“Mga Alang na Tulang” Asin “Duwang Saksi”—Paano Sinda Magkakonektar?

KAN 1919, nautob an duwang magkakonektar na propesiya: an mapadapit sa “mga alang na tulang” asin sa “duwang saksi.” Ihinula sa bisyon manungod sa “mga alang na tulang” an sarong halawigon na peryodo nin panahon (na uminabot nin dakul na siglo) na matatapos sa pagkabuhay kan sarong dakulang grupo nin mga lingkod nin Diyos. (Ezek. 37:2-4; Kap. 11:1-3, 7-13) An propesiya manungod sa “duwang saksi” naglaladawan sa sarong halipot na peryodo nin panahon (na nautob kan pagtatapos kan 1914 sagkod sa pagpupuon kan 1919) na matatapos sa pagkabuhay kan sarong sadit na grupo nin mga lingkod nin Diyos. An duwang propesiyang iyan parehong naglaladawan sa simbolikong pagkabuhay liwat, asin pareho iyan na may kautuban sa presenteng panahon kan 1919 kan ‘patindugon’ ni Jehova an saiyang linahidan na mga lingkod, patalingkason sa pagigin bihag kan Dakulang Babilonya, asin tipunon sinda kaiba kan ibinalik na kongregasyon.—Ezek. 37:10.

Pero, mangnuhon na may sarong mahalagang pagkakalain sa kautuban kan duwang propesiyang ini. An propesiya manungod sa “mga alang na tulang” nanunungod sa pagkabuhay kan gabos na miyembro kan linahidan na mga natatada. Alagad, an propesiya manungod sa “duwang saksi” nanunungod sa pagkabuhay kan nagkapirang miyembro kan linahidan nin Diyos na mga natatada—an mga nanginginot sa organisasyon asin ninombrahan bilang “maimbod asin mapagmansay na uripon.”—Mat. 24:45; Kap. 11:6.a

3. PAGPUPUON KAN 1919

   1919: Nabuhay an “duwang saksi” kan an sadit na grupo nin linahidan na mga tugang na nanginginot sa organisasyon nombrahan na maglingkod bilang “maimbod asin mapagmansay na uripon”