“Dinadara Nia Ako sa Kataed nin Toninong na Katubigan”
SA MAINIT na klima sa kadagaan kan Biblia, an mga karnero kaipuhan na magrara aroaldaw. Kun siring, an sarong mahalagang marhay na kabtang kan gibohon nin sarong pastor iyo na pararaon an saiyang aripompon. Kun beses pinararara kan mga pastor an saindang mga aripompon hale sa sarong bubon, na ibinububo an tubig sa mga raraan tangani na makarara an mga karnero. (Genesis 29:1-3) Minsan siring, partikularmente kun tig-oran, an lugar sa palibot kan saradit na sapa asin salog nagtatao nin toninong, “matubig na mga pahingaloan.”—Salmo 23:2.
Kaipuhan na aram nin sarong may kakayahan na pastor kun saen makakukua nin tubig sagkod tamang sabsaban para sa saiyang aripompon. An saiyang lubos na kabatidan sa sarong lugar naggagarantiya sa kaligtasan kan saiyang mga karnero. Si David, na dakol na taon na nagpastor sa mga karnero sa kabubulodan sa Judea, ikinomparar an espirituwal na paggiya nin Dios sa sarong pastor na dinadara an saiyang mga karnero pasiring sa marahay na mga sabsaban asin sa tubig na nagtatao nin buhay. “Dinadara nia ako sa kataed nin toninong na katubigan,” an sabi ni David oyon sa sarong traduksion.—Salmo 23:1-3, New International Version.
Pakalihis nin dakol na taon, paagi sa saiyang propetang si Ezequiel, naggamit si Jehova nin kaagid na ilustrasyon. Nanuga sia na titiponon an saiyang banwaan hale sa mga nasyon na pinagkawararakan ninda, siring sa pagtipon nin sarong pastor sa saiyang mga karnero. “Dadarahon ko sinda sa saindang sadiring daga asin pasasabsabon sinda sa kabukidan nin Israel, sa gilid nin mga salog,” an pag-asegurar nia sainda.—Ezequiel 34:13.
Si Jehova Dios interesado man na marhay manongod sa pagtao nin espirituwal na tubig. An libro nin Kapahayagan may ilinaladawan na sarong “salog kan tubig nin buhay” na nagbobolos hale sa trono nin Dios. (Kapahayagan 22:1) Ipinapaabot sa gabos na tawo an imbitasyon na uminom hale sa salog na ini. “An siisay man na boot [puedeng] kumua kan tubig nin buhay na daing bayad.”—Kapahayagan 22:17.
An simbolikong tubig na ini nin buhay nagrerepresentar sa mga probisyon nin Dios para sa buhay na daing katapusan. An siisay man puedeng pumoon na uminom hale sa tubig na iyan paagi sa ‘paglaog sa isip nin kaaraman dapit sa iyo sanang tunay na Dios asin dapit sa saro na saiyang sinugo, si Jesu-Cristo.’—Juan 17:3.