An Satong Buka an Palad na Pagsuportar sa Gibohon na Pankahadean
1 An Enero 2000 nagsesenyalar nin sarong dakulang pagbabago para sa sato gabos mantang kita nag-aadaptar sa bagong paagi nin pag-ako kan satong mga suplay asin sa pagpresentar kan satong mga babasahon sa mga tawo na nagpapaheling nin interes sa satong gibohon. Huling dai na kita mahagad o maako nin espesipikong kontribusyon para sa mga babasahon na iinaalok niato, paano masusuportaran an satong gibohon?
2 Sa pagsimbag marahay na isip-isipon an hapot kan salmista sa Salmo 116:12 na dian mababasa niato: “Ano an ibabayad ko ki Jehova para sa gabos na pakinabang na itinao nia sa sako?” Pensara an nagkapirang pakinabang na inako niato hale ki Jehova. Igwa kita kan mahal na marhay na regalong kaligtasan hale ki Jehova paagi sa pantubos. Igwa kita kan saiyang regalong Tataramon na nagtatao sa sato nin makangangalas na paglaom. Igwa kita kan saiyang banal na espiritu na nakatatabang sa sato na masabotan an hararom na mga bagay nin Dios. Inaako man niato an paggiya ni Jehova paagi sa fiel asin madonong na oripon. An sarong paagi na ikapaheheling an satong pag-apresyar sa gabos na marahay na bagay na ini iyo an satong buka an palad na pagsuportar sa gibohon na pan-Kahadean.
3 Estudyare an Halimbawa kan Israel: Kan iareglo ni Jehova na itogdok an tabernakulo sa kaawagan, dai nia milagroso na sanang itinao iyan kundi imbes tinawan nia an mga Israelita nin oportunidad na buka an palad na magtao kan saindang materyal na mga rogaring tanganing masuportaran ninda an harani nang pagtogdok. Paano sinda naghimate? An mga prinsipe asin “an gabos na pinahiro kan saiyang puso,” naghimate nanggad bilang pagsuportar sa tunay na pagsamba.—Ex. 35:21, 22, 27, 29.
4 Kumusta Man Ngonyan? Ngonyan pribilehio asin paninimbagan niato na buka an palad na magsuportar sa gibohon na pan-Kahadean. An apuradong paghuhulit asin paggibo nin mga disipulo ginigibo sa sokol na dai pa noarin man naeksperyensiahan kan kinaban. Naheling sa ika-20 siglong ini an pagtipon kan pinakadakulang kabilangan nin dusay, fiel na mga lingkod ni Jehova asin rinibo na ngonyan an nagpapabautismo kada semana.
5 Ano an Personal Niatong Magigibo? Padagos na magkaigwa nin ‘dakol na gigibohon sa gibohon kan Kagurangnan.’ (1 Cor. 15:58) Rekonoseron, arog kan ginibo kan mga magurang ni Jesus, na hinahagad ni Jehova na kita magtao sa materyal na paagi segun sa satong personal na mga kamugtakan. (Luc. 2:22-24) An enterong paghuhulit asin paggibo nin mga disipulo ngonyan sinusustentohan paagi sa areglo nin pagdonar. Sinusuportaran niato an gibohon paagi sa pagholog kan satong mga donasyon sa mga kahon na may markang “Contributions for the Society’s Worldwide Work—Matthew 24:14.” Kun noarin niato ini gigibohon nasa balang indibiduwal nang paghihingoa segun sa saiyang mga kamugtakan.
6 Ngonyan pribilehio niatong suportaran an gibohon na pan-Kahadean. An paggibo niato kan bilog niatong makakaya sa bagay na ini magbubunga nin mga bendisyon asin kaogmahan ngonyan, patin buhay na daing katapusan sa bagong kinaban.—Mat. 25:46b; Luc. 6:38.