An Puso ko Nagsosopay sa Pagpasalamat

ISINAYSAY NI JOHN WYNN

Kanigoan kaparate kong sinasayumahan kaidto na umiba sa pagtiripon kan Mga Saksi ni Jehova! Ako nagsasagin makolog an tulak o makolog an payo​—maski ano tanganing dai makaatender. Alagad an karigonan kan sakong ina perming hinahale tolos an siring na mga kamatean, asin ako minaiba man giraray sa saiya sa paglakaw nin tolong kilometro pasiring sa Kingdom Hall, na naghihinanyog mantang ipinakikipag-olay nia an Tataramon nin Dios sa sarong mas may edad na kaiba.

TINOKDOAN ako kaini nin mahalagang leksion: An mga magurang maninigo na nungkang umontok sa pagigin marigon, sa mamomoton na paagi, sa kun ano an tama sa pagheling nin Dios. (Talinhaga 29:​15, 17) Maninigo na nungkang lingawan ninda an pagboot nin Dios na “dai pagpabayaan an satong pagtorotiripon.” (Hebreo 10:25) Mantang sinasalingoy ko an sakong buhay, kanigoan an sakong pagpasalamat na pinirit ako kan sakong ina na gibohon an pinakaikararahay ko!

Nagpapasalamat sa Marahay na mga Halimbawa

Minsan ngani daing pagtubod an sakong ama, sia mapagpabaya sa mga paniniwala ni Nanay kan sia magin Estudyante sa Biblia, siring sa pakamidbid kaidto sa Mga Saksi ni Jehova. Kan 1913 sia nagdangog kan pahayag na “Beyond the Grave” (sa Bicol, “Sa Ibong kan Lolobngan”), na ipinahayag ni Charles T. Russell, an primerong presidente kan Watch Tower Society. Minsan siring, nahuri siang mag-abot, asin gabos na tukawan okupado na. Kaya inagda siang tumukaw kaiba kan ibang nahuri harani sa plataporma, kataed mismo ni Pastor Russell. An pahayag na iyan nakatudok na marhay sa saiyang isip. Ipinublikar idto kan suminunod na aldaw sa lokal na peryodiko, asin sinaray nia an sarong kopya kaiyan asin paorootrong binasa iyan.

Pakatapos kan pagtiripon, si Nanay nagtao nin papel na may ngaran nia, asin dai nahaloy sia sinongko nin sarong Estudyante sa Biblia. Pag-abot nin panahon, sia nagpoon na maghatod nin mga pulyeto sa Biblia sa mga pinto sa samong ginikanan na banwaan nin Gloucester, Inglaterra. Poon kan kami kan duwa kong tugang na babae horoben pang marhay, nakikikabtang na kami kaiba ni Nanay sa paghuhulit.

Kan si Harry Francis, sarong maigot na Estudyante sa Biblia, bumalyo sa Gloucester, sia mainit na inako ni Nanay. Dai nahaloy, nagpaheling sia nin personal na interes sa sako, asin an saiyang pamparigon sa boot nagin mayor na dahelan na kan huri ako nagin payunir, an apod sa pambilog na panahon na mga ministro. An halimbawa ni Tugang na Francis nagtokdo sa sako nin importanteng leksion: An mga gurang maninigong perming maghanap nin mga paagi na parigonon an boot nin mga hoben.

Kan magin Estudyante sa Biblia an sakong ina, nagin siring man kaiyan an iba sa Gloucester. Minsan siring, an nagkapirang magurang sa kongregasyon nagpoon na magkaigwa nin mapalangkaw na kaisipan, asin an mga miembro kan klase​—na apod kaidto sa kongregasyon—​nagpoon na sumunod sa mga indibiduwal. Sa sarong pagtiripon, an nagkapira pigpaparadugkol an likod ni Nanay, na sinasadol sia na iitaas an saiyang kamot sa pagsuportar sa nagkapirang kamagurangan. Alagad aram ni Nanay na dai sinda nagtatao nin tamang halimbawa, asin sia nagsayumang mapatakot. Kan panahon na idto, kan mga huring taon nin 1920, an dakol nagbaya asin dai na naglakaw sa dalan nin katotoohan. (2 Pedro 2:2) Pero, si Nanay nungkang suminuway sa maimbod na pagsuportar sa organisasyon, sa siring nagtatao nin marahay na halimbawa para sa sako.

An Sakong Paninindogan Para sa Katotoohan

Sa katapustapusi, kan Hunyo 1939, kan ako 18 anyos, nabautismohan ako sa Salog nin Severn. Kan taon na iyan ako ninombrahan man na lingkod sa pag-asikaso sa sound. Kaidtong mga aldaw naggamit kami nin sarong dakulang kasangkapan sa transkripsion na makosogon na nagpapatokar kan mensaheng “Religion Is a Snare and a Racket” (sa Bicol, “An Relihion Sarong Siod Asin Raket”) sa pampublikong mga lugar. Idinoon kan panahon na idto an pagbuyagyag kan pagsaginsagin asin falsong mga katokdoan kan Kakristianohan.

Sarong beses ako nasa enotan nin sarong parada na dara-dara an sarong bandereta na sa sarong parte nagpapahayag “Religion Is a Snare and a Racket” asin sa ibong na parte “Serve God and Christ the King” (sa Bicol, “Maglingkod sa Dios Asin ki Cristo na Hade”). Kasunod an sarong sadit na kabayo na may darakulang kartel sa tig-ibong na iris kaiyan na nag-aanunsio kan lekturang pampubliko. Seguradong nagin dakulang dadalanon an paradang idto sa relihiosong marhay na siudad nin Gloucester!

Sa ibong nin pinansial na mga problema sa harong, inenkaminar ako ni Nanay na magpayunir. Sa siring, kan Setyembre 1939, sa kapinonan kan Guerra Mundial II, nagdatong ako sa primero kong destino sa pagpapayunir sa Leamington, sarong sadit na banwaan sa Warwickshire. Nag-iistar sa banwaan an nagkapirang retiradong klerigo.

Naggamit kami nin magian na ponograpo sa samong ministeryo sa harong-harong, na ipinadadangog an mga lektura ni Joseph F. Rutherford, an presidente kaidto kan Watch Tower Bible and Tract Society. Sa ibong na lado, an samong kasangkapan sa transkripsion (na puedeng gamiton sa mas dakol na nagdadangog) mas magabat, asin dinadara niamo iyan sakay nin karukaruwahe sa aki. Kun beses an mga klerigo, huling naaanggot sa mensahe na nagbubuyagyag sa falsong relihion, inaalaw kami paluwas sa saindang solar. Alagad dai kami pinanluluyahan nin boot. Binendisyonan ni Jehova an samong gibohon, asin ngonyan sarong kongregasyon na may labing sanggatos na Saksi an manonompongan sa Leamington.

Kan 1941, mantang an Guerra Mundial II naglalakop na daing kontrol, nagbalyo ako sa Wales, na duman ako nagpayunir sa mga banwaan nin Haverfordwest, Carmarthen, asin Wrexham. Bilang pambilog na panahon na ministro, nakakua ako nin iksemsion sa serbisyo militar, alagad dai nasabotan kan mga tawo an samong neutral na paninindogan. Sa siring, kami kan sakong kaibaiba pinagdenunsiar bilang mga espiya o traydor sa nasyon. Sarong banggi, pinalibotan kan mga pulis an samong harong na de rueda. An sakong kaibaiba, na kapupuli pa sana hale sa saiyang trabaho na pagpala nin karbon, nagdungaw sa luwas tanganing helingon kun siisay an yaon duman. An saiyang lalauogon pano nin alpog kan karbon, asin sa pagheling kan mga pulis sia garo andam na para sa pagsakyada nin mga komando. Kinaipuhan niamo na ipaliwanag an situwasyon!

Kami mayaman na binendisyonan sa samong mga destino. Sarong beses, kan kami yaon sa Carmarthen, si John Barr na hale sa sangang opisina sa Londres (ngonyan miembro na kan Namamahalang Grupo) sinongko kami na nakaparirigon sa boot. Kan panahon na idto, igwa sana nin duwang parahayag sa Carmarthen; sa presente, igwa na nin labing sanggatos. An Wrexham ngonyan igwa na nin tolong kongregasyon, asin kasuarin pa sana nagkapribilehio ako na idedikar an sarong magayon na Kingdom Hall sa Haverfordwest.​—1 Corinto 3:6.

Nagpapasalamat sa Sakong Ministeryo

Mantang kami nasa Swansea, South Wales, an sakong kaibaiba, si Don Rendell, dai tinawan nin iksemsion sa militar. Sia ibinilanggo sa ibong nin paliwanag na dai itinotogot kan saiyang konsensia na makiguerra tumang sa mga kapwa Kristiano sa ibang kadagaan. (Isaias 2:​2-4; Juan 13:​34, 35) Tanganing parigonon an saiyang boot, patin magpatotoo sa kataraed, irinani ko an kasangkapan sa transkripsion asin ipinadangog an mga lektura sa Biblia.

Minsan siring, an lokal na kababaehan dai ini nagustohan asin ipinasa an kupya asin nangolekta nin kuarta na pambayad sa mga soldados tanganing bugbugon kami kan sakong kaiba. Naghale kami, na nagdadalagan sa pinakamarikas na magigibo niamo​—itinutulod ko man an karukaruwahe sa aki na namumugtakan kan kasangkapan sa transkripsion—​pasiring sa Kingdom Hall para sa proteksion. Alagad kan kami makaabot duman, nakabarat iyan! An napapanahon na pag-interbenir sana kan mga pulis an nagligtas sa samo sa grabeng pambubugbug.

Malinaw na nabantog an pangyayari. Kan ako naghuhulit sa puerang lugar na harani sa Swansea paghaloyhaloy, may sarong lalaki na may pag-oyon na nagsabi sa sako: “Kristianismo an ipinakikipaglaban nindo, arog kan hoben na lalaki sa Swansea na mapusong nagbalangibog kan saiyang tinutubod asin kinaipuhan na dumulag para sa proteksion.” Nasorpresa nanggad siang maaraman na ako an hoben na lalaking idto!

Bakong pasil an pagpapayunir kan mga taon na idto nin guerra. Kakadikit kan samong kinabanon na mga rogaring, alagad inapresyar asin ikinagayagaya niamo kun ano an yaon sa samo. Permi kaming nag-aako nin regular na suplay nin espirituwal na kakanon, asin nungka kaming nagpalta sa sarong pagtiripon, apuera kun kami naghehelang. Nagbakal ako nin lumang bisikleta, asin tinakodan mi iyan nin dakulang mga basket na lalagan nin sarong ponograpo saka mga literatura sa Biblia. Kun beses nagbibiahe ako nin 80 kilometros sa sarong aldaw na nagbibisikleta! Nagpayunir ako sa laog nin mga pitong taon asin may kapadangatan na ginigirumdom ko an mga aldaw na idto.

Kan 1946, pakatapos kan Guerra Mundial II, inimbitaran akong magtrabaho sa Bethel, an apod sa mayor na mga pasilidad kan Mga Saksi ni Jehova sa saindang kanya-kanyang nasyon. An samong Bethel nasa 34 Craven Terrace kaidto, kataed kan Tabernakulo sa Londres. Naogma akong makiasosyar sa mga gurang duman, siring ki Alice Hart, na an ama, si Tom Hart, tinutubod na iyo an kaenot-enoteng Saksi sa Inglaterra.

Pakakua nin Fiel na Kadamaydamay

Kan 1956, nagluwas ako sa Bethel tanganing pakasalan si Etty, sarong payunir na nakamidbid ko kan dalawon nia hale sa Netherlands an saiyang tugang na babae na nag-iistar kaidto sa Londres. Kan naghihinanapos an guerra, si Etty nagtotokdo nin pagmakinilya asin estenograpiya sa sarong komersial na kolehio sa Tilburg, sa timog na Netherlands. Sarong aldaw may sarong maestro na nag-alok na sabayan sia sa pagbisikleta papuli tanganing siertohon na ligtas siang makapuli. Sia sarong Katoliko Romano. Kan sinda umabot, suminunod an sarong pag-orolay kaiba an Protestanteng mga magurang ni Etty. Nagtalubo an pagkakatood, asin an maestro permi nang nagdadalaw sa saindang harong.

Dai naghaloy pakatapos kan guerra, an maestrong ini nagduman sa harong ni Etty, na nagkukurahaw, “Nanompongan ko na an katotoohan!”

“Paghona ko sinabi mo na yaon na sa saimo an katotoohan kan ika sarong Katoliko Romano!” an simbag kan ama ni Etty.

“Dai!” an ogmahon na simbag nia. “An Mga Saksi ni Jehova an igwa kan katotoohan!”

Ginamit an bangging idto asin an dakol pang nagsurunod sa seryosong marhay na pag-orolay sa Biblia. Dai naghaloy si Etty nagin payunir. Sa saiyang ministeryo sia napaatubang man sa anggot na marhay na pagtumang, na sa Netherlands hale sa Iglesia Katolika Romana. An mga aki, na sinutsutan kan mga padi, riniribok an saiyang mga pakikipag-olay kun sia naghaharongharong, asin sa sarong okasyon rinaot ninda an saiyang bisikleta. Dinara nia an saiyang bisikleta sa sarong parahirahay na nag-ako kaidto nin sarong pulyeto hale sa saiya. “Helinga an ginibo kan mga aki!” an sabi nia na naghihibi.

“A, dai ka mawaran nin paglaom,” an maboot na simbag kan lalaki. “Marahay an ginigibo mo. Hihirahayon ko na daing bayad an saimong bisikleta.” Asin ginibo nia iyan.

Naaraman ni Etty na daing interes an mga padi sa saindang mga aripompon sagkod na ponan niang makipag-adal sa sainda sa Biblia. Dangan minasongko an mga padi asin madre tanganing paluyahon an pagtubod kan mga tawo kapwa sa Biblia asin ki Jehova. Sa ibong kaini, nagkaigwa sia nin dakol na mabungang pag-adal sa Biblia.

Nagpapasalamat sa Samong Buhay na Magkaibahan

Pakatapos kan samong kasal, iinasignar kami ni Etty sa gibohon na nagbibiahe sa Inglaterra, asin sa laog nin haros limang taon, dinalaw niamo an mga kongregasyon tanganing pakosogon sinda sa espirituwal. Dangan nakaresibi ako nin imbitasyon na umatender sa ika-36 na klase kan Gilead, na ginibo sa pankinaban na opisina prinsipal kan Mga Saksi ni Jehova sa Brooklyn, Nueva York. An sampulong bulan na kurso, na natapos kan Nobyembre 1961, partikularmenteng dinisenyo na sanayon an mga lalaki na asikasohon an gibohon sa mga sangang opisina kan Mga Saksi ni Jehova. Mantang mayo ako, si Etty nagdanay sa Inglaterra sa Bethel sa Londres. Kan ako makagradwar, magkaibahan kaming iinasignar duman.

Kan sumunod na 16 na taon, nagtrabaho ako sa departamento sa paglilingkod, na inaasikaso an mga bagay dapit sa mga aktibidad kan kongregasyon. Dangan, kan 1978, kan magadan an paraataman sa Erokan na Bethel, si Pryce Hughes, ninombrahan ako na kasalihid nia. An pagigin responsable sa marahay na kamugtakan kan mga miembro kan samong nagdadakulang pamilyang Bethel​—labi nang 260 an miembro kan samong pamilya ngonyan—​nagin nakakokontentong asignasyon sa laog kaining dakol na taon.

Kan 1971 nagadan an mahal kong ina sa edad na 85. Nagpuli kami ni Etty sa Gloucester para sa lobong, na duman sarong tugang na lalaki an magayon na sinumaryo an langitnon na paglaom ni Nanay. (Filipos 3:14) Nagpapasalamat ako sa mamomoton na pag-ataman na itinao kan sakong mga tugang na babae, si Doris asin si Grace, ki Nanay sa saiyang kagurangan, sa siring nagpapangyari sa samo ni Etty na magpadagos sa pambilog na panahon na ministeryo!

Parate niamong iniisip ni Etty an samong mga magurang asin kun paano ninda kami pinadakula sa siring kamamomoton, marigon na paagi. Dai nanggad masosokol an utang niamo sa sainda! An sakong ina nangorognang nagtao nin marahayon na halimbawa sa sako asin sa sakong mga tugang na babae, na pinaririgon an samong pag-apresyar ki Jehova asin sa saiyang organisasyon.

Tunay nanggad, an samong puso nagsosopay sa pagpasalamat mantang hinohorophorop niamo an lambang bagong aldaw nin paglilingkod sa satong langitnon na Ama, si Jehova. Kanigoan kamakangangalas, kamamomoton na Dios sia! An salmista sa Biblia ipinahayag an samong mga saboot kan sia magsurat: “Papahalangkawon taka, O sakuyang Dios na Hade, asin pag-oomawon ko an saimong ngaran sa panahon na daing katapusan, sagkod lamang pa ngani. Sa bilog na aldaw pag-oomawon taka, asin pag-oomawon ko an saimong ngaran sa panahon na daing katapusan, sagkod lamang pa ngani.”​—Salmo 145:​1, 2.

[Retrato sa pahina 26]

Kaibahan ko an sakong agom, si Etty