Hinahangaan niato an arog kaiyan na mga parakabayo asin an saindang mga kabayo. Minsan siring, an mga kabayo asin nangangabayo na naheling kan kagsurat sa librong Kapahayagan (Apocalipsis) makangangalas na paghelingon! Sinda misteryoso patin nakakakubhan. An mga nangangabayong ini namidbid na nin dakol bilang an Mga Nangangabayo sa Apocalipsis.

Imahinaron na ngonyan, nagtataguktok sa pagdalagan parani sa saindo, an apat na ekspertong mga nangangabayo, na an saro may kapot pang minasbad! Helinga an kolor kan saindang kabayo. An lambang saro laen man. An sarong kabayo maputi, an saro mapula, an saro maitom, asin an saro malungsing kolor na medyo berde-madarag. Tunay na sinda pambihira, misteryosong paghelingon.

Sundan an marikas na pagsaysay sa naheling kan parasurat sa Biblia, si apostol Juan. Sia nagsasabi: “Dangan naheling ko an sarong maputing kabayo, asin an nangangabayo dian may darang arko. Tinawan sia nin korona, asin sia nangabayo bilang ganador tanganing mandaog. . . . Asin nagluwas an saro pang kabayo, na mapula, asin an nangangabayo dian tinawan nin kapangyarihan na haleon an katoninongan sa daga, asin papangyarihon na an mga tawo maggaradanan; tinawan sia nin dakulang minasbad. . . . Asin duman naheling ko an sarong maitom na kabayo, asin an nangangabayo dian may kapot na timbangan sa saiyang kamot, asin nadangog ko an sarong tingog . . . na nagsabi, ‘An trigo sa halaga nin [sarong aldaw na tangdan] an sarong litro, asin an sebada tolong litro sa halaga nin [sarong aldaw na tangdan]’ . . . Asin duman naheling ko an sarong kabayo na kolor abo, asin an ngaran kan nangangabayo dian Kagadanan, asin sinusundan sia kan Hades. Tinawan sinda nin kapangyarihan sa ikaapat na kabtang kan daga, tanganing gadanon an mga tawo paagi sa minasbad, gutom, kagadanan, asin mababangis na hayop kan daga.”—Kapahayagan 6:2-8, An American Translation.

Poon kan enot na isurat an bisyon na ini, an kahulogan kaiyan nagin dakulang problema para sa dai mabilang na mga parabasa. Ano an irenerepresentar kan misteryosong mga kabayong ini asin kan mga nangangabayo dian? Kasuarin nagpoon an saindang pangangabayo? An sainda daw na pangangabayo may koneksion sa buhay ngonyan? An dakol na manlaenlaen na paliwanag itinatao kun dapit sa ipinagrerepresentar kan mga kabayo asin kan mga nangangabayo, asin kun kasuarin nangyari an saindang pangangabayo.

An pinakadakulang pagkakalaen yaon sa mga interpretasyon sa maputing kabayo asin sa nangangabayo dian. Halimbawa, an New Catholic Encyclopedia nagpapaliwanag na an maputing kabayo nagrerepresentar ‘magsalang sa kapangganahan kan ebanghelyo o sa imperyalismo.’

Sa librong Daniel and the Revelation, si Uriah Smith nagtatao kan interpretasyon na ini: “An maputing kabayo . . . angay na simbolo kan mga kapangganahan kan ebanghelyo kaidtong enot na siglo . . . An kaputian kan kabayo nagpapaheling kan pagigin puro kan pagtubod kan panahon na idto.”

An The Expositor’s Bible nagsasabi: “Sa enot na nangangabayo an mobimiento imbes na an persona ni Cristo iiniintrodusir sa sato, sa pinakaenot na tangga kan mapangganang pag-oswag kaiyan, asin ipinanunuga an kapangganahan kaiyan sa ngapit. . . . Nanonodan niato na an mobimientong ini nasa kinaban, na an kahadean na ini nasa tanga niato, asin na an mga minatumang dian madadaog.” Minsan siring, si Woodrow Kroll, kan The Christian Jew Foundation, naghohona na an nangangabayo sa maputing kabayo iyo an Anticristo.

SIISAY an makakapagpaliwanag sa misteryo kan mga nangangabayo sa Apocalipsis? Sa Biblia, sa Daniel 2:47, si Jehova Dios inaapod na “Parapahayag nin mga hilom.” Mantang sia an nagpasabong kan Biblia, kaiba na an bisyon manongod sa mga nangangabayo, sia an makapagtatao kan mga simbag na kaipuhan niato. Kun siring, paagi sa pagsiyasat sa saiyang ipinahayag na Tataramon para sa impormasyon, nadidiskobre niato an kahulogan kan de-kolor na mga kabayo asin kan mga nangangabayo dian.—Amos 3:7; 2 Timoteo 3:16; 2 Pedro 1:21.

An enot na tolong bersikulo kan Kapahayagan, o Apocalipsis, nagtatao nin liyabe na makakabukas sa misteryo. Ipinaheheling kaiyan na an sunod-sunod na mga bisyon na ini may koneksion sa maabot na mga pangyayari, an boot sabihon, sa maabot pa pakalihis kan taon 96 C.E. kan maheling ni apostol Juan an gabos na bagay na ini asin isurat iyan. Kaoyon ini sa saiyang isinabi sa Kapahayagan 1:10 na an mga naheling sa mga bisyon na ini mangyayari sana pagkapoon kan “aldaw kan Kagurangnan.”—Ikomparar an 1 Corinto 1:8; 5:5.

Nasa isip ini, sisiyasaton niato an mga kabayo asin an mga nangangabayo dian. Sa primero, mahalaga na magkaigwa kan tamang pakasabot manongod sa maputing kabayo asin sa nangangabayo dian. Dangan an kahulogan kan iba pang nangangabayo masunod na sana.

Sinisiyasat an mga Interpretasyon

Sa naeenot na artikulo, sinabi na an sarong interpretasyon kan maputing kabayo asin nangangabayo dian iyo na sinda nagrerepresentar ‘magsalang sa kapangganahan kan ebanghelyo o sa imperyalismo.’ Alagad ta an kinaban dai pa nakokombertir sa ebanghelyo (maogmang bareta) manongod ki Cristo asin sa mga katuyohan nin Dios mapadapit sa saiya. Asin tunay na an imperyalismo dai pa man nagigin mapanggana. Imbes, iyan narurumpag, nagkakabaranga, sa siglong ini.

Kumusta man an interpretasyon na an maputing kabayo nagrerepresentar sa kapangganahan kan ebanghelyo asin sa pagigin puro kan pagtubod kaidtong enot na siglo? Dai kaini kinokonsiderar an bagay na an bisyon manongod sa mga bagay na maabot sa ngapit. Asin mantang isinurat ni Juan an bisyon bilang sarong presong desterrado sa isla nin Patmos kan taon 96 kan satong Komon na Kapanahonan, dai iyan puwedeng magrepresentar sa ano man na may koneksion sa enot na siglo.

An saro pang paliwanag iyo na an maputing kabayo nag-iintrodusir kan mobimiento imbes na kan persona ni Cristo asin na an saiyang Kahadean ‘nasa tanga’ niato, an boot sabihon, nasa satong puso. Alagad ta an mobimiento ni Jesu-Cristo asin kan Kristianismo dai nagpoon sa sarong panahon pakalihis kan pagsurat sa Kapahayagan. Imbes, an mobimientong ini risa nang gayo sa tahaw kan mga Kristiano kan enot na siglo bago si Juan nagsurat.

Siring man, kan si Jesus magsabi na “an kahadean nin Dios nasa tanga nindo,” an kaolay nia iyo an parasaginsagin na mga relihiyosong Fariseo bilang simbag sa sarong hapot na pinalataw ninda. Si Jesus dai nakikipag-olay sa saiyang maimbod na mga parasunod asin sinasabihan sinda na an Kahadean bagay na ‘nasa tanga ninda’ sa sentido na iyan nasa saindang puso. Imbes, sinasabihan nia an daing pagtubod na mga Fariseo na sia, si Jesus, bilang an representante kan maabot na Kahadean nin Dios, presente sa tanga ninda kan okasyon na idto.—Lucas 17:21; helingon man an The Jerusalem Bible asin an The New English Bible.

Ano man an ideya na an nangangabayo sa maputing kabayo iyo an Anticristo? An Biblia mayong sinasabi na an Anticristo makakagibo nin siring na mga pagsalakay na puwedeng masabi manongod sa saiya na “sia nagluwas sa pandaog asin sa pagtapos kan saiyang pandadaog,” arog kan isinabi manongod sa nangangabayo sa maputing kabayo. (Kapahayagan 6:2) Maliwanag na an siisay man na nangangabayo sa maputing kabayo maluwas na nandadaog nin biyo. An saiyang pandadaog dai masusudya. An gabos niang kaiwal malalaglag.

An mga Tanda sa Biblia Nakatatabang sa Pagmidbid

An dai mamamaluan na pagpamidbid sa nangangabayo sa maputing kabayo itinatao kan “Parapahayag nin mga hilom” sa huring kabtang kan iyo man sanang sunod-sunod na bisyon na ini. Sa Kapahayagan 19:11-16, may naheling giraray na sarong maputing kabayo, na ngonyan may maliwanag na pagpamidbid kun siisay an nangangabayo.

An bagay na an maputing kabayo duwang beses na naheling sa makahulang mga bisyon na ini nagpaparisa na iyan saro sanang kabayo asin na ipinaheheling an laen-laen na trabaho o aktibidad kan nangangabayo. Sa nahuhuring eksena, an nangangabayo nginaranan. Sia inapod na “Maimbod asin Totoo,” “An Tataramon nin Dios,” asin “Hade nin mga hade asin Kagurangnan nin mga kagurangnan.”

An mga ngaran na iyan dai nang iwinawalat na pagduda kun siisay an nangangabayo sa maputing kabayo. Iyan daing iba kundi an Kagurangnan na Jesu-Cristo mismo! (Ikomparar an Kapahayagan 17:14.) Alagad sa anong panahon sa saiyang buhay? Iyan kaipuhan na pagkatapos na kan enot na siglo, kan itao an bisyon sa Kapahayagan. Mangnohon man na ngonyan tinawan na sia nin makahadeng korona. Kaya sa maabot na panahon poponan ni Jesu-Cristo an espesyal na papel bilang Hade, o Namomoon. Asin sa katongdan na iyan, sia ilinaladawan man bilang sarong guerrero na may darang pana, tanganing lumuwas “sa pandaog asin sa pagtapos kan saiyang pandadaog.”

An saro pang nagpapaheling na ini kaipuhan na sa ngapit pa iyo an bagay na ini: Kaidtong panahon kan apocaliptikong bisyon, labi nang 60 taon an nakalihis poon kan matapos ni Jesus an saiyang buhay sa daga, sia buhayon liwat hale sa mga gadan, asin sumakat sa langit. Kan sia bumuwelta sa langit, si Jesus sinabihan na maghalat sa too nin Dios sagkod sa maabot na panahon na an saiyang mga kaiwal gibohon na “tongtongan kan saiyang mga bitis.”—Hebreo 10:12, 13.

An Pangangabayo Nagpoon

Kaya an pangangabayo sa maputing kabayo mapoon sa maabot pang panahon kun si Jesu-Cristo patukawon na bilang an langitnon na Hade sa Kahadean nin Dios. Sa panahon na iyan isusugo sia nin Dios na may pagboot: “Mandaog ka sa tahaw kan saimong mga kaiwal.” (Salmo 110:2) Alagad ta noarin ini nangyari?

An pagkorona ki Jesu-Cristo bilang langitnon na Hade ilinaladawan sa Salmo 45:3-7. Dangan sa Hebreo 1:8, 9 si apostol Pablo nagkotar sa salmong ini asin iinaaplikar an bersikulo 6 asin 7 sa Aki nin Dios, si Jesu-Cristo. An detalyadong impormasyon asin mga pruweba sa Kasuratan na ipinublikar kan mga Saksi ni Jehova nagpapaheling na an pagkorona ki Jesu-Cristo sa langit nangyari sa katapusan kan Mga Panahon nin mga Hentil, “an itinalaan na mga panahon nin mga nasyon,” kan taon 1914.—Lucas 21:24.a

Kaya, an arin man na interpretasyon na ibinubugtak an pangangabayo nin mas amay pa sa taon 1914 dai puwedeng magin tama. Saro pa, mantang nasa enotan an nangangabayo sa maputing kabayo, an iba pang mga kabayo asin nangangabayo na kasunod magrerepresentar sa mga pangyayari na mangyayari kadungan, o pakalihis, kan pagpopoon kan saiyang pangangabayo. Kun siring, an pangangabayo kan apat na nangangabayong ini dapat na mangyari poon sa asin pakatapos na pumoon an “panahon kan katapusan” kan 1914. Poon kaidto na “an huring mga aldaw” naheling.—Daniel 12:4; 2 Timoteo 3:1-5, 13.