⁶ Bilang Sarong Mamomoton na Pastor: An paraataman sa pag-adal sa libro interesado sa mga tugang na huli sa saindang kamugtakan kadikit sanang kabtang an nagigibo sa paghuhulit. Sinesegurado nia na naaaraman kan mga limitadong marhay an nagigibo huli sa kagurangan o huli sa pagigin nasa harong na dai makaluwas asin kan mga temporaryong limitado an nagigibo huli sa seryosong helang o danyos an dapit sa probisyon na nagtotogot sa sainda na ireport an oras nin paglilingkod sa langtad na tigki-15 minutos kun dai sinda makapagreport nin kompletong sarong oras sa sarong bulan. (Dedeterminaran kan Komite sa Paglilingkod kan Kongregasyon kun siisay an kualipikado sa probisyon na ini.) Sia nagpapaheling man nin interes sa mga nakaasignar sa grupo na tibaad inaktibo, na nagmamaigot na tabangan sinda na ipagpadagos an saindang aktibidad kaiba kan kongregasyon.​​—Luc. 15:​4-7.

Kun Ano an Sasabihon Manongod sa mga Magasin

An Torrengbantayan Okt. 15

“Paano daw nindo ipaliliwanag sa mga aki o sa iba kun taano ta kadakol kan maraot na nangyayari ngonyan? [Pasimbagon.] Sinisimbag kan Biblia an hapot na, ‘Siisay an Nasa Likod kan Gabos na Karatan?’ [Basahon an 1 Juan 5:19.] An isyung ini kan An Torrengbantayan makakatabang saindo na masabotan kun siisay an maraot na iyan asin kun paano niato sia kokontrahon.”

Awake! Okt. 22

“Sa paghona daw nindo an mga pamibi kan mga namomoon sa relihion o nin siisay pa man puedeng magpangyari nin katoninongan sa kinaban? [Pasimbagon.] An Biblia nanunuga nin panahon nin katoninongan na lakop sa globo. [Basahon an Isaias 9:​6, 7.] Narisa daw nindo na pangyayarihon nin sarong espesyal na namamahala an katoninongan sa kinaban? Ipinaheheling kan isyung ini kan Awake! kun siisay an namamahalang iyan asin kun paano nia itatao an tunay na katoninongan.”

An Torrengbantayan Nob. 1

“An dakol sa sato nagmamaigot na magkaigwa nin matoninong na relasyon sa iba. Alagad posibleng marhay na maoyon kamo na iyan mas madaling sabihon kisa gibohon. [Pasimbagon.] Ipinaliliwanag kan Biblia kun taano ta siring kaini. [Basahon an Santiago 3:2.] Ipinaheheling kan artikulong ini kun paanong an paghagad nin dispensasyon puedeng iyo an liabe na ikabalik asin papagdanayon an katoninongan.”

Awake! Nob. 8

“Ipinaririsa kan hula sa Biblia na maabot an panahon na mayo ni saro na masabing, ‘Naghehelang ako.’ [Basahon an Isaias 33:24.] Bako daw na makangangalas iyan? [Pasimbagon.] Minsan siring, ngonyan an katawohan nagsasakit nin makuri huli sa dakol na helang, kaiba an damat na AIDS. Sinisimbag kan isyung ini kan Awake! an hapot na, Matatapos pa daw an AIDS?”