Pagtabang sa Iba na Pamurawayon si Jehova

¹ Sarong mahalagang marhay na mensahe an ibinabalangibog sa mga tawo sa bilog na daga: “Matakot kamo sa Dios asin pamurawayon sia, huli ta nag-abot na an oras kan saiyang paghokom, asin kaya sambahon nindo an Saro na naggibo kan langit asin daga asin dagat patin mga burabod nin tubig.” (Kap. 14:​6, 7) Pribilehio niato na makikabtang sa pagbalangibog na iyan. Ano an kaipuhan na maaraman nin mga tawo manongod ki Jehova tanganing katakotan asin sambahon sia?

² An Saiyang Ngaran: Kaipuhan na ikalaen nin mga tawo paagi sa ngaran an solamenteng tunay na Dios sa dakol na falsong dios na sinasamba ngonyan. (Deut. 4:​35; 1 Cor. 8:​5, 6) Sa katunayan, ginamit kan mga kagsurat kan Biblia an bantog na ngaran ni Jehova nin labing 7,000 na beses. Minsan ngani tama sana na naggagamit kita nin pakamansay sa kun noarin niato iiintrodusir an ngaran nin Dios, maninigo na dai niato iyan noarin man itago o likayan na gamiton. An kabotan nin Dios iyo na mamidbid kan gabos na tawo an ngaran nia.​​—Sal. 83:18.

³ An Saiyang Personalidad: Tangani na pamurawayon si Jehova, kaipuhan na maaraman nin mga tawo kun anong klaseng Dios sia. Kaipuhan na itokdo niato sainda an saiyang pambihirang pagkamoot, labi sa gabos na kadonongan, lubos na hustisya, asin makakamhan sa gabos na kapangyarihan, kaibanan an saiyang pagkaherak, mamomoton na kabootan, asin iba pang makangangalas na mga kualidad. (Ex. 34:​6, 7) Dapat man nindang manodan an pagkaigwa nin nakararahay na pagkatakot sa Dios, an may pagkangirhat na paggalang sa saiya, na rinerekonoser na an sainda mismong buhay depende sa pagkaigwa kan pag-oyon ni Jehova.​​—Sal. 89:7.

⁴ Pagrani sa Dios: Tangani na maligtas sa nagdadangadang na paghokom nin Dios, an mga tawo dapat na may pagtubod na mag-apod ki Jehova. (Roma 10:​13, 14; 2 Tes. 1:8) An kalabot digdi bako sanang an pagkaigwa nin kaaraman manongod sa ngaran asin mga kualidad nin Dios. Dapat niatong tabangan an mga tawo na magkaigwa nin personal na relasyon ki Jehova, na nagtitiwala sa saiya sa bilog nindang puso. (Tal. 3:​5, 6) Mantang sinda nag-aaplikar kan saindang nanonodan, minadolok sa Dios paagi sa odok na pamibi, asin nakakaeksperyensia kan saiyang tabang sa saindang buhay, matalubo an saindang pagtubod, na nakakatabang sa sainda na rumani ki Jehova.​​—Sal. 34:8.

⁵ Logod na maigot niatong ipahayag an ngaran nin Dios asin tabangan an iba na lubos na magtiwala asin matakot sa saiya. Tibaad dakol pa an matabangan niato na mamidbid si Jehova asin pamurawayon sia bilang saindang “Dios nin kaligtasan.”​​—Sal. 25:5.

Magpaheling nin Pag-apresyar sa Teokratikong mga Rekurso

¹ Kan naggigibo nin mga areglo sa paghirahay kan templo, inomaw ni Hadeng Josias an mga inasignaran na magtrabaho, na nagsasabi: “Dai maninigong hagadan nin kuenta kan kuarta an mga pinakapot kaiyan, huli ta sinda naggigibo na may pagkafiel.” (2 Ha. 22:3-7) An pag-apresyar kan mga tawong idto sa sagradong mga bagay maheheling sa kun paano an pagkapot ninda sa mga rekurso na ipinaniwala sa sainda. Ngonyan, mantang kita nakikikabtang sa banal na gibohon kan maogmang bareta nin Dios, kaipuhan man niatong magpaheling nin pagkafiel sa pagkapot kan mga rekurso na itinao sa sato.

² Sa Ministeryo sa Langtad: An pag-apresyar sa mahalagang marhay na mensahe na yaon sa satong mga publikasyon asin an pakaaram sa gastos na kalabot sa pagprodusir kaiyan nagpapangyari sa sato na pahalagahan iyan na marhay. Dai niato maninigong basta na sana ialok an satong mga babasahon sa mga dai nagpapaheling nin tunay na pag-apresyar sa mensahe kan Biblia. Kun kadikit an ipinaheheling na interes nin saro sa maogmang bareta, puede niato siang alokan nin pulyeto imbes na ibang babasahon.

³ Idistribwir an mga babasahon sa paagi na nagpapaheling nin paggalang sa halaga kaiyan. Likayan an pagwalat kaiyan sa pampublikong mga lugar kun saen magkakawararak sana iyan. Tangani na malikayan an pagsayang, bilangon an nasa harong nindo bago kumua nin dagdag na babasahon. Kun kamo pirmeng may sobra sa kada isyu kan mga magasin, isip-isipon kun baga dapat na inaan an saindong pedido.

⁴ Mga Publikasyon na Personal na Gagamiton: Maninigo na pumedido sana kita nin mga publikasyon na talagang kaipuhan niato. Nangorogna na maninigo kitang dai magin waga kun naghahagad nin mga Bibliang deluxe, Reference Bible, asin iba pang darakulang publikasyon, arog kan Concordance, Index, mga tomo kan Insight, asin librong Proclaimers, na gabos pinoprodusir na darudakula an gastos.

⁵ Sinesegurado daw nindo na isurat an saindong ngaran asin adres sa saindong personal na kopya kan mga publikasyon? Ini nakakatabang na mainaan an pangangaipo na kumua nin pansalida sa mga publikasyon na ikinabugtak kun saen. Kun may nawara kamong songbook, Biblia, o publikasyon na pag-aadalan, tibaad makua nindo iyan sa mga nawarang bagay na natipon sa Kingdom Hall o lugar kan asamblea.​​—Luc. 15:​8, 9.

⁶ Pagmaigotan niato na magin madonong sa paggamit kan satong mga babasahon. Ini sarong paagi na ikapaheling an satong pagkafiel sa pagkapot kan mga rekurso kan Kahadean na ipinaniwala sa sato ni Jehova.​​—Luc. 16:10.