An Dakulang Patotot Ibinuyagyag

AN PRESENTENG sistema kan kinaban na nasa pamomogol ni Satanas igwa nin tolong pangenot na elemento na kontrolado kan “dios kan kinaban na ini.” An mga ini iyo an politikal na pamamahala, pamomogol asin impluwensia kan dakulang negosyo, asin relihiyon. Sa nag-aging mga milenyo nin kasaysayan, an tolong elementong ini dai nahahale sa haros gabos na sistema nin pamamahala. Arin sa makapangyarihan na mga puwersang ini an isinisimbolo kan “ina kan mga patotot”?—2 Corinto 4:3, 4, The Jerusalem Bible; Kapahayagan 12:9; 17:5.

Sono sa bisyon ni Juan na pinag-oolayan niato digdi, an mga namomoon, “an mga hade kan daga,” boluntad sa boot na nagdolok sa saiyang higdaan nin pakikisaro. (Kapahayagan 18:3) (An ebidensia kaini sa kasaysayan itatao sa minasunod na mga pahina.) Kaya, an Dakulang Babilonya dai puwedeng magsimbolisar sa elementong politikal na pamamahala sa sistema kan kinaban.

Kumusta man an dakulang negosyo na may dakulaon na kabtang sa buhay-buhay nin tawo ngonyan? Tunay na iyan sarong makosog na impluwensia sa dakol na nasyon asin garo man sana iyo an nagdedesisyon kun baga siisay an magigin mayaman asin kun siisay an magigin dukha. Ini daw an Dakulang Babilonya? An sarong anghel nagtao nin mahalagang giya ki Juan na minasimbag sa hapot na ini. Ipinaisi nia an nakakukubhan na pangyayari—an pagbagsak kan Babilonya! Nawaran sia kan saiyang mga kliyente asin sambay, na bigla na sanang nabalde sa saiya. Siisay pa, apuwera sa “mga hade kan daga,” an kabilang sa saiyang regular na mga bisita? An anghel nagsasabi: “Dahelan sa arak kan kaanggotan nin saiyang pakikisaro nagin biktima an gabos na nasyon, asin an mga hade kan daga nakisaro sa saiya, asin nagin mayaman an mga negosyante kan daga huli sa kapangyarihan kan saiyang daing sopog na luho.” Iyo, an mga negosyante kan daga nakinabang sa pagnenegosyo asin pakikiibaiba sa saiya asin sa pagpadakol sa saiyang “daing sopog na luho.” Kaya, dai sia puwedeng magsimbolo sa pankinaban na dakulang negosyo.—Kapahayagan 18:3.

Kun siring, paagi sa eliminasyon, an politikal na pamamahala asin pamomogol saka impluwensia kan dakulang negosyo mayo na. Ano an nawalat? Daing iba kundi an kabtang nin kapangyarihan na tama man sa akusasyon na, “huli ta paagi kan saimong espiritistikong mga gawe an gabos na nasyon nadayaan.” Iyan an dati makapangyarihan alagad ngonyan nagluluya nang elemento na nakaimpluwensiang gayo sa kaisipan asin gawe nin mga nasyon magpoon pa kan mga aldaw nin suanoy na Babilonya. Sia an igwa nin “kahadean sa mga hade kan daga”—arin na baga, an falsong relihiyon!—Kapahayagan 17:18; 18:23.

Iyo, minsan pa ini tibaad nakakukubhan sa pirang sinserong mga tawong relihiyoso, an Dakulang Babilonya, an ina nin mga patotot, iyo an simbolo kan pankinaban na imperyo nin falsong relihiyon ni Satanas. Sia simbolo kan mga relihiyon sa kinaban na sa manlaenlaen na paagi nakikompromiso sa mga elemento nin politikal asin pinansial na pamamahala sa bilog na kasaysayan.

Babilonya na Parasutsot nin Guerra

Kaoyon sa makahulang bisyon, an Dakulang Babilonya iyo an dakulang patotot na nagdara sa mga nasyon, banwaan, asin tribo sa madugong mga guerra, krusada, asin iriwal, na binibendisyonan sinda nin mga orasyon, agua bendita, pangadiye, asin malaad na mga diskursong patriotiko.a—Kapahayagan 18:24.

An saiyang klero, nangorogna an saiyang mga kapelyan, nagin boluntad na mga instrumento kan mga namomoon sa pagtipon sa mga tawo bilang mga patamaan nin kanyon sa garadanan nin duwang guerra mundial asin iba pang darakulang ralaban. An Katoliko ginadan an kapwa Katoliko, asin an Protestante may kaimbodan na ginadan an kapwa Protestante, na may napierdeng mga 40 sagkod 60 milyones na buhay sa duwa sanang guerra mundial.

Sa edukadong ika-20 siglong ini, an pamana nin relihiyon nagpapadagos na magpatubo nin pagkaongis asin kagadanan—bako sanang sa Kakristianohan na may mga paghampangan an Katoliko kontra sa Protestante kundi siring man sa kinaban na bakong Kristiano na igwa man nin Islam kontra sa Judaismo, Hinduismo kontra sa Islam, Buddhismo kontra sa Hinduismo, Sikhismo kontra sa Hinduismo, asin iba pa.

Dugang pa, poon pa kaidto boot kan relihiyon na magkaigwa nin makosog na impluwensia sa “mga hade kan daga,” na pinoprobaran na iyo an magdesisyon sa mga kaaabtan kaiyan asin sa masalihid dian. Helingon niato sa halipot an nagkapirang halimbawa.

[Nota sa Ibaba]

[Ritrato sa pahina 4]

Arin sa mga ini—politika, dakulang negosyo, o relihiyon—an irenerepresentar kan “Dakulang Babilonya”?