Mapakumbaba Siang Naglingkod ki Jehova
“BAKO nanggad kun saen ka naglilingkod kundi kun siisay an pinaglilingkodan mo an tunay na mahalaga.” Gustong-gustong sabihon ni John Booth an mga tataramon na iyan, asin namuhay sia sono dian. An saiyang buhay digdi sa daga, na natapos kan Lunes, Enero 8, 1996, malinaw na nagpaheling kun siisay an pinili niang paglingkodan.
Bilang hoben na lalaki kaidtong 1921, hinahanap ni John Booth an katuyohan sa buhay. Nagtokdo sia sa pan-Domingong eskuelahan sa Repormadong Iglesyang Olandes, alagad kontra sia sa ideya nin pagsasanay na magin ministro huli ta sa boot nia an mga klerigo igwa nin paslong pamumuhay. Kan maheling nia an sarong anunsio para sa sarong pahayag na may titulong “An Minilyon na Nabubuhay Ngonyan Dai na Noarin man Magagadan,” dai siang sinayang na panahon na kumua nin literatura na iinanunsio kaiyan. Huling naakit sa saiyang binasa, dai nahaloy nagbibisikleta na sia nin 24 kilometros pasiring sa mga pagtiripon kan Mga Estudyante sa Biblia, na apod kaidto sa Mga Saksi ni Jehova. Nabautismohan sia kan 1923 asin nagpoon na maghulit sa harong-harong sa rehion nin Wallkill, Nueva York, kun saen may pagibohan nin mga produktong gatas an saiyang pamilya.
Si Tugang na Booth naglaog sa pambilog na panahon na ministeryo kan Abril 1928. Naghulit sia sa saiyang sadiring teritoryo asin sa probinsia sa Timog, na iriniribay an mga literatura sa Biblia para sa pagkakan asin dadagusan. Kinaipuhan niang atubangon na may kapusoan an mga peligro na arog baga nin nagwawasiwas nin badil na mga kagsadiri nin ilegal na mga distiliriya nin alkohol, na an saro kaiyan binadil asin nalugadan an payunir na kaibaiba ni John Booth. Kan 1935, si Tugang na Booth ninombrahan na magin nagbibiaheng paraataman asin nagpoon na songkoon an mga kongregasyon asin mas saradit na grupo sa bilog na banwaan. Nag-organisar sia nin mga asamblea asin tinabangan an mga tugang na lalaki asin babae na magpadagos sa ibong nin mga pagtumang. An paghampang sa anggot na mga sururog, paninindogan sa korte, asin pagkabilanggo nagin ordinaryong mga pangyayari para ki Tugang na Booth. “Mangangaipo nin sarong libro an pagtao nin mga detalye sa nakaoogmang mga panahon na idto,” an isinurat nia sarong beses.
Kan 1941, si Joseph F. Rutherford, na presidente kaidto kan Watch Tower Society, iinasignar si Tugang na Booth na magtrabaho sa Haciendang Pankahadean, harani sa Ithaca, Nueva York. Duman maimbod siang naglingkod sa laog nin 28 taon. An saiyang pagkamoot sa ministeryo dai nagdiklom, nawili sia sa nag-aging mga taon na makiasosyar sa rinibong estudyante kan Paadalan sa Biblia kan Watchtower sa Gilead para sa pagsasanay sa mga misyonero, na yaon duman sa Haciendang Pankahadean sagkod kan 1961. Kan 1970, pinapaglingkod si Tugang na Booth sa mga Hacienda kan Watchtower sa Wallkill, Nueva York, kaya namugtak sia sa iyo man sanang lugar na pinonan niang magpayunir mga 45 taon na an nakaagi.
Kan 1974, si Tugang na Booth ninombrahan na magin miembro kan Namamahalang Grupo kan Mga Saksi ni Jehova sa Brooklyn, Nueva York. Naglingkod sia na fiel sa katongdan na iyan sagkod na sia nagadan sa edad na 93 anyos. Si John Booth namotan huli sa saiyang mapakumbabang marhay asin maboot na Kristianong personalidad. Sagkod na sinudya sia kan saiyang salud asin kosog, sia fiel na naghuhulit sa harong-harong asin sa mga kalye kan siudad.
Minsan ngani an mga naglingkod kaiba nia nagmomondo sa saiyang pagkagadan, nararanga sinda sa panuga kan Biblia mapadapit sa siring na linahidan na mga Kristiano, na sinda binubuhay liwat sa langitnon na buhay asin na “an mga bagay na saindang ginibo kaibanan ninda.” (Kapahayagan 14:13; 1 Corinto 15:51-54) Tunay nanggad na sarong bagong palibot, alagad palibot na dian si John Booth makapaglilingkod ki Jehova sagkod lamang!
[Retrato sa pahina 32]
John Booth 1903-1996
[Retrato sa pahina 32]
HERALD-AMERICAN, ANDOVER 1234
76 Jehovites Jailed in Joliet
[Pasasalamat para sa pinagkuanan]
Chicago Herald-American