Pagtampok kan mga Brochure Tanganing Hanapon an mga Interesado

¹ An mga brochure mapuwersang instrumento. Sa 32 na pahina sana, an brochure marigon na ikaeestablisar an Makakasuratan na mga katotoohan asin ikatutumba an mga pangangatanosan asin katokdoan na kontra sa kaaraman nin Dios.​—2 Cor. 10:5.

² Pakabasaha kan brochure na An mga Saksi ni Jehova​—Sararong Nag-ootob sa Kabotan nin Dios sa Bilog na Kinaban, an sarong lalaki nagsurat: “Dai pa ako noarin man nakaheling nin siring na organisasyon. . . . Makangangalas na makanompong nin mga tawo na odok sa boot na sinusunod an kabotan nin Dios sa panahon na ini nin grabeng relihiyosong pagsaginsagin.” An sarong albularyo sa Aprika inadalan an brochure na Enjoy Life on Earth Forever! Ano an nagin epekto kaini sa saiya? Binayaan nia an saiyang pagsantiguwar asin binulagan an kasaroan niang mga babae puwera sa enot niang agom. Dangan legal nia siang pinakasalan.

³ An brochure na Should You Believe in the Trinity? epektibong instrumento nin katotoohan. An sarong parasurat sa The Sunday Gleaner sa Jamaica, nagsabi dapit kaiyan: “An publikasyon . . . sarong ekspertong gibo kan mga Saksi asin mayong Trinitaryo ngonyan an ligtas. . . . Pinakadepisil para sa parasurat na ini dapit sa relihiyon na maheling kun paano an sarong ordinaryong miembro nin iglesya makasisimbag sa . . . mga argumentong iinareglo kan mga Saksi tumang sa paniniwala na si Jesus Dios.”

⁴ Gamiton Iyan nin Marhay: Tanganing magin epektibo, an nakaaakit na mga instrumentong ini kaipuhan na ikapasakamot sa mga tawong babasahon iyan. Mantang igwa kita nin manlaenlaen na brochure, na an kada saro laen an iinaatubang na tema, maninigo niatong pagmaigotan na ialok an saro na sierto tang pinakaangay sa indibiduwal na hinuhulitan niato. Kun aram ta an satong mga brochure asin may dara kita kan manlaenlaen na kopya kaiyan magigin mas pasil niatong gamiton iyan nin marhay, baga man sa paglilingkod sa langtad, sa harong, o dawa saen.

⁵ Halimbawa, kun nakikipag-olay sa saro na nariribong dapit sa doktrina nin Trinidad kan Kakristianohan o tibaad naghohona na si Jesus Dios, arin na brochure an gagamiton nindo? Kun may naghahapot kun taano an sarong mamomoton na Dios ta tinotogotan an grabeng kasakitan, arin na brochure an makasisimbag kaiyan? Kun an saro nagpapahayag nin pagmakolog dapit sa pangangaipo para sa sarong gobyerno na ikararahay nin mga tawo, anong brochure an puwedeng angay para sa saiya?

⁶ Dugang pa sa pakaaram kun arin na brochure an gagamiton, pagmaigotan na paorogon an pagkagalaga nin saro dapit sa mga laog kaiyan. Palatawon an sarong komento o ilustrasyon na puwedeng makapukaw sa saiyang interes sa pagbasa kan materyal. O puwede nindong basahon sa saiya an saro o duwang parapo, helingon an sitadong mga teksto, asin ipakipag-olay an materyal. Dakol na marahay na pag-adal sa Biblia an naponan sa paaging ini.

⁷ An satong mga brochure nagtatao nin Makakasuratan na mga simbag asin nagtatanom nin paglaom sa mga nag-aaragagha asin nag-aaragrangay huli sa makababaldeng mga bagay na ginigibo sa kinaban. (Ikomparar an Ezequiel 9:4.) An mga tawong arog-karnero maghihimate sa mensaheng yaon sa literaturang iyan. Pribilehiyo niato na gamiton nin marhay an mga brochure mantang hinahanap niato an mga interesado.

Paggamit nin Marhay sa Torrengbantayan Asin Awake!

¹ An Torrengbantayan asin Awake! iyo an pinakamahalaga asin pinakapakipakinabang na mga magasin na mababasa nin mga tawo ngonyan. Taano? Huli ta an espirituwal na mga katotoohan na napapalaman dian puwedeng magkaigwa nin daing katapusan na epekto sa ikararahay kan buhay nin mga tawo. Alagad, dakol an dai lubos na nakamamate kan saindang espirituwal na pangangaipo, o dai ninda aram kun saen maglalaom tanganing mapanigoan iyan. Pribilehiyo niato na arogon si apostol Pablo paagi sa pagtabang sa mga tawo na mabuksan an saindang mga mata sa espirituwal.​—Mat. 5:​3; Gibo 26:18.

² Magin Positibo Asin Mag-andam nin Marhay: Sierto na igwang arog-karnerong mga tawo sa saindong teritoryo na mahimate sa katotoohan. An iba tibaad kaipuhan sana nin maboot na pagdagka tanganing basahon an mga magasin. Kun siring, magin positibo asin marahay mangombensir mantang iinaalok nindo an Torrengbantayan asin Awake! Perming magdara nin suplay nin mga magasin asin aprobetsaran an lambang oportunidad na ikawaras iyan, dawa itinatampok an ibang publikasyon.

³ Ano an makahihimo sato na magin mas epektibo sa pagwaras nin mga magasin? Primero, kita mismo kaipuhan na inaapresyar talaga an halaga kaiyan. Maninigo kitang magin pamilyar sa mga artikulo sa mga magasin na iinaalok niato, asin ini mapaorog sa satong kompiansa asin satong kaigotan sa pag-atubang kaiyan. Perming isaisip ini mantang enot nindong binabasa iyan. Magin alisto sa pagpili nin mga puntong itatampok sa ministeryo. Hapoton an sadiri: ‘Kiisay partikular na makaaakit an artikulong ini? Aapresyaron daw ini nin agom na babae, hoben, o tibaad negosyante? An punto daw na ini makawiwili sa estudyante, sa may agom, sa sarong nahahadit dapit sa palibot?’ Tanganing tunay na magin epektibo, maninigong kaya niatong ikarekomendar an mga magasin sono sa kaaraman asin kaogmahan mismo niato sa napapanahon na mga artikulo kaiyan.

⁴ Gamiton nin Marhay an Daan na mga Luwas: Girumdomon, An Torrengbantayan asin Awake! dai nawawaran kan saindang halaga, dawa dai iyan ikinapasakamot sa nag-aging saro o duwang bulan na petsa kan pagluwas kaiyan. An impormasyon kaiyan dai nagigin menus an halaga sa pag-agi nin panahon, asin dai kita maninigong mag-alangan na ialok an daan na mga kopya kun marahay pa an hitsura kaiyan. An pagpabaya na matambak an daan na mga magasin asin dai iyan noarin man ginagamit nagpapaheling nin kadaihan nin pag-apresyar sa mahahalagang instrumentong ini. An kada magasin naglalaman nin mga katotoohan na kayang pukawon asin panigoan an espirituwal na apetito. Imbes na ipagilid an daan na mga luwas asin malingawan iyan, bako daw na mas marahay na gumibo nin espesyal na paghihingoa na ipasakamot iyan sa interesadong mga tawo o kisuerra iwalat iyan kun mayong tawo sa harong?

⁵ An magasin na Awake! nakatabang sa dakol na kan primero mga tawong mayong hilig sa espirituwal na makamate sa saindang espirituwal na pangangaipo. An Torrengbantayan sarong pangenot na instrumento sa programa nin espirituwal na pagpakakan kan banwaan ni Jehova. An mga magasin na ini marahay na magkapadis, asin may mahalagang kabtang na ikahulit an maogmang bareta.

⁶ Mantang inaaprobetsaran niato an lambang oportunidad na makapasakamot nin mga magasin, lubos kitang makasasarig sa pagigin epektibo kaini sa pagpanigo sa espirituwal na mga pangangaipo kan mga arog-karnero. Boot niatong papagdanayon an positibong kaisipan, mag-andam nin marhay, asin magin regular sa ministeryo. Bilang mga parahayag kan maogmang bareta, regular logod niato gabos na gamiton nin marhay an mga magasin na Torrengbantayan asin Awake!