“Maglingkod Kamo ki Jehova na May Paggayagaya”

1. Ano an puedeng magin gikanan nin dakulang kagayagayahan para sa mga lingkod ni Jehova?

¹ “Danay kamong maggayagaya dian sa Kagurangnan,” an surat ni apostol Pablo. “Sa giraray sasabihon ko, Maggayagaya kamo!” (Fil. 4:4) An pribilehiong paghiras kan maogmang bareta asin pagtabang sa arog-karnerong mga tawo na sumamba ki Jehova gikanan nin dakulang kagayagayahan. (Luc. 10:17; Gibo 15:3; 1 Tes. 2:19) Minsan siring, kun manompongan niato na kun beses mayo nin kagayagayahan sa satong ministeryo, ano an puede niatong gibohon?

2. Paano nakakokontribwir sa satong kagayagayahan an pagdanay na nakakonsentrar sa ginikanan kan sugo sa sato?

² Sarong Gibohon na Ordenado nin Dios: Girumdomon na gikan ki Jehova an sugo sa sato na paghuhulit. Iyo, pribilehiado nanggad kita na magin “mga kapwa trabahador nin Dios” sa pagbalangibog kan mensahe kan Kahadean asin paggibo nin mga disipulo! (1 Cor. 3:9) Kaiba niato si Cristo Jesus sa dai noarin man maootrong gibohon na ini. (Mat. 28:18-​20) An mga anghel aktibo man na kalabot asin nakikipagtabangan sa sato sa ginigibo na ngonyan na dakulang espirituwal na pag-ani. (Gibo 8:26; Kap. 14:6) An Kasuratan, kaiba an mga eksperyensia kan banwaan nin Dios, nagtatao nin dai mamamaluan na ebidensia na sinusuportaran ni Jehova an gibohon na ini. Kun siring, kun kita naghuhulit, kita minaduman “bilang isinugo nin Dios, na naheheling nin Dios, kaiba ni Cristo.” (2 Cor. 2:17) Kanigoan kakosog na dahelan na maggayagaya!

3. Ano an papel kan pamibi sa pagpapadanay kan satong kagayagayahan sa paglilingkod sa Dios?

³ Mahalagang marhay an pamibi sa pagpapadanay kan satong kagayagayahan sa paglilingkod sa Dios. (Gal. 5:22) Mantang magigibo niato an gibohon nin Dios solamente sa saiyang kosog, kaipuhan niatong makimaherak para sa saiyang espiritu, na suelto niang itinatao sa mga naghahagad sa saiya. (Luc. 11:13; 2 Cor. 4:​1, 7; Efe. 6:18-20) An pamimibi manongod sa satong ministeryo makakatabang sa sato na papagdanayon an tamang pagmansay kun kita napapaatubang sa negatibong mga reaksion. Pangyayarihon kita kaiyan na padagos na maghulit na daing takot asin masinggaya.​​—Gibo 4:​29-​31; 5:​40-​42; 13:50-​52.

4. Paano makakatabang an lubos na pag-andam na dugangan an satong kagayagayahan sa paghuhulit, asin ano an nagkapirang praktikal na paagi na kita makapag-aandam?

⁴ Mag-andam na Marhay: An sarong praktikal na paagi na dugangan an satong kagayagayahan kun kita nakikikabtang sa ministeryo iyo na kita nag-aandam na marhay. (1 Ped. 3:15) An siring na pag-andam dai nagkakaipo nin dakol na panahon. Nagkakaipo nin pira sanang minuto na repasohon an isinuherir na mga presentasyon para sa bagong mga magasin o sarong presentasyon na angay sa plano nindong ialok na literatura. Para sa angay na introduksion, puede nindong konsultahon an librong Reasoning o nakaaging mga isyu kan An Satong Ministeryo sa Kahadean. Nanompongan nin nagkapirang parahayag kan Kahadean na nakakatabang an pagsurat nin halipot na pag-atubang sa sarong kapidasong papel. Sa panapanahon, rinerepaso ninda sa halipot an papel na iyan tangani na irepresko an saindang memorya. Nakakatabang ini sa sainda na madaog an nerbios asin nagtatao sa sainda nin kompiansa na maghulit na may pagkapusoan.

5. Paano kita asin an iba nakikinabang sa kagayagayahan?

⁵ An kagayagayahan nagtatao nin dakol na pakinabang. An magayagayang disposisyon nakadadagdag sa gayon kan satong mensahe. An kagayagayahan nagpapakosog sa sato na magtagal. (Neh. 8:​10; Heb. 12:2) Orog sa gabos, an magayagayang paglilingkod niato nagpapamuraway ki Jehova. Kun siring, ‘maglingkod kita ki Jehova na may paggayagaya.’​​—Sal. 100:2.

Kun Ano an Sasabihon Manongod sa mga Magasin

An Torrengbantayan Okt. 15

“An dakol na desisyon na napapaatubang sa sato may halawig na mga epekto sa buhay niato. Ano an makakatabang sa sato na likayan an paggibo nin bakong madonong na mga desisyon? [Pasimbagon. Dangan basahon an Talinhaga 3:6.] Iinaatubang kan isyung ini kan An Torrengbantayan an limang basado sa Bibliang giya na makakatabang sa sato sa paggibo nin madonong na mga desisyon.”

Awake! Okt. 22

“Nariparo daw nindo na paorog nang paorog na nababaretaan niato an manongod sa mga mikrobyo na dai nabobolong? [Pasimbagon.] An magasin na ini nagsisiyasat kan mga dahelan kaini asin nagsusuherir kun ano an magigibo niato tangani na protehiran an satong sadiri. Tinotokar man kaiyan an panuga kan Biblia na sarong kinaban na duman mayo nang maghehelang.” Basahon an Isaias 33:24.

An Torrengbantayan Nob. 1

“Sa sarong panahon, kita gabos trinaydor na an pagtitiwala. Hinapot na daw nindo an saindong sadiri, ‘May mapagtitiwalaan pa daw ako?’ [Pasimbagon. Dangan basahon an Talinhaga 3:5.] Ipinaliliwanag kan magasin na ini kun taano ta kita lubos na makapagtitiwala sa Dios. Tinotokar man kaiyan kun paano niato madedeterminaran kun siisay na mga tawo an maninigo niatong pagtiwalaan.”

Awake! Nob. 8

“An mga produktong gibo sa petrolyo haros apektado an gabos na aspekto kan buhay niato. Napag-isip-isip na daw nindo kun paano an magigin buhay kun mayo kaiyan? [Pasimbagon.] Tinotokar kan magasin na ini kun paano an petrolyo nagin prominenteng marhay sa sosyedad sa presenteng panahon. Ipinaliliwanag man kaiyan kun taano ta dai kita kaipuhan na matakot na pag-abot nin aldaw mauubos na an petrolyo.”