Pagparigon kan Boot Asin Pagpakosog sa mga Nagdadangog

ANO man an mga problemang inaatubang ninda, an mga lingkod nin Dios maninigong makanompong nin pagparigon sa boot sa Kristianong kongregasyon. Sa katuyohan na iyan, dapat na seguradohon nangorogna nin kamagurangan na nakaparirigon sa boot an saindang mga pahayag asin hatol. An kamagurangan maninigo na magin “siring sa pailihan sa doros asin tagoan sa bagyo, siring sa mga sapa nin tubig sa sarong desierto, siring sa limpoy nin tugdok na kantil sa tagiltil na daga.”​—Isa. 32:2.

Kun kamo magurang sa kongregasyon, nagtatao daw nin pagparepresko asin karangahan an saindong mga pahayag? Nakakapabagsik daw iyan sa mga naghihingoang fiel na maglingkod ki Jehova? Iyan daw nagtatao nin kosog na magmaigot sa paggibo kan kabotan nin Dios sa ibong kan pagkaindiperente o oposisyon nin mga tawo? Ano kun an nagkapira sa mga nagdadangog sa saindo may depresyon, nagagabatan sa grabeng sakit sa pagbuhay, o nakikipaglaban sa magabat na helang na mayo nin aram na bolong? Puede nindong ‘pakosogon an saindong mga tugang paagi sa mga tataramon kan saindong ngoso.’​—Job 16:5.

Gamiton an oportunidad nindo bilang nagpapahayag na tabangan an saindong mga tugang na makakua nin paglaom asin kosog ki Jehova asin sa mga probisyon nia.​—Roma 15:13; Efe. 6:10.

Ipagirumdom an Ginibo ni Jehova. An sarong importanteng paagi na makaparigon sa boot iyo an pagpaheling kun paano tinabangan ni Jehova an saiyang banwaan sa mga kasakitan kaidtong nakaagi.​—Roma 15:4.

Sinabihan ni Jehova si Moises na “parigonon an boot” asin “pakosogon” si Josue bago lumaog an Israel sa Dagang Panuga, na kaidto sakop nin kaiwal na mga nasyon. Paano iyan ginibo ni Moises? Kaatubang si Josue, ipinagirumdom ni Moises sa bilog na nasyon an mga ginibo ni Jehova para sa sainda kan paghale ninda sa Egipto. (Deut. 3:28; 7:18) Isinaysay man ni Moises an mga kapangganahan na itinao sa sainda ni Jehova sa mga Amorreo. Dangan sinadol ni Moises si Josue: “Magmarigon an boot asin magmakosog kamo.” (Deut. 31:1-8) Kun hinihingoa na parigonon an boot kan saindong mga tugang, tinatabangan daw nindo sinda na makakua nin kosog paagi sa paggirumdom sa ginibo na ni Jehova para sa sainda?

Kun beses an mga indibiduwal nalulunosan na marhay kan saindang mga problema na iniisip ninda kun baga mananamitan pa ninda an mga bendisyon kan Kahadean. Ipagirumdom sa sainda na masasarigan an mga panuga ni Jehova.​—Jos. 23:14.

Sa nagkapirang nasyon an satong mga tugang napapaatubang sa mga dekreto nin gobyerno na nangangalad kan paghuhulit kan maogmang bareta. Sa siring na mga kaso, matatabangan nin mamomoton na kamagurangan an mga kapagtubod na makakua nin kosog sa mga eksperyensia kan mga apostol ni Jesu-Cristo. (Gibo 4:1⁠–​5:42) Asin an pagdoon kun paano minaniobra nin Dios an mga pangyayari na nakasurat sa librong Ester segurado nanggad na makamomotibar sa mga tugang na magkaigwa nin rigon nin boot.

Kun beses an mga indibiduwal nag-aatender sa mga pagtiripon kan kongregasyon alagad dai na nag-ooswag. Tibaad iniisip ninda na nungka sindang mapatatawad nin Dios ta grabe karaot an dati nindang pamumuhay. Tibaad ikasasaysay nindo kun paano trinatar ni Jehova si Hadeng Manases. (2 Cron. 33:1-16) O puedeng iestorya nindo an mga taga suanoy na Corinto na binago an saindang pamumuhay, nagin mga Kristiano, asin ipinahayag na matanos nin Dios.​—1 Cor. 6:9-11.

Hinohona daw nin nagkapira na an mga problemang inaagihan ninda nagpaparisa na nawara na sa sainda an pabor nin Dios? Puede nindong ipagirumdom sa sainda an inagihan ni Job asin kun paano sia binendisyonan nin igo huli ta nangapot sia sa saiyang integridad ki Jehova. (Job 1:1-22; 10:1; 42:12, 13; Sal. 34:19) An bakong totoong mga pararanga ki Job naghingako nin sala na seguradong nagkasala si Job. (Job 4:7, 8; 8:5, 6) Sa kabaliktaran, kan pinakokosog an mga disipulo asin “pinaririgon an boot ninda na magdanay sa pagtubod,” sinabi ni Pablo asin Bernabe: “Kita kaipuhan na lumaog sa kahadean nin Dios paagi sa dakol na kasakitan.” (Gibo 14:21, 22) Siring man ngonyan, mapakokosog nindo an mga nag-aagi sa pagbalo paagi sa pagsabi na an pagtagal sa irarom nin kasakitan hinahagad sa gabos na Kristiano asin may dakulang halaga sa mga mata nin Dios.​—Tal. 27:11; Mat. 24:13; Roma 5:3, 4; 2 Tim. 3:12.

Parigonon an boot kan mga naghihinanyog sa saindo na isipon an mga paagi na inotob ni Jehova an saiyang mga panuga sa saindang buhay. Paagi sa kadikit na pagpagirumdom, tibaad maheling ninda kun paano na may ginibo na si Jehova sa sainda mismo, siring sa ipinanuga nia. Sa Salmo 32:8, mababasa niato: “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol na nakaturuhok sa saimo.” Paagi sa pagtabang sa mga naghihinanyog sa saindo na girumdomon kun paano sinda giniyahan o pinakosog ni Jehova, mahihimo nindo na maheling ninda sa personal na marhay na paagi na si Jehova nagmamalasakit sa sainda asin na talagang tatabangan nia sinda sa ano man na pagbalo na inaatubang ninda ngonyan.​—Isa. 41:10, 13; 1 Ped. 5:7.

Magpaheling nin Dakulang Kaogmahan sa Ginigibo Ngonyan nin Dios. Kun hinihingoang parigonon an boot kan saindong mga tugang, apodon an atension sa ginigibo ni Jehova ngonyan mismo. An pagtaram manongod sa mga bagay na ini sa paagi na nagpapaheling na iyan ikinaoogma nindo nin marhay mapukaw nin kaagid na saboot sa puso kan mga naghihinanyog sa saindo.

Isip-isipa kun paano kita tinatabangan ni Jehova na makaya an mga sakit sa buhay. Itinotokdo nia sa sato an pinakamarahay na paaging mabuhay. (Isa. 30:21) Saiyang iineeksplikar an mga dahelan nin krimen, inhustisya, kadukhaan, helang, asin kagadanan saka sinasabi nia sa sato kun paano nia tataposon an gabos na ini. Pinalilibotan nia kita nin mamomoton na kasararoan nin magturugang. Tinatawan nia kita kan mahalagang marhay na pribilehiong mamibi. Pinaniniwalaan nia kita kan pribilehio na magin mga Saksi nia. Binubuksan nia an satong mga mata tanganing maheling na si Cristo pinatukaw na sa trono duman sa kalangitan asin marikas na natatapos an huring mga aldaw kan daan na sistema.​—Kap. 12:1-12.

Idagdag sa mga bendisyon na iyan an satong mga pagtiripon kan kongregasyon, asamblea, asin kombension. Kun nagtataram kamo manongod sa mga probisyon na ini sa paagi na nagpapaheling nin tunay na pag-apresyar dian, mapakokosog nindo an determinasyon nin iba na dai pagpabayaan an pakikitipon sa saindang mga tugang.​—Heb. 10:23-25.

An mga bareta na nagpapatunay sa pagbendisyon ni Jehova sa satong mga paghihingoa sa ministeryo sa langtad gikanan man nin kosog. Kan enot na siglo kan si Pablo asin Bernabe pasiring sa Jerusalem, nagtao sinda nin “dakulang kagayagayahan sa gabos na tugang” paagi sa detalyadong pagsaysay kan pagkakombertir nin mga tawong hale sa mga nasyon. (Gibo 15:3) Makatatao man kamo nin kagayagayahan sa mga tugang paagi sa pag-estorya sa sainda nin nakapakokosog na mga eksperyensia.

May ibubungang dagdag na pagparigon sa boot kun an mga indibiduwal tinatabangan na masabotan an halaga kan saindang ginigibo. Tawan sinda nin komendasyon sa pakikikabtang ninda sa Kristianong ministeryo. Tawan nin komendasyon an mga nalilimitaran na marhay an aktibidad nin kagurangan asin helang alagad nagpapaheling nin fiel na pakatagal. Ipagirumdom sa sainda na dai nalilingawan ni Jehova an pagkamoot na ipinaheling ninda para sa saiyang ngaran. (Heb. 6:10) An pagtubod na probado sa irarom nin pagbalo rogaring na daing kaagid sa halaga. (1 Ped. 1:6, 7) Kaipuhan na ipagirumdom ini sa satong mga tugang.

Magtaram na May Pagsaboot Manongod sa Paglaom sa Ngapit. An ipinasabong na mga panuga manongod sa maabot na mga bagay mayor na gikanan nin pagparigon sa boot sa gabos na namomoot sa Dios. Tibaad parate nang nadadangog kan kadaklan sa mga nagdadangog sa saindo an mga tataramon na ini. Alagad paagi sa ipinaheheling nindong pag-apresyar kun kamo nagtataram manongod sa mga panugang ini, matatawan nindo iyan nin buhay, ikatatadom nindo an pagkompiar sa kaotoban kaiyan, asin mapagsosopay nindo sa pagpasalamat an mga puso. An pag-aplikar kan nanodan nindo sa Teokratikong Paadalan sa Pagmiministro makatatabang sa saindo na magibo iyan.

Si Jehova mismo an Dakulang Paraparigon sa Boot asin Paratao nin kosog sa saiyang banwaan. Pero, puede kamong magkooperar sa saiya sa pagpaabot kan siring na mga bendisyon. Kun kamo nagpapahayag sa kongregasyon, gamiton nin tama an oportunidad na gibohon iyan.