Tunay na Kristianong Pagkasararo​​—Paano?

¹ Ano an makakapasararo sa labing anom na milyon katawo sa 234 nasyon asin mga 380 grupo nin magkakalenguahe? Solamente an pagsamba ki Jehova Dios. (Miq. 2:​12; 4:​1-3) Aram kan Mga Saksi ni Jehova basado sa personal na eksperyensia na an tunay na Kristianong pagkasararo tunay na nangyayari ngonyan. Bilang “sarong aripompon” na sakop kan satong “sarong pastor,” determinado kitang labanan an nakababangang espiritu kan kinaban na ini.​​—Juan 10:16; Efe. 2:2.

² An seguradong katuyohan nin Dios iyo na an gabos na madonong na linalang magkasararo sa tunay na pagsamba. (Kap. 5:13) Huling aram an importansia kaini, odok na ipinamibi ni Jesus an pagkasararo kan saiyang mga parasunod. (Juan 17:​20, 21) Paano an lambang saro sa sato makakokontribwir sa pagkasararo kan Kristianong kongregasyon?

³ Kun Paano Makakamtan an Pagkasararo: Kun mayo an Tataramon asin an espiritu nin Dios, dai makakamtan an Kristianong pagkasararo. An pag-aplikar niato kan satong nababasa sa Biblia nagtotogot sa espiritu nin Dios na sueltong magbolos sa satong buhay. Ini an nagpapangyari sa sato “na otobon an pagkasararo kan espiritu sa nakakapasararong bogkos nin katoninongan.” (Efe. 4:3) Itinutulod kita kaiyan na magpatiriostios sa pagkamoot. (Col. 3:​13, 14; 1 Ped. 4:8) Sinusuportaran daw nindo an pagkasararo paagi sa paghorophorop sa Tataramon nin Dios aroaldaw?

⁴ An sugo sa sato na maghulit asin gumibo nin mga disipulo nakakapasararo man sa sato. Kun kita naglilingkod sa Kristianong ministeryo kaibanan kan iba, na “daramay na naghihingoa para sa pagtubod sa maogmang bareta,” kita nagigin “mga kapwa trabahador sa katotoohan.” (Fil. 1:27; 3 Juan 8) Mantang ginigibo niato iyan, napakokosog an nakakapasararong bogkos nin pagkamoot sa laog nin kongregasyon. Taano ta dai agdahon an saro na haloy na nindong dai nakaibanan sa paghuhulit na ibanan kamo sa ministeryo sa langtad sa semanang ini?

⁵ Kanigoan an pribilehio niato na magin kabtang kan solamenteng tunay na internasyonal na kasararoan nin magturugang sa daga ngonyan! (1 Ped. 5:9) Ngonyan na Disyembre asin sa enot na kabtang kan Enero, kadakol sa Pilipinas an direktang nakaeeksperyensia kan pagkasararo na ini sa “Pamurawayon an Dios” na Pandistritong mga Kombension. An lambang saro logod sa sato magkontribwir sa mahalagang marhay na pagkasararo na ini paagi sa pagbasa kan Tataramon nin Dios aroaldaw, paagi sa pagresolber sa mga dai pagkaintindihan sa mamomoton na paagi, asin paagi sa paghuhulit kan maogmang bareta na “oroyon.”​​—Roma 15:6.

Paghanap sa mga Maninigo

¹ An mga instruksion ni Jesus sa paggibo kan paghuhulit nag-aatubang sa sato nin angat. Sia nagsabi: “Sa ano man na siudad o baryo kamo lumaog, hanapon nindo kun siisay dian an maninigo.” (Mat. 10:11) Huling an mga tawo ngonyan padikit nang padikit an oras na ginagamit sa harong, paano niato magigibo nin epektibo an paghanap na ini?

² Analisaron an Teritoryo Nindo: Magpoon paagi sa pag-analisar kan teritoryo nindo. Noarin posibleng marhay na nasa harong an mga tawo? Saen sinda manonompongan durante kan aldaw? Igwa daw nin sarong aldaw kan semana o oras kan aldaw na tibaad mas andam nindang aakoon an pagdalaw? An pagliwat kan ministeryo nindo tangani na bumagay sa rutina asin mga sirkonstansia nin mga tawo sa lokal na teritoryo makakatabang sa saindo na magibo an pinakamarahay.​​—1 Cor. 9:​23, 26.

³ Dakol na parahayag an nagin mapanggana durante kan amay na mga oras sa banggi. May mga kagharong na mas relaks asin magugustong maghinanyog sa oras na iyan. Kun maoran an panahon asin dai kamo makaluwas huli sa baha, puedeng magin epektibo an paghuhulit paagi sa telepono o pagsurat. An paghuhulit sa komersial na teritoryo asin paghuhulit sa pampublikong mga lugar mga paagi man na mapaabotan an mga tawo kan maogmang bareta.

⁴ Durante nin sarong bulan na may espesyal na aktibidad, iinareglo nin sarong kongregasyon an paghuhulit sa oras na pabanggi na kun Sabado asin Domingo saka paghuhulit sa banggi kun Mierkoles asin Biernes. Nag-organisar man sinda nin paghuhulit paagi sa telepono asin nag-areglo na maghulit sa komersial na teritoryo. An mga areglong ini nagpakosog na marhay nin entusiasmo para sa ministeryo kaya nagdesisyon an kongregasyon na ipadagos iyan.

⁵ Maigot na Dumalaw Liwat: Kun sa teritoryo nindo masakit na manompongan sa harong an mga tawo kun nagdadalaw liwat kamo, pagmaigotan na sa pagtatapos kan kada pagdalaw, pati na sa enot na pagsongko, gumibo kamo nin espesipikong pag-oolay na masongko giraray. Dangan, seguradohon na otobon an napag-olayan. (Mat. 5:37) Kun angay, puede nindong hagadon an numero kan telepono kan kagharong. Makakatabang man ini sa saindo na kontakon giraray an tawong iyan.

⁶ Seguradong bebendisyonan ni Jehova an maigot na mga paghihingoa niato na hanapon an mga maninigo asin kultibaron an interes na nanonompongan niato.​​—Tal. 21:5.