Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 20: Maogmang Pamilya nin Tawo na Sakop nin Bagong Pagkaama
1. Taano an manongod sa bagong pagkaama ta maogmang bareta sa pamilya nin tawo?
PAKATAPOS kan Armagedon, may ikaduwang pagkaama na naghahalat sa bilog na katawohan. Iyan maogmang bareta nanggad! An bagong pagkaama ginigibong posible an buhay na daing sagkod sa pagkasangkap nin tawo sa lakop sa dagang paraiso, huli ta an mismong bagong Ama kan pamilya nin tawo dai nagagadan. Sia may kapangyarihan na tumao nin sangkap na buhay sa gabos na saiyang aamponon bilang aki digdi sa daga.
2. Taano ta kaipuhan an bagong pagkaama?
2 Kaipuhan an bagong pagkaama huli ta nawara sa katawohan an orihinal na pagkaama kaiyan, an pagkaama kan Kaglalang nin tawo. An linahe na magpoon ki Jesus pabalik sa enot na tawo, si Adan, natatapos sa pagtao sato kan listahan na ini: “Cainan, na aki ni Enos, na aki ni Set, na aki ni Adan, na aki nin Dios.”—Lucas 3:37, 38.
3. Gurano kapahapahamak kan pagkawara sa bilog na katawohan kan pagkaama ni Jehova Dios?
3 An pagkawara kan pagkaama ni Jehova Dios nagin kapahapahamak para sa bilog na katawohan. An mga gikan ni Adan nagmana kan pagkakondenar sa kagadanan. An bagay malinaw na sinasabi sa Roma 5:12: “Paagi sa sarong tawo an kasalan naglaog sa kinaban asin an kagadanan huli sa kasalan, asin kaya an kagadanan nakalakop sa gabos na tawo huli ta sinda gabos nagkasala.” An “sarong tawong” iyan iyo si Adan, asin huli sa saiyang tuyong kasalan, nawara sa saiya an pagkaama kan saiyang Kaglalang, si Jehova.
4. Si Adan asin an katawohan napasairarom kan kiisay na pagkaama?
4 Napasa irarom nin kiisay na pagkaama si Adan? Sa kiisay na pagkaama nia dinara an kinaban nin katawohan? Sa pagkaama kan saro na nakakombensir saiya na lumuwas sa pamilya kan gabos na makinuyog na aki nin Dios sa langit asin daga. Idto pagkaama kan saro na nagtaram kan enot na putik, si Satanas na Diablo. Paano ini ginibo kan paratumang na iyan ki Jehova?
5. (a) Anong instrumento an ginamit ni Satanas na Diablo sa pagdaya sa agom ni Adan na makisuway sa Dios? (b) Taano asin paano si Adan nagkaigwa nin lubos na paninimbagan sa saiyang ginibo?
5 Sa 2 Corinto 11:3 ibinuyagyag ni apostol Pablo an bagay, na isinurat: “Nadaya kan halas si Eva paagi sa katusohan kaiyan.” May katusohan, ginamit ni Satanas an sarong halas sa Eden tanganing ipahayag an enot na putik sa daing pagsuspetsang si Eva, na putik na pinagsasahotan si Jehova Dios nin pagputik. (Genesis 3:1-7; Juan 8:44) Dai itinanos ni Adan an saiyang agom. Dai sia nagsayuma na kumakan kaiba nia asin dai ilinigtas an situwasyon. An tuyo niang pagkakasala nagamit kan Halas tumang sa saiya. Sa pagtao kan kasalan sa maninigong tawan kaiyan, an 1 Timoteo 2:14 nagsasabi: “Si Adan dai nadaya, alagad an babae lubos na nadaya asin naholog sa paglapas.”
An Saro na Maninigo sa Pagkaama
6, 7. Ipinaheling ni Jesus na sia mapaniniwalaan nin anong pagkaama, asin paano ini espisipikong isinabi kan hula sa Biblia?
6 Sa pagsayumang sumamba sa “dios kan palakaw na ini nin mga bagay,” pinatunayan ni Jesus na sia an Saro na dapat paniwalaan kan ikaduwang pagkaama sa pamilya nin tawo. (2 Corinto 4:4; Mateo 4:1-11; Lucas 4:1-13) Poon sa saiyang pagkamundag bilang tawo kan 2 B.C.E., sia an Saro na naaaplikaran kan hula sa Isaias 9:6:
7 “Namundag sa sato an sarong aki, may itinao sa satong sarong aking lalaki; asin an makaprinsipeng pamamahala mamumugtak sa saiyang abaga. Asin an saiyang ngaran aapodon na Makangangalas na Parahatol, Makosog na Dios, Amang Daing Katapusan, Prinsipe nin Katoninongan.” Kaya an “Prinsipe nin Katoninongan” may saro pang mahalagang katongdan para sa katawohan—an pagigin “Amang Daing Katapusan” kaiyan.
8. Taano si Jesus ta nakahiro na magin an “Amang Daing Katapusan” nin katawohan, asin paano ini pinatunayan ni apostol Pablo?
8 An Aki nin Dios magigin “Amang Daing Katapusan” sa pamilya nin tawo, na para kaiyan itinao nia an saiyang sangkap na buhay na tawo bilang atang. Siring sa isinurat ni apostol Pablo: “Huli ta kun paagi sa paglapas nin sarong tawo an dakol nagadan, an dai na kutana maninigong kabootan nin Dios asin an saiyang daing bayad na balaog kaiba kan dai na kutana maninigong kabootan paagi sa sarong tawong si Jesu-Cristo orog pang nagsopay sa dakol. Kaya, kun paanong paagi sa sarong paglapas an bunga sa gabos na tawo iyo an silot, siring man paagi sa sarong gibo nin pagpapakangmatanos an bunga sa gabos na tawo iyo an pagpapahayag sa sainda na matanos para sa buhay.”—Roma 5:15, 18.
9. Paano si Jesus nagin ikaduwang Adan sa katawohan, alagad gikan sa anong lugar na sia nagseserbing Ama nin katawohan?
9 Kaya, may sangkap na pagkabalanse sa mahahalagang bagay na ini. An nakaginibo kan “sarong paglapas” iyo an enot na tawo sa daga, si Adan. An “sarong gibo nin pagpapakangmatanos” ginibo kan solamenteng saro pang sangkap na tawo, si Jesus. Ini nagtogot saiya na magin an “Amang Daing Katapusan” kan mga gikan kan naglapas na si Adan. Sa paaging ini sia nagigin ikaduwang Adan sa pamilya nin tawo. An pag-atang kan saiyang sangkap na buhay na tawo asin an pagpresentar kan diretsong iyan sa buhay na tawo sa Dakulang Hokom sa langit ginigibong imposible para sa saiya na maglingkod digdi sa daga bilang daing sagkod na ama nin katawohan. Kan sia buhayon liwat hale sa mga gadan, ibinalik sia sa lugar nin mga espiritu asin ilinangkaw sa too kan Parabuhay Liwat sa saiya. Kaya sinasabi: “Nasusurat pa ngani: ‘An enot na tawong si Adan nagin buhay na kalag.’ An huring Adan nagin espiritung nagtatao nin buhay.” (1 Corinto 15:45) An bago, nag-ampon na Ama nin katawohan magtatao sainda kan pinakamarahay na kapinonan sa buhay na mapupuwede.
An Enot na mga Tawong Linalang na Magkakaigwa nin Ama
10. Sairisay an enot na mga tawo na magigin aki kan nag-ampon na Amang ini?
10 An “Amang Daing Katapusan,” si Jesu-Cristo na Hade, ipaheheling kun sairisay an mga enot na magigin aki nia. Paano? Paagi sa pagpreserbar sa “dakulang kahorasaan” kan dusay na buhay nin minilyon na nabubuhay ngonyan. Sinda an “dakulang kadaklan” nin “ibang karnero.”—Kapahayagan 7:9, 14.
11. Anong daganon na oportunidad an nasa atubangan kan arog-karnerong mga makaliligtas sa “dakulang kahorasaan”?
11 Daing kaagid an daganon na oportunidad na natatagama sa “dakulang kadaklan” pakalihis kan “dakulang kahorasaan.” Ilinaladawan bilang kabtang kan “tanda” kan “pagtatapos kan palakaw nin mga bagay” na ini, an piguratibong mga kanding sa parabola ni Jesus popohoon an buhay digdi sa daga, na mangangahulogan nin daing katapusan na kalaglagan para sa sainda. Alagad bakong siring an mangyayari sa “dakulang kadaklan” nin mga arog-karnero na mamomoton asin maimbod na naggibo nin karahayan sa natatada sa espirituwal na “mga tugang” ni Cristo na nasa daga pa. (Mateo 25:31-46) An pagliligtas sa “mga karnerong” iyan pasiring sa ibong kan “dakulang kahorasaan” asin palaog sa Milenyal na Paghade kan ihinulang “Prinsipe nin Katoninongan” magpapangyari sa mga nakaligtas na ini na lumaog sa mga bendisyon kan Kahadean. Sinda an magigin daganon na sakop kan “Prinsipe nin Katoninongan.”
12. Anong mga tataramon ni Jesus manongod sa pagkabuhay liwat an nagpaparisa na daing sagkod na buhay an itinatagama sa mga malaog sa daganon na sakop kan Kahadean?
12 Sa panahon na iyan an itinaram ni Jesus bago nia buhayon liwat hale sa mga gadan si Lazaro maootob sa mga malaog sa daganon na sakop kan Kahadean. Sia nagsabi: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay; asin an gabos na nabubuhay asin naggigibo nin pagtubod sa sako dai noarin man magagadan.” (Juan 11:25, 26) Huli sa saindang pagkuyog sa saiya, sinda magkakamit nin sangkap na buhay nin tawo sa daganon na sakop kan Hade. Minsan an nakidamay na paragibo nin maraot na nagadan kataed ni Jesus sa Kalbaryo tatawan kan oportunidad na makalaog sa Paraiso. (Lucas 23:43) Ootobon ni Jesus an gabos na kahulogan kan saiyang ngaran na “Amang Daing Katapusan.”
An Maogmang Paglaom Para sa mga Gadan
13. An pagbuhay liwat sa mga tawong gadan magpapangyari na an siisay na mga bantog na tawo kan suanoy na mga panahon maheling sa daganon na sakop kan Kahadean?
13 Si Jesus, an pinakapangenot na gikan ni Abraham, nagsabi na an apoon na ini, an aki niang si Isaac, asin an makoapo niang si Jacob maheheling sa daganon na sakop kan Kahadean nin Dios. (Mateo 22:31, 32) Ini papangyayarihon kan pagbuhay liwat. Arog kan sabi ni Jesus, an gabos na tawong gadan sa mga lolobngan nin girumdoman makakadangog sa tingog kan Aki nin Dios asin maruluwas. An saindang ngapit magpoon sa panahon na iyan madepende sa saindang igagawe.—Juan 5:28, 29; Kapahayagan 20:12-15.
14. Ano an kaipuhan na patienot na gibohon para sa mga nakalinya sa daganon na pagkabuhay liwat, asin sairisay an enot na makikikabtang sa mga pag-andam na ini?
14 Kaipuhan na gibohon an dakulang pag-andam para sa mga tawo na ibabangon hale sa mga lolobngan pasiring sa buhay sa ibabaw kan daga sakop kan Kahadean kan “Amang Daing Katapusan.” An mga pag-andam na ini enot na gigibohon kan mga nakaligtas sa “ralaban kan dakulang aldaw nin Dios na Makakamhan sa gabos” sa Armagedon. (Kapahayagan 16:14, 16) Dai niato aram ngonyan kun magigin pira an “dakulang kadaklan” kan “ibang karnero” kan “Prinsipe nin Katoninongan” sa panahon na iyan, pero magkakaigwa nin igo para sa trabaho.
15. An dakol maglilingkod sa anong espesyal na katongdan sakop kan nag-ampon na Ama nin katawohan?
15 An Salmo 45 itinataram sa “Prinsipe nin Katoninongan” na ini bilang Hade, asin mantang sia an magigin “Amang Daing Katapusan” kan katawohan, an salmong ini nagsasabi sa saiya: “Sa kasalihid kan saimong mga apoon magkakaigwa kan saimong mga aki, na saimong nonombrahan bilang mga prinsipe sa bilog na daga.” (Salmo 45:16) Alagad bago pa buhayon liwat an maimbod na “mga apoon” na idto, an mga lalaki sa “dakulang kadaklan” nin mga nakaligtas sa Armagedon manonombrahan na sa makaprinsipeng mga katongdan na iyan. An rinibo sa may esperansang makaligtas sa Armagedon naglilingkod na bilang kamagurangan sa labing 54,900 na kongregasyon nin mga Saksi ni Jehova, na pinamamahalaan an espirituwal na intereses kan saindang kongregasyon.
16. (a) Sa pamamahala nin mga prinsipe, an mga nakaligtas sa Armagedon maglilingkod sa anong aktibidad? (b) Anong mga hapot an minalataw manongod sa pagkasunodsunod kan pagbabalik kan mga gadan?
16 Sa pamamahala nin mga prinsipe, an mga nakaligtas sa Armagedon maglilingkod na may maigot na pakikikooperar. Dai pa niato aram kun anong mga instruksion an aakoon kan “mga prinsipe sa bilog na daga” hale sa langitnon na “Prinsipe nin Katoninongan,” na nagtatao nin nakaoogmang eksperyensia para sa gabos nindang kapwa nakaligtas sa Armagedon. Isip-isipa an gabos na gubing na kaipuhan na andamon tanganing matawan nin angay na isusulot an mga gadan na binuhay liwat! Isip-isipa an gabos na kakanon na kaipuhan na andamon o tiponon! Kaipuhan man na andamon an mga istaran. Kanigoan kaogma kan panahon na iyan para sa gabos na may kabtang sa pag-aandam na ini! Siisay daw an enot na bubuhayon liwat? Sinda daw mabuwelta sa pagkasunodsunod na kabaliktaran kan pagkasunodsunod ninda sa paghilig sa mga lolobngan nin girumdoman? An martir daw na si Abel asin Enoc, na kinua nin Dios, saka si Noe, Abraham, Isaac, Jacob, asin an gabos na maimbod na propeta, tatawan nin espesyal na balos paagi sa pagkabuhay liwat nin enot?
17. Siisay an madeterminar sa pagkasunodsunod kan pagbabalik kan mga gadan sa buhay digdi sa daga, asin anong titulo na ihinula manongod sa saiya an nagpaparisa kan saiyang kakayahan na gibohon an saiyang mga paninimbagan?
17 An “Prinsipe nin Katoninongan” aram ini asin iyo an madeterminar kaini. Asin sia biyong may kakayahan para sa saiyang mga paninimbagan bilang an bagong Ama kan nabalukat na katawohan. An saro pa sa ihinulang mga titulo nia iyo an “Makosog na Dios.” Iyan nangangahulogan na sia magigin makosog, makapangyarihan na Saro. An pagpapaheling kan saiyang pagkadios magigin makakamhan ta bubuhayon nia an gabos na tinubos na gadan, na nagigirumdoman an saindang indibiduwal na ngaran asin an saindang personalidad. (Juan 5:28, 29; Gibo 10:42) May sangkap siang kakayahan na remedyohan an gabos na danyos na ginibo ni Satanas na Diablo sa nakaaging 6,000 na taon kan pagkabuhay nin tawo.
18. (a) Paano nahale an pangangaipo na si Adan magin apoon ni Jesu-Cristo? (b) Paano si Jesus nahimong magin ikaduwang ama kan mga aki ni Adan?
18 An enot na Adan nagpamana nin pagkakondenar sa kagadanan sa gabos niang aki. Nagin daw apoon si Adan kan tawong si Jesu-Cristo? Dai, si Jesus dai nagkaigwa nin tawong ama kundi ipinangaki nin sarong birhen na nagbados kan saiyang puwersa nin buhay na ibinalyo nin Dios hale sa lugar nin mga espiritu. Kaya an makasalan na si Adan dai nagin apoon kan daganon na Aki nin Dios na iyan. Alagad, an ikaduwang Adan nagin espiritung nagtatao nin buhay. Sa katongdan na ini puwede niang otobon an hula ni Isaias asin magin “Amang Daing Katapusan” kan mga aki kan enot na Adan, na saiyang binabalukat asin inaampon sa katuyohan na magtao nin sangkap na buhay nin tawo sa sarong paraisong daga.
19. Sa anong bagong relasyon sa rasa nin tawo malaog si Jehova Dios, asin anong pakana ni Satanas na Diablo an maoolang nia sa siring na paagi?
19 Sa siring na paagi an langitnon na Ama ni Jesu-Cristo magigin an langitnon na Lolo kan nakabalik na pamilya nin tawo. Sa dahelan na ini an pamilya nin tawo malaog sa bagong relasyon sa Kaglalang kan langit asin daga. Noarin man dai nagkaigwa ni kadikit na posibilidad na si Jehova masusudya sa saiyang orihinal na katuyohan. Sa siring maoolang ni Jehova an maringis, maraot na pakana ni Satanas na Diablo. An gabos na binalukat na pamilya nin tawo papaaramon kan bagay na ini. Kanigoan kaogma kan aldaw na si Jesu-Cristo iyo na an magin ama kan pamilya nin tawo tanganing atamanon an katawohan sa Paraiso na ibinalik sa daga!