Maanan na Marhay an Paggamit Nindo nin Panahon

1. Anong angat an inaatubang ngonyan nin mga tawo sa gabos na lugar?

¹ Sa panahon na ini na may mga aparato na nakaeekonomiya sa oras asin trabaho, dakol an nanonompongan an saindang sadiri na garo baga dakol an gigibohon asin kakadikit an panahon tangani na magibo iyan. Nadedepisilan daw kamong papagdanayon an sarong marahay na espirituwal na rutina? Minamawot daw nindo na mas dakol kutana an oras nindo sa ministeryo? Paano niato magagamit sa pinakamarahay an satong panahon?​​—Sal. 90:12; Fil. 1:​9-​11.

2, 3. Ano an angat na iinaatubang kan teknolohiya nin impormasyon, asin paano an lambang saro sa sato makagigibo nin pagsiyasat sa sadiri?

² Aramon an mga Bagay na Nagsasayang nin Panahon: Kita gabos maninigong siyasaton sa panapanahon kun paano niato ginagamit an satong oras. Nagsasadol an Biblia: “Magmaan kamong marhay na an saindong paglakaw bakong siring sa mga mangmang kundi siring sa mga madonong, na tinutubos an angay na panahon para sa saindo man sana, huli ta an mga aldaw maraot.” (Efe. 5:​15, 16) Estudyare an mga angat na iinaatubang kan mga pag-oswag sa teknolohiya nin impormasyon. Minsan ngani an mga komputer asin iba pang elektronikong mga aparato igwa nin lehitimong gamit, iyan puedeng magin siod kun dai kita magmamaan na marhay sa satong paggamit nin panahon.​​—1 Cor. 7:​29, 31.

³ An lambang saro sa sato maninigong hapoton an sadiri: ‘Ako daw naggagamit nin oras aroaldaw sa pagbasa o pagsimbag sa mga mensahe sa E-mail na nakasusuya sana? Ako daw parateng nagbababad sa telepono o nagpapadara nin mga text message manongod sa daing halagang mga bagay? (1 Tim. 5:13) Ako daw nagbababad sa Internet na mayo nin ano man na katuyohan o mayo sa boot na binabarobalyo an estasyon kun nagdadalan nin telebisyon? An pagigin bangkag daw sa elektronikong mga kawat nagpoon nang kuanon an oras kan sakong pag-adal sa Tataramon nin Dios?’ An siring na mga aktibidad pairarom na raraoton an satong espirituwalidad.​​—Tal. 12:11.

4. Anong pagliwat an ginibo nin sarong hoben, asin taano?

⁴ Madonong na Paggamit nin Panahon: An elektronikong mga aparato may tendensiang bihagon an satong panahon sagkod an satong atension. An sarong hoben na bangkag na marhay sa mga kawat sa komputer nag-admitir: “May beses na kun nagkawat ako bago lumuwas sa ministeryo o sa sarong Kristianong pagtiripon, nadedepisilan akong marhay na magkonsentrar. Haros pirme kong iniisip kun paano ko makukua an simbag sa sarong kawat pagpuli ko. Naapektaran na marhay an sakong personal na pag-adal asin regular na pagbasa sa Biblia. Nagpoon na mainaan an kagayagayahan ko sa paglilingkod sa Dios.” Rekonosido na kaipuhan niang gumibo nin mga pagbabago, pinara nia an gabos niang kawat sa komputer. “Talagang depisil iyan,” an paggirumdom nia. “Mas adikto ako sa mga kawat kisa sa paghona ko. Alagad nakaeksperyensia man ako nin dakulang pagmate nin kapangganahan huli ta aram ko na ginibo ko iyan para sa sakong ikararahay.”​​—Mat. 5:​29, 30.

5. Paano niato puedeng tuboson an panahon para sa espirituwal na mga aktibidad, asin paano kita nakikinabang sa paggibo kaiyan?

⁵ Tibaad kaipuhan na gibohon an siring na mga aksion kun igwa nin mga kabtang na kaipuhan nindong gumibo nin mga pagliwat. Puede daw nindong tuboson an kabangang oras kada aldaw hale sa bakong mahalagang mga aktibidad? Iyan kisuerra an kaipuhan nindong oras tangani na mabasa an bilog na Biblia sa laog nin sarong taon. Kapakipakinabang nanggad iyan sa espirituwal! (Sal. 19:​7-​11; 119:97-​100) Magtalaan nin depinidong oras para sa pagbasa kan Biblia, pag-andam para sa pagtiripon, asin sa ministeryo sa langtad. (1 Cor. 15:58) An paggibo kaini makatatabang sa saindo na danay na kontrolon an mga bagay na nagsasayang nin panahon asin makatatabang sa saindo na “padagos na saboton kun ano an kabotan ni Jehova.”​—Efe. 5:17.

Kun Ano an Sasabihon Manongod sa mga Magasin

An Torrengbantayan Dis. 15

“Huling lakop na marhay ngonyan na mga aldaw an dai naotob na mga panuga, dakol an nadedepisilan na magtiwala sa siisay man. Sa paghona daw nindo igwa nin siisay man na an mga panuga mapagtitiwalaan niato? [Pasimbagon. Dangan basahon an Josue 23:14.] Ipinaheheling kan magasin na ini kun paano kita makapatatalubo nin kompiansa sa mga panuga nin Dios na nasusurat sa Biblia.”

Awake! Ene. 22

“Arog kaini an personal na ngaran nin Dios sa tataramon na Hebreo. [Ipaheling an tutob.] Marigon an paniniwala nin nagkapira na an ngaran na ini dai noarin man maninigong itaram nin makosog. An iba ginagamit iyan nin suelto. Sinisiyasat kan isyung ini kan Awake! an kontrobersiang ini. Tinotokar man kaiyan kun paano niato puedeng mamidbid an Dios sa ngaran.” Basahon an Salmo 83:18.

An Torrengbantayan Peb. 1

“An kadaklan sa sato nagmamaigot na atamanon an satong pisikal na salud. Minsan siring, isinusuherir nin dai pa sana nahahaloy na mga pagsiyasat na an satong marahay na kamugtakan sa salud apektado man kan satong espirituwalidad. Sa paghona daw nindo posible ini? [Pasimbagon. Dangan basahon an Mateo 5:3.] Tinotokar kan isyung ini kan An Torrengbantayan kun paano niato mapaninigoan an satong espirituwal na pangangaipo.”

Awake! Peb. 8

“Dakol ngonyan an sibot sa buhay asin nagkakaipo nin dakol na pahingalo. Tibaad maoyon kamo sa mga tataramon na ini na isinurat labing 3,000 na taon na an nakaagi. [Basahon an Eclesiastes 4:6. Dangan pasimbagon.] Iinaatubang kan isyung ini kan Awake! an nakakatabang na impormasyon kun paano rerekonoseron asin aatubangon an problema na kakulangan nin torog.”