Sarong Misteryo—Siisay an Patotot na Dakulang Babilonya?
AN SARONG babae, sarong daing sopog na patotot, na nakaimpluwensia sa buhay nin binilyon na tawo, ginadan, pinadusahan nin kagadanan. Alagad ini bakong ordinaryong paggadan. Ano an nagpapalaen dian? An guminadan sarong hayop, sarong mabangis na hayop na hinubaan sia, kinakan an saiyang laman, dangan iwinalat an tada tanganing soloon sa kalayo. Siisay an maimpluwensiang babaeng ini? Taano sia ta sinalakay nin sarong mabangis na hayop? Ano an naginibo nia tangani siang magin maninigo sa madahas na katapusan na ini?—Kapahayagan 17:16, 17.
Ini puwedeng magin basihan nin kawiliwiling misteryo—iyo sana iyan ta iyan bakong estorya para sa sarong nobela. Iyan sarong historikal na katunayan na naootob sa presente. Asin iyan mahalaga sa saindo ta an daing sopog na patotot na ini tibaad nakaiimpluwensia sa saindong buhay ngonyan mismo. Dugang pa, kun baga kamo magdadanay sa saiya o masiblag iyo an magdedeterminar sa buhay asin kagadanan. Kun siring siisay sia?
An mga Kliyente kan Misteryosong Babae
An mapan-akit na babaeng ini, an daing sopog na paratentar na babaeng ini, ilinaladawan ni Juan sa makahulang libro sa Biblia na Kapahayagan, na dian satong mababasa: “Asin dinara ako [kan anghel] sa kapangyarihan kan espiritu pasiring sa sarong kapatagan. Asin nakaheling ako nin sarong babae na nangangabayo sa sarong mabangis na hayop na mapula na pano nin mga ngaran nin langhad asin igwa nin pitong payo asin sampulong sungay. Asin an babae nagugubingan nin purpura asin nin mapula, asin nasasamnohan nin bulawan asin mahalagang gapo pati mga perlas asin igwa sa saiyang kamot nin kopang bulawan na pano nin makababaldeng mga bagay asin kan marompot na mga bagay kan saiyang pakikisaro. Asin sa saiyang angog nasusurat an sarong ngaran, sarong misteryo: ‘Dakulang Babilonya, an ina kan mga patotot asin kan makababaldeng mga bagay kan daga.’ ”—Kapahayagan 17:3-5.
Ngonyan an “Dakulang Babilonyang” ini seguradong sarong pambihirang babae, ta sinasabi kan tala sa bersikulo 1 na sia “nagtutukaw sa dakol na katubigan.” Ano an boot sabihon kaiyan? Ipinaliwanag kan anghel nin Dios ki Juan: “An katubigan na saimong naheling, na dian nakatukaw an patotot, nangangahulogan nin mga banwaan asin mga kadaklan asin mga nasyon patin mga tataramon.” (Kapahayagan 17:15) Daing duwa-duwa na ini sarong patotot na an impluwensia lakop sa kinaban. Pero sia bakong ordinaryong patotot. Sia “an ina kan mga patotot,” an pamayong babae. Pag-abot sa pakikisaro, sia an nagdidirehir. Pero sia igwa man nin espesyal na mga kliyente.
Ipinahayag kan anghel kun sairisay an pinapaboran na mga kliyenteng ini kan dakulang patotot. Paano nia sinda ipinamimidbid? Sia nagsasabi na an Dakulang Babilonya iyo an saro “na sa saiya nakikisaro an mga hade kan daga, mantang idtong mga nag-eerok sa daga binurat sa arak kan saiyang pakikisaro.” (Kapahayagan 17:2) Ini seguradong nakaaakit na patotot na may marahay na mga koneksion tanganing maakit an politikal na mga namomoon sa kinaban, an mismong “mga hade kan daga”! Kaya siisay sia?
Sinasabi kan anghel na sia may ngaran, sarong misteryosong ngaran, “Dakulang Babilonya.” Ngonyan uya an duwang tanda na giya tanganing mamidbid sia—an saro iyo an mga kliyenteng pinapaboran nia asin an saro pa iyo an saiyang ngaran, Dakulang Babilonya. Sa anong konklusyon minasagkod an mga tandang iyan?