Mga Pagirumdom sa Memorial

An selebrasyon kan Memorial natangod sa Sabado, Abril 11. Maninigong tawan nin atension kan kamagurangan an minasunod na mga bagay:

◼ Sa pag-iskedyul nin oras para sa pagtiripon, siertohon na an mga emblema dai ililibot sagkod na dai pa minasolnop an saldang.

◼ An gabos, kabale an espiker, maninigong paisihon manongod sa eksaktong oras asin lugar para sa selebrasyon.

◼ Maninigong magkaigwa asin mag-andam nin tamang klase nin tinapay asin arak.​—Helingon an Setyembre 1, 1985 Torrengbantayan, pahina 12 (w85-E 2/15, p. 19).

◼ An mga plato, kopa, asin angay na lamesa patin mantel maninigong darahon na sa tiriponan asin areglaron na nin patienot.

◼ Maninigong linigan nang marhay nin patienot an Kingdom Hall o ibang lugar na tiriponan.

◼ An mga attendant asin serbidor maninigong pilion asin tawan nin instruksion nin patienot manongod sa tamang prosedimiento asin sa saindang mga obligasyon.

◼ Maninigong gibohon an mga areglo na serbihan an siisay man sa linahidan na may helang asin dai kayang magin presente.

◼ Kun labi sa sarong kongregasyon an nakaiskedyul na magamit kan sasarong Kingdom Hall, maninigong magkaigwa nin marahay na koordinasyon an mga kongregasyon tangani na malikayan an dai kinakaipuhan na pagsurusuan sa agihan asin sa tinampo sa luwas.

Mga Paisi

◼ Alok sa Marso: Iaalok an librong Kaaraman sa kontribusyon na ₱25.00. Sa mga kagharong na igwa na kan librong ini, puede nindong ialok an librong Kaogmahan nin Pamilya sa iyo man sanang kontribusyon. Abril asin Mayo: Sarong taon na suskripsion sa Torrengbantayan sa kontribusyon na ₱120.00. Hunyo: Magsalang an librong Greatest Man sa kontribusyon na ₱75.00 o Mankind’s Search for God sa kontribusyon na ₱40.00. PASABOT: An mga kongregasyon na dai pa naghagad kan mga pankampanya na nasambit sa enotan maninigo nang humagad sa saindang masunod na bulanan na Literature Order Form (S-AB-14).

◼ Maninigong siyasaton an kuenta kan kongregasyon sa Marso 1 o sa pina-kamadaling panahon pakalihis kaiyan kan nangengenot na paraataman o kan saro na iinasignar nia. Ianunsiar sa kongregasyon kun nagibo na ini.

◼ Poon sa Abril, an mga paraataman sa sirkito matao kan pahayag-publiko na may temang “Magtiwala sa Nagliligtas na Kapangyarihan ni Jehova” kun nagdadalaw sa mga kongregasyon.

◼ Dakol kaming suplay kan audiocassette na igwa kan materyal hale sa Ingles na brosyur na Kahagadan. Ini kapakipakinabang sa pagtotokdo sa mga aki o sa mga tibaad nadedepisilan na bumasa. Nakaoogma man iyan na dangogon sa harong. An kontribusyon para digdi ₱60.00 asin an kantidad sa payunir ₱55.00.

◼ Huli sa dai pa sana nahahaloy na debalwasyon kan piso, dadagdagan an kantidad kan gabos na literatura poon sa Marso 1, 1998. An maaapektaran kaini literatura sana; an mga kantidad kan magasin asin suskripsion dai dadagdagan. Ipadadara sa kada kongregasyon sa suhay na patos an apat na kopya kan bagong Watch Tower Publications List na nagpapaheling kan bagong mga kantidad. Maninigong tawan nin tigsararong kopya an nag-aataman kan literatura, nag-aataman kan magasin, asin nag-aataman kan kuenta, asin ireretener an sarong kopya sa file kan kongregasyon. Itapok tabi an gabos na nakaaging edisyon kan Watch Tower Publications List tangani na malikayan an pagkaribaraw.

◼ Kan Enero 1, 1998 nagpadara sa kada kongregasyon nin porma kan Special Literature Inventory kaiba an surat sa Grupo nin Kamagurangan manongod sa babayadan. Tabi llenaran nin kompleto an pormang ini poon Pebrero 28 pakatapos na aktuwal na mabilang an gabos na literatura na nasa istak, asin ibalik an sarong kopya sa Sosyedad dai malihis sa Marso 6. Kun maresibi na an mga pormang ini sa sangang opisina, sisingilon kan Sosyedad an kongregasyon sa idinagdag na kantidad para sa literatura na nasa istak nindo poon kan Pebrero 28, 1998.

◼ An mga parahayag na boot na mag-auxiliary payunir sa Abril asin Mayo maninigo nang gumibo kan saindang mga plano ngonyan asin itao nin amay an saindang aplikasyon. Tatabangan kaini an kamagurangan na gumibo nin kinakaipuhan na mga areglo sa paglilingkod sa langtad asin magkaigwa nin supisyenteng mga magasin asin iba pang literatura. An mga ngaran kan gabos na inaprobaran na mag-auxiliary payunir maninigong ianunsiar sa kongregasyon.

Hapot

◼ Taano ta maninigo kitang magtao nin espesyal na atension sa satong gubing asin pag-alinyar kun nagdadalaw sa mga pasilidad kan Sosyedad sa Brooklyn, Patterson, asin Wallkill, Nueva York, patin mga sangang opisina sa bilog na kinaban?

An mga Kristiano linalaoman na papagdanayon an marahay na ugale. Sa gabos na panahon an satong gubing asin pag-alinyar maninigong magpabanaag kan pagkadisente asin dignidad na angay sa mga lingkod ni Jehova Dios. Nangorognang totoo ini kun nagdadalaw sa mga pasilidad kan Sosyedad sa Nueva York asin sa mga sangang opisina sa bilog na kinaban.

Durante kaining 1998, magkakaigwa nin pandistrito asin internasyonal na mga kombension. Rinibo sa satong mga tugang hale sa dakol na nasyon an madalaw sa opisina prinsipal kan Sosyedad sa Nueva York siring man sa mga sangang opisina sa ibang mga nasyon. Bako sanang kun nagdadalaw sa mga pasilidad na ini, kundi sa arin man na iba pang panahon, kaipuhan niato na ‘sa gabos na paagi patunayan an satong sadiri na mga ministro nin Dios,’ kabale an satong angay na gubing asin pag-alinyar.​—2 Cor. 6:​3, 4.

Sa pagpaliwanag kan importansia nin angay na gubing asin pag-alinyar, an Organized to Accomplish Our Ministry nagkokomento manongod sa pangangaipo nin pisikal na kalinigan, mabining gubing, patin marahay na pag-alinyar kun kita nasa ministeryo sa langtad asin nag-aatender sa Kristianong mga pagtiripon. Dangan, sa pahina 131, parapo 2, iyan nagsasabi: “Aplikado man iyan kun nagdadalaw sa erokan na Bethel sa Brooklyn o sa arin man na mga sangang opisina kan Sosyedad. Girumdomon na an ngaran na Bethel nangangahulogan ‘Harong nin Dios,’ kaya an satong gubing, pag-alinyar asin gawe-gawe maninigong magin pareho sa linalaoman sa sato kun nag-aatender sa mga pagtiripon para sa pagsamba sa Kingdom Hall.” An iyo man sanang halangkaw na pamantayan na ini maninigong sunodon kan mga parahayag kan Kahadean sa lokal na lugar siring man sa mga hale sa hararayong lugar na nagduduman tangani na maheling asin makiasosyar sa mga miembro kan pamilyang Bethel patin tangani na dumalaw sa mga pasilidad kan sanga.

An satong gubing maninigong magkaigwa nin positibong impluwensia sa iba sa kun paano ninda minamansay an tunay na pagsamba ki Jehova. Minsan siring, narisa na kun nagdadalaw sa mga pasilidad kan Sosyedad, an ibang mga tugang na lalaki asin babae may tendensiang magin sobra kaimpormal sa saindang gubing. An siring na gubing bakong angay kun nagdadalaw sa arin man na mga erokan na Bethel. Sa bagay na ini, siring sa gabos na iba pang aspekto kan satong Kristianong pamumuhay, nagmamawot kitang papagdanayon an iyo man sanang halangkaw na mga pamantayan na nagpapamidbid sa banwaan nin Dios sa kinaban paagi sa satong paggibo kan gabos na bagay sa ikamumuraway nin Dios. (Roma 12:​2; 1 Cor. 10:31) Tama man na kaolayon an satong mga inaadalan sa Biblia asin an iba na tibaad madalaw sa Bethel sa kaenot-enote patin ipagirumdom sa sainda an kahalagahan nin pagtaong atension sa angay na gubing asin pag-alinyar.

Kaya kun nagdadalaw sa mga pasilidad kan Sosyedad, hapoton an saindong sadiri: ‘Mabini daw an sakong gubing asin pag-alinyar?’ (Ikomparar an Miqueas 6:8.) ‘Iyan daw nagtatao nin marahay na ladawan kan Dios na sakong sinasamba? Madidisturbo o mauuyam daw an iba huli sa sakong itsura? Ako daw nagtatao nin tamang halimbawa sa iba na puedeng nagdadalaw sa kaenot-enote?’ Paagi sa satong gubing asin pag-alinyar, pirme logod niatong ‘samnohan an katokdoan kan satong Paraligtas, an Dios, sa gabos na bagay.’​—Tito 2:10.