Si Jehova an Satong Kaglalang

¹ Minilyon na tawo an nagtutubod na linalang nin Dios an buhay. Dakol pang iba an nagtutubod sa ebolusyon. Dangan may mga tawong dai segurado kun ano an tutubodon. An librong Life​—How Did It Get Here? By Evolution or by Creation? para sa gabos na tawong siring. An publikasyon na ini nagtatao nin paliwanag na maingat na siniyasat manongod sa kun paano nagpoon an buhay digdi sa daga asin kun ano an kahulogan kaini para sa satong ngapit. Sa Hunyo, itatampok niato an marahayon na librong ini.

² Minsan an prominenteng mga tawo sa sientipikong komunidad minidbid an napapalaen na lohika kan libro. Sarong sientipikong parasiyasat sa Netherlands an nagsurat: “An librong ini nakalampas sa gabos na linalaoman. An lohikong pagkasunodsunod kan mga kapitulo asin an mga ilustrasyon moderno nanggad sa sientipikong paagi na buta ka kun ika makontra.” An sarong abogado nagpahayag: “Nabasa ko na iyan nin apat na beses asin padagos akong napahahanga sa rarom nin pag-adal, yaman nin kabatidan, asin dokumentasyon na kinaipuhan sa pagprodusir kaiyan.” Kaya malalaoman niato na dakol pang iba an maapresyar sa librong ini.

³ Tibaad gusto nindong gamiton an halipot na pag-atubang na arog kaini:

◼ Bukasan sa pahina 6, asin magsabi: “Dakol na tawo an naghohonang an satong magayon na daga asin an buhay na yaon dian resulta nin aksidente. Ano an kinokonsiderar nindo na rasonableng paliwanag sa kun paano nagpoon an gabos? [Pasimbagon.] Kadakoldakol kan ebidensiang nagpapatotoo sa sinasabi kan Biblia manongod sa Kaglalang na bako sanang makapangyarihan na marhay kundi namomoot man sato nin labi-labi. Sia an tunay na Dios, asin an ngaran nia Jehova.” Basahon an Salmo 83:​18, asin ipaliwanag nin halipot kun paanong katuyohan niang gibohon na paraiso an bilog na daga.

⁴ Kun mawot nindong dumiretso tolos sa punto, puede nindong sabihon:

◼ “Napag-isip-isip na daw nindo an manongod sa hapot na ini?” Itokdo an titulo, bukasan sa pahina 7, basahon an mga hapot sa parapo 2, asin ipaliwanag na an libro nagtatao nin nakakokontentong mga simbag hale sa Biblia.

⁵ O puede nindong probaran ini:

◼ “Naisip na daw nindo kun paano nagkaigwa nin daga? Dakol an nag-iinsister na iyan resulta nin sarong dakulaon na pagputok sa espasyo. Ano an paghona nindo? [Pasimbagon.] Itinotokdo kan Biblia na an daga linalang nin Dios bilang daing katapusan na erokan niato. Napapalaen iyan sa ibang planeta na yaon sa laog kan satong sistema solar. Siring sa naaraman na niato, iyan sana an solamenteng planeta sa uniberso na igwa kan gabos na komplikadong probisyon na kaipuhan sa pagsustener sa buhay.” Bukasan an parapo 5 sa pahina 130, asin ipaliwanag kun taano ta masasabing an daga trabaho nin sarong Pangenot na Paradisenyo.

⁶ An saro pang pag-atubang puedeng arog kaini:

◼ “An iba naghohona na kita hale sa ‘tawong kabalang.’ Sinasabi ninda na an satong mga apoon arog kaini an itsura. [Ipaheling an retrato na yaon sa pahina 89.] Ano an paghona nindo manongod dian?” Pasimbagon. Palatawon an sinabi sa parapo 20, dangan basahon an Gibo 4:​24, na nagpapamidbid ki Jehova bilang satong Kaglalang asin Paratao nin buhay. “Sinisiyasat kan librong ini an bilog na teoriya nin ebolusyon may relasyon sa kun ano an sinasabi sa Biblia.” Helingon an mga laog sa pahina 5, asin itokdo an nagkapirang titulo, siring baga kan yaon sa kapitulo 1, 7, 15, asin 19.

⁷ An librong ini puedeng magin bendisyon para sa sinserong mga tawo na nadaya kan mga daing pagtubod ki Jehova o sa saiyang Tataramon. An totoong impormasyon na yaon sa librong Creation makatatabang sa mga siring na tumalubo an pag-apresyar sa satong Kaglalang, na mamomoton na nagmamakolog sa sato.

Tabangan an mga Daing Pagtubod

¹ Sa aldaw asin panahon ta ngonyan, nagin nang popular na mansayon an saro bilang edukado asin progresibo sa pag-iisip. An mga pilosopiya nin tawo asin inimahinar na mga teoriya pinalalangkaw, mantang iniignoro an may halaga sa espirituwal. An sinserong mga tawo na interesado sa simpleng mga katunayan asin nasasabotan na mga katotoohan maoogma sa oportunidad na siyasaton an librong Life​—How Did It Get Here? By Evolution or by Creation? An librong ini makatatabang sa mga kulang nin pagtubod. (Roma 1:​19, 20) Seguradohon na dumalaw liwat sa mga nagpaheling nin interes.

² Puede nindong ponan an orolay nin arog kaini:

◼ “Segurado akong aram nindo na dakol na edukador an minasuportar sa pagtubod na an pamilya nin tawo naglataw paagi sa ebolusyon. Itinotokdo kaiyan na an gabos nag-eksister paagi sa aksidente. Ano an pagmate nindo manongod dian? [Pasimbagon.] An ideyang ini inaapod pa man giraray na teoriya. An teoriya ‘sarong pagbanabana’ o ‘sarong dai probadong pag-asumir.’ Dakol na siglong nagtubod an tawo na an daga patag; ngonyan aram na niato na iyan mangmang na pag-asumir na bakong basado sa katotoohan. Totoo man daw iyan sa teoriya nin ebolusyon?” Basahon an introduksion sa pahina 4, dangan ipakipag-olay an Isaias 42:5.

³ O puede nindong gamiton an pag-atubang na ini sa saindong pagbuelta:

◼ “Ordinaryo na an makanompong nin mga tawo na dai nagtutubod sa Dios. Kan dakol nang taon an nakaagi, iyan bihirang marhay. Ano sa paghona nindo an rason na dakol na tawo an nawaran nin pagtubod sa Dios? [Pasimbagon.] An dakol iinaatribwir an pagkawara kan saindang pagtubod sa makangingirhat na pagtalubo nin kadahasan asin kasakitan sa kinaban. Sinda nagrarason na kun igwa nin makakamhan sa gabos na Dios, taano ta dai nia taposon an gabos na pagsakit? An mga dai nakanonompong nin nakakokontentong simbag sa hapot na iyan sa parate nagigin ateyista. Alagad kadakol kan ebidensiang nagpapatotoo na an Dios nag-eeksister asin na sa dai na mahahaloy gigibohon nia na magin lugar nin kaogmahan asin katoninongan an daga.” Ipadagos an pag-orolay paagi sa paggamit kan Makakasuratan na mga punto na manonompongan sa parapo 19, pahina 196.

⁴ Kapot-kapot an Biblia, puede nindong buksan an orolay sa pagsabi:

◼ “Kami minadalaw liwat tanganing ipaheling kun taano ta an pag-adal sa Biblia praktikal sa panahon ta ngonyan. An kadaklan igwa nin Biblia, alagad kadikit sana an nagtatao nin panahon na basahon iyan. An iba prangkang minasabi samo na mayo na sinda nin tiwala sa Biblia. Ano an pagmate nindo manongod dian? [Pasimbagon.] Saro sa mga bagay na nakakokombensir samo na an Biblia iyo an ipinasabong na Tataramon nin Dios iyo an kaotoban kan mga hula kaiyan.” Gamiton an mga teksto sa parapo 6, pahina 234.

⁵ An ideyang ini tibaad makakua nin paborableng simbag:

◼ “Naheheling ta an kagayonan asin makangangalas na ebidensia nin kadonongan sa mga bagay na nakapalibot sato sa dagang ini. An magayonon na pagsolnop nin aldaw sa retratong ini marahay nanggad na halimbawa.” [Ipaheling an ilustrasyon sa pahina 12 asin 13.] Isabi an mga puntong hale sa “Some Things to Think About” asin ipaliwanag kun paanong an librong ini nagtatao nin nakakokontentong simbag sa importanteng mga hapot manongod sa satong kinaban.

⁶ Kita puedeng magin bendisyon para sa iba paagi sa paggamit kan librong ini tanganing tabangan sinda na makanompong nin marigon na basihan nin pagtubod sa saindang Kaglalang.