Mga Paisi

◼ Alok sa Enero: Itatampok an daan na mga libro, partikularmente an Nagkakasararo sa Pagsamba sa Iyo Sanang Tunay na Dios sa kontribusyon na ₱25.00. Puede man na ialok kun igwa an sadit na edisyon kan librong Mabuhay Sagkod Lamang sa kontribusyon na ₱20.00. Pebrero: An Sekreto sa Kaogmahan nin Pamilya sa kontribusyon na ₱25.00. Marso: An librong Kaaraman sa kontribusyon na ₱25.00. Abril asin Mayo: Sarong taon na suskripsion sa An Torrengbantayan sa kontribusyon na ₱120.00. PASABOT: An mga kongregasyon na dai pa naghagad kan mga pankampanya na nasambit sa enotan maninigo nang humagad sa saindang masunod na bulanan na Literature Order Form (S-AB-14).

◼ Maninigong gumibo nin mga areglo an mga kongregasyon sa pagselebrar kan Memorial ngonyan na taon sa Huebes, Abril 1, 1999, pagkasolnop kan saldang. Minsan ngani an pahayag puedeng magpoon nin mas amay, an pagpasa kan mga emblema kan Memorial maninigong dai magpoon sagkod na dai pa nakasolnop an saldang. Dawa ngani mamawoton kan kada kongregasyon na magkaigwa nin sadiri kaiyan na selebrasyon kan Memorial, tibaad dai ini pirmeng magin posible. Sa mga lugar na nagkapirang kongregasyon an dati nang naggagamit nin sasarong Kingdom Hall, tibaad an saro o labi pang kongregasyon puedeng kumua nin ibang pasilidad na magagamit para sa bangging iyan.

◼ An espesyal na pahayag-publiko para sa panahon kan Memorial sa 1999 itatao sa Domingo, Abril 18. Iyan may temang “Tunay na Pakikikatood sa Dios Asin sa Kataed.” May itataong ­outline para sa mga espiker sa tamang panahon. An mga kongregasyon na dinadalaw kan paraataman sa sirkito, may pansirkitong asamblea, o espesyal na aldaw nin asamblea sa katapusan kan semanang iyan magkakaigwa kan espesyal na pahayag sa masunod na semana. Mayong kongregasyon na maninigong magkaigwa nin espesyal na pahayag bago Abril 18, 1999.

◼ Mantang an Abril asin Mayo espesyal na mga bulan nin pagmamagasin asin dakol an makikikabtang sa pag-auxiliary payunir sa panahon na iyan, an paraataman sa paglilingkod asin an tugang na nag-aasikaso kan mga magasin maninigong konsideraron na ngonyan an pagpedido nin dugang na mga magasin na gagamiton kan kongregasyon. Ipadara tabi an saindong mga pedido tangani na umabot iyan sa sangang opisina dai malihis sa Pebrero 1, 1999. Seseguradohon kaini na mareresibi nindo an dugang na mga magasin kadungan kan saindong regular na pedido.

◼ Iskedyul Para sa Pag-adal sa Libro kan Kongregasyon: Pag-aadalan giraray kan gabos na kongregasyon sa Cebuano, Hiligaynon, Iloko, asin Tagalog an librong The Greatest Man Who Ever Lived sa mga pag-adal sa libro kan kongregasyon poon sa semana nin Marso 22-28, 1999. Poon sa iyo man sanang semana, an gabos na kongregasyon sa Bicol, Pangasinan, asin Samar-Leyte pag-aadalan an librong Kaaraman.

◼ Mga Surat sa Tahaw na Sirangan: Huli sa mga problema sa seguridad sa mga nasyon na Muslim, hinahagad na an ano man na surat hale sa mga kongregasyon mapadapit sa mga Publisher Record card, asin iba pa, ipadara magsalang direkta sa sangang opisina sa Britania o sa sangang opisina sa Pilipinas tangani na ipadara sa Britania. An gabos na surat maninigong nasa Ingles kun direktang ipadadara sa Britania asin an kongregasyon na maresibi kan mga surat maninigong malinaw na nakasurat. Dangan ipadadara kan sangang opisina sa Britania an materyal sa tamang kongregasyon, asin liliwaton an ano man na mga tataramon na tibaad magsapeligro sa mga tugang duman. An areglong ini aplikado sa Bahrain, Kuwait, Oman, Qatar, Saudi Arabia, asin United Arab Emirates.

◼ Igwa na sa Sosyedad ngonyan kan bilog na set kan Kingdom Melodies on Compact Discs, Num. 1 sagkod 8. An kada saro kan walong compact disc na ini puedeng pedidohon sa kontribusyon na ₱100.00, o an bilog na set puedeng pedidohon sa kontribusyon na ₱800.00.

Pagliliwat sa mga Kahagadan na Oras sa mga Payunir

¹ Pinahahalagahan niato gabos an pagkaigwa nin mahigos na mga regular asin auxiliary payunir sa kongregasyon. Dawa sa lugar na an teritoryo limitado asin sirot na nahuhulitan nin regular, nagtao an mga payunir nin marahay na halimbawa paagi sa saindang maigot na paglilingkod sa Kahadean. Inenkaminar ninda an gabos na parahayag na padagos na magin sibot sa paghanap sa mga “may tamang tendensia.”​—Gibo 13:48.

² Naobserbaran kan Sosyedad an nagdadakol na kadepisilan na inaatubang kan mga payunir, nangorogna mapadapit sa paghanap nin sekular na trabahong por ora na matogot sa sainda na maasikaso nin igo an saindang personal na mga pangangaipo tanganing magdanay sa bilog na panahon na paglilingkod. An situwasyon sa ekonomiya sa presente sa dakol na nasyon orog pang nagpadepisil man sa iba na lumaog sa pagpapayunir, maski ngani iyan an saindang odok sa pusong pagmawot. Kan nakaagi pa sanang mga bulan, an mga ini asin an iba pang bagay maingat na kinonsiderar.

³ Kun siring, huli sa nasambitan na, ininaan kan Sosyedad an kahagadan na oras pareho sa mga regular asin auxiliary payunir. Poon sa taon nin 1999, an kahagadan sa mga regular payunir magigin nang 70 oras kada bulan, o total na 840 oras sa sangtaon. An bulanan na kahagadan sa mga auxiliary payunir magigin nang 50 oras. An kahagadan na oras sa mga espesyal payunir asin misyonero dai nagliwat, huling may probisyon an Sosyedad sa pagtabang sa sainda sa pag-asikaso kan saindang pundamental na materyal na mga pangangaipo. Sa siring, mas lubos sindang makakokonsentrar sa saindang paghuhulit asin paggibo nin mga disipulo.

⁴ Linalaoman na an pagliliwat na ini sa mga kahagadan na oras makatatabang sa dakol na payunir na makapagdanay sa mahal na marhay na pribilehiong ini nin paglilingkod. Iyan posible man na magbukas kan dalan para sa dakol pang parahayag na lumaog sa gibohon na regular asin auxiliary payunir. Magigin nanggad bendisyon ini para sa gabos na nasa kongregasyon!