging pasakitan. (Filipos 2:5-8) Si Jesus naglingkod sa pisikal na mga pangangaipo nin mga tawo paagi sa milagrosong pagpakakan sa mga kadaklan asin paggibo nin dakol na pagpaomay. (Mateo 14:14-22; 15:32-39) Permi niang ipinaoorog an kapakanan nin iba kisa sadiri nia. Kaya ngani nasabi nia: “An mga amid may mga lungib asin an mga gamgam nin langit may mga salagan, alagad an Aki nin tawo dai nin mahihigdaan.” (Mateo 8:20) Namamatean ni Jesus an paghiro kan espiritu nin Dios mantang iyan nagluluwas sa saiya sa paggibo nin milagrosong mga pagpaomay. Alagad nungka na sia naghingoang magganansia sa materyal sa paggamit sa pambihirang kapangyarihan na iyan, arog kan an sarong babae na dinudugo sa laog na nin 12 taon kaptan an saiyang panluwas na gubing na may pagtubod asin naomayan. (Marcos 5:25-34) Saro pa, si Jesus nungka na ginamit an pambihirang mga kapangyarihan para sa saiyang sadiri.—Ikomparar an Mateo 4:2-4.
16. Sa anong mga paagi na si Cristo naglingkod sa espirituwal na pangangaipo nin mga tawo?
16 Minsan ngani si Jesus daing kapasloan na inasikaso an pisikal na mga pangangaipo kan mga tawo paagi sa pagpaomay sa saindang mga kamatean asin milagrosong pagpakakan sa sainda, an mayor na motibasyon sa saiyang daganon na ministeryo iyo an paghuhulit kan maogmang bareta kan Kahadean nin Dios, pagtotokdo, asin paggibo nin mga disipulo. Sa ibong kan gabos na makangangalas na mga pagpaomay nia, dai sia namidbid bilang an Dakulang Doktor o Paramilagro kundi bilang an Marahay na Paratokdo. (Mateo 4:23, 24; Marcos 10:17) Inapod ni Jesus an saiyang sadiri na Paratokdo, arog kan pag-apod saiya kan saiyang mga disipulo asin pati kan saiyang mga kaiwal. (Mateo 22:16; 26:18; Marcos 9:38) Asin kanigoan na mga katotoohan an itinokdo nia, arog kan sa saiyang Sermon sa Bukid! (Mateo 5:1–7:29) Angay na marhay an saiyang mga ilustrasyon, asin mapuwersa nanggad an saiyang makahulang mga parabola asin iba pang hula! Bakong makangangalas na an mga soldados na isinugong umarestar ki Jesus sarong beses dai makaya kan saindang boot na dakopon sia!—Juan 7:45, 46.
17. (a) Paano kita tinawan ni Jesus kan sangkap na arogan sa pagkamoot? (b) Ano an ipaliliwanag sa masunod na artikulo?
17 Daing duwa-duwa, si Jesu-Cristo nagtao sato kan sangkap na halimbawa sa daing kapasloan na pagbalos sa mga pagpaheling sa sato nin Dios nin pagkamoot. Tinawan ni Jesus an saiyang langitnon na Ama kan enot na lugar sa saiyang buhay asin puso. Sia tunay na namoot sa katanosan, mamomoton na nakiiba sa saiyang mga apostol asin ibang disipulo, asin ginamit an saiyang buhay sa paglilingkod sa espirituwal asin materyal na mga pangangaipo nin mga tawo. Ultimo, kinoronahan ni Jesus an saiyang ministeryo paagi sa pagtao kan saiyang buhay bilang pantubos. (Mateo 20:28) Alagad kumusta man kita? Totoo, kita bakong sangkap, kapareho ni Moises asin David. Minsan siring, arog kan ipaheheling kan masunod na artikulo, may praktikal na mga paagi na satong maaarog an satong Arogan sa daing kapasloan na pagbalos sa mga kapahayagan kan pagkamoot nin Dios.
Ano an Isisimbag Nindo?
◻ Taano ta masasabi na “an Dios pagkamoot”?
◻ Paano si Moises nagbalos sa mga kapahayagan kan pagkamoot nin Dios?
◻ Sa anong mga paagi na si David nagbalos sa pagkamoot ni Jehova Dios?
◻ Anong halimbawa an itinao ni Jesu-Cristo sa pagbalos sa pagkamoot nin Dios?
[Ritrato sa pahina 8]
Aram daw nindo kun paano si Moises nagbalos sa pagkamoot nin Dios?
[Mga ritrato sa pahina 12, 13]
Si Jesus nagbalos sa pagkamoot nin Dios paagi sa pagtabang sa iba sa espirituwal asin pisikal saka pagtao kan saiyang buhay bilang pantubos