Pagtao ki Jehova kan Pinakamakakaya Niato

¹ An Ley ni Jehova sa Israel nagsabi nin espesipiko na an mga hayop na ipinepresentar sa saiya bilang atang kaipuhan na “daing depekto.” An may depektong hayop dai inaako. (Lev. 22:18-​20; Mal. 1:​6-9) Apuera kaini, kun nag-aatang, an gabos na taba​​—an pinakamanamit na kabtang​—​para ki Jehova. (Lev. 3:​14-​16) Bilang Ama asin Kaharohalangkaweng Kagurangnan kan Israel, maninigo na ki Jehova an pinakamarahay nanggad.

² Siring kan suanoy na mga panahon, interesadong marhay an Dios sa kualidad kan satong mga dolot ngonyan. An paglilingkod niato maninigong magpabanaag nin tamang reberensia ki Jehova. Siempre, an mga kamugtakan nagkakalaenlaen sa lambang tawo. Pero, may marahay kitang dahelan na pakasiyasaton an satong sadiri tanganing seguradohon na itinatao niato sa saiya an pinakamakakaya niato.​​—Efe. 5:10.

³ Bilog na Pusong Paglilingkod: Tanganing an ministeryo niato magtaong onra ki Jehova asin mataros an puso kan mga naghihinanyog sa sato, iyan dai puedeng mekanikal. An satong mga kapahayagan mapadapit sa satong Dios asin sa saiyang marahayon na mga katuyohan maninigong maggikan sa puso na nagsosopay nin pag-apresyar. (Sal. 145:7) Idinodoon kaini an kahalagahan kan pagpapadanay nin marahay na programa nin personal na pagbasa asin pag-adal sa Biblia.​​—Tal. 15:28.

⁴ Kalabot man sa pagtao ki Jehova kan pinakamakakaya niato an pag-arog sa saiyang pagkamoot sa mga tawo. (Efe. 5:​1, 2) An pagkamoot sa mga tawo an mamotibar sa sato na pagmaigotan na mapaabotan an pinakadakol na mapupuede kan nagtatao nin buhay na mensahe nin katotoohan. (Mar. 6:34) Pinahihiro kita kaiyan na magpaheling nin personal na interes sa mga nakakaolay niato. Huli kaiyan dayaday na iniisip ta sinda pagkatapos kan enot na pagdalaw asin nagigin listo na dumalaw liwat. Itinutulod kita kaiyan na gibohon an bilog na makakaya niato tangani na tabangan sinda na umoswag sa espirituwal.​​—Gibo 20:24; 26:​28, 29.

⁵ “Atang nin Pag-omaw”: An saro pang paagi na itinatao niato ki Jehova an pinakamakakaya niato iyo an satong kahigosan sa ministeryo. Kun kita organisadong marhay asin nakakonsentrar sa ministeryo, makakagibo kita kan pinakamarahay sa panahon na makukua niato. (1 Tim. 4:10) An marahay na pag-andam nagpapangyari sa sato na magtaram nin klaro asin may kombiksion, na paagi kaiyan pinadadakula an posibilidad nin paborableng reaksion. (Tal. 16:21) Mantang ihinihiras niato an maogmang bareta sa iba, an satong odok sa pusong mga kapahayagan tama sanang apodon na “atang nin pag-omaw.”​​—Heb. 13:15.

Mga Hoben—Basahon an Tataramon nin Dios!

¹ An pagkahoben sarong panahon nin mga problema asin magabat na mga desisyon. Dakol sa saindo na Kristianong mga hoben an aroaldaw na napapaatubang sa impluwensia na balgahon an mga pamantayan nin Dios sa paggawe. Bago kamo gumibo nin personal na mga desisyon mapadapit sa edukasyon, trabaho, asin pag-agom, maninigo na nakagibo na kamo nin espirituwal na mga pasohan nindo. Solamente sa paaging iyan na makakagibo kamo nin iba pang desisyon na mapapakinabangan sa bilog nindong buhay. An depinidong espirituwal na mga pasohan makakatabang sa saindo na humiro nin madonong asin gibohon na mapanggana an saindong dalan. Paagi sa regular na pagbasa asin paghorophorop sa Tataramon nin Dios, mapapahiro kamo na mamuhay kaoyon sa ipinasabong na hatol kaiyan, asin magigin mapanggana an saindong tamang mga paghihingoa.​​—Jos. 1:8; Sal. 1:​2, 3.

² Paano Kamo Makikinabang Dian? An kinaban ni Satanas pano nin pan-akit na gumibo nin sala. (1 Juan 2:​15, 16) Tibaad may midbid kamong mga kaklase o iba pang kaedad nindo na nakaeksperyensia nin kalamidad huli sa pagpadara sa impluwensia nin kairiba. An pagsusog sa hatol kan Biblia magtatao sa saindo kan moral asin espirituwal na kosog na haboan an makasalan na dalan. Dugang pa, an hatol kan Tataramon nin Dios makakatabang sa saindo na likayan an natatagong mga siod ni Satanas. (2 Cor. 2:​11; Heb. 5:14) An paglakaw sa mga dalan nin Dios magtatao sa saindo nin tunay na kaogmahan​​—personal na pagkakontento sa saindong dalan nin buhay.​​—Sal. 119:​1, 9, 11.

³ An dai nagbabagong mga prinsipyo kan Tataramon nin Dios nakakalabi sa kadonongan nin tawo. (Sal. 119:98-​100) An pagigin pamilyar sa mga prinsipyo sa Biblia asin paghorophorop sa ihinayag na mga katuyohan ni Jehova kaiba an odok sa pusong pamibi makakatabang sa saindo na makapatalubo nin dayupot na relasyon sa madonong sa gabos na Autor kan Biblia, si Jehova Dios. Sia nanunuga: “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol na nakaturuhok sa saimo.”​—Sal. 32:8.

⁴ Magkaigwa nin Panahon Tangani na Basahon Iyan: An sarong hoben na Kristiana ginibong pasohan na basahon an bilog na Biblia, asin natapos sia sa laog nin sarong taon. Paano sia nakinabang? Nagigirumdoman nia: “Kadakol akong nanodan manongod ki Jehova​​—mga bagay na orog na nagpadayupot sako sa saiya asin nagin dahelan na mawoton kong matakot sa saiya sa bilog kong buhay.” (Sant. 4:8) Nabasa na daw nindo an bilog na Biblia? Kun dai pa, taano ta dai gibohon na pasohan nindo an paggibo kaiyan? Bebendisyonan nanggad ni Jehova an mga paghihingoa nindo, asin mag-aani kamo nin darakulang balos.