Ano an Katuyohan nin Hula?

AN MGA naghihingako na an saindang laen-laen na klase nin pagsamba mga kapahayagan gikan sa mga mas makapangyarihan sa tawo nag-aadmitir man na igwa nin marahay asin maraot na mga kapangyarihan na orog sa tawo. An pag-admitir na ini nagpapalataw sa mga hapot na ini: An kada saro daw sa mga klaseng ini nin pagsamba ipinahayag gikan sa marahay na gikanan? O iyan daw may maraot na gikanan? Arin an ipinasabong kan tunay na Dios?

An Enot na Relihiyon

An katawohan minimidbid na sarong pamilya, asin ini kaoyon kan kasaysayan sa Biblia manongod sa sarong orihinal na mag-agom na tawo, si Adan asin Eva. Si Jehova, an Kaglalang, ipinamidbid an saiyang sadiri sa sainda. Ipinahayag nia ki Adan asin Eva an saindang kabtang sa saiyang katuyohan asin an saindang tunay na relasyon sa saiya. Ginibo nin Dios si Adan na saiyang enot na propeta, na may paninimbagan na itao an banal na mga kapahayagan sa saiyang agom asin sa huri sa saindang aki, an boot sabihon, sa bilog na katawohan.—Genesis 1:27-30; 2:15-17.

Iyo sana ini an solamenteng relihiyon, an saro sanang klase nin pagsamba na ipinahayag ni Jehova Dios. Idto ipinahahayag paagi sa pagkuyog sa kabotan nin Dios. Mayo nin mga rituwal, atang, altar, o orakulo na hinahagad.

Naglataw an Falsong Relihiyon

An enot na nagtutumang na “kapahayagan” guminikan sa sarong anghel na gustong sambahon. Nag-opresir sia nin pansalida sa tunay na relihiyon asin sinugotan si Adan asin Eva na umiba sa saiya sa pagrebelde tumang sa saindang Kaglalang. Ginibo sia kaining Satanas, an paratumang ki Jehova. An saiyang “hula” nagsagin nag-oopresir nin pagsadiring boot asin independensia sa Dios. Imbes, iyan ginikanan nin pagkaoripon ki Satanas asin sa kasalan, na nagbunga nin kagadanan.—Genesis 3:1-19; Mateo 4:8-10; Roma 5:12.

Kan huri si Satanas inibanan nin iba pang rebeldeng anghel, o demonyo. Daing duwa-duwa na an mga ini nagpalakop nin falsong relihiyosong mga ideya na nakakontribuwir sa pagparaot sa katawohan. Kaidtong kaaldawan kan makoapo ni Adan na si Enos, “nagpoon an pag-apod sa ngaran ni Jehova.” Sono sa Targum of Palestine, ini ginibo na may paglanghad bilang kabtang kan idolatrosong pagsamba kan panahon na idto.—Genesis 4:26; 6:1-8; 1 Pedro 3:19, 20; 2 Pedro 2:1-4.

An falsong relihiyon pinara kan Baha kan aldaw ni Noe, na iwinalat an saro sanang tunay na klase nin pagsamba na ginigibo kan propeta ni Jehova, si Noe. (Genesis 1:5-9, 13; 7:23; 2 Pedro 2:5) Alagad ta yaon pa man giraray an mga demonyo asin otrong iinintrodusir an falsong mga hula asin relihiyosong ideya. Pinapangyari ninda na an mga gikan ni Noe mapaanggot si Jehova paagi sa pagtogdok kan siudad nin Babel bilang sentro nin falsong pagsamba. Alagad ta rinibaraw nin Dios an saindang tataramon asin “iwinarak sinda hale duman pasiring sa ibabaw kan bilog na daga.”—Genesis 11:1-9.

Ano an sinasabi kaini gabos sa sato? Kita gabos gikan ki Noe asin Adan. Kaya an gabos na kultura saro sana an ginikanan asin may nawalat na kadikit na ideya manongod sa Dios bilang tada kan kaaraman na nagdanay gikan sa kaaldawan ni Noe. Alagad ta an pundamental na ideyang ini rinaot nin falsong relihiyosong mga ideya na namana sa mga apoon na idto na nagkawararak hale sa Babel (na kan huri itinogdok giraray bilang Babilonya) pasiring sa gabos na parte kan daga. Ini maririsa sa pararehong superstisyon manongod sa mga espiritu kan gadan, sa pagsamba sa mga apoon, asin sa paggibo nin astrolohiya, pagtoodtood, asin panraratak.—Daniel 2:1, 2.

An Katuyohan nin Hula

Ini daw nangangahulogan na an mga relihiyon sa presenteng aldaw basado sana sa mga ideya na minana sa suanoy na panahon na idto? Dai. Si Satanas asin an mga demonyo sagkod ngonyan nagpapasabong nin falsong hula tanganing dayaon asin pagsiriblagon an katawohan, ribarawon an tunay na mga kapahayagan manongod sa Dios, asin establisaron an falsong mga ideya asin relihiyon. (1 Timoteo 4:1; 1 Juan 4:1-3; Kapahayagan 16:13-16) An Biblia nagsasabi: “Nagkaigwa man nin falsong mga propeta sa tahaw kan banwaan, kun paanong magkakaigwa man nin falsong mga paratokdo sa tahaw nindo. An mga ini hilom na magdadara sa laog nin nakalalaglag na mga sekta.”—2 Pedro 2:1.

Sa ibong na kampi, prineserbar ni Jehova an tunay na relihiyon na itinao sa Eden. Dinugangan nia an impormasyon tanganing padakulon an satong kaaraman manongod sa saiya asin an satong paninimbagan sa pagkaotob kan saiyang katuyohan. Kaya an tunay na mga hula ipinamimidbid an katotoohan manongod sa Dios, sa saiyang katuyohan, asin sa saiyang moral na mga pamantayan. Liniliwanag kaiyan an relasyon nin tawo sa saiya tanganing ikabalik an tawo sa pakaoyon sa saiyang katuyohan, na minagiya sa lubos na kaotoban kaiyan.—Isaias 1:18-20; 2:1-5; 55:8-11.

Sa pagpopoon kan pagrebelde nin tawo, si Jehova nagsabi nin sarong hula na nagtao nin paglaom sa mga aki ni Adan asin Eva. Ipinahayag nia na magkakaigwa nin paraligtas, “banhi,” na malaglag ki Satanas asin sa saiyang mga banhi. (Genesis 3:15) An nahuring mga hula nakatabang na ipamidbid an ipinanugang “hulang” ini, o “linahidan” nin Dios, asin nagpahayag na sia an may pangenot na kabtang sa pagkaotob kan mga katuyohan nin Dios.—Salmo 2:2; 45:7; Isaias 61.1.

Kaya an pangenot na intension nin hula ipamidbid an mga katuyohan nin Dios asin an “linahidan,” o “Cristo,” na paagi sa saiya iyan magkakaorotob. Huling an piniling ini napatunayan na iyo si Jesus, an anghel ni Jehova nagsabi: “Magsamba ka sa Dios; huli ta an pagpatotoo ki Jesus iyo an nagpapasabong nin [o, iyo an espiritu nin] paghuhula.” (Kapahayagan 19:10) Duwang bagay an liniliwanag kan mga tataramon na ini. Enot, mayo nin ahente nin tunay na hula na maghahagad na sia sambahon huli ta an tunay na pagsamba para sana ki Jehova Dios. (Mateo 4:4; Juan 4:23, 24) Ikaduwa, an ultimong katuyohan nin gabos na tunay na hula dapat na ipahayag an mga pangyayari asin katotoohan mapadapit ki Jesus. Ini nagmimidbid sa mayor na kabtang na itinao sa saiya ni Jehova sa pagkaotob kan Saiyang katuyohan na pakangbanalon an Saiyang ngaran asin ibalik an daga sa tamang lugar kaiyan sa Saiyang areglo nin mga bagay.—Juan 14:6; Colosas 1:19, 20.

Sa dahelan na ini, an ipinasabong na mga mensahe gikan sa Dios sa pangenot nagtotokdo ki Jesus. An bilog na espiritu, o intension asin katuyohan, kan tunay na hulang iyan magpatotoo sa saiya. Dugang pa, an kaotoban kan mga hula ki Jesus tanda na iyan gabos totoo. Ini an dahelan na sinasabi kan Biblia na “an katotoohan nagdatong paagi ki Jesu-Cristo.” “Huli ta minsan gurano kadakol kan mga panuga nin Dios, an mga iyan nagin Iyo paagi sa saiya.”—Juan 1:17; 2 Corinto 1:20; Gibo 10:43; 28:23.

Taano ta sa mga Israelitas?

Pinonan ni Jehova an saiyang “pagpatotoo ki Jesus” paagi sa saiyang hula manongod sa ipinanugang “banhi.” Dangan ipinahayag nin Dios na an daganon na linahe kan “banhi” paagi ki Noe, Sem, Abraham, Isaac (bakong ki Ismael), asin Jacob. An mga tawong ini nagdanay na maimbod sa tunay na relihiyon, na pinatunayan na sinda maimbod na mga propeta ni Jehova mantang an gabos na nasyon rinaot kan pagsamba sa falsong mga dios. (Genesis 6:9; 22:15-18; Hebreo 11:8-10, 16) An linahe nagpadagos paagi sa mga gikan kan mga tawong ini—an nasyon nin Israel asin partikularmente an pamilya ni David, an pinakaprominenteng hade sa Israel.—2 Samuel 7:12-16.

Sa pagpaliwanag kun taano ta pinili nia an Israel, si Jehova nagsabi: “Bakong huli sa saindong pagigin pinakadakol sa gabos na banwaan . . . [kundi] huli sa saiyang pag-otob sa sumpa . . . sa saindong mga magurang,” si Abraham, Isaac, asin Jacob. (Deuteronomio 7:6-8; 29:13) Malinaw na saro sanang nasyon an makatatao kan linahe para sa ipinanugang “banhi.” Minsan siring, an tunay na relihiyon bakong limitado sana sa mga Israelitas. Minsan ngani an mga kapahayagan nin katotoohan dai itinao sa ibang nasyon, an mga indibiduwal hale sa sainda puwedeng umiba sa Israel sa pagsamba, asin an iba sa sainda iiniba ngani sa linahe kan banhi. (Bilang 9:14; Rut 4:10-22; Mateo 1:5, 6) An separadong mga kapahayagan na itinao sono sa nasyon o rasa gigikanan sana kutana nin orog na relihiyosong pagkabaranga, mantang kabotan ni Jehova na pagsararoon an katawohan sa sarong pagsamba.—Genesis 22:18; Efeso 1:8-10; 2:11-16.

An mga kahagadan nin Dios parareho para sa gabos na rasa. Huling sia dai nagliliwat sa saiyang moral na mga pamantayan asin katuyohan, an saiyang mga ginibo sa Israel nagpaheling kun ano an gigibohon nia sa kaagid na mga situwasyon sa ano man na oras. (Malaquias 3:6) Kaya an Israel nagserbing modelo para sa gabos na nasyon. Paagi kaiyan ipinaheling nin Dios an mga pakinabang sa tunay na pagsamba asin an karungawan nin falsong mga pagsamba. Mantang an mga Israelitas nagdadanay na maimbod sa saiya, sinda saiyang iniingatan asin binibendisyonan. Kun sinda minasamba sa falsong mga dios nin ibang mga nasyon, sinda nahoholog sa pan-aapi kan mga nasyon na iyan, sono sa ipinatanid sa sainda ni Jehova.—Deuteronomio 30:15-20; Daniel 9:2-14.

An Israel nagserbi man na makahulang modelo, asin si David nagin makahulang ladawan ni Jesus, na nagmana kan tipan nin Dios ki David para sa Kahadean. (1 Cronica 17:11, 14; Lucas 1:32) An Pagboot na itinao sa Israel, kaiba an mga atang asin pagkasaserdote kaiyan, nanganino sa atang ni Jesus asin nagtokdo sa saiyang langitnon na Kahadean asin pagkasaserdote. Kaya an Pagboot nagin “paratokdo na minagiya pasiring ki Cristo.”—Galacia 3:19, 24; Gibo 2:25-36; Hebreo 10:1-10; Kapahayagan 20:4-6.

An Libro nin Tunay na Hula

An mahalagang impormasyon na ini dai puwedeng ikapreserbar nin tama paagi sa berbal na tradisyon o paagi sa separadong mga kapahayagan sa laen-laen na nasyon. An pinakamarahay na paagi nin pagpreserbar asin pagpaabot sa gabos na nasyon iyo an nasusurat na rekord. Asin ini naootob kan Biblia. Iyan sana an igwa kan ipinasabong na mga kapahayagan nin Dios asin nagpepreserbar sa makasaysayan asin makahulang rekord kan saiyang mga ginibo sa tawo. Iyan sana an nagtotokdo ki Jesu-Cristo bilang Ahente nin Dios para sa kaligtasan asin igwa kan ultimong mga hula manongod sa maabot na pagkaotob sa saiyang Mesiyanikong gibohon. Kaya ini an kompletong ipinasabong na nasusurat na Tataramon nin Dios.—Roma 15:4; 1 Corinto 10:11; 2 Pedro 1:20, 21.

Poon kan matapos an Biblia, an mga nag-introdusir nin bagong mga “hula,” relihiyon, asin sekta dai puwedeng pinasabngan nin Dios. An tunay na mga hula dai itinao tanganing magpahayag nin bagong mga relihiyon. An mga iyan pinapagdanay na napapanahon an sarong tunay na relihiyon asin nagpamidbid kan maabot na kaotoban kan katuyohan ni Jehova. An kaotoban kan mga iyan nagtatao nin pruweba sa saiyang pambihirang pagka-Dios asin kapangyarihan, na nagpapaheling na sia sana an makahuhula nin mga pangyayari mga siglo bago pa asin otobon iyan nin eksakto.—Isaias 41:21-26; 46:9-11.

Kaya an gabos na nagmamawot na makaaram sa tunay na hula asin gumibo nin tunay na relihiyon kaipuhan na dumolok sa Biblia. Iyan an libro nin hula nin Dios—an saiyang kompletong mensahe sa katawohan.—2 Timoteo 3:16, 17.

[Mga ritrato sa pahina 7]

An linahe kan ipinanugang “banhi”

Noe

Sem

Abraham

Isaac

Jacob

David

Jesus